Yelagata gakkiya, eti keehi unꞌꞌettanaadan oottiya hanotatuppe issoy eta yelidaageeti paraman shaahettiyogaa. Neeni hegaa waata genccana danddayay?

Ha huuphe yohuwan

•  Neeni oottana bessenna heezzubata

•  Neeni oottana danddayiyo heezzubata

•  Ne laggeti woygiyonaa?

 Neeni oottana bessenna heezzubata

 1. Mooroy neegaa gaada qoppoppa

 “Ta aawa giddooninne ta aayee giddon maayotettay xayidi metoy merettiyogaa doommidoy taani yelettido wodiyaana gidiyogaa issi wode ta aayyiya tawu yootaasu, yaatin, tana yelidaageetu aqo deꞌoy laalettanaadan gaaso gididay tana gaada qoppaas.”—Diyano.

 Hagaa qoppa: Nena yelidaageeti shaahettidoy ne gaasuwana gidenna. Eta naaꞌꞌa giddo deꞌiya metuwa gaasuwana. Eta metuwawu gaasoy nena gidakka, qassi hegaa giigissana danddayakka. Bantta aqo deꞌuwan merettida metuwa giigissana bessiyaageeti eta.

 2. Hanqqettada takkoppa

 “Ta aaway ta aayessi ammanettibeenna gishshawu taani keehi yiillotaas. Zaarettada an ammanettanawu daro wode koshshiis.”—Riyano.

 Hagaa qoppa: Nena yelidaageetu giddon hanidabay nena yiilloyennan woy hanqqettanaadan oottennan aggenna, qassi neeni hegaadan hanidoy gaasoy deꞌiina. Shin lancciya uluwan oyqqidi takkiyogee nena qohees. Hegee nena asatettankka qofankka qohana danddayees. Hegaa gishshassa lancciya oyqqiyogee daroto issi uri marziya bawu uyidi hara uri qohettanaadan naagiyogaa mala geetettidoy. a

 3. Ufayssiya aqo deꞌoy neessikka deꞌana danddayenna gaada qoppoppa

 “Ta aaway oottidoogaa malabaa taanikka oottana gaada yayyaas. Taani azinaa gelikko, qassi naata yelikko, tana yelidaageeti paraman shaahettanaadan oottidabaa malabaa taanikka oottana gaada yayyaas.”—Jesiko.

 Hagaa qoppa: Nena yelidaageetu aqo deꞌoy ushachchibeenna gishshawu neegeekka hegaa mala gidana deꞌees giyogaa gidenna. Ubbaa nena yelidaageeta gakkidoogaappe maaddiyabaa tamaarana danddayasa. Leemisuwawu, neeni aqo lagge oottada dooriyo urawu deꞌana bessiyo eeshshata loytta qoppana danddayasa. Nena yelidaageeti paraman shaahettidoogee, neeni loꞌꞌo azina woy machchiyo gidanawu koshshiya eeshshay neessi deꞌanaadan koyanaadankka maaddees.

 Neeni oottana danddayiyo heezzubata

 1. Neeyyo siyettiyabaa haratussi yoota. Banttawu siyettiya iita qofaa haratussi yootenna asati darotoo banttana qohiyabaa oottiyogaa, hegeekka ushshaanne jallissiyaabaa goꞌettiyogaa doommoosona. Hegaa malabata oottiyogaappe kaallidi deꞌiyabata oottanawu mala:

 Nena yelidaageetussi yoota. Ne aaway woy ne aayyiya woy etappe issoy bantta aqo deꞌuwan merettiya metuwa neeyyo yootiyabaa gidikko, hegee nena waati qohiiddi deꞌiyakko, woppu gaada shin qoncciyan etawu yoota. Eta haasayissanawu metootikko, etappe issuwawu woy naaꞌꞌawu dabddaabbiya xaafada wottana danddayasa.

 Ammanettida ne laggeessi yoota. Nena loytti ezggana danddayiya uraassi neeyyo siyettiyabaa yootiyogee nena keehi maaddana. Geeshsha Maxaafay, “laggee mule wodekka siiqees; ishaikka metuwaa wode maaddanaassi yelettees” yaagees.—Leemiso 17:17.

 Nena Medhdhidaagaassi yoota. ‘Woosaa siyiya’ Xoossaa Yihooway nena ubbatoo siyana. (Mazamure 65:2) Geeshsha Maxaafay “I intteyyo qoppiyo gishshau, inttena hirggissiya ubbabaa a bolli olite” yaagees.—1 PHeexiroosa 5:7.

•   Woppu gaada ne haasayissana danddayiyoy eta naaꞌꞌaappe oonee, ne aawaayyee ne aayyiyoo?

•   Nena gakkiiddi deꞌiyabaa genccanaadan maaddana danddayiya laggee oonee? (yelaga woy gastta gidana danddayees)

•   Neeni woossana danddayiyo metoti awugeetee?

 2. Hanotati laamettiyo wode ne hanotaakka giigissa

 Nena yelidaageeti paraman shaahettidoogaa gaasuwan neeni deꞌiyo keettay, timirtte keettay woy demmiyo miishshay haray atto ne laggettikka laamettana danddayees. Hegaa malabati neeni yiillotanaadaaninne unꞌꞌettanaadan oottana danddayiyogee qoncce; qassi ne deꞌoy aadhdhi wodhdhidabadan neeyyo siyettana danddayees. Yaatin, he laamettidabata waata hammu gaada ekkana danddayay? He laamettida hanotaara ne maayettada deꞌana danddayiyo ogiyan xeella wotta.

•   Nena yelidaageeti paraman shaahettido gishshawu ne deꞌuwan laamettida gitabay aybee?

•   He hanotaa hammu gaada ekkanawu neeni ay oottana danddayay?

 3. Neeyyo deꞌiya loꞌꞌo eeshshaa akeeka

 Nena yelidaageeti paraman shaahettiyogee neeni keehi unꞌꞌettanaadan oottikkonne ne minotettaa kehi nashshanaadankka oottana danddayees. Hegaa mala hanotay neeni hara eeshshatakka dichchanaadan maaddana danddayees. Ayyo layttay 13 gidido wode A yelidaageeti paraman shaahettido Jeremi hagaadan giis: “Tana yelidaageeti paraman shaahettidoogee taani aawatettay siyettiyo asa gidanaadan oottiis. Taani bayra naꞌaa gidiyo gishshawu, ta aayyiyo loytta kaafananne ta kaallo ishaa maaddana koshshiis.”

•   Ne aawaanne aayyee giddon merettida metuwa gaasuwan neeni ne deꞌuwan dichchido mino eeshshay aybee?

•   Neeni dichchanawu koyiyo hara eeshshati awugeetee?