1. Nagaranchcha asi eesuwan oyqqettiyo geeman deꞌiya piree aybee?

 “MAATAY deꞌiyo ooninne geeman deꞌiya piriyan gelees.” Asay maataa suure goꞌettennaagaa bessiya ha qofay 19tta xeetu layttan issi maccaasiyaa xaafido danttuwaappe ekettidaba. Nagaranchcha asi he piriyan eesuwan oyqqettiyoogee azanttiyaaba. Asi deꞌido wode ubban “issi asi bau de7iya haariyo maataa hara asa qohanau” goꞌettiyoogee qoncce. (Eranchchaa 8:9) Siiqennaagaa bessiya ogiyan maataa goꞌettiyoogee asaa bolli qoodin wurenna metoy gakkanaadan oottiis.

2, 3. (a) Yihooway ba wolqqaa goꞌettiyoogaa xeelliyaagan maalaalissiyaabay aybee? (b) Nu wolqqay aybaa xaaxi waaxii, qassi nuuni he wolqqa ubbaa waati goꞌettana koshshii?

² Gidoppe attin, zawi baynna wolqqay deꞌiyo Xoossaa Yihooway ba wolqqaa bessenna ogiyan mule goꞌettennaagee garamissennee? Hagaappe kasetiya shemppotun nuuni beꞌidoogaadan, I medhdhanawu, xayssanawu, naaganawu, woy kase sohuwawu zaaranawu goꞌettiyo ba wolqqaa I siiquwan halchchido halchchuwaadan muletoo goꞌettees. Nuuni I ba wolqqaa goꞌettiyo ogiyaa wotti dentti qoppiyo wode, kaseegaappe aaruwan akko shiiqoos. Hegee qassi nu wolqqaa goꞌettiyoogan nuuni ‘Xoossa milatanawu’ baaxetanaadan nuna denttettana danddayees. (Efisoona 5:1) SHin pattenna asawu ayba wolqqi deꞌii?

³ Asay ‘Xoossaa leemisuwaaninne’ A milatidi merettidoogaa hassaya. (Doomettaabaa 1:26, 27) Yaatiyo gishshawu, nuussikka amarida wolqqay deꞌees. Nu wolqqay issibaa poliyoogaa woy oottiyoogaa, harata haariyoogaa woy haratu bolli deꞌiya maataa, harata, ubba qassi nuna siiqiyaageeta issibawu denttettiyoogaa, bollaa minotettaa (wolqqaa), woy nuuyyo deꞌiya aquwaa xaaxi waaxiyaagaa gidana danddayees. Yihoowabaa Mazamurawee hagaadan giis: “De7uwaa pulttoi ne achchan de7ees.” (Mazamure 36:9) Hegaa gishshawu, nuussi deꞌiya  wolqqa ubbawu pulttoy Xoossaa. Yaatiyo gishshawu, nuuni he wolqqaa Xoossaa ufayssiya ogiyan goꞌettanawu koyoos. Nuuni waatidi hegaadan oottana danddayiyoo?

4, 5. (a) Wolqqaa suure goꞌettanawu maaddiya waannabay aybee, qassi Xoossay wolqqaa goꞌettiyo ogee hegaa waati bessii? (b) Nuuni nu wolqqaa suure goꞌettanaadan siiqoy nuna waati maaddanee?

⁴ Wolqqaa suure goꞌettanawu maaddiya waannabay siiquwaa. Xoossay wolqqaa goꞌettiyo ogee hegaa bessennee? Xoossaa waanna oyddu eeshshata, hegeetikka wolqqaa, suure pirddaa, aadhdhida eratettaanne siiquwaa SHemppo 1n tobbidoogaa hassaya. Oyddu waanna eeshshatuppe aaruwan qoncciyaagee awugee? Siiquwaa. “Xoossai siiqo” gidiyoogaa 1 Yohaannisa 4:8y yootees. Ee, Yihoowa waanna eeshshay siiquwaa; I ubbabaa siiqoy denttettin oottees. Hegaa gishshawu, I ba wolqqaa ubbatoo siiqoy denttettiininne bana siiqiyaageeta maaddiyaabaa oottanawu goꞌettees.

⁵ Nuuni nu wolqqaa suure goꞌettanaadan siiqoy nunakka maaddana. Qassi, Geeshsha Maxaafay, siiqoy ‘keha’ gidiyoogaanne ‘baassi bessennabaa oottennaagaa’ yootees. (1 Qoronttoosa 13:4, 5) Yaatiyo gishshawu, nu maataa garssan deꞌiyaageetuyyo meqettaa iitennaadan siiqoy nuna diggees. Ubba qassi, nuuni harata bonchchuwan oyqqoosinne nu koyiyoobaappe eti koyiyoobaa kaseyoos.—Piliphphisiyuusa 2:3, 4. 

6, 7. (a) Xoossawu yayyiyoogee aybee, qassi wolqqaa bessenna ogiyan goꞌettennaadan naagettana mala he eeshshay nuna waati maaddii? (b) Xoossaa azzanttiyaabaa oottennan agganawu yayyiyoogeenne Xoossaa siiqiyoogee waani gayttiyaakko leemisuwan qonccissa.

⁶ Nuuni wolqqaa bessiya ogiyan goꞌettanaadan maaddana danddayiya, Xoossawu yayyiyo eeshshaara siiqoy gayttees. He eeshshay aybissi maaddii? Leemiso 16:6y, ‘asi Yihoowayyo yayyiyoogan iitabaa oottennan naagettiyoogaa’ yootees. Nuuni naagettana koshshiyo iita oosotuppe issoy wolqqaa bessenna ogiyan goꞌettiyoogaa. Nu maataa garssan deꞌiyaageeta nuuni bessenna ogiyan oyqqennaadan Xoossawu yayyiyoogee nuna naagees. Aybissi? Hegaa mala asaa oyqqiyo hanotan nuuni  Xoossaa sinttan oyshettiyoogaa eriyoogee hegaawu issi gaaso. (Nahimiyaa 5:1-7, 15) SHin nuuni Xoossawu yayyiyoogaa bessiyoy hegaa xallaana gidenna. Geeshsha Maxaafan “yashshaa” geetettidi birshshettida qaalay Xoossaa bonchchidi yayyiyoogaa darotoo bessiyaaba. Geeshsha Maxaafay yayyiyoogaa Xoossaa siiqiyoogaara gattees. (Zaarettido Wogaa 10:12, 13) Bonchchiyo gishshawu yayyiyoogee nu bolli iitabay gakkees giidi yayyiyoogaa gidennan, Xoossaa wozanappe siiqiyo gishshawu, A azzanttiyaabaa oottennan agganawu yayyiyoogaa giyoogaa.

⁷ Leemisuwawu, issi guutta naꞌay ba aawaara gayttiyo loꞌꞌo hanotaa qoppa. He naꞌay ba aaway kehanne siiqiyaagaa gidiyoogaa akeekees. Hegaa bollikka, naꞌay ba aaway baappe ay koyiyaakkokka erees, qassi moorikko ba aaway bana seeranaagaa erees. Naꞌay ba aawawu yashshan kokkorenna. SHin, I ba aawaa wozanappe siiqees. He naꞌay ba aawan nashshissiyaabaa oottiyoogan ufayttees. Xoossawu yayyiyoogeekka hegaa mala. Nuuni saluwan deꞌiya nu Aawaa Yihoowa siiqiyo gishshawu, A ‘wozanay keehippe seelettanaadan’ oottiya aybanne oottenna mala yayyoos. (Doomettaabaa 6:6) Nuuni A wozanaa ufayssanawu koyoos. (Leemiso 27:11) Nuuni nu wolqqaa suure goꞌettanawu koyiyoy hegaassa. Nuuni hegaadan waati oottana danddayiyaakko ane pilggoos.

8. (a) Son azinawu deꞌiya maatay aybee, qassi hegaa I waati goꞌettana bessii? (b) Azinay ba machchiyo bonchchiyoogaa waati bessana danddayii?

⁸ Ane so asaa giddon deꞌiya hanotaa qoppa. Efisoona 5:23y ‘azinay ba maccaaseeyyo huuphe’ gidiyoogaa yootees. Azinay Xoossay immido ha maataa waati goꞌettana bessii? Geeshsha Maxaafay azinati bantta ‘maccaasati daafuranchcha mereta gidiyoogaa eridi etaara issippe deꞌanaadaaninne eta bonchchanaadan’ yootees. (1 PHeexiroosa 3:7) “Bonchchuwaa” geetettidi birshshettida Giriiketto sunttay “xoqqu ootti xeelliyoogaa woy nashshiyoogaa” giyoogaa. He qaalay ‘imotanne’ “daro al77o” geetettidi birshshettiis. (Oosuwaa 28:10; 1 PHeexiroosa 2:7) Ba  keettaayyiyo bonchchiya azinay O mule shocenna, woy qassi O ziqqi oottenna woykko A bana pattennabadan xeellanaadan oottiyaabaa haasayenna. Hegaappe dumma ogiyan, I O xoqqu ootti xeelleesinne bonchchuwan oyqqees. Banttarkka deꞌiyo wodekka haratuura deꞌiyo wodekka, I haasayiyoobaaninne oottiyooban O xoqqu ootti xeelliyoogaa bessees. (Leemiso 31:28) Hegaa mala azinaa A machchiyaa siiqiyoogaanne bonchchiyoogaa xalla gidennan, Xoossaykka A nashshees.

9. (a) Son machcheeyyo deꞌiya maatay aybee? (b) Machchiyaa ba azinaa kaafanawu ba eraa goꞌettanaadan O maaddana danddayiyaabay aybee, qassi hegee ayba ayfe demissii?

⁹ Machchotuyyookka son amarida maatay deꞌees. Bantta azinatu maataa bonchchidi azinata loꞌꞌobawu minttettiya woy eti maarabaa kuuyanaadan maaddiya, Xoossawu aqida macca asatubaa Geeshsha Maxaafay yootees. (Doomettaabaa 21:9-12; 27:46–28:2) Machchiyaa ba azinaappe gooba gidana danddayawusu woy awu baynna eray iyyo deꞌana danddayees. Gidikkokka, A ba azinaa ‘bonchchananne’ ‘Godaayyo haarettiyoogaadan awu haarettana’ bessees. (Efisoona 5:22, 33) Maccaasiyaa Xoossaa ufayssanawu qoppiyoogee A ba azinaa kariyoogaappe woy A bolli xalttamanawu maliyoogaappe ba eraa ba azinaa kaafanawu goꞌettanaadan maaddana danddayees. Hegaa mala “aadhdhida eranchcha maccaasiyaa” ba azinaara hashetada oottiyoogan ba soo asaa minttawusu. Yaatiyoogan, A Xoossaara sarotettan deꞌawusu.—Leemiso 14:1.

10. (a) Yelidaageetuyyo Xoossay immido maatay aybee? (b) “Seeraa” giyo qaalaa birshshettay aybee, qassi hegee ayba ogiyan imettana koshshii? (Tohossa qofaakka xeella.)

¹⁰ Yelidaageetuyyookka Xoossay maataa immiis. Geeshsha Maxaafay hagaadan giidi zorees: “Aawatoo, intte intte naata Godaa seeraaninne zoriyan dichchiteppe attin, eta hanqqetissoppite.” (Efisoona 6:4) Geeshsha Maxaafan “seeraa” giya qaalay “dichchiyoogaa, loohissiyoogaa, kaaletuwaa immiyoogaa” geetettana danddayees. Naatuyyo seeray koshshees; eti ufayttiyaageeta gidanawu etawu qoncce kaaletoynne maaray deꞌana bessees. Geeshsha Maxaafay hegaa mala seeraa woy kaaletuwaa  siiquwaara gattees. (Leemiso 13:24) Yaatiyo gishshawu, “qaixaariyan qaxxayiyoogee” woy seeriyoogee naata qofan woy asatettan mule qohana koshshenna. a (Leemiso 22:15; 29:15) Yelidaageeti siiquwaa bessennan meqettaa iitidi woy hanotaadan laamettenna seeraa seeriyoogee bantta maataa bessenna ogiyan goꞌettiyoogaa bessiyaaba; qassi hegee naati ayyaanan liiqanaadan oottana danddayees. (Qolasiyaasa 3:21) Hara baggaara qassi, bessiya ogiyan seeriyoogee naati eta aawaynne aayyiyaa eta siiqiyoogaanne eta eeshshaabaa qoppiyoogaa akeekanaadan oottees.

11. Naati bantta wolqqaa waati suure goꞌettana danddayiyoonaa?

¹¹ Naatubaa shin? Eti bantta wolqqaa waatidi suure goꞌettana danddayiyoonaa? Leemiso 20:29y “yelagatu bonchchoi eta wolqqaa” gidiyoogaa yootees. Yelagati bantta minotettaanne wolqqaa banttana ‘Medhdhidaagawu’ haggaazanawu goꞌettiyoogaappe aadhdhiya hara loꞌꞌo ogee baynnaagee qoncce. (Eranchchaa 12:1) Yelagati eti oottiyoobay eta aawaa woy aayyiyo ufayssana danddayiyoogaa hassayana koshshees. (Leemiso 23:24, 25) Naati banttana yelida, Xoossawu yayyiyaageetuyyo azazettiyo wodenne loꞌꞌo deꞌuwaa deꞌiyo wode, eta yelidaageetu wozanay ufayttees. (Efisoona 6:1) Hegee “Xoossaa daro ufaissees.”—Qolasiyaasa 3:20.

12, 13. (a) Cimati gubaaꞌiyan banttawu deꞌiya maataa waati xeellana koshshii? (b) Cimati wudiyaa kehatettan oyqqana koshshiyoy aybissakko leemisuwan qonccissa.

¹² Kiristtaane gubaaꞌiyaa kaalettiyaageeta Yihooway immiis. (Ibraawe 13:17) Ha kaalettiyaageeti Xoossay banttawu immido maataa dorssatussi koshshiyaabaa kunttanawunne ayyaanaaban eti diccanaadan maaddanawu goꞌettana bessees.  Cimatuyyo imettida maatay eti bantta mala Kiristtaaneta huqqunnanaadan oottii? Mule oottenna! Cimati gubaaꞌiyan banttawu deꞌiya maataa bessiyaagaadan xeellananne banttana ziqqi oottana koshshees. (1 PHeexiroosa 5:2, 3) Geeshsha Maxaafay cimata hagaadan gees: “Xoossay ba Naꞌaa suuttan wozido Xoossaa gubaaꞌiyaa heemmite.” (Oosuwaa 20:28, NW) Hagee wudiyaa giddon deꞌiya ubbaa kehatettan oyqqanaadan oottiyaaba.

¹³ Nuuni hegaa kaallidi deꞌiya leemisuwan qonccissana danddayoos. Issi mata laggee alꞌꞌobaa neeni naaganaadan oychchees. Neeni naaganaadan ne laggee immiyoobay I daro miishshan shammidoba gidiyoogaa eraasa. Neeni naagettada hegee moorettennaadan akeekan oyqqiyoogee qoncce. Hegaadan, A giddon deꞌiyaageeti dorssan leemisettido, tumuppe alꞌꞌo gidida gubaaꞌiyaa naaganaadan Xoossay cimatuyyo aawatettaa immiis. (Yohaannisa 21:16, 17) Yihooway dorssata keehi siiqiyo gishshawu, ba mexi issi Naꞌaa Yesuus Kiristtoosa alꞌꞌo suuttan eta woziis. Yihooway ba dorssatuyyo aybippenne aadhdhiya waagaa qanxxiis. Ashkke gidida cimati hegaa akeekidi Yihoowa dorssata kehatettan oyqqoosona.

14. Haasayiyoobawu ayba wolqqay deꞌii?

¹⁴ ‘Haasayiyoobawu wottiyoonne woriyo wolqqay’ deꞌiyoogaa Geeshsha Maxaafay yootees. (Leemiso 18:21, NW) Haasayiyoobay daro qohuwaa gattana danddayees. Qoppennan haasayiyooban woy boriyan qohettibeenna asi mule baynnaagee qoncce. SHin haasayiyoobawu pattiyo wolqqaykka deꞌees. Leemiso 12:18y ‘aadhdhida eranchchaa inxxarssay pattiyoogaa’ yootees. Ee, minttettiya haasayay masunttaa pattiya zayte mala gidana danddayees. Amarida leemisota ane beꞌa.

15, 16. Haasayiyooban harata ayba ogetun minttettana danddayiyoo?

¹⁵ Koyro Tasalonqqe 5:14y ‘yayyiyaageeta [“unꞌꞌettidaageeta,” NW] minttettanaadan’ zorees. Ee, Yihoowawu ammanettidi oottiyaageetikka issi issitoo unꞌꞌettana danddayoosona.  Nuuni eta waati maaddana danddayiyoo? Yihooway eta xoqqu ootti xeelliyoogaa eti akeekanaadan maaddanawu eti oottidobaa yootada wozanappe galata. ‘Wozanay meꞌꞌidoogeetuyyoonne ayyaanan liiqidaageetuyyo’ Yihooway wozanappe qoppiyoogaanne eta siiqiyoogaa qonccissiya Geeshsha Maxaafaa xiqiseta etayyo yoota. (Mazamure 34:18) Haasayiyoobawu deꞌiya wolqqaa nuuni harata minttettanawu goꞌettiyo wode, “kayyottidaageeta minttettiya” qarettiya nu Xoossaa milatiyoogaa bessoos.—2 Qoronttoosa 7:6.

¹⁶ Haratussi keehi koshshiyo wodiyan eta minttettanawukka haasayiyoobawu deꞌiya wolqqaa goꞌettana danddayoos. Nu mala Kiristtaaniyawu I siiqiyo uri hayqqidee? Qarettidi haasayiyoobay kayyottida uraa minttettana danddayees. Taani aynne pattikke giya cimidaageeti deꞌiyoonaa? Cimidaageeta xoqqu ootti xeelliyoogaanne nashshiyoogaa bessiya, etawu qoppidi haasayiyoobay eta minttettana danddayees. Issi uri caddi oyqqiya harggiyaara baaxetiiddi deꞌikko, silkkiyan woy akko baada keha qaalaa ayyo haasayiyoogee I minettanaadan keehi maaddana danddayees. Haasayiyoobawu deꞌiya wolqqaa ‘minttettiya loꞌꞌo qaalaa’ haasayanawu nuuni goꞌettiyo wode,  nuna medhdhidaagee keehi ufayttanaagee qoncce!—Efisoona 4:29.

17. Haasayiyoobaa harata maaddanawu goꞌettana danddayiyo keehi koshshiya ogee aybee, qassi yaatana bessiyoy aybissee?

¹⁷ Nuuni Xoossaa Kawotettaa mishiraachchuwaa haratuyyo yootanawu goꞌettiyoogaappe aaruwan haasayiyoobawu deꞌiya wolqqaa goꞌettana danddayiyo hara ogee baawa. Leemiso 3:27y ‘nuuyyo wolqqay deꞌishin, metootidaagawu loꞌꞌobaa oottiyoogaa nuuni aggennaadan’ yootees. Nuuni deꞌuwaa ashshiya mishiraachchuwaa haratuyyo yootana bessees. Yihooway nuuyyo kehatettan immido keehi koshshiyaabaa haratussi yootennan aggiyoogee likke gidenna. (1 Qoronttoosa 9:16, 22) SHin nuuni ha oosuwaa ay keenaa oottanaadan Yihooway nuuppe koyii?

18. Yihooway nuuppe koyiyoobay aybee?

¹⁸ Nuuni Yihoowa siiqiyoogee loytti haggaazanaadan nuna denttettees. Hagaa xeelliyaagan Yihooway nuuppe koyiyoobay aybee? Nu hanotay ayba gidinkka, nuuni ubbay kaallidi deꞌiyaabaa oottana danddayoos: “Intte oottiyo ooso ubbaa asau gidennan Godau oottiyoogaadan, wozanappe oottite.” (Qolasiyaasa 3:23) Ubbaappe aadhdhiya azazuwaa xeelliyaagan yootiyo wode Yesuusi hagaadan giis: “Intte Godaa intte Xoossaa intte kumetta wozanaappe, intte kumetta shemppuwaappe, intte kumetta qofaappe, intte kumetta wolqqaappe siiqite.” (Marqqoosa 12:30) Ee, Yihooway nuuni ubbay kumetta shemppuwaappe A siiqanaadaaninne ayyo haggaazanaadan koyees.

19, 20. (a) SHemppoy wozanaa, qofaanne wolqqaa xaaxi waaxiyaaba gididaashin, Marqqoosa 12:30n deꞌiya harabati aybissi odettidonaa? (b) Kumetta shemppuwaappe Yihoowawu haggaaziyoogaa giyoogee woygiyoogee?

¹⁹ Kumetta shemppuwaappe Xoossawu haggaaziyoogaa giyoogee woygiyoogee? SHemppoy issi uraa asatettaa, abbiyaanne era ubbaa gujjin, A kumetta oonatettaa bessiyaaba. SHemppoy wozanaa, qofaanne wolqqaa xaaxi waaxees; yaatin, Marqqoosa 12:30n deꞌiya harabay aybissi odettidee? Issi leemisuwaa ane qoppa. Beni wode, issi uri bana (ba shemppuwaa) aylletettawu bayzzana danddayees. Yaatikkonne, he ashkkaray ba godawu wozanappe oottennan aggana danddayees; I ba kumetta wolqqaa woy ba kumetta qofaa ba goday koyiyoogaadan goꞌettennan aggana danddayees. (Qolasiyaasa 3:22) Hegaa gishshawu, nuuni xibennan Xoossawu haggaazana bessiyoogaa qonccissanawu Yesuusi he ubbabaa yootidoogee erettidaba. Xoossawu kumetta shemppuwaappe haggaaziyoogee, nuuni nu wolqqaanne abbiyaa nuussi danddayettida keenan ayyo oottanawu goꞌettiyoogaa.

²⁰ Kumetta shemppuwaappe haggaaziyoogaa giyoogee nuuni ubbay haggaazuwan aattiyo wodeenne goꞌettiyo wolqqay issi lagge gidana bessees giyoogee? Issi uraa hanotaynne A wolqqay haraagaappe dumma gidiyo gishshawu, issi lagge gidana  danddayenna. Leemisuwawu, tunttaara deꞌiya payya yelagay cimatettaa gaasuwan abbee ixxido uraagaappe daro saatiyaa haggaazana danddayees. So asaara gayttidaagan aawatetti baynna, aqo oyqqibeenna uri so asawu koshshiyaabaa kunttiyo aawatettay deꞌiyo uraagaappe daruwaa oottana danddayees. Nuuni loytti haggaazanawu nuuyyo wolqqay deꞌiyaabanne hanotay injjetiyaaba gidikko, nuuni keehi galatana bessees! Hagaa xeelliyaagan nu hanotaa haratuugaara geeddarissidi eta boranawu nuuni mule koyennaagee qoncce. (Roome 14:10-12) Nu wolqqaa harata minttettanawu goꞌettanawu koyoos.

21. Nu wolqqaa goꞌettiyo aybippenne aadhdhiya ogee aybee?

²¹ Ba wolqqaa suure goꞌettiyoogan Yihooway wottiyoobi baynna leemiso. Nuuni nagaranchcha gidikkonne, danddayettida ubban A milatanawu koyoos. Nu maataa garssan deꞌiyaageeta bonchchuwan oyqqiyoogan nu wolqqaa suure goꞌettana danddayoos. Qassi, nuuni polanaadan Yihooway nuuyyo immido deꞌo ashshiya sabbakuwaa oosuwaa kumetta shemppuwaappe oottanawu koyoos. (Roome 10:13, 14) Neeni neessi danddayettida ubban ne kumetta shemppuwaappe ayyo oottiyo wode Yihooway ufayttiyoogaa hassaya. Ne hanotaa akeekiyaanne nena siiqiya Xoossawu neeyyo danddayettida keenan wozanappe oottanawu neeni koyiyoogee erettidaba. Ne wolqqaa neeni goꞌettiyo hegaappe aadhdhiya ogee mule baawa.