•  Masu oohulela 2

•  Mihakhu sa masu a Muluku 3-5

  •  Mwaha 3

  •  Othokorora itthu soomunepani 4

  •  Omusoma Biblya 5

•  Mwiilipihere ovara muteko woolaleera 6-14

  •  Otthekula woopatxera 7

  •  Munnuwiheraka opwatthela 8

  •  Mwaapakaka atthareli 9

  •  Mwiiwanyeihaka soororomela sanyu 10

  •  Mwaha 11

  •  Nyaha sinthokororiwa 12

  •  Mapuru oolaleera oohiyana hiyana 13

  •  Ovarela muteko iviidiyu ni iliivuru 14

•  Makhalelo a makristu 15-16

  •  Osommwa wa Biblya mmulokoni 16

•  Masu oomalihera 17

•  Ottottopela ni ovaha miruku 18

•  Owehexexa etempu 19

•  Oxekura wa mutokweene a esirikwiitu 20

•  Esemana ya assembleya naari konkresu 21

•  Esemana ya wuupuwelela okhwa wa Yesu 22

•  Mutokweene a muthukumano wa ekumi ni mutekwaahu makristu 23

•  Presidente a muthukumano wa ekumi ni mutekwaahu 24

•  Mutokweene onkhavihera ovaha miruku 25

•  Isaala ikina 26

•  Iviidiyu 27

1. Miruku sivahinwe edokumentu ela inookela waakhavihera atthu ootheene empaka iparte sa muthukumano wa Ekumi ni mutekwaahu wa makristau. Mutthu akhalano eparte, ahinaayeru oreherera ontthunya osoma toko miruku simphwanyeya va Ekumi ni mutekwaahu wa makristau — Ekadernu ya vamweerini nave-tho miruku simphwanyeya edokumentu ela. Anamalaleera ootheene ennatthuneya weera yoopereriweke ovaha masina aya weera evahiweke yoothanleliwa aya ya anamasoma. Atthu akina tho enoonela mithukumano veeli-veeli, pooti okhavihera wakhala weera ennaakhulela sooxuttiha sa mBiblyani ni ennakhala moovarihana ni malamulo a sooxuttiha iyo. Mutokweene a muthukumano wa ekumi ni mutekwaahu makristu onnatthunaya owehexexa nnene waari weera mutthu ontthuna weerela eparte mithukumano ohikhanle namalaleera mikhalelo sawe sinnavarihana ni Biblya, avinyaka omuleela waari weera onnaakhuleliwa. Eyo entthuneya opakiwaka munna ommusomiha mutthu owo areene vaavo (naari ohoolo wa apapawe naari amannye mukristu) Nyaha sinthokororiwa imoha-moru seiye sinthokororiwa ni mutthu aathunaka okhala namalaleera oohipatisiwa — od-T ekapitulu. 8 eparag. 8.

2. Eminuutu 1. Isemana sootheene yamalaru wiipiwa etxipo ni opakiwa nivekelo noopatxera, presidente a Muthukumano wa Ekumi ni mutekwaahu aweeriheke asinna otthuna wiiwa itthu sinrowa othokororiwa va muthukumano owo. Nave-tho onnatthuneye ottittimihera ipontu sootthuneya seiyo muloko onrowaaya ottottela mureerelo.

 3. Mwaha: Iminuutu 10. Mpuwa mwa Ekadernu ya vamweerini wookhalamo muru ni ipontu piili naari tthaaru sootthuneya sinthokororiwa mpuwa mwa mwaha. Mwaha ola ontthuneya weera opakiweke ni mutokweene a mmulokoni naari murumeyi oorumeela oophwanelela. Wakhala weera liivuru a mBiblyani onrowa opatxera osommwa esemana ene yeeyo, enoorowa wooniheriwa eviidiyu woohima sa eliivuru eyo. Munna ompaka mwaha onnatthuneya wiiwanyeiha moota eviidiyu envarihanaaya ni mwahaawe. Nave-tho onnatthuneya othokorora ipontu siri vakadernuni. Opwaha mwa yeeyo, yakhala etempu, pooti ovarela muteko ifootu siri vakadernuni, seiyo sireheriwe weera ittittimihere mwaha owo. Munna ompaka mwaha pooti ovarela muteko ireferensia ikina, mene apakeke eyo wakhala weera iyo sinnavarihana ni mwaha onthokororiwa vakadernuni

 4. Othokorora itthu soomunepani: Iminuutu 10. Eparte ela ti ya makoho ni waakhuliwa, woohikhalano masu oopatxeriha naari oomalihera. Nave eparte ela ontthuneya weera epakiweke ni mutokweene a mmulokoni naari murumeyi oorumeela oophwanelela. Nto epakiweke makoho ootheene. Munna owo tonthanla waatthuneyaka osoma iversu sihimmwale naari hooye. Atthu evaheke ikomentariyu saya mpuwa mwa isegundu 30 naari ohiphiyera.

 5. Omusoma Biblya: Iminuutu 4. Epaarte ela ti yaanamasoma ni entthuneya weera epakiweke ni munna. Naxikola ovahinwe yoothanleliwa ela ontthuneya weera asome iversu sihimmwale ahuulumaka etthu ntoko masu oopatxeriha naari oomalihera. Presidente a muthukumano ontthuneya waakhavihera anaxikola weera esomeke nnene. Iversu ikina anaxikola enthanleliwaaya osoma ti soowaatta opwaha ikina, mwaha wa yeeyo, mutokweene a muthukumano wa Ekumi ni mutekwaahu onnatthuneya owehaka mikhalelo sa yoole ori naxikola aapakaka soothanleliwa (designação).

6. Iminuutu 15. Eparte ela ya mithukumano erehererinwe weera yaaxuttiheke anamalaleera ootheene muteko ahu woolaleera nave weera yunnuwihereke mikhalelo saya soolaleera, wuuluma ni oxuttiha. Moovarihana ni mikhalelo sa vamulokoni asitokweene a mmulokoni pooti ovahiwa iparte iya sa anamasoma. Yoole ori namasoma onnatthuneya osoma ni ovarela muteko soosoma sa ebroxura Mwiilipihere naari ebroxura Mwaasiveleke atthu. Yeeyo emphwanyeya mparenteni vaavo enkhalaayavo yoothanleliwa ya ekadernu ya vamweerini. Etempu ekina pooti othokororiwaka “mwaha”. Eparte ene yeela ontthuneya weera epakiweke ni mutokweene a mmulokoni naari murumeyi oorumeela oophwanelela —. Nwehe  eparagrafu 15 enuuluma woohima sa moota woopaka nyaha sineera “Mwaha”.

 7. Otthekula woopatxera: Epaarte ela pooti opakiwa nnamasoma mulopwana naari muthiyana. Ole onthanleliwa opaka eparte ela, akhala mulopwana, namakhavihera awe akhaleke-tho mulopwana, akhala muthiyana namakhavihera akhaleke muthiyana, naari akhaleke mutthu a emusi awe namasoma owo. Namasoma ni namakhavihera pooti opaka epaarte ela ekilantheene naari yeemenleene — Weera musuwele itthu sintxipale woohima sa nyaha sa soothanleliwa iya naari mapuro oolaleera namasoma okhanlaawe oowoonihera eparte ene yeela, nwehe  eparagrafu 12 ni  13.

 8. Munnuwiheraka opwatthela: Epaarte ela entthuneya weera epakiweke ni munna naari murokora. Ole onthanleliwa opaka eparte ela, akhala mulopwana namakhavihera awe akhaleke-tho mulopwana, akhala muthiyana namakhavihera akhaleke muthiyana. (km-T 5/97 epaax. 3). Namasoma ni namakhavihera pooti opaka epaarte ela ekilantheene naari yeemenleene. Namasoma onnatthuneya woonihera etthu yoowuuluma weera onnuwihere opwatthela oonihenraawe otthekula ovinre. Weera musuwele itthu sintxipale woohima sa nyaha sa soothanleliwa iya naari mapuru oolaleera okhanlaawe namasoma oowoonihera eparte ene yeela, nwehe  eparagrafu 12 ni  13.

 9. Mwaapakaka atthareli: Epaarte ela entthuneya weera epakiweke ni munna naari murokora. Ole onthanleliwa opaka eparte ela, akhala mulopwana namakhavihera awe akhaleke-tho mulopwana, akhala muthiyana namakhavihera akhaleke muthiyana. (km-T 5/97 epaax. 3) Namasoma ni namakhavihera pooti opaka epaarte ela ekilantheene naari yeemenleene. Eparte ela, namasoma ontthuneya weera oonihereke eparte emoha ekhaanini ya yoosomiha ya Biblya epatxerihinwe. Khontthuneya ohulela naari wuuluma masu oomalihera, waaikhala weera namasoma onthokororiwa epontu ya moota ene yeeyo. Khontthuneya osoma moowiiwanyaya iparagrafu sootheene sihimmwale, nnaamweera eyo yaakhuleliwaka opaka.

 10. Mwiiwanyeihaka soororomela sanyu: Wakhala weera epaarte ela mwaha, ontthuneya weera epakiweke nnamasoma mulopwana. Wakhala weera yoowoonihera, pooti opakiwa nnamasoma mulopwana naari muthiyana. Ole onthanleliwa opaka eparte ela, akhala mulopwana namakhavihera awe akhaleke-tho mulopwana, akhala muthiyana namakhavihera akhaleke muthiyana, naari akhaleke mutthu a emusi awe namasoma owo. Ole ompaka eparte ela, ontthuneya weera aakhuleke nnene ni moowiiwanyeya nikoho na muru wa muru onthokororaawe, avarelaka muteko waakhula omphwanyeya nipuro okumihinwaayavo mwaha owo. Namasoma pooti othanla meekhaawe waari weera onoohima eliivuru okumihinwaayavo mwaha awe.

 11. Mwaha: Epaarte ela entthuneya weera epakiweke ni munna ni ontthuneya weera epakiweke ntoko mwaha wa muloko. Wakhala weera mwaha owo okumihinwe epontu ya ethoonyero A ya ebroxura Mwaasiveleke atthu, namasoma ontthuneya weera attittimihereke moota soolepa sa mBiblyani sinhimmwa sinvareleyaaya muteko mmutekoni woolaleera. Mwa ntakihero, owo pooti ohima etempu heeni yooreerela ovarela muteko yoolepa eyo, etthu entaphulelaaya, ni moota woomwiiwanyeiha mutthu yoolepa eyo. Ni wakhala weera mwaha okumihinwe mwa soosoma sa ebroxura Mwaasiveleke atthu, namasoma ontthuneya weera ottittimihereke yoosoma eyo moota envareleyaaya muteko mmutekoni woolaleera. Owo pooti ohima ntakihero nihimmwale va epontu 1 ya yeele eri yoosoma naari yoolepa eri poothe ehimmwale mwa yoosoma eyo, wakhala weera eyo ti yoovareleya muteko.

   12. Nyaha sinthokororiwa: Soomwimmwa sa eparagrafu ela ni eparagrafu enttharelana sinvareleya muteko mwa soothanleli sa “Otthekula woopatxera” ni “Munnuwiheraka opwatthela”. Yaahikhala yoohimmwa ekina, yootthuna ya namosama va iparte sene seiya, ori otthekula avarelaka muteko ikhaikhai sa mBiblyani sookhweya mene sootthuneya wa mutthu owo ontthekulaaweno, ni ohiya mwaha weera ethokorore otthekula wa naaveeli enkelaaya okhalano. Namsoma ontthuneya othanlaka mwaha woovareleya muteko ni oneera okuhimere sookhumelela sooreera muttetthe anamalaleera enlaleeraaya. Namasoma pooti othanla woonihera naari hooye eliivuru, eviidiyu siri va ikaruma sahu sooxuttiha. Ohiya otekorari yoowoonihera, namasoma ontthuneya wiireherera vantxipale weera oonihere mikhalelo ntoko waapwatta atthu ni wuuluma ntoko onuulumelaawe.

   13. Mapuru oolaleera oohiyana hiyana: Namasoma ontthuneya weera avareleke muteko mapuro oolaleera ehimmwale ni apakeke yoowooniheriwa we avarelaka muteko mapuro awo moovarihana ni mikhalelo sa muttetthe oraawe, mwa ntakihero:

1. (1) Empa ni empa: Mapuro oolaleera moota ala, enhela mpuwa olaleera empa ni empa, olaleera ni telefooni naari ekaarta. Nave enhela mpuwa omweeriha mutthu nintthekulaahuno mapuro ene yaala okhalano yootthuna ya otthekula woohima sa Biblya. Mapuro enhimmwa eri mapuro enhela mpuwa a olaaleera empa ni empa.

2. (2) Olaleera woohiireherera: Olaleera moota ola onnoonihera moota woottottela mureerelo otthekula ninkhalaahuno weera okhale otthekula woolaleera. Eyo pooti ohela mpuwa otthekula muhimaka soolepa sa mBiblyani omutekoni, oskola, ebairu munkhalaanyu, muxaapani naari nipuro nikina emaara yeeyo munvaraanyu miteko sa nihiku ti nihiku.

3. (3) Olaleera mapuro oowaattiwa: Olaleera mapuro moota ala, enhela mpuwa olaleera ni ekarinya ni wuuluma ni atthu omerkaatu, mphironi, ojardim, mapuro eniiyaathiwa ikaaro naari nipuro nri poothe eri atthu antxipale.

 14. Ovarela muteko iviidiyu ni iliivuru: Moovarihana ni mikhalelo, namasoma pooti olakela ovarela muteko eviidiyu naari eliivuru. Wakhala weera yoothanleliwa ya namasoma enhela mpuwa eviidiyu, naari wakhala weera namasoma ontthuna ottittimihera eviidiyu emoha, owo pooti ohima eviidiyu ni wuuluma etthu envarihana ni eviidiyu eyo, mene khontthuneya woonihera emaara yoopaka eparte.

15. Yamala wiipiwa etxipo, iminuutu 15 sinnavareliwa muteko mwa mwaha mmoha naari miili seiyo sinaakhavihera asinna ovarela muteko masu a Muluku. Yaahikhala yoohimmwa ekina ipaarte iya sintthuneya weera ipakiweke ni mutokweene a mmulokoni naari apaale ni murumeyi oorumeela oophwanelela. Wakhala weera sootthuneya sa mmulokoni, sintthuneya pahiru opakiwaka ni mutokweene a mmulokoni. Wakhala weera eparte ela erinono “Mwaha,” munna ompaka mwaha pooti tho opaka makoho makina ohiya eri vakadernuni etempu eri poothe emaara onuulumaawe mwaha. Owo ontthuneya wuuluma masu oohulela moowaakuveya weera akhaleno etempu yoowuuluma nyaha sootthuneya siri vamwahani ni weera aavahe eparakha asinna yoowaakhula makoho. Wakhala weera onookhala okohakohiwa, mutthu owo onkohakohiwa wakhala weera onoowereya ti wooreerela weera aakhuleke areene ohoolo naari neere vapalku ohiya waakhula akhilantheene vakaterani vawe.

  16. Osommwa wa Biblya mmulokoni: Iminuutu 30. Ontthuneya weera eparte ela epakiweke ni mutokweene a mmulokoni oophwanelela. (Muloko orinono asitokweene vakhaaniine pooti ovareliwa muteko murumeyi oorumeela oophwanelela. Wakhala weera ti wootthuneya.) Asitokweene ootheene a mmulokoni ennamuthanla taani ori oophwanelela weera ahooleleke yoosoma ya Biblya mmulokoni. Ale anrowa waakhuleliwa ni asitokweene entthuneya weera epatxeriheke yoosoma ela ettittimiheraka ipontu sinrowa othokororiwa, evarelaka nnene etempu, ettittimiheraka soolepa sinrowa othokororiwa ni yaakhaviheraka atthu ootheene woona otthuneya waya ovarela muteko ele enrowa othokororiwa. Yaakhulelinwe pooti ophwanya miruku sooreera va miruku sikumiheriwe sa moota woohoolela yoosoma ya eparte erinono makoho ni waakhuliwa (w23.04 epaax. 24, ekwaadru) Wakhala weera mwaha onrowa othokororiwa wohinto othokororiwa moomalela, khotthuneya-tho ovireleliha yoosoma. Waawereyaka ontthuneya weera evareliweke muteko asinna oovirikana ele eri esemana, oohoolela ni ale oosoma iparagrafu. Wakhala weera presidente a Muthukumano Ekumi ni mutekwaahu oovekela weera nvukule iminuutu, ole onhoolela yoosoma ela onrowa othanla moota woopaka eyo. Pooti apaale othanla ohisoma iparagrafu sootheene.

17. Iminuutu 3. Presidente a Muthukumano wa Ekumi ni mutekwaahu onnuupuxera ipontu soovareleya muteko ethokororiwe eriyari ya Muthukumano. Owo-tho pooti wuuluma ipontu vakhaani sa muthukumano onttharelana. Wakhala weera yoohala etempu, owo pooti ohima masina aasinna anrowa opaka iparte esemana enttharelana. Sakhala soohimmwa naari osoma ekaarta, presidente ontthuneya weera avareleke muteko masu oomalihera weera uulume sa itthu iyo, saahikhala miruku mikina. Iprograma sookhoveleliwa ntoko eprograma ya limpeza, mithukumano sa muteko woolaleera khoontthuneya weera ihimmweke otribuna, mene iheliweke va ekwaadru ya anuncio. Pooti weera iminuutu 3 khasinkwana opaka soohimmwa naari osoma ekaarta. Nto wakhala weera eyo enimweereya, presidente ontthuneya weera uulume ni asitokweene anrowa opaka iparte saya va Makhalelo a Makristu weera evukule iminuutu saya. (Nwehe  eparagrafu 16 ni  19.) Mithukumano simmala ni etxipo ni nivekelo.

18. Yamala vale yoothanleliwa ya yoole ori naxikola, presidente a Muthukumano wa Ekumi ni mutekwaahu ookhalano eminuutu emoha weera amuttottopele ni onvaha miruku naxikola avarelaka muteko ebroxura yeeyo ehimmwale. Emaara presidente onimwiitthanaawe yoole ori naxikola, khantthuneya ohima yoosoma othanleliwaawe. Nto naxikola amaliha eparte awe, presidente annatthuneya omuttottopela naxikola owo, pooti opaka eyo, ni pooti ohima yoosoma aawehawehiwaawe. Ni ohima mwaha wa heeni naxikola okhumenlaawe nnene, ni moomureerela murima omuleela mwaha wa heeni ni moota heeni ontthuneyaaya weera naxikola atthikele osoma eparte ele. Presidente pooti wuuluma itthu ikina woohima sa eparte ele oonaawe okhala sootthuneya. Presidente atthuna vale pooti waasaasera emaara weera anvahe miruku sootthuneya naxikola wiiphiini, sinkhuma ebroxura Mwaasiveleke atthu ni Mwiilipiheryeke naari eliivuru Beneficie-se, sa yoosoma aathanlelinwaawe naari yoosoma ekina. Weera musuwele itthu sintxipale woohima sa muteko wa presidente a Muthukumano wa Ekumi ni mutekwaahu, muteko wa namakhavihera oovaha miruku, nwehe  eparagrafu 19,  24 ni  25.

19. Eparte eri yootheene ehipwaheke etempu ethanlelinwaaya, nave-tho miruku iya sinnavariheleya muteko wa presidente a Muthukumano wa Ekumi ni mutekwaahu. Nnaamweera ekadernu ya vamweerini ehimaka etempu ethanlinwe wa yeele eri epaarte, nto khontthuneya waatxeerera masu wakhala weera eparte eyo epakinwe mwa iminuutu vakhaaniini naari khontthuneya waatxeerera masu mwaha wooweera etempu awe khemanle. Wakhala weera eparte ekina munna ooviriha etempu yintxipale, onnatthuneya weera munna ori mutokweene a muthukumano wa Ekumi ni mutekwaahu naari Mutokweene onkhavihera ovaha miruku anvahe miruku mwa nttittimiho, weephiini. (Nwehe  eparagrafu 24 ni  25.) Mithukumano sootheene ohela mpuwa itxipo ni mavekelo, ontthuneya sikhaleke sa ewoora 1 ni iminuutu 45.

20. Vaavo muloko onxekuriwaaya ni mutokweene a esirkwiitu, mithukumano sipakiweke moovarihana ni Ekadernu ya vamweerini sa Ekumi ni mutekwaahu, ni itthu iya sinttharelana: Osommwa wa Biblya mmulokoni, va eparte Makhalelo a Makristu, onnatxentxiwa opakiwaka mwaha wa muteko mwa iminuutu 30, yoowo ompakiwa ni mutokweene a esirkwiitu. Ohinaaye mwaha wa muteko, presidente a Muthukumano wa Ekumi ni mutekwaahu, onnuuluula itthu sithokororinwe, onnahima moota sinrowaaya weetta mithukumano sa esemana yoottharelana, onnahima soohimmwa sootthuneya ni onnasoma ikaarta saakhelinwe. Avinyaka onnamwiitthana mutokweene a esirkwiitu. Wamala mwaha wa muteko, mutokweene a esirkwiitu onnamaliha muthukumano ni etxipo ethanlinwe nuuwo. Owo pooti omuthanla munna weera apake nivekelo noomalihera. Mutokweene a esirkwiitu aaxekuraka muloko, khentthuneya opakiwa muthukumano osaala B yoothanleliwa eri poothe ya naxikola onuuluma nuulumo ninvareliwa muteko muloko owo. Igrupu pooti opaka mithukumano saya nnaamweera mutokweene a esirkwiitu axekuraka egrupu ekina. Mene egrupu eyo onnatthuneya woonela mwaha wa muteko ompakiwa ni mutokweene a esirkwiitu vamoha ni muloko.

21. Esemana ya assembleya naari konkreesu, khasimpakiwa mithukumano sa mmulokoni. Atthu ootheene a mmulokoni ennatthuneya wuupuxeriwa weera mutthu ori poothe pooti osoma meekhaawe naari ni amusi awe nyaha sa esemana eyo.

22. Wakhala weera wuupuwelela ori nihiku na esemana, khonrowa opakiwa Muthukumano wa Ekumi ni mutekwaahu.

23. Asitokweene a mmulokoni, onnatthuneya omuthanla mutokweene mmoha a mmulokoni weera akhale mutokweene a Muthukumano wa Ekumi ni mutekwaahu. Owo ookhalano muritti wooweeriha mithukumano okhala soorehereya ni woona saatthariwaka miruku sootheene sivahinwe. Nave mutokweene owo, onnatthuneya okhala vakhiviru ni munna onvaha miruku. Wakhala weera Ekadernu ya vamweerini ya Ekumi ni mutekwaahu ti yookhala ene, mutokweene a Muthukumano wa Ekumi ni mutekwaahu onnatthuneya olepa iparte sootheene sa mithukumano sa eriyari ya esemana wa miyeeri miili. Eyo enhela mpuwa ohiya paahi iparte sa anaxikola, mene-tho sa presidente a mithukumano sa eriyari ya esemana (asinna ethanlinwe ni asitokweene a mmulokoni) ni iparte sa anaxikola. (Nwehe  iparagrafu 3-16 ni  24) Emaara yoopaka soothanleliwa sa anamasoma ontthuneya weera mutokweene a muthukumano aheleke mpuwa miruku ni sookumanano saya, wakhala weera owo onoowera wuuluma mwa nroromelo woohima sa mwaha onthokororiwa. Mutokweene ontthuneya weera avareleke muteko miruku imoha-moharu aapakaka soothanleliwa ikina tho sa muthukumano. Eparte eri poothe onnatthuneya oveleeliwa sihalaka isemana 3. Eformulaariyu Designação para a Reunião Nossa Vida e Ministério Cristão (S-89) ontthuneya sivariheliweke muteko wa iparte sa ­anaxikola. Mutokweene a Muthukumano wa Ekumi ni mutekwaahu ontthuneya asuweleke wakhala ­weera ekoopiya ya iparte sa mithukumano sootheene yoohiiwa va ekwaadru ya soohimmwa. Asitokweene a mmulokoni pooti omuthanla mutokweene mmoha naari murummwa ookhavihera weera akhavihere. Mene paahiru asitokweene a mmulokoni tentthuneya opaka iparte sihikhanle sa anaxikola.

24. Esemana eri poothe, mutokweene a mmulokoni onnakhala presidente a Muthukumano wa Ekumi ni mutekwaahu. (Muloko orinono asitokweene vakhaani, arummwa ookhavihera eri oolikaneene, pooti okhavihera.) Presidente onnatthuneya oreherera masu oopatxera ni masu oomalihera. Owo-tho onnahima iparte sootheene, asitokweene a mmulokoni yakhala vakhaani, owo-tho pooti opaka iparte ikina, pooti okhala eparte envekela paahi wooniheriwa eviidiyu woohikhala etthu yoowuuluma. Ikomentaariyu sa iparte sikhaleke soowaakuveya. Mukuttula wa asitokweene tenaathannla asitokweene a mmulokoni enrowa okhala presidente. Ale enkhumela nnene ennathanliwa ikwaha sintxipale. Moovarihana ni makhalelo a muloko, mutokweene a Muthukumano wa Ekumi ni mutekwaahu, onnakhala presidente ikwaha sintxipale waapwaha asitokweene akina a mmulokoni. Asitokweene a mmulokoni eri oolikaneene opakiha yoosoma ya Biblya mmulokoni, ennathanliwa weera ekhale presidente a mithukumano. Mene musuweleke weera munna ori presidente ontthuneya waattottopelaka ni waavaha miruku mwa nsivelo ale erino iparte ni waatthuneyaka waavaha miruku soovareleya muteko anaxikola. Nave-tho awehexexeke weera mithukumano simale etempu ethanlinwe. (Nwehe  eparagrafu 17 ni  19.) Wakhala weera presidente ootthuna naari nookhala nipuro nintxipale vapalkuni, owo pooti onvarihela miikoro mmoha weera ahime iparte. Vaavo anhimaawe iparte, munna onrowa opaka eparte awe eereke akelaka ohoolo. Presidente pooti okilaathi opalkuni vaavo ansommwaawe Biblya ni eparte ya Mwiilipihere ovara Muteko Woolaleera. Opaka eyo, onoorowa weeriha ohiviriha etempu yintxipale.

25. Waawereyaka, eparte ela akhaleke mutokweene a mmulokoni onkhumela nnene aapakaka mwaha. Munna onvaha miruku, emaara onaavahaawe miruku asitokweene a mmulokoni naari arummwa ookhavihera mwaha wa eparte aya, ahaavaheke vaatthuni. Eyo enhela mpuwa iparte sa Muthukumano wa Ekumi ni mutekwaahu, nyaha sa vanlakani, yoosoma ya Nwehereri ni osommwa wa Biblya mmulokoni, okhale wa anamahoolela a yoosoma naari wa anamasoma a ittima. (Nwehe  eparagrafu 19.) Yakhala asitokweene antxipale a mmulokoni enkhumela nnene yaapakaka mwaha ni yaavahaka miruku, nto, eyaakha eri poothe, mutokweene mmoha pooti okhala munna oovaha miruku. Khontthuneya onvaha miruku ikwaha sootheene munna ompakaawe eparte awe.

26. Wakhala weera nummero na anaxikola nohaatta, muloko pooti okhalano isaala ikina weera anaxikola epakekemo iparte saya. Esaala eri poothe ontthuneya akhalekemo muhooleli mmoha a miruku, naari pooti okhala mutokweene a mmulokoni. Yaahikhala asitokweene antxipale, murummwa ookhavihera ookhumela nnene pooti othanleliwa muritti ola. Mukuttula wa asitokweene ommuthanla taani eneeraaya emuthanle ni waari weera yoothanla eyo enoopakiwa evariheliwaka estilo de rodízio. Muhooleli onnatthuneya osoma miruku siri va  eparagrafu 18. Anaxikola enoowompwa weera erowe esaala ekina yavira eparte ya “Othokorora itthu soomunepani”, ya eparte eneera Mihakhu sa Masu a Muluku. Yavira eparte ya Mwiilipihere Ovara Muteko Woolaleera, anaxikola pooti otthikela mapuro aya.

27. Mithukumano ntoko iya, sinnavariheliwa iviidiyu sootthuneya. Iviidiyu sa mithukumano sa eriyari ya esemana, sinnaphwanyaneya va aplikativu JW Library® nave pooti ophwanya evariheliwaka matelefooni oovirikana.

© 2023 Watch Tower Bible and Tract Society of Pennsylvania

S-38-MHS 11/23