1, 2. Haymaanootiyaa xeelliyaagan qofaa qachanau meezaanay koshshiyoogaa qonccissiya leemisoy awugee?

 NUUNI Xoossaa waatidi erana danddayiyoo? Daro haymaanootetu timirttiyaa pilggiyoogee bessiyaabee? Hegee danddayettiyaaba gidenna. Nuuni hegaa oottana danddayiyaaba gidiyaakkokka, awugee likkekko waatidi erana danddayiyoo?

² Xoossaa xeelliyaagan deꞌiya dumma dumma qofaappe denddidaagan, tumay awugaakko eriyo ogee, giishin asay maayettiyo meezaanay nuussi koshshiyoogee tuma. Leemisuwau: Issi carqqiyaa likkiyaa xeelliyaagan giyan palamay denddiis goos. Bayzziyaagee carqqee heezzu meetire gees; shin shammiyaagee hegaappe guuxxees giidi qoppees. Yohoy waanidi giigana danddayii? Carqqiyaa meetiriyan likkiyoogaana.

3. Geeshsha Maxaafay xaafettidoy aybissee?

³ Haymaanootiyaa xeelliyaagan kuuyanau meezaani deꞌii? Ee, hegeekka Geeshsha Maxaafaa. Xoossay ubbasan deꞌiya asay babaa tumaa eranaadan Geeshsha Maxaafaa xaafissiis. Biilooniyan qoodettiya Geeshsha Maxaafay attamettiis. Geeshsha Maxaafay kumettay woykko baggay 2,400ppe dariya doonan birshshettiis. Ubba asay ba qaalan Xoossaabaa tumaa nabbabana danddayees gaana danddayettees.

4. Geeshsha Maxaafay ay ay oyqqidee?

⁴ Geeshsha Maxaafay Xoossay immido alꞌꞌo imota. I nuuni hara ogiyan mule erana danddayennabata qonccissees; ayyaana alamiyan deꞌiyaageetubaa yootees. I  Xoossaa qofaa, a eeshshaanne a halchuwaa qonccissees. I shaꞌan qoodettiya layttan Xoossay asaa oyqqido ogiyaa yootees. I sinttappe hananabaa yootees. Qassi merinaa deꞌuwau efiya ogiyaa nuuni waati demmana danddayiyaakko i qonccissees.

5. Geeshsha Maxaafay saynisiyaara moggottiyoogaa bessiya leemisoy awugee?

⁵ Geeshsha Maxaafay tumuppe Xoossaa Qaala gidiyoogaa nuuni ammanana danddayiyo daro gaasoy deꞌees. Issi gaasoy, Geeshsha Maxaafay saynisiyaara moggottiyoogaa. Beni wode saꞌa yuushuwan deꞌiya asay biittaa issibay tuuqiis giidi qoppees. Leemisuwau, Arggo bagga Afirkkan asay issi wode, biittaappe bollaara 3,500too, biittaappe garssaara qassi 3,500too xaaxettida shooshshay biittaa tuuqidobadan ammanees. Gidikkokka, saynisiyaara moggottiya hanotan, 3,500ppe dariya layttaappe kase, Geeshsha Maxaafaa xaafidaageetuppe issoy Xoossay ‘saꞌaa aybakko baynnasan kaqqidoogaa’ xaafiis.—Iyyooba 26:7.

6. Geeshsha Maxaafay Xoossaappe yiidoogau aybippenne aadhiya naqaashay aybee?

⁶ Geeshsha Maxaafay sinttanaabaa yootin bali baynnan polettidabay i tumuppe Xoossaappe yiidoogau aybippenne aadhiya naqaasha. Hiraagaa yootiya asatuppe dumma hanotan, Xoossay sinttanaabaa tumuppe erees; i yootidobay ubbay ubbatoo polettees.

7. Beni wode polettida Geeshsha Maxaafaa hiraagatuppe issoti issoti awugeetee?

⁷ Geeshsha Maxaafaa hiraagatuppe xeetan qoodettiyaageeti beni wode polettidosona. Leemisuwau, Yesuusi yelettanaappe 700 layttaa kasetidi i Beetaliheeme kataman yelettanaagaa Geeshsha Maxaafay geeshshidi yootiis; polettidabaykka hegaa. (Mikiyaasa 5:2; Maatiyoosa 2:3-9) Yesuusa xeelliyaagan odettida daro hiraagaa gujjin, i geelaꞌeeppe yelettanaageenne wurssettan 30u biran a aatti immanaagee Geeshsha Maxaafan kasetidi odettiis. He hiraagatikka polettidosona. Ayba asinne hegaa malabaa kaseti yootana danddayennaagee qoncce!—Isiyaasa 7:14; Zakkaariyaasa 11:12, 13; Maatiyoosa 1:22, 23; 27:3-5.

8. Ha wodiyan polettiiddi deꞌiya Geeshsha Maxaafaa hiraagatuppe amaridaageeti awugeetee? Eti ay boxooxissiyoonaa?

⁸ Geeshsha Maxaafaa hiraagati daroti nu wodiyan polettiiddi deꞌoosona. Hegeetuppe  amaridaageeti kaallidi deꞌiyaageeta.

•   “Deree deriyaa bolli [olan], kawotettai kawotettaa bolli denddana. Biittai wolqqappe qaaxxiyoogee, daro sohuwan koshai, wurssiya harggee yaana.”—Luqaasa 21:10, 11.

•   ‘Makkalay darana.’—Maatiyoosa 24:12.

•   “Wurssetta gallassi . . . asati banttana siiqiyaageeta, miishshaa siiqiyaageeta, . . . banttana yelidaageetuyyo azazettennaageeta, . . . banttana naagennaageeta, kehennaageeta, lo77obaa dosennaageeta, . . . otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.”—2 Ximootiyoosa 3:1-5.

 Ha hanotati ha wodiyan polettiiddi deꞌiyoogaa maayikkii? Geeshsha Maxaafaa hiraagay tumanne bali baynnaagaa gidiyoogee Geeshsha Maxaafay coo maxaafa gidennaagaa bessees. I Xoossaa ayyaanan xaafettida maxaafa!—2 Ximootiyoosa 3:16.

9, 10. Asay Geeshsha Maxaafaa laammanaadan Xoossay paqqadibeennaagaa bessiyay aybee?

⁹ Neessi paabirkkay deꞌees, qassi ne oosanchatuyyo wogaa kessada kaqqadasa goos. Issi morkkee ne xaafidoogaa laammikko waatuutii? Laamettidaagaa giigissikkii? Hegaadankka, Xoossay ba Qaalan, Geeshsha Maxaafan deꞌiya tumaa asay laammanaadan paqqadenna.

¹⁰ Xoossaa Qaalay tamaarissiyoobaa laammanau malidaageetuyyo hanibeenna. Nuuni ha wodiyan deꞌiya Geeshsha Maxaafaa beniigaara gatti xeellikko, eti issi mala. Hegee, daro layttatun Geeshsha Maxaafay laamettibeennaagaa bessees.