1, 2. Xoossaa loꞌꞌotettay ay keena daroo, qassi Geeshsha Maxaafay ha eeshshaa waati loytti qonccissii?

 DARO wodiyawu siiqettiya laggeti away wulliyo wode pooꞌiya ufayssiya pooꞌuwan karen issippe qumaa miiddi beꞌiyoobaa ufayssan nashshoosona, miiccoosonanne haasayoosona. Etappe haahuwan, issi goshshanchchay ba gadiyaa xeelliiddi, shullida kattan saꞌay gaappottin iray bukkiyoogaa doommido gishshawu ufayttidi noocu gees. Harasan, issi azinaynne machchiyaa eta guutta naꞌay tuchchanawu maliyoogaa beꞌiyoogan ufayttoosona.

² Eti erin woy erana xayin, he asati ubbaykka Xoossaa Yihoowa loꞌꞌotettaappe goꞌettiiddi deꞌoosona. Haymaanootiyaa kaalliya issi issi asay darotoo zaari zaaridi “Xoossay loꞌꞌo” gees. Geeshsha Maxaafay hegaappe aaruwan mintti qonccissees. Hagaadan gees: “A loꞌꞌotettay keehi daro!” (Zakkaariyaasa 9:17, NW) SHin he qaalatu suure birshshettaa eriyaageeti ha wodiyan guutta milatoosona. Xoossaa Yihoowa loꞌꞌotettay aybiira gayttidabee, qassi he eeshshay nuna huuphiyan huuphiyan waati maaddii?

3, 4. Loꞌꞌotettay aybee, qassi Yihoowa loꞌꞌotettay Xoossaa siiquwaa loytti qonccissees gaana danddayiyoy aybissee?

³ Ha wodiyan deꞌiya daro doonatun, “loꞌꞌotettaa” giya qaalay xaaxi waaxi qonccissiya qaala. Gidoppe attin, Geeshsha Maxaafan qonccidaagaadan loꞌꞌotettay xaaxi waaxi qonccissiya qaala gidenna. He qaalay waanna qonccissiyoobay suuretettaanne kandduwaa geeshshatettaa. Loꞌꞌotettay Yihooway oottiyo ubbaban qonccees gaana danddayoos. A wolqqaa, A suure pirddaanne A aadhdhida eratettaa gujjin, A eeshshati ubbay  keehi loꞌꞌo. SHin, loꞌꞌotettay Yihoowa siiquwaa loytti qonccissees gaana danddayettees. Aybissi?

⁴ Loꞌꞌotettay haratuyyo oottiyooban loytti qoncciya eeshsha. Loꞌꞌo asa gidiyoogee xillo asa gidiyoogaappe keehi ufayssiyoogaa kiitettida PHawuloosi qonccissiis. (Roome 5:7) Xillo asi higgee yootiyoogaadan ammanettidi oottanaagee sirissenna; shin loꞌꞌo asi hegaappe aarobaa oottees. Kasetidi harata maaddiyo ogeta I koyees. Nuuni beꞌanaagaadan, Yihooway tumukka hegaadan oottiyoogan loꞌꞌo. He loꞌꞌotettawu denddoy zawi baynna Yihoowa siiquwaa gidiyoogee qoncce.

5-7. Yesuusi “lo77o tamaarissiyaagoo” geetetti xeegettanawu koyibeennay aybissee, qassi Yesuusi hegan mintti yootido gita tumay aybee?

⁵ Loꞌꞌotettankka Yihooway ooppenne aadhdhees. Yesuusi hayqqanaappe guuttaa kasetidi, issi bitanee akko shiiqidi A “lo77o tamaarissiyaagoo” giis. Yesuusi hagaadan zaariis: “Aissi tana lo77uwau gai? Xoossaa xalaalaappe attin, hara lo77oi ooninne baawa.” (Marqqoosa 10:17, 18) He zaaroy neeyyo akeekanawu metana danddayees. Yesuusi he bitaniyaa seeridoy aybissee? Yesuusi ‘loꞌꞌo tamaarissiyaagaa’ gidennee?

⁶ He bitanee sabbanawu “Lo77o tamaarissiyaagoo” giidi bonchcho sunttaa goꞌettidoogee qoncce. Loꞌꞌo gidiyoogan saluwan deꞌiya ooppenne aadhdhiya ba aawaassi he bonchchoy bessiyoogaa Yesuusi ashkketettan yootiis. (Leemiso 11:2) Qassi, Yesuusi issi gita tumaa mintti yootiis. Loꞌꞌobawu likkee Yihoowa xalaala. Aybi loꞌꞌokko, qassi aybi iitakko kuuyiyo maatay Yihoowa xalaalawu deꞌees. Addaameenne Hewaana makkalidi loꞌꞌuwaanne iitaa erissiya mittaa miyoogan he maataa banttawu ekkanawu koyidosona. Etappe dumma hanotan, Yesuusi ba Aaway maaraa kessanaadan ashkketettan aggi bayiis.

⁷ Hegaa bollikka, loꞌꞌoba ubbawu pulttoy Yihoowa gidiyoogaa Yesuusi erees. ‘Loꞌꞌo imo ubbaanne kumetta woyto ubbaa’ immiyay Yihoowa. (Yaaqooba 1:17) Yihoowa loꞌꞌotettay I kehatettan immiyooban waani qonccidaakko ane pilggoos.

8. Yihooway ubba asawu loꞌꞌotettaa waati bessidee?

⁸ Ay wodekka deꞌida asay ubbay Yihoowa loꞌꞌotettaappe goꞌettiis. Mazamure 145:9y hagaadan gees: “GODAI ubbau keha.” I ubbawu loꞌꞌo gidiyoogaa qonccissiya amarida leemisoti aybee? Geeshsha Maxaafay hagaadan gees: “Intteyyo iraa saluwaappe bukissees; kattaakka i wodiyan immees; qassi qumaa immidi, inttena daro ufaissees; yaatidi intteyyo lo77obaa oottiiddi, ubba wodekka bau markka xayibeenna.” (Oosuwaa 14:17) Neeni malꞌꞌiya qumaa maydda keehi ufaytta eray? Yihooway ba loꞌꞌotettan saꞌan geeshsha haattay ubbatoo deꞌanaadaaninne gidi palahiya ‘kattay wodiyan wodiyan’ mokkanaadan oottennaakko, ayba qumikka deꞌenna. Yihooway hegaa mala loꞌꞌotettaa bana siiqiyaageetu xallawu gidennan, ubbawu  bessiis. Yesuusi hagaadan giis: “Iita asaukka lo77o asaukka Xoossai ba awaa awaxxissees; qassi xillotuyyookka nagaranchchatuyyookka ba iraa bukissees.”—Maatiyoosa 5:45.

9. Appilee Yihoowa loꞌꞌotettaa waati qonccissii?

⁹ Yihooway kehatettan immiyo ubbatoo awaxxiya awaa, bukkiya iraanne wodiyan wodiyan mokkiya kattaa metootennan demmiyo gishshawu, daroti hegaa nashshennan aggana danddayoosona. Leemisuwawu, appiliyaabaa qoppa. Kumetta saꞌan barggottiya heeran appilee asay meezettido mittaa ayfe. Appilee beꞌanawu loꞌꞌees, maanawu malꞌꞌees, qassi wozanan irxxi giya haattaynne bollawu keehi koshshiyaabati an deꞌoosona. Kumetta saꞌan 7,500 gidiya appiliyaa qommoy deꞌiyoogaa eray? Appiliyawu zoꞌo, adilꞌꞌe mala, maata malanne hara daro  meray deꞌees, qassi appiliyaa yesoy woyniyaa ayfiyaappe biidi gita burttukkaaniyaa gakkanaashin dumma dumma. Neeni appiliyaa zerettaa qiibaa kushiyan oyqqikko, hegee pattennaba milatees. SHin he zerettay mokkidi keehi loꞌꞌiya mitta gidees. (Siiquwaa Sabaa 2:3) Ofinttan appiliyaa mittay keehi ciiyyees; qassi badhdheesan ayfees. Appiliyaa mittay 75 layttawu, layttan layttan 20 karttoone ayfiyaa ayfees; issi karttoonee 19 kilo graame.

10, 11. Issibaa eranaadan maaddiya bollaa qommoti Xoossaa loꞌꞌotettaa waati qonccissiyoonaa?

¹⁰ Yihooway nuuni A oosota akeekanaadaaninne etan ufayttanaadan maaddiya ‘maalaalissiya ogiyan merettida’ bollaa zawi baynna ba loꞌꞌotettan nuussi immiis. (Mazamure 139:14) Ha shemppuwaa doomettan qonccida hanotaa zaarettada qoppa. Hegaa mala wodetun ufayssiyaabaa ay beꞌiyoo? Ufayttidi miicciya guutta naꞌaa, gaden iray bukkiyoogaa, qassi away wulliyo wode dumma dumma merata beꞌoos. Asaa ayfee 10,000,000 gidiya dumma dumma meraa beꞌana danddayees! Nu dosiyo asi haasayiyo wode, carkkoy mittaa giddoora kanttiyo wodenne tuchchiya naꞌay miicciyo wode nuuni dumma dumma cenggurssata siyana danddayoos. Hegaa malabaa beꞌiyoogaaninne siyiyoogan nuuni ufayttiyoy aybissee? Geeshsha Maxaafay hagaadan gees: “Siyiya haittaanne xeelliya aifiyaanne, eta naa77aakka GODAI medhdhiis.” (Leemiso 20:12) SHin hageeti nuuni akeekanaadan maaddiyabatuppe naaꞌꞌa xalla.

¹¹ Nuuni singgiyoogee Yihoowa loꞌꞌotettaa qonccissiya haraba. Asaa siiree issi triliyoone gidiya dumma dumma peenuwaa shaakkana danddayees geetettiidi qofettees. Hegeetuppe amaridaageeta, hegeetikka neeni dosiyo qumaa, ciishshaa, saꞌan wodhdhida bonccuwaanne eexxiya tamaa cuwaa qoppa. Qassi ufayssiya carkkoy ne bollan carkkiyoogan, siiqiya uri nena qoommidi minttettiyoogaaninne teerida mittaa ayfiyaa ne kushiyan oyqqiyoogan ne ufayttanaadan oottiyay bochchiyoogan issibaa akeekiyo imotaa. Neeni appe guuttaa baara beꞌiyo wode shonggay ay malakko shaakka eraasa. Ne inxxarssan deꞌiyaabati  he ayfiyaa teeran deꞌiya dumma dumma keemikaaliyaa shaakkiyo wode hegee nena keehi malꞌꞌees. Ee, nuuni Yihoowa hagaadan galatanaadan oottiya darobay deꞌees: “Neessi yayyiyaageetuyyo neeni minjjidonne . . . neeni oottido ne kehatettai aiba daroo!” (Mazamure 31:19) SHin Yihooway baassi yayyiyaageetussi loꞌꞌobaa waati ‘minjjidee’?

12. Yihooway giigissiyo keehi koshshiyaabati aybee, qassi aybissi?

¹² Yesuusi hagaadan giis: “Xoossaa maxaafai, ‘Asi Xoossai haasayiyo qaala ubban de7anaappe attin, oitta xalaalan de7enna’” yaagees. (Maatiyoosa 4:4) Yihooway giigissiyo ayyaanaabaa qumay nuuni merinaa deꞌuwaa demmanaadan oottiyo gishshawu, asatettawu maaddiyaabaappe aadhdhiyaaba. Ha wurssetta gallassatun Yihooway kase sohuwawu zaariyo ba wolqqan ayyaanaabaa gannatiyaa essidoogaa ha maxaafan shemppo 8n beꞌida. He gannatiyan waannatiya issibay ayyaanaabaa qumay gidi palahiyoogaa.

13, 14. (a) Hananabaa yootiya Hizqqeeli ajjuutan beꞌidobay aybee, ha wodiyan hegee ay qonccissii? (b) Baassi ammanettidi oottiyaageetuyyo Yihooway giigissiyo deꞌuwaa demissiya imotati aybee?

¹³ Ooraxissiyo gitabaa yootiya Geeshsha Maxaafaa hiraagatuppe issuwan, hananabaa yootiya Hizqqeeli ooraxxidanne bonchchettida beeta maqidasiyaa ajjuutan beꞌiis. Beeta maqidasiyaappe pulttidi goggiya haattay gita ‘shaafa’ gidana gakkanaashin aakkiisinne ciimmatiis. He shaafay goggiyoosa ubban, keehi maaddiis. He shaafaa doonan deꞌiya mittay ayfido ayfeti qumanne xale gididosona. Qassi he shaafay deꞌuwan deꞌiyaabi baynna Maxine Abban deꞌiyaabi paxa deꞌanaadan oottiis! (Hizqqeela 47:1-12) SHin ha ubbabay ay qonccissii?

¹⁴ Ha ajjuutay beeta maqidasiyaabaa Hizqqeeli beꞌidoogan qonccidaagaadan, Yihooway tumu goynuwaa zaarettidi essanaagaa bessiyaaba. Ajjuutan beꞌido he shaafaadan, Xoossay ba asawu immiyoobay awudeegaappenne aaruwan gidi palahiyaagee goggees. Tumu goynoy 1919n zaarettidi eqqido  wodiyaappe doommidi, Yihooway deꞌuwaa demissiya imotata ba asawu giigissiis. Waatidi? Geeshsha Maxaafay, Geeshsha Maxaafaa qofay deꞌiyo xuufeti, gubaaꞌe shiiqotinne gita shiiqoti miilooniyan qoodettiya asawu tumay gakkanaadan keehi maaddidosona. Hegeetu baggaara Yihooway aybippenne aadhdhiya imota gidida Kiristtoosa wozuwaa yarshshuwaabaa asaa tamaarissiis. He imotay asay Yihoowa sinttan geeshsha gidanaadaaninne tumuppe Xoossaa siiqiyanne ayyo yayyiya ubbawu merinaa deꞌuwaa hidootay deꞌanaadan oottiis. a Yaatiyo gishshawu, ha wurssetta gallassatun alamee ayyaanaaban keehi namisettikkonne, Yihoowa asawu gidi palahiya ayyaanaabaa qumay deꞌees.—Isiyaasa 65:13.

15. Yihoowa loꞌꞌotettay ammanettiya asawu Kiristtoosa SHaꞌu Layttaa Haaruwaa wode ayba hanotan gogganee?

¹⁵ Ha alamee xayiyo wodekka Hizqqeeli ajjuutan beꞌido shaafay goggiyoogaa aggenna. Ubba qassi Kiristtoosa SHaꞌu Layttaa Haaruwaa wode he shaafay kaseegaappe aaruwan goggana. He wode Yihooway Mase Kawotettaa baggaara, ammanettida asay loddan loddan wottiyoobi baynnaagaa gidanawu Yesuusa yarshshuwaa kumetta goꞌꞌaa demmanaadan oottana. He wode nuuni Yihoowa loꞌꞌotettan keehi ufayttana!

16. Yihoowa loꞌꞌotettay hara eeshshata xaaxi waaxiyoogaa Geeshsha Maxaafay waati qonccissii, qassi hegeetuppe amaridaageeti aybee?

¹⁶ Yihoowa loꞌꞌotettay kehatettan immiyoogaa xalla gidenna. Xoossay Muusa hagaadan giis: “Taani ta phooliya bonchchuwaa [“loꞌꞌotettaa,” NW] qonccetta ubbaa ne sinttaara kanttissana; ta geeshsha sunttaakka ne achchan awaajjana.” Guyyeppe hagaadan giis: “GODAI Muuse sinttaara hagaadan yaagidi awaajjiiddi kanttiis; ‘Taani GODAA; taani GODAA; qaretainne  maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa [“tumay keehi daridoogaa,” NW].’” (Kessaabaa 33:19; 34:6) Hegaa gishshawu Yihoowa loꞌꞌotettay daro loꞌꞌo eeshshata xaaxi waaxees. Hegeetuppe naaꞌꞌata ane beꞌoos.

17. Yihooway nagaranchcha asaa waati oyqqii, qassi I yaatanaadan oottiya eeshshay awugee?

¹⁷ ‘Qaretaa.’ Ha eeshshay Yihooway haratussi ashkkenne eta baakko shiishshiyaagaa gidanaadan oottees. Yihooway maatay deꞌiyo asatudan kehennaagaa, qarettennaagaa, woy meqetti baynnaagaa gidenna; I ashkkenne keha. Leemisuwawu, Yihooway Abrahaamayyo hagaadan giis: “[“Hayyanaa,” NW] xoqqu gaada neeni de7iyoosaappe arshsho bagginne arggo baggi, qassi huuphessa bagginne tohossa baggi xeella.” (Doomettaa 13:14) Daro birshshettati “hayyanaa” giya qaalaa goꞌettokkona. SHin Ibraawettuwan koyro xaafettidaagan he qofaa azazuwaappe ashkketettan oychchiyo oyshawu laammiya issi qaalay deꞌiyoogaa Geeshsha Maxaafaa eranchchati yootoosona. Ubbaa haariyaagee issi asa “hayyanaa” giyoogaa qoppa! Kehenna, wolqqanttiyaanne ashkke gidenna asay kumido ha alamiyan, qarettiya nu Xoossaa Yihooway harati baakko shiiqanaadan oottiyoogaa wotti dentti qoppiyoogee minttettiyaaba gidiyoogee tuma.

18. Yihooway “tumay keehi daridoogaa” gidiyoy ayba ogiyaanee, qassi he qaalati ammanttiyaageeta gidiyoy aybissee?

¹⁸ “Tumay keehi daridoogaa.” Alamiyan ha wodiyan ammanettennaagee meeze gididaba. SHin Geeshsha Maxaafay hagaadan gees: “Xoossai worddotanau asa gidenna.” (Qoodaabaa 23:19) Tiitu 1:2y ‘Xoossay worddotenna’ yaagees. Yihoowa loꞌꞌotettay I worddotennaadan oottees. Hegaa gishshawu, Yihooway qaalaa gelidobay awudenne ammanttiyaaba; I yootidobay polettennan mule attenna. Ubba qassi Yihooway ‘tumaa Xoossaa’ geetettees. (Mazamure 31:5) I worddobaa yootennaagaa xalla gidennan, tuma gidida darobaa yootees. I genttenna, hara uri erennaadan diggenna woy qottenna; shin zawi  baynna ba aadhdhida eratettaa bawu ammanettidi haggaaziyaageetuyyo kehatettan tamaarissees. b ‘Eti tuman hemettana’ mala, I yootiyo tumaara maayettiya ogiyan waani deꞌanaakkokka eta tamaarissees. (3 Yohaannisa 3, NW) Yihoowa loꞌꞌotettay nuna huuphiyan huuphiyan waati maaddii?

19, 20. (a) Hewaana Yihoowa loꞌꞌotettan ammanettiyoogaa agganaadan Seexaanay waatidee, qassi hegee ay kaalettidee? (b) Yihoowa loꞌꞌotettay nuna waati maaddii, qassi aybissi?

¹⁹ Seexaanay Edene ataakiltte sohuwan Hewaana Yihoowa loꞌꞌotettan ammanettiyoogaa agganaadan oottanawu O paacciyoogaa doommiis. Yihooway Addaama hagaadan giis: “Gannatiyaa mittaa teeraa ubbaappe neeni maana giikko ma.” He ataakiltte sohuwan deꞌiya xeellanawu loꞌꞌiya shaꞌan qoodettiya mittatuppe bitanee meennaadan Yihooway diggidoy issuwaa xalla. SHin Seexaanay Hewaano koyro oyshaa woygi oychchidaakko akeeka: “Xoossai tumu inttena, ‘Gannatiyan de7iya mittaa teeraa ubbaappekka mooppite’ giidee?” (Doomettaabaa 2:9, 16; 3:1) Hewaana Yihooway loꞌꞌobaa diggidabadan qoppanaadan oottiyoogan Seexaanay Yihooway yootidobaa geellayiis. Hegan A cimettidoogee azzanttiyaaba. Ha wodiyan deꞌiya daro asatuugaadan, Hewaana baayyo ubbabaa immida Xoossaa loꞌꞌotettaa siriyoogaa doommaasu.

²⁰ He siriyaa gaasuwan keehi iita azzanoynne waayee gakkidoogaa eroos. Hegaa gishshawu, Ermmaasa 31:12y yootiyo zoriyaa akeeka: ‘Eti Yihooway immiyo kehatettan (woy Yihoowa loꞌꞌotettan) ufayttana.’ Yihoowa loꞌꞌotettay nuuni keehi ufayttanaadan oottana koshshees. Loꞌꞌotettan kumida nu Xoossaa halchchuwaa nuuni mule sirana koshshenna. Xoossay bana siiqiyaageetuyyo loꞌꞌobaa amottiyo  gishshawu, nuuni an wozanappe ammanettana koshshees.

21, 22. (a) Neeni loꞌꞌotettan Yihoowa milatana koyiyo amarida ogeti aybee? (b) Kaalliya shemppuwan nuuni beꞌana eeshshay aybee, qassi he eeshshay loꞌꞌotettaappe waani dummatii?

²¹ Hegaa bollikka, nuuni Xoossaa loꞌꞌotettaabaa haratussi yootiyo wode keehi ufayttoos. Yihoowa asaa xeelliyaagan, Mazamure 145:7y hagaadan gees: “Eti ne kehatettaa daruwaabaa yootana.” Nuuni galla galla Yihoowa loꞌꞌotettan goꞌettoos. Yihooway loꞌꞌotettan immido issibaa dummayi qonccissidi galla galla galatiyoogaa meezettiyoogee loꞌꞌo. Loꞌꞌotettaabaa qoppiyoogee, ubba galla he eeshshaa gishshawu Yihoowa galatiyoogeenne hegaabaa haratuyyo yootiyoogee nu loꞌꞌo Xoossaa milatanaadan nuna maaddees. Yihoowagaadan loꞌꞌobaa oottiyo ogeta nuuni koyikko, kaseegaappe aaruwan akko shiiqana. Cimida kiitettida Yohaannisi hagaadan giis: “Ta siiquwau, lo77obaappe attin, iitabaa milatoppa. Lo77obaa oottiya ooninne Xoossaa asa.”—3 Yohaannisa 11.

²² Yihoowa loꞌꞌotettay hara eeshshatuurakka gayttidaba. Leemisuwawu, Xoossay “aggenna siiqoi daridoogaa.” (Kessaabaa 34:6) Yihooway baassi ammanettidi haggaaziyaageetu xallawu ha eeshshaa bessiyo gishshawu, ha eeshshay loꞌꞌotettaappe dummatees. I hegaadan waatidi oottiyaakko kaalliya shemppuwan tamaarana.