Geeshsha Maxaafay Asay Laamettanaadan Oottees

ISSI izaawu kase ba diccido ammano wogawu zaaretti simmana koyidoy aybissee? Issi yelagay ba deˈo laytta ubban amottido aawaa waati demmidee? Eti yootidobaa ane nabbaboos

“Yihoowakko simmiyoogee tawu keehi koshshiis.”​—EELE KAALILA

YELETTIDO LAYTTAA: 1976

YELETTIDO BIITTAA: QOPHIROOSA

KASE TAARIKIYAA: MIISHSHAA LAALIDA NAˈAA

KASE DEˈUWAA: Taani Qoophiroosan yelettada Awusttiraaliyan diccaas. Tana yelidaageeti Yihoowa Markkata; qassi eti Yihoowanne A Qaalaa Geeshsha Maxaafaa dosanaadan oottidi tana dichchidosona. SHin yelagatettan taani makkaliyoogaa doommaas. Taani hara yelagatuura gayttanawu qamman qosettada sooppe kiyada bays. Nuuni kaamiyaa wuuqqoos, qassi hara daro danobaakka oottoos.

Koyro heeran taani nu so asaa azzanttenna mala yayyada, hegaa geeman oottays. SHin takkada hegaadan yayyiyoogaa aggaagaas. Yihoowa dosenna, taappe keehi bayratiya asatuura laggetaas; eti qassi ta eeshshay keehi moorettanaadan oottidosona. Wurssettan, taani eta haymaanootiyaa kaallanawu mule koyennaagaa tana yelidaageetussi yootaas. Eti danddayan tana maaddanawu malidosona; shin taani eta mule siyana koyabeykke. Yaatin eti keehi azzanidosona.

Nu sooppe kiya simmada, jallissiyaabaa goˈettiyoogaa doommaas; ubba daro maaruwaanaa tokkiyoogaanne bayzziyoogaa doommaas. Taani pokkobaa hanaydda deˈaas; qassi uyyiiddinne duriiddi aqiyoosan daro wodiyaa aattaas. Qassi hanqquwan suulliya asa gidaas. Ta dosennabaa asi haasayikko woy oottikko, hanqquwaa suullays, darotoo asaa bolli waassaysinne eta shocays. Taani issi Kiristtaanee oottana bessennaagaa tamaarido ubbabaa oottaas.

TAANI LAAMETTANAADAN GEESHSHA MAXAAFAY MAADDIIS: Tanaara jallissiyaabaa goˈettiya issuwaara mata lagge gidida; I naatettan deˈishin A aaway hayqqiis. Nuuni darotoo qamma bilahe gakkanawu haasayoos. I ba aawaa keehi laamotiyoogaa issi issitoo tawu yootees. Taani dendduwaa hidootaabaa naatettaappe doommada eriyo gishshawu, Yesuusi hayqqida asaa denttidoogaanne I sinttappekka hegaadan oottanawu qaalaa gelidoogaa awu odiyoogaa doommaas. (Yohaannisa 5:​28, 29) Taani he wode, “Ne aawaara zaarettada gayttanaagaa qoppa. Nuuni ubbay saˈan gannatiyan merinawu deˈana danddayoos” yaagaas. Ta laggee hegaa siyidi keehi ufayttiis.

Hara wodetun qassi ta laggee wurssetta gallassaa woy Sillaasiyaa mala timirtteta oychchiis. Taani A Geeshsha Maxaafaappe Xoossaa Yihoowabaa, Yesuusabaanne wurssetta gallassabaa tumaa yootiya daro xiqiseta bessaas. (Yohaannisa 14:28; 2 Ximootiyoosa 3:​1-5) Taani Yihoowabaa ta laggiyawu gujja gujja yootido payduwan, Yihoowabaa keehi qoppaas.

Ta wozanan moogetti uttida, tana yelidaageeti keehi daafuridi zerido tumaa zerettay leddan leddan mokkiyoogaa doommiis. Leemisuwawu, issi issitoo ta laggetuura shiiqidi jallissiyaabaa goˈettiiddi deˈishin, Yihoowaabaa qoppiyoogaa doommays. Ta laggetuppe daroti Xoossaa siiqiyoogaa yootoosona; shin eta hanotay eti A siiqennaagaa bessees. Taani hegaa mala asa gidana koyenna gishshawu, ay oottana koshshiyaakko akeekaas. Yihoowakko simmiyoogee tawu keehi koshshiis.

Ay oottana koshshiyaakko eriyoogee he eridobaa oottiyoogaara issi mala gidenna. Issi issibaa agganaagee tana metibeenna; jallissiyaabaa goˈettiyoogaa agganawu waayettabeykke. Ubba kase laggetuppe duuxxada, issi gubaaˈe cimaara Geeshsha Maxaafaa xannaˈiyoogaa doommaas.

SHin issi issiban laamettanawu metootaas. Hanqquwan suulliyoogaa agganaagee tana keehi metiis. Issi issitoo guutta wodiyawu hanqqettennan takkidaashin issibay tana keehi hanqqetissin zilˈˈettada, mule laamettana danddayennabadan qoppays. Taani hidootaa qanxxido gishshawu, tana xannaˈissiya cimawu yootaas. He cimay ubbatoo danddayeesinne keha; qassi I tana keehi maaddiis. Issi wode, hidootaa qanxxana bessennaagaa yootiya, Wochchiyo Keelan kiyida huuphe yohuwaa I tawu nabbabiis. * Taani yiillotiyo wode waatana bessiyaakko issippe tobbida. He huuphe yohuwan deˈiya zoriyaa kaalliyoogaaninne Yihoowakko zaara zaarada woossiyoogan yiillotiyoogaa guyyeppe aggaas. Wurssettan, Hosppune 2000n xammaqettada Yihoowa Markka gidaas. Tana yelidaageeti keehippe ufayttidosona.

TAANI GOˈETTIDO HANOTAA: Taani ta bollaa haˈˈi jallissiyaabaaninne shori baynna kandduwan tunissennaagaa eriyo gishshawu, ta wozanaynne kahay woppu giis. Haˈˈi taani oottiyo ubbaban kaseppe keehi ufayttays.

Tana yelidaageeti taban hidootaa qanxxibeenna gishshawu Yihoowa galatays. Qassi, Yohaannisa 6:​44n, “Tana kiittida ta Aawai taakko ehiido asappe attin, taakko yaanau danddayiya asi baawa” yaagiya, Yesuusi yootido qaalaa ubbatoo hassayays. Yihooway tana baakko zaarettidi ehin simmido gishshawu, A keehi galatays.

“Aawaa siiqoy tana keehi yeemoyiis.”—MARKO ANTONIYO ALVAREZ SOTA

YELETTIDO LAYTTAA: 1977

YELETTIDO BIITTAA: CHIILE

KASE TAARIKIYAA: DEEZ-MEETAL MUUZIQAA KAAˈIYAAGAA

KASE DEˈUWAA: Tana ta aayyiyaa dichchaasu; taani Tohossa Amarkkawu tohossa bagga gaxan deˈiya Majelan giyo heeran deˈiya, Puntta Arenas giyo loˈˈiya kataman diccaas. Ta aawaynne ta aayyiyaa tawu layttay ichchasha gidiyo wode shaahettidosona; hegaappe denddidaagan, tana aggibayidabadan qoppaas. Aawa keehi laamotaas.

Ta aayyiyaa Yihoowa Markkatuura Geeshsha Maxaafaa xannaˈiyo gishshawu, gubaaˈe shiiquwaa biyo wode SHiiquwaa Addaraashaa tana ekkada bawusu. SHin taani shiiquwaa biyoogaa dosenna gishshawu, darotoo yiillotaydda bays. Tawu layttay 13 gidiyo wode, shiiquwaa biyoogaa muleera aggaagaas.

He wode muuziqaa dosiyoogaa doommaas; qassi tawu muuziqaa imotay deˈiyoogaa akeekaas. Tawu layttay 15 gidiyo wode, baalatun, hooteeliyaaninne asay shiiqido harasan heevi-meetal giyoonne deez-meetal giyo muuziqaa kaaˈiyoogaa doommaas. Muuziqaa eranchcha gidida haratuura laggetido gishshawu, kilaasikal muuziqaa dosaas. Yaatada, heeran deˈiya issi muuziqa timirtte keettan tamaariyoogaa doommaas. Tawu layttay 20 gidiyo wode, gujja tamaaranawu gita katamaa Santiyaago baas. He wodekka heevi-meetal banddiyaaninne deez-meetal banddiyan muuziqaa kaaˈiyoogaa aggabeykke.

Taani he wode ubbatoo ta deˈuwan unˈˈettays. Unˈˈettiyoogaa agganawu ta so asadan xeelliyo, tanaara muuziqaa issippe kaaˈiyaageetuura mattottana gakkanawu uyaysinne jallissiyaabaa goˈettays. Taani makkalanchcha asa gidiyoogaa ta hanotay erissees. Karetta maayuwaa maayays, buuchchaa dichchays, qassi ta huuphee xeessaa gakkanaashin dicciis.

Ta eeshshaappe denddidaagan, taani darotoo asaara warettaysinne polisetuura ooyettays. Issi gallassi ushshan sugettada tananne ta laggeta yiilloyida, jallissiyaabaa bayzziya asata shocaas. Eti tana keehi shocido gishshawu ta goggocoy meqqiis.

SHin tana keehi qohidabay ta mata laggeti oottidobaa. Issi gallassi, ta macca laggiyaa ta mata laggetuppe issuwaara daro layttawu qosan siiqettiyoogaa eraas; shin ta laggeti ubbay hegaa eriiddi taappe genttidosona. Hegee tana keehi qohiis.

Taani Puntta Arena katamawu simmada muuziqaa tamaarissiyoogaanne cheelo giyo muuziqaa miishshaa kaaˈiyoogaa doommaas. Taani he wodekka heevi-meetal muuziqaanne deez-meetal muuziqaa banddetuura kaaˈaysinne kaaˈaydda duuqettays. Qassi Suzano giyo loˈˈiya naˈeera gayttada iira issippe deˈiyoogaa doommaas. Amarida wodeppe guyyiyan, Suzana I aayyiyaa Sillaasiyaa ammaniyoogaanne taani hegaa ammanennaagaa akeekaasu. A, “Yaatin, tumay awugee?” gaada tana oychchaasu. Oychchin, Sillaase timirttee worddo gidiyoogaa taani erikkonne hegaa Geeshsha Maxaafaappe bessana danddayennaagaa yootaas. SHin bessana danddayiyay oonakko erays. Yihoowa Markkati Geeshsha Maxaafaappe tumaa bessana danddayiyoogaa iyyo yootaas. Hegaappe simmada, taani daro layttawu oottabeennabaa oottaas; hegeekka, Xoossay tana maaddana mala woossaas.

Amarida gallassappe guyyiyan, taani eriyo asa milatiya issi ura demmada, I Yihoowa Markkakkonne oychchaas. I ta ay milatiyaakko beˈidi yayyikkokka, SHiiquwaa Addaraashshaa shiiquwaabaa taani oychchido oyshaa kehatettan zaariis. Hegee ta woosaa zaaro gidiyoogaa akeekaas. SHiiquwaa Addaraashaa baada, tana asi erenna mala wurssetta yafaran deˈiya oydiyan uttaas. SHin taani naatettan shiiquwaa shiiqiyoogaa daroti hassayidosona. Eti tana qoommidi siiquwan mokki ekkin, taani woppu gaas. Taassi ta soo simmidoba milatiis. Tana naatettan Geeshsha Maxaafaa tamaarissida ishaa demmada, zaarettidi xannaˈissanaadan oychchaas.

TAANI LAAMETTANAADAN GEESHSHA MAXAAFAY MAADDIIS: Issi gallassi, Leemiso 27:11n, ‘Ta naˈawu aadhdhida eranchcha gidada tana ufayssa’ yaagiyaagaa nabbabaas. Laafa asi saluwaa saˈaa Medhdhida Xoossaa ufayssana danddayiyoogaa qoppada maalaalettaas. Ta deˈo laytta ubban koyaydda deˈido Aaway Yihoowa gidiyoogaa akeekaas!

Saluwan deˈiya ta Aawaa ufayssanawunne A sheniyaa oottanawu koyaas; shin daro layttawu jallissiyaabawunne ushshawu haarettaas. Yesuusi tamaarissido, Maatiyoosa 6:24n deˈiya, “Naa77u godatuyyo haarettanau danddayiyai ooninne baawa” yaagiya qofaa akeekaas. Ta deˈuwan laamettanawu baaxetiyo wode, 1 Qoronttoosa 15:33n, “Iita laggetettai lo77o hanotaa moorees” giya zoree tana keehi maaddiis. Taani kase biyo sohuwaa biyoogaanne kase laggetuura peˈiyoogaa aggana xayikko, iita meeziyaa aggana danddayennaagaa akeekaas. Geeshsha Maxaafaa zoree qoncce: Tawu xubbe gidana danddayiyaabatuppe muleera haakkanawu taani keehi laamettana koshshees.—Maatiyoosa 5:30.

Taani muuziqaa keehi siiqiyo gishshawu, heevi-meetal muuziqaa kaaˈiyoogaanne siyiyoogaa agganawu daro metootaas. SHin gubaaˈiyan deˈiya ta laggeti maaddin, taani wurssettan aggaas. Daro ushshaa uyiyoogaanne jallissiyaabaa goˈettiyoogaakka aggaas. Hegaa bollikka, ta huuphiyaa qanxxettaas, buuchaa meedettaas, qassi karetta maayo xallaa maayiyoogaa aggaas. Taani huuphiyaa qanxxetana koyiyoogaa Suzanissi yootin, A taani ayssi koyidaakko eranawu keehi koyaasu. A ubba hagaadan gaasu: “Ha SHiiquwaa Addaraasha giyoobay aybakko beˈanawu taani nenaara baana!” A yan beˈidobaa keehi dosido gishshawu, sohuwaara Geeshsha Maxaafaa xannaˈiyoogaa doommaasu. Amarida wodiyaappe guyyiyan nuuni eketti gelettida. Qassi 2008n xammaqettidi Yihoowa Markka gidida. Ta aayeera issippe Yihoowawu haggaaziyo gishshawu keehi ufayttida.

TAANI GOˈETTIDO HANOTAA: Haˈˈi ha alamiyaa worddo ufayssaappenne cimmiya laggetuppe shemppaas. Taani muuziqaa haˈˈikka dosays; shin doorada siyays. Ta deˈuwan beˈidoban ta so asaanne harata, ubba qassi yelagata maaddays. Ha alamee shoobbiyo darobay loˈˈiyaaba milatikkokka, wurssettan hegee ‘goˈˈennabanne wora oliyo’ buura mala gidiyoogaa eti akeekanaadan maaddanawu koyays.—Piliphphisiyuusa 3:8.

Taani siiqoynne sarotettay kumido gubaaˈiyan ammanettiya laggeta demmaas. Ubbaappe aaruwan qassi, Yihoowakko shiiqiyoogan, wurssettan ta Aawaa demmaas.

[Tohossa qofata]

[Qonccissuwaa]

“Taani Yihoowakko simmana danddayidoy I zaarettidi ehiido gishshataassa”