Geeshsha Maxaafay Asay Laamettanaadan Oottees

Mekisiikon deˈiya issi bitanee kase pokkobaa oottiyoogaa agganaadan aybi maaddidee?

“Tana Bonchchidosona.”—GUWADALUPE VILYAREˈAL

YELETTIDO LAYTTAA: 1964

YELETTIDO BIITTAA: MEKISIIKO

KASE TAARIKIYAA: POKKOBAA OOTTIYAAGAA

KASE DEˈUWAA: Taani Mekisiikon daro hiyyeesati deˈiyo Sonora giyo sohuwan deˈiya Hermoosilo giyo kataman diccaas. Taani naatettan deˈishin ta aaway hayqqido gishshawu, ta aayyiyaa nuussi koshshiyaabaa kunttanawu minnada oottawusu. Nuussi miishshi baynna gishshawu caamma wotta erikke. Taani so asaa maaddanawu naatettan oosuwaa doommaas. Nuuni keehi guutta keettan deˈoos.

Nu aayyiyaa nuna naagenna mala, gallassaappe dariya baggaa son deˈukku. Tawu layttay 6 gidido wode, 15-laytta naˈay tanaara mattumaa gayttiyoogaa doommiis. Daro wodiyawu hegaadan haniiddi takkiis. Hegee kaalettidobaappe issoy attuma asa siiqiyoogee bala gidenna gaada taani qoppidoogaa. Tana maaddanaadan dottoretanne qeeseta oychchin, tabay meto gidennaagaanne tawu siyettiyaabay bala gidennaagaa yootidosona.

Tawu layttay 14 gidido wode, attuma asaara mattumaa gayttiyaageetudan hananawunne etadan maayanawu kuuyaas. Hegaappe simmin, 11 layttawu amarida dumma dumma attuma asatuura hegaadan deˈaas. Guyyeppe, huuphiyaa loyttiyoogaa tamaarada, huuphe keettaa dooyaas. SHin, taani ufayttikke. Darotoo waayettaysinne asay tana yeggi bayidabadan qoppays. Taani oottiyoobay bala gidiyoogaa akeekaas. ‘Loˈˈonne ammanettiya asi deˈii?’ gaada tana oychchiyoogaa doommaas.

Ta michcheebaa qoppaas. A Yihoowa Markkatuura Geeshsha Maxaafaa xannaˈiyoogaa doommada, guyyeppe xammaqettaasu. A tamaariyoobaa tawu yootikkonne, ta siyennan ixxaas. Gidikkokka, taani I duussaanne I aqo deˈuwaa nashshaas. Anne I keettaaway issoy issuwaa wozanappe siiqiyoogaanne bonchchiyoogaa akeekaas. Eti issoy issuwawu kehoosona. Guyyeppe, issi Yihoowa Markkiyaa tana Geeshsha Maxaafaa xannaˈissiyoogaa doommaasu. Koyro heeran darin wudennan xannaˈays. Guyyeppe, ta qofay laamettiyoogaa doommiis.

TAANI LAAMETTANAADAN GEESHSHA MAXAAFAY MAADDIIS: Yihoowa Markkati bantta shiiquwaa shoobbin baas. Hegee ta kase erennaba. Asay tana qilliicciyaaba gidikkonne, Yihoowa Markkati hegaadan oottibookkona. Eti pashkki giidi tana sarotidosonanne tana bonchchidosona. Tana hegee keehi ufayssiis.

Taani issi gita shiiquwaa shiiqido wode, Yihoowa Markkata kaseppe aaruwan nashshaas. Eti coratti shiiqidaageetikka ta michchee mala xillonne suure asata gidiyoogaa akeekaas. Taani koyaydda takkido loˈˈonne ammanettiya asati hageeteeshsha gaada qoppaas. Eta siiquwaaninne issippetettan, qassi taani oychchiyo oysha ubbaa eti Geeshsha Maxaafaappe zaariyoogaa beˈada garamettaas. Geeshsha Maxaafay yootiyoobaa kaallidoogee eta loˈˈo asa oottidoogaa akeekaas. Taani eta mala gidanawu daroban laamettana koshshiyoogaakka akeekaas.

Taani macca asaagaadan deˈiyo gishshawu, muleban laamettana koshshiyoogee tuma. Ta haasayay, hanotay, maayoy, huuphiyaa ohettaynne laggeti ubbay laamettana koshshiis. Ta kase laggeti tana hagaadan giidi qilliiccidosona: “Neeni ayssi hagaadan hanay? Neeni kaseegaadan haniyaakko loˈˈo. Geeshsha Maxaafaa xannaˈoppa. Neeyyo paccidabay baawa.” SHin, pokkobaa oottiyoogaa agganaagee tana aybippenne aaruwan metiis.

Hegaadan laamettanaagee metikkonne, danddayettiyoogaa akeekaas; ayssi giikko, Geeshsha Maxaafay 1 Qoronttoosa 6:9-11n hagaadan giidobay ta wozanaa denttettiis: “Woi makkalanchchati Xoossaa kawotettaa laattennaagaa erekketii? Baloppite. SHaaramuxana qaaqqatiyaageeti woi eeqassi goinniyaageeti woi shaaramuxiyaageeti woi attumaasa gidiiddi, attumaasaara shaaramuxiyaageeti, . . . Xoossaa kawotettaa laattokkona. Intteppekka issi issi asai hegeetu mala. SHin . . . intte meecettidetanne geeyideta.” Yihooway he wode asatikka taanikka laamettanaadan maaddiis. Laamettiyoogee daro wodiyaa wurssidabanne keehi baaxeyidaba gidikkonne, Yihoowa Markkatu kaaletoynne siiqoy tana keehi maaddiis.

TAANI GOˈETTIDO HANOTAA: Haˈˈi taani Kiristtaaneppe koyettiyaagaadan deˈays. Taani machchaas, qassi taaninne ta keettayiyaa nu naˈay Geeshsha Maxaafay yootiyo maaraadan deˈanaadan tamaarissoos. Taani mule kaseegaa mala asa gidikke, qassi Yihoowaara dabbotaa minttada ayyo ufayssan haggaazaydda deˈays. Taani haˈˈi gubaaˈiyaa cima gidada haggaazays, qassi harati Xoossaa Qaalaa tumaa tamaaranaadan maaddaas. Taani laamettoogee ta aayyiyo keehi ufayssin, A Geeshsha Maxaafaa xannaˈada xammaqettida Kiristtaane gidaasu. Kase pokkobaa oottiya ta michchiyaakka Yihoowa Markka gidaasu.

Ta kase deˈuwaabaa eriya issoti issotikka taani muleera laamettidoogaa akeekidosona. Qassi taani laamettanaadan maaddidabay aybakko erays. Kase tana maaddanaadan dottoreta oychchidaba gidikkonne, eti maaddennabaa zoridosona. SHin, Yihooway tana keehi maaddiis. Taani tana pattennabadan xeellikkonne, I tabaa akeekiis, tana siiqiisinne danddayiis. Taani he ubbaban laamettanaadan wolqqaa immidabay eranchcha, siiqiyaanne loˈˈo Xoossay tabaa akeekidoogaanne taani loˈˈo deˈo deˈanaadan I koyiyoogaa.