1. Exeeni niixuntte ahu muthukumano wa mwaakha wa 2023?

 MUTHUKUMANO wa mwaakha wa 2023, a nootthokiheriwa voohimya sa sookupali sahu nave nihiiwa soohimmwa soovara murima voohimya sa muteko ahu woolaleerya. Nave, mwaha ovinre nihiixutta wiira atthu akina anookhalana eparakha ya okhala arumeyi a Yehova, nuumala Babilonia Muulupale opwetexiwa. Nave-tho nihiixutta wiira okhuma mweeri wa Novembro a 2023, anamalaleerya a Omwene khanrowa opirisariki ovekeliwa iwoora avirinhe aya avaraka muteko woolaleerya. Niireke eyo entaphulela wiira muteko ahu woolaleerya khorina efaita aahiiso nihiluttuweliweke ovara? Khahiyo ti yeeyo!

2. Xeeni khula nihiku ninvira muteko ahu woolaleerya onootepa aya okhala wa faita? (Marko 13:10)

² Khula nihiku ninvira, muteko ahu woolaleerya onnitepa okhalana efaita. Mwaha wa xeeni? Mwaha woowi nihalanne okathi vakhaani paahi wiira niphiye wanikisa. Nrowe nthokorerye itthu Yesu aalavunle awe voohimya sa muteko woolaleerya mahiku ala ookiserya. (Mmusome Marko 13:10.) Moovarihana ni ele Matheyo aalempe awe, Yesu aahimmye wiira ihapari sooreera sa Omwene sinoolaleiwa elapo yootheene, ohinatthi ‘olumwenku ola omala’. (Math. 24:14) Eyo entaphulela wiira olumwenku ola wootakhala wa Satana, onoopwetexiwa moomalela. Itthu sinrowa wiiraneya moohipisa, Yehova tonisuwela “nihiku nene ni ewoora ene” sinrowa aya wiiraneya. (Math. 24:36; 25:13; Mit. 1:7) Vaavo mahiku anivira aya, hiyo ninnitepa waattamela okathi owo. (aRom. 13:11) Nto nihihiye olaleerya, mpakha wanikisa wa olumwenku ola wootakhala ophiya.

3. Exeeni enniiriha olaleerya?

 ³ Vaavo ninlavula ahu sa muteko ahu woolaleerya, nookhala nikoho ootheene ahu ninreerela ahu wuupuwelela. Nikoho nene tinla: Xeeni ninlaleya ahu ihapari sooreera? Mwaha wa niphento. Okathi ninvara ahu muteko woolaleerya, ninnooniherya wiira ninniphenta ihapari sooreera, ninnaaphenta atthu nave etthu yootepa okhalana efaita, ninnooniherya wiira ninnimphenta Yehova ni nsina nawe. Vano nrowe nthokorerye moota nnooniherya ahu iponto iyo.

NINNILALEERYA MWAHA WOOPHENTA IHAPARI SOOREERA

4. Ninkhala sai okathi nniiwa ahu ihapari soohakalaliha?

⁴ Niireke munnuupuwela moota moonenle anyu ekwaha yoopacerya, nuumala wiiwa wiira mmusi anyu ooyara aahiiso munoopacerya ovara muteko yoowo mwaaphavelexa anyu? Moohaanyiherya, nyuwo mwaahihakalala, munaphavela waaleela amusi anyu akina aahiiso apatthani anyu ihapari iyo soohakalaliha. Niireke etthu emosa-ru yaahiiraneya, vaavo mwaiwale anyu ihapari sootepa ohakalaliha, eyo piiyo, ihapari sooreera sa Omwene wa Muluku?

5. Moonenle sai ekwaha yoopacerya mwiixuntte anyu ikeekhai sa mbiibiliyani? (Nwehe ifootu.)

⁵ Nkuupuwelani moota moonenle anyu ekwaha yoopacerya mwiixuntte anyu ikeekhai sa mbiibiliyani. Nyuwo mwaahiixutta wiira Tiithi anyu a wiirimu onnoophentani nave oniphavela wiira mwiireleke mpantta emusi awe enimukokhorela. Nave owo ooleiherya omaliha iretta ni ohaawa. Nave mookhalana nlipelelo na waaweha amusi anyu mwaaphenta anyu akhwiiye, atthikelaka okhala akumi elapo esya ni sooleiherya sikina. (Mar. 10:29, 30; Yoh. 5:28, 29; aRom. 8:38, 39; Wiis. 21:3, 4) Tthiri ikeekhai iyo sinnihakalaliha murima anyu. (Luka 24:32) Mwaha woophenta ikeekhai iyo mwiixuntte anyu, yaahiwiirihani ophavela waaleela atthu akina! — Munwehe-tho Yeremiya 20:9.

6. Yoowiiraneya ya Ernest ni Rose, eniwiixuttihani exeeni?

⁶ Nrowe nthokorerye yoowiiraneya ya munna  oniitthaniwa Ernest, b yoowo apapawe akhwiiye yena orina ene iyaakha 10. Owo onihimya so: “Miyo kaaniikoha so: ‘Kiireke apaapa ari wiirimu? Aahiiso ahookhwa moomalela?’ Miyo kaanaakhalela nrima anamwane akina, yaawo apapaya yaari akumi”. Ernest ikwaha sinceene aanirowa omahiye, onakhoroma opuro yaavithiwe apapawe ni onavekela so: “Xontte Muluku, kiniphavela osuwela opuro ari aya apaapa”. Nuuvira iyaakha 17 paapa awe okhwiiye ene, Ernest aahilaleeriwa ni Anamoona a Yehova ni aaheemererya osomihiwa Biibiliya. Owo aahitikinihiwa nuumala osuwela wiira alipa-ookhwa khanisuwela etthu ni anoorupa mookhwaani. Nave Biibiliya onnileiherya wiira muhoolo onookhala ohihimuxiwa. (Mus. 9:5, 10; Mit. 24:15) Moohakalaliha, owo aahiphwanya waakhuliwa wa makoho aarina awe mwa iyaakha sinceene! Ernest aahihakalala vanceene ni ikeekhai iixuntte awe mbiibiliyani. Mwaarawe, oniitthaniwa Rose, aahipacerya omusoma Biibiliya vamosa ni yena nave mwaha wa niphento aanaaleela atthu akina muhupi wa Omwene. Awo yaahipatisiwa mwaakha wa 1978. Anniluttuweliwa waaleela amusi aya, apatthani ni atthu akina voohimya sa ikeekhai sa mbiibiliyani soovara murima yiixuntte aya. Etthu yoohakalaliha, Ernest ni Rose, ahaakhaliherya atthu 70 omusuwela Yehova ni opatisiwa.

7. Exeeni eniiraneya vaavo nimphenta ahu ikeekhai sa mbiibiliyani? (Luka 6:45)

⁷ Vaavo nimphenta ahu ikeekhai niixuntte ahu mbiibiliyani, eyo enniniiriha ophavela waaleela atthu akina. (Mmusome Luka 6:45.) Hiyo nnoonela ntoko yoonela aya awiixutti a Yesu a okathi woopacerya, yaawo yaahimmye so: “Khaninwerya ohiya olaleya itthu noonale ahu ni niiwale ahu”. (Mit. 4:20) Ophenta wahu ekeekhai, onniniiriha ophavela waaleela atthu anceene, vaaweryaneyaka.

NINNILALEERYA MWAHA WOOWAAPHENTA ATTHU

8. Exeeni enniiriha waaleela atthu akina ihapari sooreera? (Nwehe ekaaxa eni: “ Waaphenta Atthu — Onimookhaliheryani Waapaka Awiixutti”.) (Nwehe efootu.)

⁸ Hiyo ninnaaphenta atthu ntoko Yehova ni Yesu. (Mir. 8:31; Yoh. 3:16) Nave ninniwoonela othunku ale ‘ahinimusuwela Muluku’ ni ale ‘ahirina nlipelelo’. (aEef. 2:12) Awo ankhala ntoko anoosama mmaasini mwaha wa mixankiho sa okumi. Masi hiyo nookhalana ikaruma sinoopola aahiiso anipirisari aya, eyo piiyo, ihapari sooreera sa Omwene wa Muluku. Mwaha wa waaphenta wahu ni owoonela wahu othunku, mikhalelo iyo sinniniiriha wiimananiha opaka ele eniwerya ahu, wiira naalaleerye ihapari sooreera. Vaavo awo aniiwa aya aahiiso aniixutta aya ikeekhai iyo, sinnaavaha nlipelelo,  sinnaakhaliherya okhala oohakalala nenna-va, nave sinnaavaha eparakha ya okhalana “okumi weekeekhai”, eyo piiyo, okumi woohimala elapo esya ya Muluku. — 1 Tim. 6:19.

9. Itthu xeeni nnaaleela ahu atthu akina sinrowa wiiraneya muhoolo? (Ezekiyeli 33:7, 8)

⁹ Nave mwaha wa waaphenta wahu atthu akina, onniniiriha waaleela wiira olumwenku ola wootakhala, ohanle ophiya wanikisa. (Mmusome Ezekiyeli 33:7, 8.) Hiyo ninniwoonela othunku atthu ootheene, waahela muhina amusi ahu yaale ahinimurumeela Yehova. Anamunceene, anikhala ahisuwelaka wiira “anookhala maxakha maalupale, ahinakhumelele okhuma woopaceryani wa olumwenku mpakha vano, nnakhala ahinrowa-tho okhumelela”. (Math. 24:21) Hiyo nimphavela wiira atthu awo asuwele itthu sinrowa okhumelela okathi wa ophukela, niire so, asuwele wiira itiini soowootha sinoomala-malihiwa nave olumwenku ola wootakhala wa Satana onoopwetexiwa ni Armagedoni. (Wiis. 16:14, 16; 17:16, 17; 19:11, 19, 20) Ninnivekela wiira vaweryaneya yiiwe ele ninhimya ahu ni athanle omurumeela Yehova hoothe ni hiyo. Masi exeeni enrowa owiiraneela ale ahinniwiriyana nenna-va, ohela muhina amusi ahu?

10. Xeeni vari aya va faita, waaleela atthu akina itthu sinrowa wiiraneya moohipisa?

¹⁰ Sintoko otthokihenrye aya mwaha ovinre, pooti wiira Yehova onoorowa owoopola atthu yaale anrowa orukunuxa murima, okathi anrowa aya onweha Babilonia Muulupale opwetexiwaka. Okhala wiira ti siiso, ti wa faita wiimananiha waalaleerya. Nkuupuwelani ela: Etthu nnaaleela ahu awo olelo-va, pooti waakhaliherya wuupuwelela muhoolo. (Munwehe-tho Ezekiyeli 33:33.) Woonasa wene, awo pooti wuupuwelelaka muhupi naalalenrye ahu ni owiiriheke opacerya omurumeela Yehova hoothe ni hiyo ohinatthi okathi omala. Ntoko kwarta a oFilipi, yoowo aaturunke muupuwelo awe nuumala oweha ekhumelelaka “etetere yuulupale”, waanyiheryasa ale ahinniwiriyana olelo-va, pooti oturuka muupuwelo aya muhoolo nuumala onweha Babilonia Muulupale opwetexiwaka. — Mit. 16:25-34.

NINNILALEERYA MWAHA WA OMPHENTA YEHOVA NI NSINA NAWE

11. Nimmooniherya sai Yehova owerya wahu, omuttittimiha ni onvuwiha? (Wiisuupulula 4:11) (Nwehe ifootu.)

¹¹ Etthu yuulupale enniiriha olaleya ihapari sooreera, mwaha woowi ninnimphenta Yehova ni nsina nawe noowaarya. Ninnithokorerya muteko ahu woolaleerya, ntoko enamuna eninvuwiha Yehova, yoowo onimphenta ahu. (Mmusome Wiisuupulula 4:11.) Ninnikupali ni murima ahu wootheene moolumo ala ani: “Yehova, Muluku ahu oowerya, nyuwo munniphwanelela waakhela ovuwa ni nttittimiho” na arumeyi anyu oororomeleya. Hiyo  ninnooniherya wiira ninninvuwiha ni omuttittimiha, vaavo nnaaleela ahu atthu akina itthu sinooniherya wiira owo ‘topattunxe itthu sootheene’ nave ninkhala mwaha woowi topattunxe okumi ahu. Ninnimooniherya owerya wahu, vaavo ninrumeela ahu okathi ahu, ikuru sahu ni mireerelo sahu, wiira nivare muteko woolaleerya moovarihana ni makhalelo ahu. (Math. 6:33; Luka 13:24; aKol. 3:23) Ohimya mookwasa, hiyo onisivela vanceene waaleela atthu akina voohimya sa Muluku yoowo nnimphenta ahu. Nave ninnihakalala waaleela atthu akina voohimya sa nsina nawe ni malamulo awe. Mwaha wa xeeni?

12. Nintteeliha sai nsina na Yehova okathi ninlaleerya ahu?

¹² Omphenta wahu Yehova onniniiriha otteeliha nsina nawe. (Math. 6:9) Eyo enitaphulela wiira nimphavela waaleela atthu akina wiira itthu Satana olavunle awe omuhimyaka Yehova, khahiyo ti seekeekhai. (Maph. 3:1-5; Yoob. 2:4; Yoh. 8:44) Okathi ninlaleerya ahu, nihaana ophavela waaleela atthu ootheene aniphavela oniwiriyana, ti pani ori Yehova ni mikhalelo sawe. Nimphavela wiira khula mutthu osuwele mukhalelo muulupale wa Yehova wiira ophenta, ni wiira enamuna onilamulela awe ti yooloka ni yaxariya. Nave asuwele wiira moohipisa Omwene awe onoomaliha mixankiho sootheene ni onooruuha murettele ni ohakalala wa apinaatamu ootheene. (Esal. 37:10, 11, 29; 1 Yoh. 4:8) Vaavo nnaaleela ahu itthu iyo atthu akina, ninnitteeliha nsina na Yehova. Nave ninnihakalala vaavo nniimananiha ahu waakhaliherya atthu akina onisuwela ntoko Anamoona a Yehova. Exeeni enniiriha ohimya siiso?

13. Xeeni ninxukhurela ahu mwaha woowiitthaniwa okhala Anamoona a Yehova? (Yesaya 43:10-12)

¹³ Yehova oonithanla wiira nikhale ‘anamoona awe’. (Mmusome Yesaya 43:10-12.) Iyaakha vakhaani sivinre, ekarta ya Nikhuuru Noolamulela yaahimmye so: “Eparakha yuulupale khula mmosa a hiyo onireerela awe okhalana,  ori wiitthaniwa okhala Namoona a Yehova”. Masi mwaha wa xeeni? Nkuupuwelani mootheriwe ene opaka etthu yoohiloka. Vano munamphavelasa mutthu wiira owaakiheni ni aasuwelihe atthu akina wiira murimootheriwa ni wiira nyuwo mwa mutthu ooloka ni khamutonko opaka eyo. Tani mwaarowa anyu omuthanla wiira owaakiheni? Moohaanyiherya, mwaarowa omuthanla mutthu munimusuwela anyu, oororomeleya, orina mikhalelo sooloka ni okhanle ookupaliwa ni atthu akina. Mwaha woonithanla okhala Anamoona awe, Yehova onooniherya wiira onninsuwela oratteene ni onniniroromela waaleela atthu akina wiira yena paahi tori Muluku eekeekhai. Hiyo ninnixukhurela vanceene eparakha eyo ya wiihaneliwa okhala Anamoona awe nave nihaana orumeela wiira naasuwelihe atthu akina nsina nawe ni wiira itthu onihimyaniwa awe ni Satana khahiyo sa ekeekhai. Mwa enamuna eyo, ninnooniherya wiira ninkhala moovarihana ni nsina nahu, noowi Anamoona a Yehova! — Esal. 83:18; aRom. 10:13-15.

NIHIHIYE OLALEERYA MPHAKA WANIKISA

14. Itthu xeeni soohakalaliha ninlipelela ahu?

¹⁴ Ninnihakalala vanceene okathi nnuupuwela ahu itthu sinrowa wiiraneya muhoolo! Akhaliheriwaka ni Yehova, ninlipelela wiira atthu anceene yiixutte ekeekhai ahinatthi opacerya maxakha maalupale. Nave, hiyo ninnihakalala osuwela wiira hata okathi wa maxakha maalupale, ori ene okathi wooxankiha, woonasa wene atthu anceene pooti othanla okhuma olumwenku ola wa Satana ni waataana ni hiyo, wiira ninvuwiheke Yehova! — Mit. 13:48.

15-16. Exeeni nihinreerela ahu ohiya, ni mpakha silini?

¹⁵ Nilipelelaka ophiya okathi owo, nookhalana muteko munceene ninreerela ahu ovara. Nookhalana eparakha ya ovara muteko ohinrowa otthikeliwa-tho, okhanle olaleya ihapari sooreera sa Omwene wa Muluku elapo yootheene. Nave nihihiye waalopola atthu akina mwaha wa itthu sinrowa wiiraneya muhoolo. Awo ahaana osuwela wiira moohipisa makhalelo a olumwenku ola anoomala. Nto waphiya okathi wa ophukela, awo anoosuwela wiira muhupi naalaleya ahu waakhuma wa Yehova. — Ezek. 38:23.

¹⁶ Nto etthu xeeni ninreerela ahu opaka ootheene ahu? Nihihiye olaleerya mwaha wa ophenta, eyo piiyo, ophenta ihapari sooreera, waaphenta atthu ni etthu yootepexa okhalana efaita, omphenta Yehova ni nsina nawe. Tivonto, nihihiye okhalela nthiti muteko woolaleerya mpakha Yehova ohimya wiira “Vaaphiyerya!”