DARO asay Sillaasiyaa, “Kiristtaane ammanuwawu waanna timirtte” giidi qoppees. He timirttiyaa maaran, Aaway, Naˈaynne xillo ayyaanay heezzaykka issi Xoossaa geetettoosona. Kardinal Jon Okonori Sillaasiyaabaa hagaadan giis: “Hegee hanno gakkanawu nuuni eriichchibeenna keehi geemmida xuura yoho.” Sillaasee akeekanawu keehi metiyaaba gidiyoy aybissee?

Zi Ilastireted Baybl Dikshineri giyo maxaafay hegawu issi gaasuwaa yootees. He maxaafay Sillaasiyaabaa hagaadan gees: “Geeshsha Maxaafan hegaa qonccissiya xiqisee baynna gishshawu, hegee Geeshsha Maxaafaa timirtte gidenna.” Sillaasee “Geeshsha Maxaafaa timirtte gidenna” gishshawu, Sillaasiyaa ammaniyaageeti he timirttiyaa kaafiyaabaa demmanawu xiqiseta koyoosona, ubba geellayoosona.

Darotoo asay suure akeekenna xiqisetuppe issoy Yohaannisa 1:1. Wolayttatto Geeshsha Maxaafan he xiqisee hagaadan gees: “Qaalai koiro de7ees; qaalaikka Xoossaara [Giriikettuwan, ton teˈon] issippe de7ees; qassi qaalai Xoossaa [teˈos].” Ha xiqisiyan teˈos (xoossaa) giya qaalay naaˈˈu ogetun qoncciis. Koyroogan Giriikettuwan erettidabaa qonccissiya ton giya qaalay kasetees; he sohuwan deˈiya teˈon giya qaalay Ubbaa Dandddayiya Xoossaa bessees. SHin naaˈˈanttoogan teˈos giya qaalaa matan qonccissiya qaali baawa. Hegan qonccissiya qaalay baletti attidee?

Yohaannisa Wonggelee erettidabaa qonccissiya qaalaa goˈetuwaa higgee deˈiyo, daro asay haasayiyo Koyine giyo Giriikettuwan xaafettiis. Geeshsha Maxaafaa eranchchaa A. T. Robertseni issi qofa qashuwan yohuwaawaakka appe kaalliyaagaakka qonccissiya qaalati deˈikko, “he naaˈˈatikka erettiyaaba qonccissiyaageeta, qassi issuwaa haran laammana danddayiyo issi mala qaaladan xeelettiyoogaa” yootiis. Robertseni hegaa leemisuwan qonccissanawu, “Goshshai [Giriikettuwan, ho agros] sa7aa [Giriikettuwan, ho kosmos]” yaagiya Maatiyoosa 13:38n deˈiya qofaa yootiis. Saˈay goshshaa giikkokka qofay issi mala.

SHin Yohaannisa 1:1n deˈiyaagaadan, yohuwaawaa qonccissiya qaalay deˈin, appe kaalliyaagawu baynnaba gidikko shin? Eranchchaa Jems Alen Hiweti ha xiqisiyaa leemisodan goˈettidi hagaadan giis: “Hegaa mala qofa qashuwan yohuwaawaynne appe kaallidi deˈiyaagee issi mala woy lagge gidokkona.”

Leemisuwan qonccissanawu, Hiweti “Xoossai poo7o” giya 1 Yohaannisa 1:5 goˈettiis. Giriikettuwan “Xoossay” ho teˈos geetettidi xaafettees; ho giyaagee erettiyaabaa qonccissiya qaala. SHin “pooˈoy” qonccissiya qaalay baynnan fos geetetti xaafettiis. Hiweti, “Issi uri ubbatoo . . . Xoossaa pooˈoy qonccissees gaana danddayees; shin pooˈoy Xoossaa gaanawu ubbatoo danddayenna” yaagiis. “Xoossai ayyaana” yaagiya Yohaannisa 4:24ynne “Xoossai siiqo” giya 1 Yohaannisa 4:16ykka hegaa malabaa qonccissees. Ha naaˈˈu xiqisetunkka yohuwaaway erettidaba gidiyoogaa qonccissiya qaalati deˈoosona; shin kaallidi deˈiya “ayyaana” qassi “siiqo” giyaageetussi baawa. Yaatiyo gishshawu, yohuwaawaynne appe kaalliyaagee issoy haran laamettiyaaba gidokkona. Ha xiqiseti “ayyaanay Xoossaa” woy “siiqoy Xoossaa” geetettana danddayokkona.

Giriiketto qaalaa eranchchatinne Geeshsha Maxaafaa birshshiya daroti Yohaannisa 1:1y “Qaalaa” oonatettaa gidennan, A erissiya issibaa qonccissiyoogaa yootoosona. Geeshsha Maxaafaa birshshiya Wiliyam Barkileyi hagaadan giis: “[Kiitettida Yohaannisi] teˈos giyaagaappe kase erettidabaa qonccissiya qaalaa goˈettibeenna gishshawu, hegee issibaa qonccissees . . . Yohaannisi Qaalay Xoossaara issuwaa gibeenna. Hara guussan, Yesuusi Xoossaa gibeenna.” Eranchchaa Jesen David Bedun giyo asikka hegaara issi malabaa yootiis; hagaadan giis: ‘Giriikettuwan, Yohaannisa 1:1c wurssettan deˈiyaagaa mala qofa qashuwan theos giyaagaa qonccissiyaabi baynnan xaafiyo wode, ay xoossakka gidiyoogaa nabbabiyaageeti qoppoosona.’ Beduni gujjidikka hagaadan giis: “Yohaannisa 1:1y Qaalay mexi issi Xoossaa gidennan, Xoossaadan ayyaana gidida xoossaa.” Woykko Amerikan Istandard Vershin Geeshsha Maxaafaa birshshida asatuppe issuwaa gidida Josef Heneri Tayeri giidoogaadan, “Logos [woy, Qaalay] ba huuphe Xoossaa gidennan, Xoossaa mala gidida xoossa.”

Xoossaa oonatettay eranawu metiya “gita xuura” yohoo? Yesuusi hegaadan xeellibeenna. Yesuusi, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagidi ba Aawaa woossiis. He woosan, I baappenne ba Aawaappe gidduwan qoncce dummatettay deˈiyoogaa qonccissiis. (Yohaannisa 17:3) Nuuni Yesuusa ammaniyaabanne Geeshsha Maxaafay tamaarissiyo qonccebaa akeekiyaaba gidikko, Yesuusa Xoossaa mala gidida A Naˈaa ootti xeelliyoogan A bonchchoos. Qassi Yihooway “issi Xoossaa” gidiyoogaadan awu goynnoos.