Azzanttiyabaa: Dungguuxatettay neeni haratuura laggetennaadaaninne etaara loˈˈo wodiya aattennaadan diggana danddayees.

 Ufayssiyabaa: Dungguuxatettay ubbatoo iita gidenna. Hegee neeni haasayanaappe kase qoppanaadan, issibaa loytta xeellanaadaaninne ezgganaadan maaddana danddayees.

 Keehi ufayssiyabaa: Dungguuxatettay laamettana danddayenna eeshsha gidenna; yaatiyo gishshawu hegee gattiyo qohuwa teqqana danddayaasa. Neeni hegaadan waata oottana danddayiyakko ha huuphe yohoy qonccissana.

•  Nena yashshiyabay aybakko shaakka era

•  Oottanabata

•  Ne laggeti woygiyonaa?

 Neeni dungguuxa gidikko asaa somˈˈuwa xeellaydda haasayanawu keehi unˈˈettana danddayaasa. Hegee neeni xuma kifiliyan nerkka deˈiyabadan neeyyo siyettanaadan oottana danddayees. Qassi hegee nena yashshiyaba gidana danddayees. Shin nena yashshiyabay aybakko shaakka eranawu baaxetikko hegawu yayyana koshshennaagaa akeekana danddayaasa. Heezzu leemisota beˈa.

•   Yashshaa #1: “Woyga haasayanaakko erikke.”

   Tumubaa: Asay neeni haasayidobaappe aaruwan ne ufayssidobaa hassayees. Harati haasayiyobaa wozanappe ezggiyo hiillaa meezetiyogan yashshaa xoonana danddayaasa.

   Qoppana bessiyabaa: Neessi ay mala laggee deˈanaadan koyay? Ne haasayiyobaa loytti ezggiya ureeyye, haasayaa dariya uree?

•   Yashshaa #2: “Taani haasayaa darikko asay tanan ufayttenna.”

   Tumubaa: Neeni dungguuxa gidin aggin asay nebaa issibaa qoppiyogaa aggenna. Neeni ne eeshshaa asay eranaadan oottikko, asay nebaa loˈˈobaa qoppana danddayees; qassi hegee neeni dungguuxatettaa xoonanaadan maaddana.

   Qoppana bessiyabaa: Ubba asay nebaa iitabaa qoppiyaba neeyyo milatikko, asaa bolli coo pirddaydda deˈiyay nena gidanddii?

•   Yashshaa #3: “Balabaa haasayada yeellatanaappe coˈˈu giyogee loˈˈo.”

   Tumubaa: Issi issitoo, ubba asaykka balabaa haasayana danddayees. Hegaa mala balata neeni polo asa gidennaagaa haratussi bessiyo loˈˈo injjedan xeelliyogan yashshaa xoonana danddayaasa.

   Qoppana bessiyabaa: Banttana polo asadan xeellenna asatuura laggetiyogee ufayssennee?

 Hagaa eray? Issi issi asati daro kiitaa xaafidi asawu kiittiyo gishshawu dungguuxa gidokko giidi qoppoosona. Shin tumu laggetettaa metootennan medhdhanawu maaddiyagee asaara gayttidi haasayiyogaa. Asaa eeshshaabaa xannaˈiyanne zammaana tekinolojiya eranchchay Sheeri Terkili hagaadan giis: “Issoy issuwa somˈˈuwa xeelliyogeenne issoy issuwa cenggurssaa siyiyogee issoy issuwara loytti dabbotanawu maaddees.” a

•   Nena haratuura geeddarssoppa. Neeni xexxelana koshshenna. Shin, loˈˈo laggetettaa medhdhada hegan ufayttanawu ne dungguxatettaa xoonanawu halchchana danddayaasa.

   “Asaara haasayiyobay keehi adussa gidana bessiyabadan, qassi he haasayaa neeni kaalettiyabadan qoppana koshshenna. Ooratta urawu nena eretissikko woy amarida oyshata A oychchikko hegee gidees.”—Aliisho

   Geeshsha Maxaafaa maaraa: “SHin asai ubbai huuphiyan huuphiyan ba oosuwaa paacco; hegaappe guyyiyan, hara asaagaara giigissennan, ba huuphe ooso xalaalan ceeqettiyoobaa demmana.”—Galatiya 6:4.

•   Akeekanchcha gida. Asaara metootennan haasayiya asata loytta xeella; qassi eti haratuura waati haasayiyakko akeeka. Eti ayba hiillaa goˈettiyonaa? Eti daro goˈettenna hiillay awugee? Neeni qullanawu keehi koyiyo eta hiillay awugee?

   “Laggeta metootennan demmiya asata loytta akeekanne etappe tamaara. Issi uraara koyro gayttiyo wode eti ay oottiyakkonne woygi haasayissiyakko xeella.”—Aarona.

   Geeshsha Maxaafaa maaraa: “Biratai birataa poshiyoogaadan, asai issoi issuwaappe tamaarees.”—Leemiso 27:17.

•   Oyshata oychcha. Issibaa xeelliyagan asay ba qofaa yootiyogaa dosiyo gishshawu, oyshata oychchiyogee asaara haasayaa doommanawu loˈˈo oge. Qassi hegee asay ne bolli xeelaa wottennaadan oottees.

   “Kasetada giigettiyogee daro unˈˈettennaadan nena maaddana danddayees. Asay shiiqiyo sohuwa baanaappe kase amarida qofata woy oyshata qoppana danddayaasa; yaatikko ooratta asaara gayttiyo wode daro unˈˈettakka.”—Alano.

   Geeshsha Maxaafaa maaraa: “Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Piliphphisiyuusa 2:4.