La Bìblia la càmbia la vita dele persone

COME che una gióvena che la ga infrontà tante desgràssie quando la era una toseta la ga catà un vero ogetivo nela vita? Parché che un omo violento che el se gavea rebelà contra el governo l’è deventà un predicador dele bone notìssie de pace? Ledi qua le so stòrie par catar le risposte.

“Me ocorea tanto catar amor e afeto.” — INNA LEZHNINA

ANO DE NASSIMENTO: 1981

PAESE: RÙSSIA

CHI ERO: GO INFRONTÀ DESGRÀSSIE QUANDO ERO TOSETA

EL ME PASSÀ: Me genitori i ze sordi e anca mi son nassesta sorda. I me primi sei ani de vita i era boni. Ma dopo i me genitori i se ga divorsià. Anca se mi ero picinina, mi savea cossa volea dir un divòrsio, e son restada tanto triste. Dopo del divòrsio, el me pupà e el me fradel pi vècio i ze restadi in Troitsk, ma la me mama la ze ndata de star in Chelyabinsk e me ga portà insieme. Col tempo, me mama la se ga maridà nantra volta. So omo l’era ciucheton e el ne dea bote.

In 1993, me caro fradel pi vècio el se ga negà e l’è morto. Quel assidente l’è stà un bruto colpo par la nostra fameia. Me mama la ga tacà a far la ciuca e anca ela la ga scominsià a tratarme mal. Alora son ndata in serca de una vita meio. Me ocorea tanto catar amor e afeto, par quela son ndata in serca de consolo in difarente ciese, ma no lo go catà.

LA BÌBLIA LA GA CAMBIÀ TANTO LA ME VITA: Quando mi gavea 13 ani, una colega de scola che la era Testimònia de Geovà la me ga contà stòrie dela Bìblia. Me ga piasesto tanto imparar sora persone dela Bìblia come Noè e Giò, che i ga servio a Dio anca se i ga bio una vita difìcile. In poco tempo, mi go scominsià a studiar la Bìblia cole Testimònie de Geovà e a ndar ale so riunion.

Col stùdio dela Bìblia mi go imparà tante bele verità. Son restada tanto contenta de imparar che Dio el ga un nome. (Salmo 83:18) Son restada maraveiada de veder come che le professie dela Bìblia le ze pròpio giuste quando parla de come el mondo el saria “nei ùltimi giorni”. (2 Timòteo 3:1-5) E l’è stà tanto emossionante imparar sora la speransa dela ressuression. Imagina sol! Vao veder nantra volta el me fradel! — Gioani 5:28, 29.

Ma gnanca tuti i ze restadi contenti. Me mama e so omo i era rugni cole Testimònie de Geovà. Lori i ga proà farme assar de studiar la Bìblia. Ma mi amea tanto quel che ero drio imparar che no ndea mia desister.

L’è stà fadiga ndar avanti cola oposission dela me fameia. Nantro bruto colpo l’è stà quando el me fradel pi gióveno, che ndea insieme a mi nele riunion dele Testimònie de Geovà, anca el se ga negà e l’è morto. Ancora cossita, le Testimònie de Geovà sempre le me ga giutà. Intrà de lore, mi go catà el amor e el afeto che mi ero in serca. Mi savea che quela gavea de esser la vera religion. In 1996, son stata batesada come Testimònia de Geovà.

COME SON STATA GIUTADA: Fà sei ani che son maridada con un omo maraveioso che ga nome Dmitry. Noantri servimo insieme nel scritòrio dela filial dele Testimònie de Geovà in San Petersburgo. Col tempo, me genitori i ga cambià la so maniera de pensar sora quel che credo.

Ringràssio tanto par gaver la oportunità de cognosser a Geovà! Servir a lu ga dato un vero ogetivo ala me vita.

“Mi restea preocupà con tante domande.” — RAUDEL RODRÍGUEZ RODRÍGUEZ

ANO DE NASSIMENTO: 1959

PAESE: CUBA

CHI ERO: ME GO REBELÀ CONTRA EL GOVERNO

EL ME PASSÀ: Son nassesto in Havana, Cuba, e son stà slevà nte un posto poareto ndove ghen’era tante brighe ntela rua. Col tempo, go scominsià a gaver interesse par el giudó e altri sporti de lota.

Mi ndea ben ntela scola e me genitori i me ga incoraià a ndar ala università. Lì, go scominsià a sentir che el sistema polìtico del me paese gavea de cambiar. Alora me go rebelà. Mi e un colega ghemo barufà con un polissial par proar ciavar la so arma. In quela barufa el polissial el ga ciapà tante bote nela testa e l’è restà tanto mal. Par quela, mi e me colega semo stati metesti in preson e condanadi ala morte par fusilamento. Mi gavea solche 20 ani, ma presto ndaria morir!

Mi trenea cossa che ndaria far davanti dei soldadi nel me fusilamento, parché no volea che i vedesse che mi gavea paura. Ma mi restea preocupà con tante domande. Mi pensea: ‘Parché che ghen’è tante ingiustìssie nel mondo? Sarala questa vita tuto quel che ghen’è?’

LA BÌBLIA LA GA CAMBIÀ TANTO LA ME VITA: La nostra condenassion ala morte la ze stata cambiada par 30 ani in preson. In quel tempo, mi go cognossesto qualche Testimònie de Geovà che le era in preson par causa de quel che le credea. Son restà maraveià parché le Testimònie de Geovà le era coraiose, ma sensa esser violente. Anca se le ze state meteste in preson de maniera ingiusta, lore no le era cative gnanca sbrontolone.

Le Testimònie de Geovà le me ga insegnà che Dio el ga un ogetivo par i umani. Lore le me ga mostrà ntela Bìblia che Dio el va far la Tera deventar un paradiso sensa crime gnanca ingiustìssia. Lore anca le me ga insegnà che la Tera la sarà piena de persone bone che le gavarà la oportunità de viver par sempre nte un mondo perfeto. — Salmo 37:29.

Me piasea de quel che imparea cole Testimònie, ma la me personalità la era tanto difarente dela soa. Mi pensea che mai saria bon de assar de banda la polìtica e la violensa. Par quela go dessidio de far una letura personal dela Bìblia. Quando go finio, son nicorto che le Testimònie de Geovà le era el ùnico pòpolo che fea compagno ai primi cristiani.

Col me stùdio dela Bìblia, go visto che me tochea far grandi cambiamenti nela me vita. Par esémpio, me tochea fermar de doperar parole sporche quando parlea e molar i sigri. Anca gavaria de fermarme de meterme in assunti polìtichi. L’è stà fadiga far questi cambiamenti, ma col aiuto de Geovà, pin pian son stà bon de farli.

L’è stà pròpio fadiga par mi imparar a controlar la me ràbia. Ancora prego a Geovà par gaver autocontrolo. Tanti testi dela Bìblia i ze drio giutarme. Par esémpio, Proverbi 16:32, che dise: “Quel che el fà fadiga restar inrabià l’è meio che un omo poderoso, e quel che l’è bon de controlarse l’è meio de quel che el vinse una cità.”

In 1991, son stà batesà come Testimònia de Geovà. El me batésimo l’è stà fato nte un mastel de àqua nela preson. Nel ano dopo, mi e altri prisioneri semo stati liberti e mandadi ala Spagna parché gaveino fameia lì. Dopo che son rivà nela Spagna, suito son ndato ale riunion dele Testimònie de Geovà. Lore le me ga ricevesto come se mi fusse insieme de lore par ani e le me ga giutà a costumarme cola vita nela Spagna.

COME SON STÀ GIUTÀ: Adesso son una persona felice e adoro a Dio insieme a me dona e me fiole. Go el privilègio de doperar la pi granda parte del me tempo par giutar altri a imparar dela Bìblia. Dele volte me penso de quando mi ero gióveno e ero darente de morir, e resto contento con tuto quel che go guadagnà de quel tempo fin adesso. No solche son vivo, ma anca go speransa. Mi penso nel paradiso che Dio el ga prometesto, ndove ghen sarà tanta giustìssia e “no ghen sarà pi la morte”. — Apocalisse 21:3, 4.

[Comentàrio]

“Son restada tanto contenta de imparar che Dio el ga un nome”

[Ritrato]

Me piase a mi e me sposo insegnar la Bìblia ai sordi cole publicassion in léngua de segnai