Neeni biron aaye uluwan tilettiyo wode, ne deꞌoy ayfiyan beettenna zaygot giyo keehi qii seliyappe doommees. Shin amarida aginatuppe simmin, kumetta bollaara deꞌiya guutta naꞌaa gidaasa. He issi seelee bana corayidi, 200​ppe dariya dumma dumma seeleta gidees; qassi he seeletu qottay, yesoynne eti oottiyo oosoy dumma dumma.

 Hagaa qoppa: Aaye uluwan tilettida zaygot giyo issi seele ba giddon deꞌiya DNA giyobaa daabulidi naaꞌꞌawu shaahettees. He shaahettida seeletikka banttana daabuli daabulidi corattoosona. Koyro heeran, he ooratta seeleti issi mala. Eta giddon deꞌiya DNA giyobay dumma dumma seeleta giigissanawu maaddiya ubba kaaletota oyqqi uttiis.

 Seele tilettin issi saaminttappe simmin, he cora seeleti dumma dummabaa oottanawu naaꞌꞌa kiyidi shaahettoosona. He shaahettida seeletuppe baggay hadettaa woykko embiryo giyoba kiyees, haray qassi geedobaa woykko plasenta giyobanne hadettay diccanaadan maaddiya seeletu citaa kiyees.

 Heezzantto saaminttan he hadettay bana heezzawu darajjayees. He hadettawu bolla baggan deꞌiyaagee loddan loddan narbbiyawu, guugiyawu, doonawu, bola bagga gogawunne hara dumma dumma seeliyawu laamettees. He hadettawu gidduwan deꞌiyagee suuttawu, meqettawu, kilahuwawu, dibbawunne hara seeletu citawu laamettees. Qassi humꞌꞌuwan deꞌiyagee garssa bolla kifiletukko, hegeetikka, goofinyawu, puggiyawunne kattaa gaacciyo bolla kifiliya dariya baggawu laamettees.

 Shahaara wodee issi issi seeleti hadetta garssan issi sohuwappe hara sohuwa banttarkka woy citan citan gididi qaaxxoosona. Hara seeleti citaa medhdhiyogan piddi giidi micettida malabaa medhdhoosona woy banttana dakkoyidi xooꞌee deꞌiyo tuubbuwa woy leeꞌe wodoruwa malabaa medhdhoosona. Hegee hananaadan seeleti issoy issuwaara darajjayettidi oottana bessees. Leemisuwawu, piddi giida seeleti banttana xaaxidi guutta tuubbuwa mala gidoosona. Hegee hadettaa giddon issi kutti dumma dumma sohuwan haniyabaa. He tuubbuwa malabati aduqqi aduqqidi boosonanne macaraa kessoosona; guyyeppe hegeeti issoy issuwara gayttidi kumetta suuttaa xaphuwa medhdhoosona

 Xeetu biilooniyappe dariya seeleti hanana koshshiyobaa koshshiyo sohuwaninne koshshiya wodiyan corattidi issi qommo oosuwawu giigiyo wode, kumetta payyatettaara deꞌiya naꞌay yelettees.

 Ne qofay aybee? Seeleti banttana banttarkka corayidi issi qommo oosuwawu giigiyo abbee lodda laamiyan hanidabeyyee? Woy hegaa giigissiday deꞌii?