TIMIRTTE 38
Deꞌuwaa Imotawu Yihoowa Galata
Deꞌuwan ufayttana danddayiyo darobay deꞌees. Nu deꞌuwan metoy gakkiyo wodekka, harabatun ufayttana danddayoos. Yihooway deꞌuwaa immido gishshawu A galatiyoogaa bessanawu waatana danddayiyoo? Qassi nuuni galatanaadan oottiya ubbabaappe aadhdhiyaabay aybee?
1. Deꞌuwaa imotawu Yihoowa galatana koshshiyoy aybissee?
Deꞌoy nuna siiqiya Aaway Yihooway immidoba gidiyo gishshawu, nuuni A galatana bessees. “De7uwaa pulttoi” A; I paxa deꞌiya ubbabaa medhdhiis. (Mazamure 36:9) “I ba huuphen de7uwaa shemppuwaanne ubbabaa asa ubbaassi immees.” (Oosuwaa 17:25, 28) Yihooway nuuni paxa deꞌanawu koshshiyaabaa immees. Hegaa bollikka, deꞌuwan ufayttanaadan oottiyaabaa I nuussi immiis.—Oosuwaa 14:17 nabbaba.
2. Yihooway deꞌuwaa immido gishshawu A galatiyoogaa bessanawu waatana danddayiyoo?
Neeni ne aayee uluwan tilettoosappe doommidi Yihooway neessi qoppees. Yihooway ba Qaalan xaafissido woosan A ashkkaratuppe issoy hagaadan giis: “Yelettibeenna ta bollaa ne aifee be7iis.” (Mazamure 139:16) Ne shemppoy Yihoowawu keehi alꞌꞌo. (Maatiyoosa 10:29-31 nabbaba.) Ooninne banakka gidin, eriiddi shemppo worikko Yihooway keehi azzanees. a (Kessaabaa 20:13) Nuuni naagettennan nu shemppuwaa daafan yeggiyaabaa oottikko woy haratu shemppuwawu naagettana xayikko Yihooway azzanees. Nuuni nu shemppoykka haratuugeekka qohettennaadan naagettiyo wode, maalaaliya deꞌuwaa immida Yihoowa galatiyoogaa bessoos.
LOYTTA AKEEKA
Yihooway deꞌuwaa immido gishshawu A galatiyoogaa neeni bessana danddayiyo amarida ogeta akeeka.
3. Ne payyatettaa naaga
Nuuni awudenne Yihooway koyiyoobaa oottanawu qaalaa gelido gishshawu, nu deꞌuwan ubbaban awu haggaazanawu koyoos. Hegee nu asatettaa Xoossaayyo yarshshiyoogaa mala. Roome 12:1, 2 nabbabite; yaatidi ha oyshata tobbite:
-
Ne payyatettaa naaganaadan nena denttettana koshshiyaabay aybee?
-
Neeni hegaadan oottana danddayiyo amarida ogeti aybee?
4. Neeni oottiyo ubbaban ooninne qohettennaadan woy hayqqennaadan naagetta
Geeshsha Maxaafay nuuni qohiyaabaa oottennaadan yootees. Neeni qohettennaadan oottana danddayiyo amaridabata akeekanawu BIIDUWAA beꞌite.
Leemiso 22:3 nabbabite; yaatidi kaallidi deꞌiya hanotatun neenikka haratikka qohettennaadan ay oottana danddayiyaakko tobbite.
-
Son.
-
Ooso sohuwan.
-
Ispporttiyaa oottiyo wode.
-
Kaamiyaanne hegaa malabaa laaggiyo woy toggiyo wode.
5. Yelettibeenna naꞌa deꞌuwaa qohoppa
Issi naꞌi ba aayee uluwan dicciyo wode haniya ubbabaa Yihooway xeelliyoogaa Daawiti danttuwan qonccissiis. Mazamure 139:13-17 nabbabite; yaatidi ha oyshaa tobbite:
-
Yihoowa xeelan issi uraa deꞌoy doommiyoy yelettiyo wodeeyye shahaaray aayee uluwan attiyo wodee?
Yihooway Israaꞌeelatussi immido higgee aayotakka yelettibeenna naatakka naagiis. Kessaabaa 21:22, 23 nabbabite; yaatidi ha oyshata tobbite:
-
Issi uri yelettibeenna naꞌa akeekennan worikko, Yihooway waati xeellii?
-
Issi uri eriiddi woriyoogaa shin? b
-
Xoossaa qofaa neeni aybidan xeellay?
Deꞌoy keehi alꞌꞌo gidiyoogaa akeekiya maccaasiyaakka, shahaaraa kesissiyoogaappe harabaa kuuyana danddayennabadan qoppana danddayawusu. Isiyaasa 41:10 nabbabite; yaatidi ha oyshata tobbite:
-
Issi maccaasiyaa shahaaraa kesissanaadan harati giddikko, ooni maaddanaadan oychchana bessii? Aybissi?
ISSI ISSI ASAY HAGAADAN GEES: “SHahaaraa kesissiyoogee woy aggiyoogee issi maccaasee maata—hegee I bollaa.”
-
Yihooway aayee shemppuwaanne yelettibeenna naꞌaagaa alꞌꞌobadan xeelliyoogaa neeni ammananaadan oottiyay aybee?
AY AKEEKADII?
Nuuni Yihooway immido deꞌuwaa dosanaadan, qohennaadaaninne naaganaadan Geeshsha Maxaafay tamaarissees. Nuugawukka haratu deꞌuwawukka hegee hanees.
Zaaretuwaa
-
Asaa deꞌoy Yihoowawu alꞌꞌoba gidiyoy aybissee?
-
Issi uri eriiddi shemppo woriyoogaa Yihooway waati xeellii?
-
Neeni deꞌuwaa imotaa gishshawu Yihoowa galatiyoy aybissee?
PILGGA
Yihooway deꞌuwaa immido gishshawu A galatiyoogaa bessanawu waatana danddayiyoo?
SHahaaraa kesissida issi maccaaseeyyo Xoossay atto gaanee? giya oyshaa zaaruwaa akeeka.
“SHahaaraa Kesissiyoogaa Xeelliyaagan Geeshsha Maxaafay Woygii?” (Nu websaytiyan deꞌiyaaba)
Nuuni nu shemppuwaa daafan yeggennaban allaxxanawu deꞌuwaa xeelliyaagan Xoossaa qofaa waati goꞌettana koshshiyaakko akeeka.
“Nena Daafan Yeggana Danddayiya Ispporttiyaa Oottiyoogee Bessiyaabee?” (Beegottite! huuphe yohuwaa)
Issi uri hayqqanawu qoppikko shin? Geeshsha Maxaafay waati maaddana danddayiyaakko akeeka.
a Yihooway bantta wozanan azzanidaageetussi keehi qoppees. (Mazamure 34:18) I asay hayqqanawu koyanaadan oottiya azzanuwaa akeekees, qassi eta maaddanawu koyees. A maadoy issi uri hayqqanawu qoppiyoogaa agganawu minnanaadan waati maaddana danddayiyaakko akeekanawu, ha timirttiyan Pilgga giyaagaa giddon “Taani Hayqqanawu Koyays—Hayqqanawu Qoppiyoogaa agganawu Geeshsha Maxaafay Tana Maaddana Danddayii?” giya qofaa nabbaba.
b SHahaaraa kesissidaageeti bantta mooruwan keehi zilꞌꞌettana koshshenna—Yihooway etawu atto gaana danddayees. Gujjada eranawu, ha timirttiyan Pilgga giyaagaa giddon “SHahaaraa Kesissiyoogaa Xeelliyaagan Geeshsha Maxaafay Woygii?” giya qofaa nabbaba.
Hageeta Beꞌadii?
ASAY DAROTOO OYCHIYO OYSHATA
Yihoowa Markkati Geeshsha Maxaafaa Xannaꞌissiyoy Ayba Ogiyaanee?
Yihoowa Markkati miishsha qanxxissennan xannaꞌissiyo prograamiyan, Geeshsha Maxaafaa birshshettaa awugaakka goꞌettana danddayaasa. Ne so asa ubbaynne ne laggetikka nenaara xannaꞌanaadan shoobbana danddayaasa.
