Kiyarinwe eyaakha ya 1948 ecidade ekhaani ya oNigeriya, wAfrika. Emaara ene yeele, tiiyu aka Mustafa ni munnaka mutokweene, yaaBatiziwa enakhala Anamoona a Yehova. Vaavo kaaraakano iyaakha 9, paapa aka aahookhwa. Nto kaaxupeya. Munnaka Wahabi aakileela weera kaamunweha veeli paapa aka woovinyererihiwani. Etthu ele yaakimaaliha vantxipale ni kaatthuna omusoma Biblya. Miyo kiBatizinwe eyaakha ya 1963. Asinnaka akinatho araru yaaBatiziwa.

Eyaakha ya 1965, miyo kaathaama kirowaka okhala ni munnaka mutokweene oneeriwa Wilson ocidade ya oLagos. Waari wooreera waasuwela mapioneiru makina ookilaatheya a muloko wa Igbobi. Woona moota mapioneiru awo yiilipiheraaya ni yaahakalalaaya, waakeeriha miyotho opatxera ovara ntoko pioneiru. Eyo yeereñye mweeri wa Janeiro a 1968.

Munna mmoha aavara oBetheli, eeriwa Albert Olugbebi, aahipaka muthukumano woothanleya ni egrupu emoha ya amiravo weera uulume ohaaweleya waya mapioneiru oothanleya onorte wa oNigeriya. Nlelo kinnuupuwela masu ooreera a munna Olugbebi uulummaawe oriki: Nyuwo amiravo ni pooti ovarela muteko etempu anyu ni ikuru sanyu weera munvarele Yehova. Mookhalano muteko muntxipale  muntthuneyaanyu ovara. Miyo kannatthuna vantxipale olikanxa munepa wa mprofeta Yesaya kikhalaka oolikaneene weera kirowe woowini Yehova onrowaawe okirumawo, mwa yeeyo, miyo kaalepa epetição ya opioneiru oothanleya. — Yes. 6:8

Maio a 1968, miyo kaathanleliwa okhala pioneiru oothanleya ecidade ya oKano, onorte wa oNigeriya. Eyo yeereñye mpuwa mwa ekhotto ya Biafra, ekhotto yeeyo yeereñye eyaakha ya (1967-1970), ekhotto ele yaakumihera maxupo ni okhwa onorte wa elapo ele. Ekhotto ele yaavirelela okhala onorte wa oNigeriya. Munna mmoha atthunaka okikosoopa, aakeerela weera kihaakhulele yoothanleliwa ele. Mene miyo kaamwaakhula ha: “Asantte vantxipale mwaha wooxupeya wanyu. Mene Yehova aatthunaka weera kivare yoothanleliwa ela, kinnaroromela weera anookhala ni miyo.”

Etthu yeereñye oKano, yaari yooriipiha murima. Ekhotto ele yaananariha ecidade ele etokweene. Vaavo naavaraahu muteko woolaleera, ikwaha ikina hiyo nannaaphwanya atthu yiivinweene ni ekhotto ele. Ehinaaye opatxera ekhotto ela saakhalawo miloko sintxipale oKano, mene asinna antxipale yaatthawa ocidade. Vano naaphwannye anamalaleera oohiphiya 15, ni awo yannoova vantxipale ni yaari ookhulumuwa ene. Asinna awo yaahakalala vantxipale enoonakaru hiyo mapioneiru oothanleya oophiyeraka 5. Hiyo naahaalipiha asinna ale, ni asinna awo yaapatxera ohakalala. Opwaha mwa yeeyo, hiyo naahaakhavihera moota wooreherera mithukumano, muteko woolaleera, moota woowinviyari irelatooriyu ni moota woovekela iliivuru oBetheli.

Hiyo naapatxera oxuttera nuulumo na hauçá. Vaavo atthu a muttetthe ole yiiwaaya mitthenka sa omwene ni nuulumu naya, awo yanniiwexexa nnene. Mene asitokweene a ittiini a oKano, khiyaasiveliwa naari vakhaani mano ni muteko ahu woolaleera. Ekwaha emoha, miyo ni munna mmoha, naatthimakihiwa ni mulopwana mmoha akunxeene mwaalo. Oreera waya, okhala weera naahitthimaka ompwaha mulopwana ole ni naahiwera otthawa. Nnaamweera naakumanano itthu iye, Yehova, ‘aahinikiraathiha moororomelani’ nave nummero na anamalaleera naapatxera waatxeerereya. (Nsal. 4:9 [4:8, NM]) olelo ecidade ya oKano aakhala anamalaleera oopwahaka 500 a miloko 11.

Noovira etempu, eyaakha ya 1968, kivarakaru vakhaani ecidade ya oKano, miyo kaathanleliwa orowa oNiamey, ekapitaale ya eRepublika ya oNíger, vamoha ni mapioneiru meeli oothanleya. Moohipisa, kaahona weera oNíger wAfrika ocidental, nipuro nootepa oviha opwaha mapuro makina a mulaponi. Opwaha paahi oviriha oviha, hiyo nannatthuneya oxuttera muulumo a elapo ele, efrancês. Nnaamweera naaviriha maxupo awo, hiyo nannamuroromela Yehova ni naapatxera olaaleera okapitaale ni egrupu ekhaanini ya anamalaleera yaakhala weiwo. Evinreene etempu vakhaani atthu a oNiamey, yaahaakhela ekoopiya ya liivuru, A Verdade Que Conduz à Vida Eterna. Mpaka atthu yannaneemexa mphironi envekaka liivuru mmoha!

Evinreene etempu vakhaaniini, hiyo naahoonelela weera anamalamulela khiyaasiveliwa ni Anamoona a Yehova. Julho a 1969, hiyo naakhalano Asembleya oopatxera a esirkwiitu ni atthu oophiyeraka 20. Hiyo nannaweherera moohakalala mwaha wa oBatizo, mwaha wooweera anamalaleera eeli yaamurowa oBatiziwa. Mene nihiku noopatxera na Asembleya, aahiphiya poliiciya ni aahaakanyera muthukumano ole. Mapoliiciya yaahikikuxa miyo vamoha ni mapioneiru akina oothanleya ni mutokweene a esirkwiitu enniroiha opoliiciya. Opwaha mwa yeeyo, awo yaanikoha-koha ni yaaneerela nitthike nihiku naattharelana. Woona weera itthu saamurowa oxupa, hiyo naalakela opaka mwaha wa oBatizo owannyawe munna mmoha, ni avinyaka opaka oBatizo mmoolokoni moowiipithiheya.

Sivinreene isemana vakhaani muhoolo mwaya, anamalamulela yaakoomoola elapo ele vamoha ni mapioneiru oothanleya 5. Awo yaanivanhe iwoora 48 weera niireherere ni okhuma elapo ele, nto hiyo wannatthuneya wiireherera ni omwaasa transporte ahu. Hiyo naahipaka eyo ni naahirowa oBetheli ya oNigeriya, weiwo naakhenlaahuwo soothanleliwa inyowani.

ONigeriya, miyo kaahithanleliwa ecidade ya Orisunbare, weiwo kaahakalalaka ni muteko woolaleera ni opakiha soosoma sa Bibliya vamoha ni egrupu ekhaanini ya anamalaleera yaakhala weiwo. Mene sivirakaru miyeeri 6, eBetheli yaakiwopa otthikela oNíger meekhaaka. Woopatxerani miyo kaatikhiniheya ni kaanyoonyiwa vakhaaniini. Mene miyo kannatthuna vantxipale okumana veeli ni asinna a oNíger. Nto miyo kaatthikela oNiamey!

Kiphiyakaru, nivinreene nihiku nimoha mulopwana mmoha aamweetta nakoso ooNigeriya, aahoonelela weera miyo ka Namoona a Yehova ni aapatxera okipakela makoho woohima sa Biblya. Hiyo naasoma ootheene, ahiyakaru ompaha soona ni owura, owo aaBatiziwa. ONíger miyo kannahakalala olaleera ni asinna mwa iparte soovirikana sa elapo ni woona moota, moovira iyaakha atthu yaakhulelaaya ekhaikhai. Miyo kiphiyaka, elapo ele yaari anamoona a Yehova 31, Mene kivinyakawo yaari 69.

Mweeri wa Dezembro eyaakha ya 1977, kaahitthikela oNigeriya weera kamwaakhele treinamentu.  Evirakaru ekursu ya isemana tthaaru, mutokweene a ekomissão a efiliyaale, munna Malcolm Vigo, aahikinnya ekaarta ya oBetheli ya oSera Leoa. Asinna yaamwaasa munna mmoha a ekumi yooreera, oohithela, ni uuluma ingles ni efrancês weera akhale mutokweene a esirkwiitu ya oGuiné. Munna Vigo, aahimme weera treinamentu ole kaamwaakhenlaaka, aari a yoothanleliwa ene yeeyo. Ni owo aakeerela: “Muupuwele nnene muhinaaye waakhulela.” Ewoora ene yeeyo miyo kaamwaakhula weera: “Okhala weera Yehova tonkirumiha, miyo kinoorowa.”

Miyo kaahirowa oSera Leoa ni kaahikumana ni asinna a ekomissão. Munna mmoha eerela eparte ekomissão ele, aahikileela ha, “Khansuwenle nnene moota oneettaaya muteko woolaleera oGuiné.” Nnaamweera efiliyaale ele yaarino muritti woowehaweha muteko woolaleera oGuiné, khiwaawereya olokolola ni asinna yaakhala weiwo mwaha wooweera maxupo a epoliitika yaatepa elapo ele. Efiliyaale yaaheerera ikwaha sintxipale omuruma mutokweene a efiliyaale orowa okhavihera oGuiné, mene khiyaawenre. Mwa yeeyo, yaakivekela weera kipake mukwaha kirowaka ekapitaale ya oGuiné, Conacri, ni keerere ovekela weemereriwa ni Governu okhala weiwo.

Emaara miyo kaaphiñyaaka oConacri, kaapwaha wembaixada ya oNigeriya weera kuulume ni embaixador. Miyo kaamuleela weera kaatthuna ovara muteko woolaleera oGuiné, mene owo aakeerela kihirowe mwaha wooweera waari woowoopiha. Miyo kaamutthukiwa naari yaamukikhumelela etthu yoonanara. Owo aakeerela, “Otthikele oNigeriya walaleereke weiwo”, mene miyo kaamwaakhula ha, “Miyo koolakela okhala wenno.” Nto owo aalepa ekaarta emoha amulepelaka Ministro a oGuiné weera akikhavihere. Avinyaka ministro ole aakaakhela mookireerela murima.

Etempu vakhaani miyo kaatthikela oBetheli ya oSera Leoa, ni kaahaaleela asinna weera Governu aahikaakhulela okhala oGuiné. Nto asinna yaahakalala vantxipale woona moota Yehova aakireelihaawe!

Eyaakha ya 1978 ni 1989, miyo kaavara ntoko mutokweene a esirkwiitu oGuiné, oSera Leoa, nave kaahikhala nipuro na mutokweene a esirkwiitu a oLibériya. Woopatxerani miyo kannavoreiwa veeli-veeli. Ikwaha ikina eyo yanneereya vaavo kaakhalaaka mapuro oohikhaliwa ni atthu antxipale. Mene asinna ikwaha sootheene yannapaka ele yaaweraaya weera ekirooihe oxipitaale.

Ekwaha emoha, kaahivoreeiwa vantxipale malaariya ni nyunku. Kilamakaru, kaahisuwela weera asinna yaahivaanela nipuro yaarowaaya okivitha kakhwa vale! Nnaamweera ekumi aka kivirinheene maxupo ikwaha sintxipale, nkintale wuupuwelela ohiya soothanleliwa saka. Ni mpaka olelo va, kinnaroromela weera Yehova paahi tonnikosoopa mooreerela, mwaha wooweera, pooti nikhwaaka, onoorowa onivinyereriha.

Eyaakha ya 1988 kaamusuwela Dorcas, yoowo aari oomaala ni oolipa moomunepani. Hiyo naahithelana ni owo aahipatxera ovara ni miyo osirkwiitu. Dorcas aavara vantxipale mwa yoothanleliwa ahu osirkwiitu ni aari oolikaneene opaka itthu sintxipale vamaithoni va Yehova. Ikwaha neettaahu weera nxekure miloko, hiyo nanneetta  ikilometro soophiyeraka 25 nikunxeene miritti sahu. Vaavo naaxekuraahu miloko soorakamela, hiyo nannanwela transporte ori poothe, eyo yaahela mpuwa weetta vakhaani-vakhaani mphiro woonanara ni woosareya malitti.

Dorcas aari oolipa murima. Mwa ntakihero, ikwaha ikina hiyo nanneetta mukwaha mapuro yaawo yaasareñye ikonya. Mpuwa mwa mukwaha wa mahiku 5, hiyo naahoonelela weera iponte sa ethaapwa, saahinanara, nto naatthuneya olapuwa mooloko ni nikula. Vaavo naaphiñyaahu okhopela wa mooloko, ni vaavo Dorcas aatthunaawe okhuma munikulani, owo aahimorela mmaahini. Naari owo naari miyo khinaawera orapela, ni mooloko ene yoowo, saakhalamo ikonya. Moohakalaliha, amiravo yaavolowa mmaahini ni yaawera onvuluxa Dorcas. Mene nnaamweera oreene hiiho, etempu ekina hiyo nannuupuwela mooriipiwa murima etthu ele yeereñye, nnaamweera oreene hiiho, hiyo naavirelela ni yoothanleliwa ahu.

Woopatxerani wa eyaakha ya 1992, hiyo naatikhina vantxipale vaavo noonelenlaahu weera Dorcas aarupala. Hiyo nanniikoha wakhala weera naamuhiya ovara ntoko mapioneiru oothaanleya. Mene hiyo naahuupuwela há, ‘Yehova oonivaha yoovaha ela!’ Mwa yeeyo, hiyo naahinvaha nsina nooweera Jahgift (yoovaha ya Yah). Sivinreene iyaakha 4 Jahgift ayarinweene, aayareliwa murokorawe, Eric. Anamwane ahu eeli mweekhaikhai yoovaha ya Yehova. Moovira etempu, Jahgift aavara eskritooriyu ya otaphulela ya oConacri, ni Eric murumeyi oorumeela.

Dorcas aahiya ovara notoko pioneira oothanleya, mene owo aavirelela ovara ntoko pioneira ookilaatheya, nnaamweera aahuwa anamwane ahu. Nnikhavihero na Yehova miyo kaavirelela ovara mwa ehuhu yootheene. Anamwane ahu yunnuwakaru, Dorcas aatthikela ovara ntoko pioneira oothanleya. Vano hiyo ooweeli ninvara ntoko mamissiyonaariyu oConacri.

Miyo ikwaha sootheene kannarowa weiwo Yehova aakirumihaawewo. Ikwaha sintxipale miyo ni amwaaraka nohoona okosoopa wawe ni mareeliho awe. Omuroromela Yehova waanikhaviheera hiyo ohixupeya ni itthu sa weerutthuni. Miyo ni Dorcas nooxuttera ni sooweereya sahu weera Yehova “Muluku a ovuluxiwa,” naapwiipwi a ovareleleya weekhaikhai. (1 Sow. 16:35) Miyo kinnaroromela weera ootheene ale emmuroromela yoowo, ‘enookhala oovareleleya vamoha ni Yehova’. — 1 Sam. 25:29.