La Bìblia la càmbia la vita dele persone

UN OMO dela Scòssia el ga imparà che ghen’è una roba pi importante che guadagnar soldi. Elo cossa? Cossa che ga giutà un omo del Brasil a no gaver pi una vita imoral e fermarse de doperar crack? Come che un gióveno dela Slovénia l’è stà bon de fermarse de bever? Ledi cossa che lori i dise.

“Mi catea che gavea una bona vita.” — JOHN RICKETTS

ANO DE NASSIMENTO: 1958

PAESE: SCÒSSIA

CHI ERO: UN OMO CHE NDEA BEN NEI NEGÒSSI

EL ME PASSÀ: Son stà slevà nte una fameia che la gavea soldi. El me pupà l’era un ofissial del esèrsito dela Inglatera. Par quela, sempre ndeino de star in altri posti. Ghemo vivesto nela Scòssia, Inglatera, Alemagna, Chénia, Malàsia, Irlanda e Cipre. Dei me 8 ani avanti, nela Scòssia, mi ero de star ntele scole che mi studiea. Pi tardi, go studià nela università de Cambridge, nela Inglatera.

Quando mi gavea 20 ani, go scominsià a laorar con petròleo par oto ani. Go laorà nela Amèrica del Sud, nela Àfrica e anca nela Austràlia. Dopo che son ndà de star nela Austràlia, go verto una impresa de investimento che, dopo de un tempo, la go vendesta.

Coi soldi che go guadagnà cola venda dela impresa, son stà bon de aposentarme con 40 ani. Go doperà el tempo che mi gavea par viaiar. Go viaià de moto due volte par tuta la Austràlia. Anca, go cognossesto tuto el mondo. Mi catea che gavea una bona vita.

LA BÌBLIA LA GA CAMBIÀ TANTO LA ME VITA: Ancora vanti de aposentarme mi volea ringrassiar a Dio par la bona vita che mi gavea. Go scominsià a ndar ntela ciesa Anglicana, parché mi belche la cognossea de picinin. Sol che lì i doperea poco la Bìblia. Dopo, go studià coi mòrmon, ma me go fermà parché anca lori i doperea poco la Bìblia.

Fin che un giorno, le Testimònie de Geovà le ze vegneste nela me casa. Suito go visto che tuto quel che lore le insegnea le vegnea dela Bìblia. Lore le me ga mostrà el testo de 1 Timòteo 2:3, 4. Lì dise che Dio “el vol che tuti i tipi de persone i sìpie salvi e i gàpie la cognossensa giusta dela verità”. Son restà maraveià, parché lore le ga dito che ghe ocore gaver no sol la cognossensa, ma la cognossensa giusta dela Bìblia.

Studiar cole Testimònie de Geovà me ga giutà a gaver la cognossensa giusta dela Bìblia. Par esémpio, go imparà che Geovà e Gesù no i ze una Trinità. Lori i ze una persona difarente una del altra. (Gioani 14:28; 1 Corinti 11:3) Son restà tanto contento de imparar questa verità, parché la ze fàcile de capir. Ma anca son restà disgustà parché go perso tanto tempo par proar capir cossa che la ze la Trinità, un insegno che no se pol mia capir.

Go scominsià a ndar ntele riunion dele Testimònie de Geovà. Son restà maraveià parché lori i tratea ben a tuti e i obedia pròpio quel che la Bìblia la dise. Parea che i era “santi”. Quando go visto el so vero amor, son restà sicuro che gavea catà la vera religion. — Gioani 13:35.

COME SON STÀ GIUTÀ: Dopo che son stà batesà, mi go cognossesto una brava dona, che ga nome Diane. Ela la ze stata slevada come Testimònia de Geovà e me piasea dele so bele qualità. Pi tardi, se ghemo maridà. El apoio e la amicìssia de Diane i ze una benedission de Geovà.

Noantri due voleino tanto cambiar par un posto ndove ghe ocorea de aiuto par predicar le bone notìssie. In 2010, semo ndati de star in Belise, nela Amèrica Sentral. Qua noantri predichemo ale persone che le ama a Dio e le vol tanto saver quel che la Bìblia la dise.

Go una pace tanto granda, parché go catà le verità de Dio e dela Bìblia. Guasto la pi granda parte del me tempo drio insegnar le persone sora la verità. Veder come la Bìblia la càmbia la vita dele persone, cossita come ga cambià la mia, me assa tanto contento. Adesso si, go catà una maniera de ringrassiar a Dio par la me vita.

“Lore le me ga dato tanta atension.” — MAURÍCIO ARAÚJO

ANO DE NASSIMENTO: 1967

PAESE: BRASIL

CHI ERO: MI GAVEA UNA VITA IMORAL

EL ME PASSÀ: Son stà slevà ntela pìcola cità de Avarè, in San Paolo. La pi granda parte dele persone che le ze de star lì no le ga tanti soldi.

El me pupà l’è morto quando mi ero ancora ntela pansa dela me mama. Ancora ceo, quando la me mama no la era casa, mi vestia le so robe. Mi fea estri de una dona e le persone le disea che mi ero gay. Col tempo, go scominsià a far sesso con altri tosi e òmini.

Con 24 ani, mi ndea in tanti posti drio ndar in serca de òmini e done par far sesso, come bodeghe, feste e fin davanti la ciesa. Nel carnaval, mi me vestia come una dona e ndea balar nele scole de samba. Mi ero tanto cognossesto.

Tanti dei me amighi i era gay, prostitute e vissiadi in droghe. Arquanti de lori i me ga dato crack e suito son restà vissià. Dele volte, dopereino droghe par tuta la note. In altre volte, quando ero mi sol, mi restea tuto el giorno drio doperar crack. Son restà tanto magro che le persone le catea che mi gavea aids.

LA BÌBLIA LA GA CAMBIÀ TANTO LA ME VITA: In quel tempo, mi go cognossesto le Testimònie de Geovà. Lore le me ga dato tanta atension e le me ga ledesto el testo de Romani 10:13, che dise: “Tuti quei che i invoca el nome de Geovà i sarà salvi.” Quele parole le me ga insegnà che l’era tanto importante doperar el nome de Geovà. Tante volte, dopo de doperar crack par tuta la note, verdea la finestra, vardea el cielo e coi oci pieni de làgrime mi preghea a Geovà e suplichea el so aiuto.

La me mama la sofria tanto parché la vedea che le droghe le era drio finir cola me vita. Par quela go dessidio fermarme de doperar droghe. Pena dopo, go scominsià a studiar cole Testimònie de Geovà. Lore le me ga assà sicuro che el stùdio ndaria giutarme a gaver forsa par fermarme de doperar droghe. E el me ga giutà pròpio!

Nel me stùdio go visto che mi gavea de far grandi cambiamenti. La roba pi difìcile l’è stà assar de esser gay parché mi ero cossita de gióveno. Quel che me ga giutà l’è stà cambiar de amicìssie e assar de ndar in arquanti posti, come bodeghe e feste.

No l’è stà fàcile far i cambiamenti. Quel che me ga dato consolo l’è saver che Geovà el se preocupa con mi e el capisse che son drio sforsarme. (1 Gioani 3:19, 20) In 2002, mi no fea pi le robe che i omossessuai i fà e son stà batesà come Testimònia de Geovà.

COME SON STÀ GIUTÀ: La me mama la ze restada tanto contenta coi me cambiamenti che anca ela la ga scominsià a studiar la Bìblia. Pi tardi, par desgràssia, ela la ga sofrio un derame. Ma stesso cossita, la seita a gaver amor par Geovà e par la Bìblia.

Fà oto ani che son pioniero. Dopero el me tempo par insegnar la Bìblia ai altri. Dele volte, go bio de lotar contra voie sbaliade. Ma, quel che me assa pi forte l’è saver che se seito far la roba giusta, Geovà el resta contento.

Rivarme darente de Geovà e viver de una maniera che lo assa contento me assa pi sicuro. Ancoi son un omo felice.

“Mi bevea tanto.” — LUKA ŠUC

ANO DE NASSIMENTO: 1975

PAESE: SLOVÉNIA

CHI ERO: CIUCHETON

EL ME PASSÀ: Son nassesto in Liubliana, capital dela Slovénia. Fin i me 4 ani mi ero un toseto alegre. Ma dopo, el me pupà el se ga copà. Alora, la me mama la ga bio de laorar tanto par slevar mi e me fradel pi vècio.

Con 15 ani son ndato de star cola me nona. Me piasea de viver con ela parché i me amighi i era de star darente de li. Anca, parché me nona la me dea pi libertà che me mama. Con 16 ani, go scominsià a ndar insieme de persone che le ndea bever tuti sabi e doméneghe. Go assà i me cavei restar longhi, me vestia come un rebelde e go scominsià a fumar.

Go doperà arquante droghe, ma son restá vissià nel àlcol, parché l’era quel che me piasea de pi. Nel scomìnsio, mi sol bevea bicieri de vin. Ma dopo, quando che mi bevea, l’era de pi che una garafa cada volta. Mi ero pròpio bon de sconder che mi ero ciuco. Tante volte, le persone sol le savea che mi gavea bevesto par via dela spussa che vegnea fora dela me boca. E ancora cossita, le persone gnanca le imaginea che mi bevea tanti litri de vin o bira, insieme con tanta vodca.

Quasi sempre, l’era mi che giutea i me amighi a restar in pié dopo de restar tuta la note nte una festa, ancora che mi gavesse bevesto tanto de pi che lori. Un giorno, go scoltà un amigo dir che mi ero una “bote sensa fondo”, una bruta maniera de dir nela léngua dela Slovénia che una persona la beve tanto de pi che tuti i altri. Quel che el ga parlà me ga assà tanto disgustà.

Go scominsià a pensar cossa che mi ero drio far cola me vita e che mi no’l gavea valor. Parea che tuto quel che mi fea l’era par gnente.

LA BÌBLIA LA GA CAMBIÀ TANTO LA ME VITA: In quel tempo, go visto che un colega de scola el ga scominsià a esser difarente, lu el parea pi calmo. Mi volea saver el motivo, par quela, lo go convidà par bever un cafè. Lu el me ga spiegà che el gavea scominsià a studiar la Bìblia cole Testimònie de Geovà e el me ga parlà de arquante robe che era drio imparar. Par mi, tuto quel lì l’era novo parché mi no gavea religion. Go scominsià a ndar nele riunion dele Testimònie de Geovà e a studiar con lore.

Studiar la Bìblia ga verto i me oci parché son stà bon de veder le bele verità dela Bìblia. Par esémpio, mi go imparà che semo drio viver ntei “ùltimi giorni”. (2 Timòteo 3:1-5) Anca, go imparà che Dio ndarà destruser le persone rugne e le persone bone le gavarà la oportunità de viver par sempre nte un Paradiso. (Salmo 37:29) Go bio una forte voia de fermarme de far quel che l’è sbalià par star insieme dele persone bone.

Go scominsià a parlar coi me amighi sora le verità dela Bìblia che ero drio imparar. Tanti i me ga ridesto drio. Ma dopo, questo l’è stà una benedission parché go visto che lori no i era i me amighi. Son nicorto che la pi granda parte del me problema col àlcol l’era par via dele me amicìssie. I me amighi i spetea premosi el fin de stimana sol par restar ciuchi nantra volta.

Go cambià le me amicìssie par la bona compagnia dele Testimònie de Geovà. Star insieme de lore me ga dato coraio parché go visto che lore le amea a Dio de verità e le fea sforso par far quel che l’è giusto. Pian pian son stà bon de molar el vìssio de bever.

COME SON STÀ GIUTÀ: Ringràssio tanto a Geovà parché no me ocore pi dela bebida par esser felice. No sò ndove che mi saria ancoi se seitesse con quela vita. Ma son sicuro che la me vita adesso la ze tanto meio.

Nei ùltimi sete ani go el privilègio de viver nel Betel dela Slovénia. Cognosser e servir a Geovà ga dato un ogetivo par la me vita.