Ee, kumetta saꞌan miilooniyan qoodettiya Yihoowa Markka maccaasay tamaarissees. Xoossaa Kawotettaa mishiraachchuwaa yootiya keehi cora maccaasay deꞌees. Etabay Mazamure 68:11n kasetidi hagaadan geetettiis: “Godai kiitaa kiittiis; he kiitaa efiida maccaasati daro.”

Giddoppe attin, Yihoowa Markka maccaasay oottiyoobay hara haymaanootiyaa qeese maccaasay oottiyoobaara gayttiyaaba gidenna. Eti dummatiyoogaa bessiya gitabay deꞌees. Eti dummatiyoy aybiinee?

Eti tamarissiyo asay issuwaagee haraagaappe dummatees. Qeese maccaasay, ubba qassi banttana Kiristtaane giyaageetu macca qeeseti bantta woosa keettaa giddon deꞌiya asaa kaalettana koyoosona, qassi eti yan deꞌiya asaa tamaarissoosona. SHin Yihoowa Markka maccaasay tamaarissiyoogeeti gubaaꞌiyaappe kareera deꞌiya asaa; he asati eti dabaaban, sooppe soo biidi woy harasan demmiyoogeeta.

Harabay qassi, Yihoowa Markka maccaasay gubaaꞌe giddon oottiyoobankka hara haymaanootiyan deꞌiya maccaasaappe dummatees. Banttana Kiristtaane giyaanne hara woosa keettaa macca qeesti bantta woosa keettan deꞌiya asaa kaalettoosona, qassi bantta ammanuwaa wogaa eta tamaarissoosona. SHin Yihoowa Markka maccaasay xammaqettida attuma asay deꞌiyo wode gubaaꞌiyan tamaarissenna. Hegaadan oottana bessiyay tamaarissanawu sunttettida attuma asa xalla.—1 Ximootiyoosa 3:2; Yaaqooba 3:1.

Attuma asa xallay gubaaꞌiyaa xomoosana bessiyoogaa Geeshsha Maxaafay yootees. PHawuloosi ba mala cima gidida Tiitussi yootidobaa akeeka: “Taani nena Qarxxeesan aggada yiidoogee, . . . katama ubban woosa keettaa cimata dooranaassa.” Hegaadan sunttettida attuma asi ‘borettennaagaanne issi machchee xalaalay deꞌiyoogaa’ gidana koshshiyoogaakka PHawuloosi yootiis. (Tiitu 1:5, 6) PHawuloosi Ximootiyoosawu xaafido dabddaabbiyankka hegaa malabaa yootiis: “Ooninne woosa keettaa kaalettiyaagaa gidanau koyikko, lo77obaa amottiis giyo haasayai tuma. Woosa keettaa kaalettiya urai borettennaagaa, issi machchee xalaalai de7iyoogaa, . . . tamaarissanau danddayiyaagaa . . . gidanau bessees.”—1 Ximootiyoosa 3:1, 2, 4.

Xomoosiyo aawatettay attuma asa xallawu imettidoy aybissee? PHawuloosi hagaadan giis: “Taani maccaasai co77u giidi de7ona gaisippe attin, attumaasaa tamaarissona woikko eta bolli aawatona giikke. Aissi giikko, Addaamee koiro merettiis; Hewaana guyyeppe merettaasu.” (1 Ximootiyoosa 2:12, 13) Eta giddon kaseti merettiday attumaagaa gidiyoogee tamaarissiyoonne xomoosiyo aawatettaa Xoossay attumaagawu ayssi immidaakko bessees.

Yihoowawu haggaaziya asati banttana kaalettiya, Yesuus Kiristtoosa leemisuwaa kaalloosona. Erissiyo ashkkaraa Luqaasi Yesuusa haggaazuwaabaa hagaadan giis: “Yesuusi Xoossaa kawotettaa mishiraachchuwaa yoottiiddi, dumma dumma gita katamaanne gutta katamaa bees.” Guyyeppe, Yesuusi bana kaalliyaageeti he oosuwaa oottanaadan kiittin, eti ‘biidi qeeri katama ubban Xoossaa qaalaa yootiiddi yuuyidosona.’—Luqaasa 8:1; 9:2-6.

Ha wodiyan, Yihoowawu haggaaziya attuma asaykka macca asaykka Yesuusi, “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan wurssettai gakkana” giidi kaseti yootido oosuwaa minnidi oottoosona.—Maatiyoosa 24:14.