Geeshsha Maxaafay Asay Laamettanaadan Oottees

Naatetta wodiyaa iita tuggan aattida yelagiya ba deˈuwan waana ufayttana danddayadee? Iita makkaliyaanne polotikaa dosiya asi wonggeliyaa yootiya saro asa gidanaadan oottiday aybee? Ha oyshatu zaaruwaa demmanawu kaallidi deˈiya taarikiyaa nabbaba.

“Siiqettanawunne Dosettanawu Keehi Amottaas.”—EENA LEHNINO

YELETTIDO LAYTTAA: 1981

YELETTIDO BIITTAA: RUSIYAA

KASE TAARIKIYAA: NAATETTAN TUGGATIDAARO

KASE DEˈUWAA: Ta aawaynne aayyiyaa tulle gidishin, taanikka tulle gidada yelettaas. Koyro usuppun layttata ufayttada deˈaas. Hegaappe simmin, ta aawaynne aayyiyaa paraman shaahettidosona. Taani guutta naˈa gidikkokka, paraman shaahettiyoogee aybakko eraas; qassi hegan keehi qohettaas. Eti shaahetti simmin, ta aawaynne ta bayra ishay Tiroyitsiken deˈidosona; shin ta aayyiyaa tana ekkada CHeliyabinske baasu. Guyyeppe, A hara azinaa gelaasu. I ushanchcha asa, yaanidaagee onne tana darotoo wadhdhees.

Ta bayra ishay 1993n haattan muukettidi hayqqiis. Hegaappe denddidaagan nu soo asay keehi kayyottiis. Ta aayyiyaa hegaa gishshawu ushshaa uyiyoogaa meezetada, akka ba azinaadan tana qohiyoogaa doommaasu. Loˈˈo deˈuwaa waana deˈanaakko qoppiyoogaa doommaas. Siiqettanawunne dosettanawu keehi amottaas. Minttettuwaa demmanawu cora woosa keettata biyoogaa doommaas; shin ayba minttettonne demmabeykke.

TAANI LAAMETTANAADAN GEESHSHA MAXAAFAY MAADDIIS: Tawu layttay 13 gidiyo wode, tanaara tamaariya Yihoowa Markka gidida naˈiyaa Geeshsha Maxaafaappe tawu issi issi taarikiyaa yootaasu. Iita hanotay deˈishinkka Xoossawu oottida, Nohanne Iyyooba mala asatuban ufayttaas. Sohuwaara Yihoowa Markkatuura Geeshsha Maxaafaa xannaˈiyoogaa, qassi eta shiiquwaa biyoogaa doommaas.

Geeshsha Maxaafaa xannaˈiyoogee wozanaa ufayssiya daro tumaa taani akeekanaadan oottiis. Xoossaayyo sunttay deˈiyoogaa erada keehi ufayttaas. (Mazamure 83:18, NW) ‘Wurssetta gallassan’ hananabaa Geeshsha Maxaafay yootiyoobaa erada maalaalettaas (2 Ximootiyoosa 3:1-5) Hayqqida asay denddanaagaakka erada ufayttaas. Taani ta ishaara gayttana deˈiyoogaa qoppite!—Yohaannisa 5:28, 29.

SHin tana ufayssidaban ufayttiday ubba asa gidenna. Ta aayyiyaanne I azinay Yihoowa Markkata keehi ixxoosona. Taani Geeshsha Maxaafaa xannaˈiyoogaa agganaadan eti baaxetidosona. SHin taani tamaariyoobaa keehi dosido gishshawu, agganawu mule koyabeykke.

Nu soo asay tana eqettidi oottiyoobaa genccana danddayabeykke. Tanaara Yihoowa Markkatu shiiquwaa biya ta kaalo ishaykka haattan muukettidi hayqqin, daganttiya harabay merettiis. Gidikkokka, Yihoowa Markkati tana keehi minttettidosona. Taani ta deˈo laytta ubban amottaydda takkido siiquwaa eta matan demmaas. Hagee tumu haymaanoote gidanaagaa he wode eraas. Yaatada, 1996n xammaqettada Yihoowa Markka gidaas.

TAANI GOˈETTIDO HANOTAA: Aadhdhida usuppun layttaa, Dimitiri giyo loˈˈo asa gelada deˈays. Aara issippe Sent Pitisbergen deˈiya, Yihoowa Markkatu macara biiruwan oottoos. Takkidi, nu soo asay ta ammanuwaabaa xeelliyo hanotay kaseppe guuttaa laamettiis.

Yihoowa erido gishshawu keehi ufayttays! Awu haggaaziyoogee ta deˈoy kumetta gidanaadan oottiis.

“Daro Oyshatun Unˈˈettaas.”—RAWUDEL ROZEREGEZ ROZEREGEZA

YELETTIDO LAYTTAA: 1959

YELETTIDO BIITTAA: KUUBA

KASE TAARIKIYAA: MAKKALIYAANNE POLOTIKAA DOSIYA ASA

KASE DEˈUWAA: Taani Kuuban, Havaanan yelettaas; taani diccido heeray hiyyeesati deˈiyoosa gidishin, yan asay warettiyoogee meeze gididaba. Taani dicciyo wode, judo giyoonne baaxe milatiya hara ispportteta dosiyoogaa doommaas.

Taani gooba tamaare gidiyo gishshawu, yuniversttiyaa gelanaadan nu soo asay tana minttettiis. Yan deˈaydda, nu biittaa polotikaa hanotay laamettana bessees gaada qoppiyoogaa doommaas. Yaatiyo gishshawu, makkalanawu qofaa qachchaas. Tanaara tamaariya issi naˈaara gididi, issi polisiyaappe zayyiya wotti ekkanawu A shoccida. He warettan polisiyaa huuphee daro qooˈettiis. Taaninne ta laggee qashettida; qassi tokkosin hayqqanaadan pirddettida. Tawu biron layttay 20 gidikkokka, hayqqana hanays!

Qasho keettan tarkka deˈiyo wode, tana tokkosi worana haniyo wode hananabaa meezetays. Yayyida asa milatanawu mule koyikke. Qassi he wode daro oyshati ta guuggiyan simerettoosona. Taani, ‘Alamiyan pirdda pacay daridoy aybissee? Deˈo giyoogee hagaa xallee?’ yaagada qoppaas.

TAANI LAAMETTANAADAN GEESHSHA MAXAAFAY MAADDIIS: Nu hayquwaa pirdday guyyeppe 30 laytta qashuwawu laamettiis. Taani bantta ammanuwaa gaasuwan qashettida amarida Yihoowa Markkatuura gayttidoy he wode. Yihoowa Markkati xala gidikkokka, eti saro asa gidiyoogaa beˈada maalaalettaas. Eti aynne moorennan qashettikkokka, hanqqettokkonanne yiillotokkona.

Xoossay asaa halchchuwan medhdhidoogaa Yihoowa Markkatuppe tamaaraas. Xoossay saˈaa danoynne pirdda paci baynna gannate oottanawu deˈiyoogaa eti Geeshsha Maxaafaappe tana bessidosona. Biittay polo hanotan merinawu deˈanawu deˈiya, loˈˈo asan kumanaagaa eti tana tamaarissidosona.—Mazamure 37:29.

Yihoowa Markkati tana tamaarissidobaa keehi dosaas; shin ta eeshshay etaagaappe keehi dummatees. Polotikaaban oossinne exatennan deˈiyoogee woy qinxxalliya baqqiya urawu hara baggaa zaariyoogee danddayettenna gaada qoppaas. Hegaa gishshawu, Geeshsha Maxaafaa tawu buzo nabbabanawu qofaa qachchaas. Nabbabada wurssido wode, beni Kiristtaanetudan haniyaageeti Yihoowa Markkatu xalla gidiyoogaa akeekaas.

Geeshsha Maxaafaa xannaˈiyoogan taani ta deˈuwan keehi laamettana bessiyoogaa eraas. Leemisuwawu, taani darotoo cayiyo gishshawu, ta haasayaa geeshshana koshshees. Sijaara uyiyoogaakka aggana koshshees. Qassi polotikaaban exatiyoogaakka aggana bessees. Hageeta agganaagee metiyaaba gidikkokka, Yihooway maaddin loddan loddan aggaas.

SHin hanqquwaa agganaagee metidabatuppe issuwaa. Hegaara gayttidaagan ta huuphiyaa naaganawu haˈˈikka woossays. Leemiso 16:32 mala xiqiseti tana keehi maaddidosona; xiqisee, “Wolqqaama asa gidiyoogaappe, hanqqettanau eesotenna asa gidiyoogee lo77o; daro katamata olidi oiqqiyoogaappe, asi ba huuphiyaa haariyoogee aadhdhees” yaagees.

Taani 1991n xammaqettada Yihoowa Markka gidaas. Qasho keettan barmmeeliyan deˈiya haattan xammaqettaas. Kaalliya laytti, qashuwan deˈiya asatuppe amaridaageeti birshshettidi, nu dabbotukko Isppeene yedettida. Isppeene gakkada, sohuwaara Yihoowa Markkatu shiiqota biyoogaa doommaas. Yan deˈiya Yihoowa Markkati daro layttawu etaara deˈida asadan tana mokkidosona; qassi deˈuwaa wotta yeggada deˈiyoogaa doommanaadan maaddidosona.

TAANI GOˈETTIDO HANOTAA: Taani haˈˈi ufayttiya asa; ta machcheeranne ta naaˈˈu macca naatuura Xoossawu haggaazays. Ta wodiyaappe daruwan Geeshsha Maxaafaa tamaaranaadan harata maaddiyoogan ufayttays. Issi issitoo hayqoy pirddettido he yelagaabaa qoppays; shin hegaappe haa simmin taani demmido darobaa nashshays. Taani haˈˈi paxa deˈiyoogaa xalla gidennan, hidootay deˈiyoogaa. Taani suure pirdday kumidonne ‘hayqoy deˈenna,’ yaana Gannatiyaa hidootan naagays.—Ajjuutaa 21:3, 4.

[Qonccissuwaa]

“Xoossaayyo sunttay deˈiyoogaa erida keehi ufayttaas”

[Misiliyaa]

Taaninne ta azinay tuletuyyo giigida xuufiya etawu immiyoogan ufayttoos