TIMIRTTE 30
Neeni Siiqiyoogeeti Hayquwaappe Denddana!
Hayquwaa gaasuwan asay keehi kayyotteesinne azzanees. Geeshsha Maxaafay hayquwaa morkke giyoy hegaassa. (1 Qoronttoosa 15:26) Yihooway he morkkiyaa xayssanaagaa timirtte 27n tamaaradasa. SHin hayqqida asay waananee? Ha timirttiyan, Yihooway qaalaa gelido ufayssiya harabaa, hegeekka hayqqida zawi baynna asawu I merinawu ufayssiya deꞌuwaa immanaagaa tamaaraasa. I eta denttana! Tumu hegee hanana danddayii? Eti saluwan deꞌanawu denddaneeyye, saꞌan deꞌanawu denddanee?
1. Yihooway nu siiqiyo hayqqidaageetussi oottanawu koyiyoobay aybee?
Yihooway hayqqidaageeta denttanawu laamotees. Xoossaa mintti ammaniya Iyyooba giyo bitanee I hayqqin Xoossay A dogennaagaa ammanettiis. I Xoossaa hagaadan giis: “Neeni tana xeesana; xeesin taani [duufuwaappe] neeyyo koyana.”—Iyyooba 14:13-15 nabbaba.
2. Hayqqidaageeti denddanaagaa aybin eriyoo?
Yesuusi saꞌan deꞌiyo wode, hayqqidaageeta denttiyo wolqqaa Xoossay awu immiis. Yesuusi 12 laytta naꞌiyoonne issi amꞌꞌee naꞌaa hayquwaappe denttiis. (Marqqoosa 5:41, 42; Luqaasa 7:12-15) Guutta wodiyaappe guyyiyan, Yesuusa laggee Alꞌꞌaazari hayqqiis. Alꞌꞌaazari hayqqidi moogettoosappe oyddu gallassa gidikkonne, Yesuusi A hayquwaappe denttiis. Yesuusi Xoossaa woossi simmidi, “Al77aazaraa, haa kiya!” yaagiis. Yaatin ‘hayqqida bitanee kiyiis.’ Alꞌꞌaazari paxa deꞌees! (Yohaannisa 11:43, 44) Alꞌꞌaazara dabbotinne laggeti ay keena ufayttidaakko qoppa!
3. Neeni siiqiyo hayqqidaageetu hidootay aybee?
‘Hayqqidaageeti denddanaagaa’ Geeshsha Maxaafay yootees. (Oosuwaa 24:15) Yesuusi beni hayquwaappe denttidoogeeti saluwaa bibookkona. (Yohaannisa 3:13) I eti saꞌan deꞌanaadan denttiis; etikka hegan ufayttidosona. Hegaadankka, Yesuusi zawi baynna asay gannate saꞌan merinawu ufayttidi deꞌanaadan mata wode eta hayquwaappe denttana. Asi eta hassayana xayikkonne, Xoossay hassayiyo ubbata hayquwaappe denttanaagaa Yesuusi yootiis.—Yohaannisa 5:28, 29.
LOYTTA AKEEKA
Hayqqidaageeti denddana danddayiyoogaa, qassi denddanaagaa Geeshsha Maxaafaappe naqaashaa akeeka. Denddoy nena waati mintettananne neeni hidootaa wottanaadan oottana danddayiyaakko akeeka.
4. Yesuusi hayqqidaageeta denttana danddayiyoogaa bessiis
Yesuusi ba laggiyaa Alꞌꞌaazarawu oottidobaa loytta akeeka. Yohaannisa 11:14, 38-44 nabbabite; yaatidi ha oyshata tobbite:
-
Alꞌꞌaazari hayqqidoogaa nuuni aybin eriyoo?—Paydo 39 xeella.
-
Alꞌꞌaazari saluwaa biidaba gidiyaakko, Yesuusi I saꞌan deꞌanaadan oottana gaada qoppay?
5. Hayqqida daroti denddana!
Mazamure 37:29 nabbabite; yaatidi ha oyshaa tobbite:
-
Hayquwaappe denddiya zawi baynna asati awan deꞌanee?
Yesuusi Yihoowawu goynnidaageetuppe hara darotakka denttana. Oosuwaa 24:15 nabbabite; yaatidi ha oyshaa tobbite:
-
Hayquwaappe ooni denddin beꞌanawu koyay?
Ane hagaa qoppa: Aaway ba naꞌaa xiskkuwaappe denttiyoogee metennaagaadan Yesuusikka issi ura hayquwaappe denttanaagee metenna
6. Denddoy nena mintettananne neeni hidootaa wottanaadan oottana
Geeshsha Maxaafay Yaaꞌiroosa naꞌeebaa yootiyoobay kayyottida daro asaa minttettiis. He tumu taarikiyaa Luqaasa 8:40-42, 49-56n nabbabite.
Yesuusi Yaaꞌiroosa naꞌiyo denttanaappe kase I aawaa hagaadan giis: “Yayyoppa; ammano xalaalaa ammana.” (Paydo 50 xeella.) Kaallidi deꞌiya hanotatun dendduwaa hidootay nena waati maaddana danddayii?
-
Neeni siiqiyo uri hayqqiyo wode
-
SHemppo miyaabi nena gakkiyo wode
BIIDUWAA beꞌite; yaatidi kaallidi deꞌiya oyshaa tobbite.
-
Felisiti aawaanne aayyiyo dendduwaa hidootay waati minttettidee?
ISSI ISSI ASAY HAGAADAN GEES: “Hayqqidaageeti zaarettidi deꞌana giidi ammananawu metees.”
-
Ne qofay aybee?
-
Hayqqidaageeti denddanaagaa qonccissanawu ay xiqise goꞌettana danddayay?
AY AKEEKADII?
Zawi baynna asay hayquwaappe denddanaagaa Geeshsha Maxaafay yootees. Yihooway eti zaarettidi deꞌanaadan koyees, qassi eta denttanaadan I Yesuusawu wolqqaa immiis.
Zaaretuwaa
-
Yihoowaynne Yesuusi hayqqidaageeta denttanawu laamotiyoogaa nuuni aybin eriyoo?
-
Hayquwaappe denddiya zawi baynna asay saluwan deꞌaneeyye saꞌan deꞌanee? Neeni hegaadan giyoy aybissee?
-
Ne siiqiyoogeeti hayquwaappe denddanaagaa neeni ammananaadan oottiyaabay aybee?
PILGGA
Kayyuwaa danddayanawu ne ay oottanaakko akeeka.
Geeshsha Maxaafay yootiyo maarati kayyottida ura tumuppe maaddiyoonaa?
Siiqiyo uri hayqqiyo wode danddayanawu naati waatiyoogee maaddii?
Hayquwaappe denddidi saluwaa baana uri deꞌii? Denddennaageeti oonee?
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
