Ichchashu biiloone gidiya asay 2024 Olomppikiyan annaacettiya 206 biittatuppe yiida atileetetu annaaciya beꞌana. Salo Gufantto Olomppike Konttiya Prezddanttee Toomas Baki hagaadan giis: “Sarotettan alamiya issuwa oottiya hanotan nuuni hashetoos. Asa ubbay sarotettan issuwa gidana bessiyogaa, qassi nu giddon dummatettay deꞌishinkka issippetettan deꞌana koshshiyogaa akeekissiya ha Olomppikiya ane bonchchoos.”

 Olomppikee hegaa mala gitabata oottana danddayii? Alamiyan sarotettaynne issippetettay deꞌanaagawu ammanttiya hidooti deꞌii?

 Ha laytta Olomppikee asay ispportte xallaa gidennan hegaappe aarobaa qoppanaadan oottiis. Hegan annaacettiyobati asay shaahettanaadan oottiya deretettaanne polotikaa allaalleta qonccissidosona. He allaalletuppe amaridaageeti asaa maataa, zariyan zaggiyogaa, haymaanootiyan shaakkiyogaanne ubba asaa issi ayfiyan xeellennaagaa.

 Olomppikiya mala salo gufantto ispportte annaaceti asay allaxxanaadan oottoosona. Gidikkonne, he annaaceti tumu sarotettaynne issippetettay deꞌanaadan oottiyogaappe, asay issuwa issuwappe shaakkiyabata qoppiyogaanne oottiyogaa qonccissoosona, qassi ubbatoo yaatanaadan minttettoosona.

 Ha wodiyan issippetettan deꞌiyogee keehi metiyaba gidanaadan oottiya asaa eeshshata Geeshsha Maxaafay kasetidi yootiis. (2 Ximootiyoosa 3:1-5) Geeshsha Maxaafay yootiyo hiraagaa gujjada eranawu, “Nu Wodiyan Deꞌiya Asaa Eeshshaabaanne Hanotaabaa Geeshsha Maxaafay Kasetidi Yootii?” giya huuphe yohuwa nabbaba.

 Geeshsha Maxaafay alamiyan sarotettaynne issippetettay deꞌanaagawu ammanttiya hidootaa yootees. “Xoossaa Kawotettaa” geetettiya saluwa haaruwan, saꞌan deꞌiya ubba asay issippetettan deꞌanaagaa Geeshsha Maxaafay yootees.—Luqaasa 4:43; Maatiyosa 6:10.

 He Kawotettaa Kawoy Yesuus Kiristtoosi kumetta saꞌan sarotettaa ehaana. Geeshsha Maxaafay hagaadan gees:

•   “Xillotettai daayo; . . . sarotettai daro.”—Mazamure 72:7.

•   “A xeesiya hiyyeesata, . . . i ashshees. Eta naaquwaappenne makkalaappe i wozees.”—Mazamure 72:12, 14.

 Ha wodiyankka, Yesuusi tamaarissidobay 239 biittatun deꞌiya asaa issuwa oottiis. Kumetta saꞌan deꞌiya Yihoowa Markkati Kiristtaane gidiyogaadan, sarotettan deꞌana bessiyogaa tamaaridosona. Eti hegaadan waati oottiyakko eranawu, “Ixuwaa Xoonana Danddayoos” giya Wochchiyo Keelaa maxeetiya nabbaba.