MWAHA ONTHOKORORIWA 49
Neereke Yehova onoorowa waakhula mavekelo aka?
‘Nyuwo munrowa okiitthana, okaattamela ni okivekela, ni miyo ni miyo kini kiwaakhuleleni.’ — YER. 29:12.
ETXIPO 41 Xontte Mwiiwe Ovekela Waka
ELE NINKELA AHU OXUTTERA a
1-2. Mwaha wa heeni ikwaha ikina nnoonaahu weera Yehova khanakhula mavekelo ahu?
‘MPUHEKE mwa Yahvéh ni ani ovaheeni onkhwelaaya murima anyu.’ (Nsal. 37:4) Ela yoolaihera yootepa oreea! Mene neereke nintthuneya owehereraka Yehova onivaha itthu sootheene nimmuvekelaahu? Mwaha wa heeni ninkohaahu hiiho? Mkuupuwelani sooweereya iya, murokora mmoha oohitheliwa onnanvekela Yehova weera amukhavihere orowela exikola ya anamalaleera a Omwene, nto iyaakha sintxipale saavira, owo ahiitthaninweene. Muuna mmoha mmiravo onnavekela Yehova weera amukhavihere olama erettaawe weera owo awere opaka itthu sintxipale sa mmulokoni mene nnaamweera vareene hiiho, owo khanlama. Asitiithi a mmiravo mmoha, ennamuvekela Yehova weera mwaana aya avirelele okhala mweekhaikhaini, nto mwaana aya owo onnalakela ohiya onvarela Yehova.
2 Apaale nyuwo mihinta opaka nivekelo nvekelaka etthu emoha, ni etthu eyo khayereñye. Nto mwaha wa itthu eyo, nyuwo mwannuupuwelela weera Yehova onaakhula paahi mavekelo atthu akina ohiya mavekelo anyu opwaha mwa yeeyo apaale nyuwo mwaapaka etthu yoottheka. Murokora mmoha oneeriwa Janice b annuupuwelela annisonela hiiha. Murokora ola ni aiyawe yannavekela weera evare muteko oBetheli, owo ohimme ha: “Miyo kannaroromela weera moohipisa nnimwiitthaniwa weera navare oBetheli.” Ni iyaakha sintxipale saavira ntheli nle nihiitthaniwaka weera yavare oBetheli Janice onnavirelela eeraka: “Miyo kaaripiwa murima ni kaaxupeya vantxipale, miyo kannuupuwelela etthu heeni yoohireera kanpakenlaka Yehova, miyo kaavekela woohimma sa mwaha ene yoowo nto mwaha wa heeni owo ahaakhulaawe nivekelo naka?”
3. Eheeni ninkelaahu woona mwa yoosoma ela?
3 Ikwaha ikina hiyo pooti wiikoha wakhala weera onniiwa mavekelo ahu. Mpakana arumeyi oororomeleya akhalaiyi yaakhalano maxupo awo. (Yobi 30:20; Nsal. 22:2; Hab. 1:2) etthu heeni enrowa woororomelihani nyuwo weera Yehova onimwaakhula mavekelo anyu? (Nsal. 65:2) Weera niwere waakhula nikoho nna nnoorowa woona ipontu iraru: (1) Eheeni nintthuneyaahu owehereraka wa Yehova? (2) Yehova onweherera eheeni wa hiyo? (3) Etthu heeni apaale nintthuneyaahu oreherera mmavekeloni mwahu?
EHEENI NINTTHUNEYAAHU OWEHERERA WA YEHOVA
4. Moovarihana ni Yeremiya 29:12, eheeni Yehova olanheraawe?
4 Yehova oolaihera wiiwa mavekelo ahu. (Mmusome Yeremiya 29:12.) Muluku ahu onnaasivela arumeyi awe oororomeleya nto owo khorowa ohiya wiiwa mavekelo anyu. (Nsal. 10:17; 37:28) Nto eyo khenthonyera weera owo onoonivaha itthu sootheene nimmuvekelaahu, itthu ikina nnanvekelaahu Yehova ninrowa waakhela paahi elapo enyowani.
5. Yehova onuupuwela eheeni vaavo oniiwaawe mavekelo ahu? Muthalihe.
5 Yehova onnuupuwelela soovekela sahu moota sinvarihanaaya ni yootthunaawe. (Yes. 55:8, 9) Yootthunaawe eyo ennaahela mpuwa atthu owiiraana yaawo enrowa olamuleliwa ni Omwene awe. Mene Satana aahima weera atthu yaamurowaka okhala ohakalala yiilamulelaka meekhaaya. (Eph. 3:1-5) Yehova weera oonihere weera etthu Satana aahimmaawe tiyoowootha, owo ohaakhulela weera anamalamulela ekhaleke olelo va. Menento anamalamulela awo tennikumihera maxupo yaawo ninvirihaahu olelo va. (Koh. 8:9) Mene hiyo noosuwela weera Yehova khonrowa omaliha maxupo ootheene viinaano va, mwaha wooweera apaka eyo, atthu akina yaamuupuwelaka weera anamalamulela ennakhumela nnene ni ennawera omaliha maxupo enkhumelela.
6. Mwaha wa heeni nintthuneyaahu ororomela weera Yehova onnanipakela itthumwa nsivelo ni mwa exariya?
6 Yehova pooti waakhula mavekelo wa mikhalelo soovirikana. Mwa ntakihero, vaavo Mwene Ezekiya aavoreiwaawe, owo anvekela Yehova weera amukhavihere olama nto Yehova aapaka eyo. (2 Mam. 20:1-6) Mene nto vaavo murumwa Paulo anvekenlaawe Yehova weera amalihe soovoreya mweerutthuni mwawe Yehova khaapanke eyo. (2 Akor. 12:7-9) Moone tho etthu yeereñye ni murummwa Yakobe ni Pedru, Mwene Herodi aatthuna owiivasa ootheene nave muloko wannavekelela murummwa Pedru apaale tho Yakobe, nto Yakobe aahikhwa ni murummwa Pedru aahoopoliwa mwa miiriira ni nlaikha. (Mit. 12:1-11) Nto hiyo pooti wiikoha, ‘Mwaha wa heeni Yehova aamoopolaawe Pedru ahipaka emoha-moharu ni Yakobe?’ Biblya khonaakhula. c Mene hiyo pooti ororomela etthu emoha Muluku “khanootha.” (Ola. 32:4) Nave hiyo noosuwela weera Yehova annamusivela vantxipale Pedru vamoha ni Yakobe. (Apok. 21:14) Ikwaha ikina Yehova pooti waakhula nivekelo nahu wa mukhalelo nahaawehereraahu, mene hiyo khaninhovela weera Yehova onnapaka ele eri yooreera ni ekhaikhai. Mwa yeeyo hiyo khaninkhala ooxupeya woona moota Yehova onaakhulaawe mavekelo ahu. — Yobi 33:13.
7. Eheeni nihintthuneyaahu opaka, ni mwaha wa heeni?
7 Hiyo khanintthuna olikaxera sooweereya sahu ni sooweereya sa atthu akina. Mwa ntakihero, apaale hiyo ninnavekela Yehova weera anikhavihere mwa yooweereya emoha, nto nivekelo nahu khannaakhuliwa ni noovira etempu, ninnoonelela weera mutthu mukina oopaka nivekelo nimoha-moharu ni onnooneya weera Yehova ohaakhula nivekelo nawe. Murokora mmoha oneeriwa Ana ooviriha etthu ntoko eyo owo anvekela Yehova weera iyawe oneeriwa Mateus alame eretta ya câncer. Etempu ene yeeyo tho, arokora eeli oowuuluvala yannawanano eretta ya câncer, nto Ana ananvekelela iyawe vamoha ni asirokora ale eeli owuuluvala, asirokora ale eeli oowuuluvala, yaahilama nto iyawe eeriwa Mateus aakhwa. Woopatxerani, Ana anniikoha, waari weera arokora ala aalama Yehova ohaakhavihera vano Yehova aapankeene eyo, mwaha wa heeni ahaakhavihenraawe aiyawe? Ekhaikhai weera hiyo khaninwera ohima mwahawa heeni arokora ala eeli elammaaya. Mene etthu ninsuwelaahu ti yooweera Yehova onoomaliha maxupo ootheene nimkumanahuno ni weera owo onnatthuna vantxipale waavinyereriha asinthamwene awe ekhwiiye. — Yobi 14:15.
8. Moovarihana ni Yesaya 43:2, Yehova onnikhavihera moota heeni? (b) Mavekelo ennikhavihera moota heeni vaavo ninvirihaahu maxupo? (Moonele eviidiyu Mavekelo annanikhavihera ovilela maxupo.)
8 Yehova ikwaha sootheene onookhala vakhiviru vahu. Ntoko Tiithi ahu a nsivelo Yehova khomusivela vaavo onnoonaawe hiyo nihaawaka. (Yes. 63:9) Nnaamweera vareene hiiho, Yehova onnakhulela weera nikumanekeno maxupo, yaawo enlikanxeriwa ni miyooloko ni mooro. (Mmusome Yesaya 43:2.) Yehova oonilanhera weera ononikhavihera emaara ninvirihaahu maxupo ni owokhonrowa ohiya weera maxupo enkhumeleleke mpaka khalayi. Opwaha mwa yeeyo Yehova onnanivaha munepa awe wootteela weera nihikhulumuwe. (Luka 11:13; Afil. 4:13) Mwa yeeyo, hiyo nroromeleke weera nnookhalano itthu sootheene ninhaawelaahu weera nivirelele okhala oolipa ni oororomeleya wa Yehova. d
EHEENI YEHOVA ONWEHERERAAWE WA HIYO?
9. Moovarihana ni Yakobe 1:6, 7, mwaha wa heeni nintthuneyaahu ororomela weera Yehova onoonikhavihera?
9 Yehova onweherera weera nimuroromeleke. (Aheb. 11:6) Ikwahaikina maxupo ahu pooti okhala oolemelaxa, mpaka wuupuwelela weera khaninrowa ovilela. Nave hiyo pooti ohovela wakhala weera Yehova onoonikhavihera, mene Biblya onnanleela weera ni ikuru sa Yehova nnoowera ‘otuphela ixiri soorakama.’ (Nsal. 18:29) Mene ohiya ohovela waari weera Yehova onoonikhavihera, nintthuneya omuvekela ni nroromelo, niroromelaka weera owo onimwaakhula mavekelo ahu. — Mmusome Yakobe 1:6, 7.
10. Nvahe ntakihero na moota mukelaanyu okhale moovarihana ni mavekelo anyu.
10 Yehova onweherera weera ele ninvekenlaahu evarihaneke ni ele ninvekenlaahu. Mwa ntakihero, apaale munna mmoha onnanvekela Yehova weera avahiwe mahiku vkakhaani omutekoni wawe weera amonele kongresu. Yehova aarowaawe waakhula Moota heeni nivekelo nna? Owo aarowa onvaha olipa murima munna ole weera awere omuvekela patarau awe. Mene nto munna owo tho waamutthuneya opaka eparte awe ni orowa wuuluma ni patarau awe weera amuvekele. Apaale munna owo waamutthuneya omuvekela ikwaha sintxipale. Opwaha mwa yeeyo pooti otthuneyaka munna owo onvekela kolega awe weera amuranttele. Ni waatthuneya munna owo ontthuneya waakhulela otthikiliwa musurukhu mwaha wa mahiku ale ohinrowaawe ovara muteko.
11. Mwaha wa heeni nintthuneyaahu ovirelela ovekela woohima sa maxupo ahu?
11 Yehova onnaweherera weera hiyo nivireleleke ovekela ele eri yootthuneya wa hiyo. (1 Ates. 5:17) Yesu aahoonihera weera mavekelo ahu makina khiyaarowa waakhuliwa moowaakuveya. (Luka 11:9) Menento, muhikhulumuwe opaka mavekelo! Mpakeke eyo ikwaha sintxipale ni murima anyu wootheene. (Luka 18:1-7) Vaavo ninvirelelaahu ovekela woohima sa mwaha mmoha, ninnamoonihera Yehova weera mwaha owo ti wootepa otthuneya wa hiyo, ohiya paahi etthu enrowa ovira moowaakuveya. Opwaha mwa yeeyo ninnoonihera weera nookhalano nroromelo noolipa weera owo onoonikhavihera.
MWAHA WA HEENI IKWAHA IKINA ORAAYA WOOTTHUNEYA OTXENTXA ELE NINVEKELAAHU?
12. (a) Makoho heeni nintthuneyaahu wiipakela woohima sa itthu ninvekelaahu ni mwaha heeni? (b) Moota heeni nneeraahu noonihere weera ninnamuttittimiha Yehova vaavo nimpakaahu mavekelo? (Nwehe ekwaadru “ Neereke mavekelo aka ennoonihera weera kinnamuttittimiha Yehova?”
12 Wakhala weera ele ninvekenlaahu Yehova kheyereñye, hiyo pooti wiipakela makoho ala mararu. Noopatxera: ‘Neereke kinvekela etthu yooreerela?’ Ikwaha sintxipale ninnuupuwela weera etthu yooreera wa hiyo. Pooti weeraka etthu eyo ninvekelaahu khehiyono yooreera wa hiyo ni khenrowa okhala mwa mahiku mantxipale. Ni wakhala weera ninvekela weera niwere omaliha maxupo mamoha, apaale pooti yookhala etthu yootepa oreera ninwehereraahu mpuwa wa maxupo awo. Ni pooti weera itthu ikina hiyo nnanvekelaahu Yehova khasinvarihana ni yootthuna awe. (1 Yoh. 5:14) Nkuupuwelani ntakihero na anamuyari ale ehimmwale eparagrafu yoopatxera, awosa yaamuvekela Yehova weera mwanaya avirelele okhala mweekhaikhaini. Onkhala ntoko khowaari woonanara ovekela eyo. Mene Yehova khamukhanyerera mutthu weera amukokhorele. Owo ontthuna weera, ootheene ahu wahela mpuwa anamwane ahu ethanleke mwaneene aya omukokhorela Yehova. (Ola. 10:12, 13; 30:19, 20) Nto ohiya omuvekela Yehova weera anamwane ahu evirelele okhala veekhaikhaini, asitiithi onttuneya omuvekela Yehova weera aakhavihere ovara murima aya wa anamwane aya ni oweeriha omusivela Yehova ni okhala nthamwene awe. — Mir. 22:6; Aef. 6:4.
13. Moovarihana ni Aheberi 4:16 Yehova onkela onikhavihera etempu heeni? Muthalihe.
13 Nikoho nanaveeli tinna: ‘Neereke etempu yooreerela weera Yehova akivahe etthu kinnavekelaaka?’ Apaale nyuwo otthuna weera Yehova owaakhuleni moowaakuveya. Mene mweekaikhai Yehova tonsuwela etempu yooreerela weera aakhule nivekelo nahu. (Mmusoma Aheberi 4:16.) Vaavo mavekelo ahu ehinaakuliwaaya, hiyo pooti wuupuwelela weera waakhula wa Yehova ti “hooye.” Mwa ntakihero, Mmuupuwele veeli miravo ole aavekenle weera erettaawe elamihiwe. Waari weera Yehova aapaka miiriira ni omulamiha, Satana amweera weera mmriavo ole oovirelela omukokhorela Yehova mwaha wa olamihiwa. (Yobi 1:9-11; 2:4) Opwaha mwa yeeyo, Yehova oolaihera weera muhoolo owo onoorowa omaliha iretta sootheene. (Yes. 33:24; Apok. 21:3, 4) Mpaka nihiku nno ophiya, nihiweherereke olamiha mwa miiriira. Nto munna owo waamutthuneya evekelaka Yehova ikuru ni murettele wa mmuupuweloni weera awere ovirelela oweherera ni omukokhorela Yehova moororomeleya nnaamweera avoreiwaka. — Nsal. 29:11.
14. Eheeni muxuttenraanyu ni ntakihero na Janice?
14 Munnamuupuwelela Janice, yoowo amuvekenle Yehova avare oBetheli? Sivinreene iyaakha 5 aaweha moota Yehova aakhulaawe nivekelo nawe. Owo ohimme ha: “Mpuwa mwa iyaakha iya, Yehova ookixuttiha ni ookikhavihera okhala mukristu ooreera. Mene miyo waatthuneya omuroromela ni kannatthuneya wiilipihera opaka yoosomaka ya omeekha. Opwaha mwa yeeyo, miyo kannatthuneya oxuttera weera ohakalala waka khohiyono mwaha wa nipuro kimmuvarelaka Yehova.” Noovira etempu Janice ni aiyawe yaawonpwa weera yavare muteko wa esirkwiitu. Kuupuwelelaka itthu sa muttuli, Janice onnamaliha eeraka: “Yehova ohaakhula mavekelo aka, nnaamweera ahaakhunle wa moota kaawehereraka. Kaapisa woonelela weera waakhula wa Yehova waari yoovaha yootepa oreera wa miyo ni miyo kinnamuxukurela vantxipale mwaha wookhalano eparakha nsivelo ni oreera murima wa Yehova.
Wakhala weera Yehova khonaakhula mavekelo anyu, munoonela hayi ovekela itthu ikina? (Nwehe eparagrafu 15) f
15. Mwaha wa heeni ikwaha ikina oraaya wooreera wunnuwiha mavekelo ahu? (Nwehe efootu.)
15 Nikoho nanararu naarowa okhala ha: ‘Neereke miyo kintthuneya ovekelaka itthu ikina?’ Nnaamweera oreene wooreera ohimaka mmavekeloni paahi ele ninhaawelaahu, apaale hiyo pooti woonelelaka weera etthu Yehova ontthunaawe wa hiyo ori ohihimahimama itthu sintxipale emaara nimpakaahu mavekelo ahu. Nwehe ntakihero na murukora ole nttiye aavekela woohima sa Exikola ya Anamalaleera a Omwene. Owo aatthuna orowa exikola eyo weera akhavihere mapuro oothowa anamalaleera. Mene nnaamweera avekelakaweera awonpwe exikola eyo, owo pooti onvekela Yehova weera awehe moota mukina woowantxerera onvarela wawe Yehova. (Mit. 16:9, 10) Ni owo ampakavo etthu moovarihana ni mavekelo awe omukohaka mutokweene a wakhala weera wookhala muloko wookhuvela ontthuneya mapiyoneiro. Naari aamulepa ekarta arohaka oBetheli akohaka wakhala weera wookhala nipuru ontthuneya anamalaleera. e
16. Nroromeleke eheeni?
16 Ntoko noonalaahu, Yehova onoorowa waakhula mavekelo ahu mooreerela ni mwa exariya. (Nsal. 4:3; Yes. 30:18) Mwa ikwaha ikina pooti ohaakhuliwa mavekelo ahu ntoko naatthunelaahu. Mene nto Yehova khonrowa osepa mavekelo ahu mwaha wooweera owo onnanisivela ni khonrowa onihiya. (Nsal. 9:10) Nto nvirelele ‘omuroromela’ mmuleelaka itthu sootheene siri va murimani vanyu moorweela mwa nivekelo. — Nsal. 62:8.
ETXIPO 43 Nivekelo Noomuxukhurela Muluku
a Yoosoma ela enoorowa onikhavihera ororomela weera Yehova onnaakhula mavekelo ahu moorerela ni mwa exariya.
b Masina makina aatxentxiwa.
c Nwehe mwaha “Neereke nyuwo munnaroromela moota Yehova ompakaawe itthu?” va Nwehereri a Fevereiro a 2022 eparag. 3-6.
d Weera musuwele sintxipale woohima sa moota Yehova onnikhaviheraawe ovilela maxupo, moonele eviidiyu eneera Mavekelo annanikhavihera ovilela maxupo, va jw.org.
e Weera mphwanye soohimmwa wa moota woowiivaherera weera mwakhavihera muttetthe wa eFiliyaale anyu, munwehe liivuru Mutthenkeso Onipaka Otthuna wa Yehova, ekap. 10, eparag. 6-9.
f OTAPHULELA WA EFOOTU: Asirokora eeli ennavekela ehinaaye opriyenxeri epetisao ya Exikola ya Anamalaleera a Omwene. Muhoolo mwaya mmoha a yaawo ennawonpwa. Ohiya onyoonyiwa, murokora ole ahaawopiwe, owo onnapaka nivekelo wa Yehova avekelaka weera amoonihere itthu ikina seiyo sinkela waatxeerera muteko awe wa Yehova. Nto owo onnalepa ekaarta arumihaka oBetheli weera avareke muteko mapuro oothowa anamalaleera.
