1-2. a) Itthu xeeni Makristau oohithela aahiiso oohitheliwa anireerela aya wuupuwela ahinatthi opacerya omwaavya? b) ‘Onamorari’ onitaphulela exeeni? (Nwehe “Moolumo Ootthokiheriwa”.)

 NIIREKE munniphavela othela aahiiso otheliwa? Nnaamwi ekasamento ehikhanle maphattuwelo a ohakalala, anna ni arokora a iyaakha soovirikana annikhalana palano oophavela othela aahiiso otheliwa. Nto muhinatthi omwaavya, muhaana okhalana waataana wooloka ni Yehova, wiivarerya ni osuwela akhala wiira munoowerya omukhapelelaka mwa inamuna sootheene. a (1 aKor. 7:36) Akhala wiira munoopaka eyo, munoowerya omuthanla mwa miruku ole munrowa anyu othelana.

² Okhala wene, khahiyo ti vookhweya omphwanya munna wala murokora orina mikhalelo sooloka wiira muthelane. (Mir. 31:10) Hata mumphwanyaka munna aahiiso murokora muniphavela anyu omusuwela saana, pooti ohikhala vookhweya opacerya onamorari. b Mwaha ola, nnoothokorerya iponto sinrowa waakhaliherya Makristau oohithela wala oohitheliwa, moota womphwanya munna aahiiso murokora orina mikhalelo sooloka ni moota woopaceriha onamorari. Nave, nnimwiixutta moota atthu akina a mmulokoni, anrowa aya waakhaliherya anna ni arokora aniphavela othela wala otheliwa.

 MOOTA WOMPHWANYA MUNNA WALA MUROKORA ORINA MIKHALELO SOOLOKA

3. Itthu xeeni mukristau oohithela wala oohitheliwa onireerela awe wuupuwelela okathi onimphavelasa awe oothelana?

³ Akhala wiira muniphavela othela aahiiso otheliwa, muhinatthi opacerya onamorari, ti vooloka osuwela akhala wiira ookhalana mikhalelo muniphavela anyu. Mwaahiire siiso, pooti okhootta othelana ni mutthu orina mikhalelo sooloka, masi mmweemererya ohirina mikhalelo sooloka. Ohimya ekeekhai, mutthu munireerela anyu othelana ohaana okhala mukristau oopatisiwa. (1 aKor. 7:39) Masi eyo khentaphulela wiira khula mukristau opatisiwe, ookhalana mikhalelo sooloka wiira muthelane. Mwiikoheke so: ‘Soolukama xeeni kirina aka? Mikhalelo xeeni kiniphavela aka wiira okhalane ole kiniphavela aka othelana? Kinaathokorerya sai atthu akina?’

4. Okathi muninvekela anyu Yehova voohimya sa ole munrowa anyu othelana, itthu xeeni munireerela anyu ohela muhina?

⁴ Akhala wiira muniphavela othela aahiiso otheliwa, moohaanyiherya monvekela Yehova voohimya sa mwaha owo. (aFil. 4:6) Ekeekhai wiira Yehova khonimuthanlela mutthu ole onrowa awe othelana. Masi onookhaliherya wiimananiha wanyu ni moonelo anyu wiira mumphwanye ole munireerela anyu othelana, akhala wiira khamunihiya omuleela yoophavela anyu ni moonelo anyu. (Esal. 62:8) Munvekeleke Yehova wiira oovaheeni ankhili ni opixa murima. (Yak. 1:5) John, c munna oohithela onikhala wEstados Unidos, onnitthokiherya itthu onihela awe muhina vaavo onipaka awe mavekelo. Owo onihimya so: “Kinnimuleela Yehova mikhalelo kiniphavela aka wiira okhalane ole kinrowa aka othelana. Kinninvekela wiira okikhaliherye omphwanya murokora orina mikhalelo sooloka. Nave kinninvekela wiira okikhaliherye okhalana mikhalelo sinrowa okikhaliherya okhala namaiyawe ooloka”. Tanya Murokora onikhala oSri Lanca, onihimya so: “Okathi kinnimphavelaka munna wiira okithele, kinninvekela  Yehova wiira okikhaliherye okhalana waamini, moonelo wooloka ni okhala oohakalala”. Akhala wiira mooviriha okathi munceene mumphavelasaka munna aahiiso murokora wiira muthelane, muhihiye, maana Yehova onnileiherya wiira onimookhaliheryani, onimoovahani ophenta ni onnithokorerya itthu munipirisari anyu. — Esal. 55:22.

5. Okathi xeeni Makristau oohithela aahiiso oohitheliwa, anrowa aya okhalana eparakha ya omusuwela mutthu onimphenta Yehova? (1 aKorinto 15:58) (Nwehe efootu.)

⁵ Biibiliya onnintumererya wiira nihaana okhalana ‘muteko munceene nnaavarela ahu Apwiya’. (Mmusome 1 aKorinto 15:58.) Akhala wiira munniluttuweliwa ovara miteko sa Yehova ni oviriha okathi muri ene ni anna ni arokora oovirikana, ohiya paahi okhalana apatthani anrowa woolipihani, masi-tho, munookhalana eparakha ya waasuwela anna akina oohithela ni oohitheliwa, yaawo aniluttuweliwa omurumeela Yehova ntoko nyuwo. Nto okathi owo munrowa anyu wiimananihaka omuhakalaliha Yehova, munoophwanya ohakalala weekeekhai.

6. Exeeni Mukristau onireerela awe wuupuwelelaka vaavo onimphavelasa awe ole onrowa awe othelana?

⁶ Mukhalaneke ephoole, wiira omphavela ole munrowa anyu othelana ehikhale etthu yoopacerya mookumini mwanyu. (aFil. 1:10) Hata muthenle ene wala mutheliwe ene aahiiso nnaari, eyo khentaphulela wiira mookhalana ohakalala weekeekhai. Masi aniphwanya ohakalala weekeekhai, taale arina waataana wooloka ni Yehova. (Math. 5:3) Nave ale ahithenle aahiiso ahitheliwe, aakhalana eparakha ya wuncererya muteko anninvarela aya Muluku. (1 aKor. 7:32, 33) Nto murumeeleke saana okathi owo. Jessica, murokora yoowo onikhala wEstados Unidos otheliwe orina ene iyaakha sinivikana 30, onihimya so: “Kihinatthi otheliwa, kaaniluttuweliwa ni muteko woolaleerya nto eyo yaahikikhaliherya okhala oohakalala kilipelelaka otheliwa”.

NVIRIHEKE OKATHI MUSUWELAKA ITTHU SINIMUSIVELA MUTTHU OWO

7. Xeeni vari aya vooloka omusuwela saana ole munrowa anyu othelana, muhinatthi omuleela etthu munuupuwela anyu? (Miruku 13:16)

⁷ Ankhi vakhala wiira ookhala munimoona anyu oreerela othelana? Niireke moowakuveya muhaana omuleela etthu munuupuwela anyu ni yena? Biibiliya onihimya wiira mutthu a ankhili khonipaka etthu ohuupuwenle. (Musome Miruku 13:16.) Nyuwo munimooniherya okhalana ankhili, mwiivahaka okathi wiira musuwele moota onipaka awe itthu, onaathokorerya awe anna ni arokora ni amusi awe, masi muhinatthi omuleela ele munuupuwela anyu. Munna mmosa oniitthaniwa Aschwin, a elapo ya Holanda onihimya so: “Moonelo wa ophavela ohimya etthu nnuupuwela ahu, pooti orwa moowaakuveya masi-tho pooti omala-mala moohipisa. Nyuwo khimwaarowa ophavelasa onamorari ni mutthu, mwaha wookhummwa murima aahiiso osiveliwa ohinrowa okelela ohoolo”. Ohiya-vo, vaavo munrowa anyu ovirihaka okathi mmusuwelaka mutthu owo, munimoona wiira pooti ohikhala oophwanelela wiira muthelane.

8. Munna oohithela aahiiso murokora oohitheliwa, onrowa omusuwela sai mwa miruku ole omusivenle? (Nwehe efootu.)

⁸ Munrowa owerya sai omusuwela saana ole oosivenleni masi yena moohisuwela? Munoowerya osuwela waataana orina awe ni Yehova, mikhalelo sawe ni mweettelo awe, okathi wa mithukumano sa mmulokoni aahiiso mithukumano sikina. Mwa ntakiheryo, munoosuwela tani ari apatthani awe, ni itthu xeeni sinilavula awe. (Luka 6:45) Niireke soolukama sawe sinoolikana ni sawinyu? Nyuwo pooti waakoha axitokweene a muloko awe aahiiso anna ni arokora akina arina waataana wooloka ni Yehova animusuwela oratteene. (Mir. 20:18) Nyuwo pooti okoha voohimya sa mikhalelo sawe ni mweettelo awe. (Rut.  2:11) Okathi munimusuwela anyu ole oosivenleni, musyakeke omunyoonyiha aahiiso omuriipiha murima. Muttittimiheke miyoonelo sawe ni muhiviriheke okathi munceene muri ene ni mutthu owo, mphavelaka osuwela itthu sootheene mpakha ommala-maliha.

9. Exeeni munireerela anyu okupali muhinatthi omuleela ele munuupuwela anyu?

⁹ Okathi xeeni mukhanle anyu ooviriha mmusuwelaka ole oosivenleni, masi muhinatthi omuleela ele munuupuwela anyu? Vakhala wiira munimwaakuvela omuleela ele munuupuwela anyu, owo pooti wuupuwelaka wiira munipaka soothanla muhuupuwenle saana. (Mir. 29:20) Masi akhala wiira mutthu munimphavela anyu onoosuwela wiira moosiveliwa ni yena muhinatthi omuleela, weeso owo pooti wuupuwelaka wiira munnitepa woovelela opaka soothanla. (Mus. 11:4) Muhiliyale wiira muhinatthi omuleela ele munuupuwela anyu, khivanireerela okupali wiira munrowa othelana nuuwo. Masi mukupaliki wiira muri oolikana ene wiira mmuhaavye oothelana nave owo onoosivelani pooti okhala oophwanelela.

10. Exeeni mukhanle anyu oopaka mwasuwela wiira mutthu mukina onnisiveliwa ni nyuwo, masi muhisiveliwaka ni yena?

¹⁰ Exeeni mukhanle anyu oopaka mwasuwela wiira mutthu mukina onisiveliwa ni nyuwo? Masi vakhala wiira nyuwo khamunisiveliwa ni mutthu owo, mmooniheryeke ni miteko sanyu aahiiso malavulelo anyu. Vaarowa okhala voohiloka opaka itthu sinimooniherya wiira munnisiveliwa masi variki muhiphavelaka. — 1 aKor. 10:24; aEef. 4:25.

11. Ilapo sikina atthu anihaaveriwa aya ole anrowa aya othelana, itthu xeeni ale animuhaavya anireerela aya wuupuwelela?

¹¹ Ilapo sikina, anamuyari aahiiso amusi akina, pooti omuthanlelaka mutthu okhanle awe oothelana mmusi aya ohithenle aahiiso ohitheliwe. Nave ilapo sikina, amusi aahiiso apatthani tanimphavelasa mutthu onrowa othelana ni mpatthani aya aahiiso mmusi aya, nuumala-vo, enahaavya opuro wiira akumane ni asuwelane. Nto mwavekeliwa wiira mukihaaverye mutthu oothelana, nweheke akhala wiira munna aahiiso murokora owo arinasa soophavela simosa-ru. Nave mwamphwanya vale, mwiimananiheke osuwela omutthu awe, mikhalelo sawe ni otepexa wene waataana wawe ni Yehova. Okhalana waataana wooloka ni Yehova, wookhalana efaita ovikana musurukhu, osoma aahiiso muteko onivara awe. Muhiliyale wiira, awosa tarina etireitu ya opaka soothanla akhala wiira anoothelana wala nnaari. — aGal. 6:5.

 MOOTA MUKHANLE ANYU OOPACERIHA ONAMORARI

12. Akhala wiira moosiveliwa ni munna wala murokora, munrowa owerya sai omuleela wiira muniphavela onamorari ni yena?

¹² Munrowa omuleela sai munna wala murokora wiira muniphavela onamorariki ni yena? d Nyuwo pooti ophavelasa inamuna sa ovaanela ni mutthu owo mmurumeelaka telefoni, aahiiso okhala opuro atthu akina anrowa aya oweryaka woowehani. Mmuleeleke mooreerela murima wiira munnisiveliwa ni yena ni muniphavela omusuwela saana. (1 aKor. 14:9) Vaaweryaneyaka, munvahe okathi wiira uupuwele saana moota okhanle awe oowaakhula. (Mir. 15:28) Masi akhala wiira onimooleelani wiira kholikanne para onamorari, muttittimiheke moonelo awe.

13. Exeeni mukhanle anyu oopaka, akhala wiira mutthu mukina onnihimya wiira oniphavela onamorariki ni nyuwo? (aKolosi 4:6)

¹³ Ankhi vakhala wiira mutthu ohooleelani wiira onnisiveliwa ni oniphavela onamorariki ni nyuwo? Owo aahaana olipa murima wiira owerye olavula ni nyuwo, nto muhaana omureerela murima ni omuttittimiha. (Mmusome aKolosi 4:6.) Vakhala wiira munipirisari okathi wiira muupuwelele vakhala wiira munimweemererya onamorari ni yena, mmuleele. Masi vaaweryaneyaka muhipise omwaakhula. (Mir. 13:12) Akhala wiira khamuniphavela onamorari ni yena, mmuleeleke mwa nttittimiho ni mooreerela murima. Nwehe moota munna mmosa oniitthaniwa Hans onikhala wÁustria, aamwankhunle awe murokora aahimmye wiira aanisiveliwa ni yena. Owo ohimmye so: “Miyo kaahimuleela yoothanla aka mwa nttittimiho ni moomureerela murima. Kahipaka eyo moowaakuveya, okhala wiira nkaaphavela omulipeleliha ethiru. Nto kaahipacerya ovaha ephoole ni enamuna kaalavulaka ni yena ni moota kaamuthokorerya aka”. Masi akhala wiira munniphavela onamorari ni mutthu owo, mmuleeleke moonelo anyu ni moota muniphavela anyu wiira munamorariki ni yena. Muupuwelo anyu pooti okhala woovirikana ni muupuwelo wa ole munimphavela anyu, moovarihana ni makhalelo a elapo awe aahiiso itthu sikina sinimwiiriha.

ATTHU AKINA ANROWA WAAKHALIHERYA SAI MAKRISTAU OOHITHELA NI OOHITHELIWA?

14. Ninrowa waakhaliherya sai ni moolumo ahu makristau oohithela wala oohitheliwa?

¹⁴ Ootheene ahu ninrowa waakhaliherya sai Makristau aniphavela othela aahiiso otheliwa? Enamuna emosa nikhanle ahu oopaka eyo, ori ovaha ephoole ni moolumo ahu. (aEef. 4:29) Hiyo pooti wiikoha so: ‘Kiireke kinnithweela moohiloka ni ale aniphavela othela aahiiso otheliwa? Kanweha munna oohithela ni murokora  oohitheliwa avaanelaka, kiireke kihaana wuupuwela wiira anoosivelana mukina ni mukhwawe?’ (1 Tim. 5:13) Nihipake aahiiso olavula etthu, ekhanle oowiiriha makristau oohithela wala oohitheliwa, wuupuwelaka wiira yookhala etthu yoohiloka eniwiiriha ohithela aahiiso ohitheliwa. Hans yoowo nimulavunle ahu ittima sivinre, onihimya so: “Anna ni arokora akina annikikoha wiira ‘xeeni muhinithela anyu? Nyuwo khahiyo mwa mwaana, muhiinuwa’. Olavula mwa enamuna ela, enniwiiriha makristau oohithela wala oohitheliwa okhalana muupuwelo woohiloka ni ophavela othela wala otheliwa mwaha wookhanyereriwa”. Etthu yooloka nikhanle ahu oopaka, ori ohaavya okathi wiira naalipihe anna ni arokora awo! — 1 aTes. 5:11.

15. a) Exeeni nikhanle ahu oopaka nihinatthi omukhaliherya munna aahiiso murokora onimphavela mutthu oothelana? (aRoma 15:2) (Nwehe efootu.) b) Itthu xeeni mwiixuntte anyu ni eviidiyu?

¹⁵ Exeeni nikhanle ahu oopaka, okathi nimmoona ahu munna nnuupuwela wiira onookhumela saana athelana ni murokora nimmoona ahu, variki awo ahimpake palano? Biibiliya onnintumererya wiira niphaveleke mureerelo wa atthu akina. (Mmusome aRoma 15:2.) Atthu anceene oohithela aahiiso oohitheliwa, khonaasivela yaaleeliwaka aahiiso yaaruuheliwaka mutthu oothelana. Nto nihaana ottittimiha moonelo aya. (2 aTes. 3:11) Atthu akina anniphavela okhaliheriwa, masi hiyo khanikhanle oopaka eyo awo ahinivekenle. e (Mir. 3:27) Nave atthu akina anniphavela osuwelihiwa ole anrowa aya othelana masi mwa enamuna yooreerela. Lydia murokora yoowo oohitheliwa onikhala wAlemanhã, ohimmye so: “Nyuwo pooti waalattula anna ni arokora anceene wiira mutthekule omuhela muhina munna oohithela ni murokora oohitheliwa wiira asuwelane okathi owo. Nuumala-vo mwaahiyeke axineene apakeke soothanla”.

16. Exeeni Makristau oohithela aahiiso oohitheliwa anireerela aya wuupuwelelaka?

¹⁶ Ootheene ahu nikhale oothela wala ootheliwa aahiiso nnaari, nnoowerya ophwanya ohakalala mweekumini mwahu! (Esal. 128:1) Akhala wiira munniphavela othela wala otheliwa masi nlelo khamumphwannye, muhihiye oluttuweliwa ovara muteko wa Yehova. Murokora mmosa onikhala oMacao oniitthaniwa Sin Yi, onihimya so: “Mwalikanyiha okathi munrowa anyu okhalaka ni iyanyu aahiiso mwaarinyu mParayiisu, munimoona wiira okhala muhithenle nenna-va aahiiso muhitheliwe khahiyo etthu. Muttotteleke mureerelo okathi ola wootheene muniviriha anyu”. Ankhi vakhala wiira momphwanya munna aahiiso murokora ni moopacerya onamorari? Mwaha onittharelana, nnoothokorerya moota mukhanle anyu oowiiriha onamorari wanyu okhumela saana ni oninvuwiha Yehova.