Suuttaa Xeelliyaagan Xoossay Yootidobaa Ammanaas

Issi Aakimee Yootidoogaa

ISSI bitanee hayqqidoy aybissakko A anhaa mirmaray qonccissiyoobaa hosppitaaliyaa addaraashan shiiqida dottoretussi yootays. Hayqqida bitaniyaa bolli iita xiiˈee deˈees; taani hagaadan gaas: “Ha bitanee hayqqidoy daro suuttay imetto gishshawu, zoˈo suuttaa seeleti qohettidoogaappenne kilahoy oottiyoogaa aggidoogaappe denddidaagaana.”

Issi profeeseree eqqi denddi hanqqettiiddi, “Yaatin, hanenna suuttaa immideta gay?” yaagiis. Yaagin, “Taani hegaadan gabeykke” yaagaas. Bitaniyaa kilahuwawu amarida shaahuwaa islaydiyan bessayda, gujjada hagaadan gaas: “Kilaho giddon daro zoˈo suuttaa seeleti hayqqidoogaa beˈiyo gishshawu, hegee kilahoy oosuwaa agganaadan oottiyoogaa akeekana danddayoos.” * Hegee tana daganttin ta doonay meliis. Taani yelaga dottoree, I qassi profeesere gidikkokka, ta qofaa laammabeykke.

He wode taani Yihoowa Markka gidikke. Taani Jaappaanen huuphessa baggan deˈiya Senday kataman, 1943n yelettaas. Ta aaway aakime gidiyo gishshawu, taanikka akkamuwaabaa tamaaranawu kuuyaas. Akkamuwaabaa timirttiyan naaˈˈantto layttan deˈaydda, 1970n, Masuko giyo yelagiyo machchaas.

Paatoolojiyaa Xannaˈiyoogaa Doommaas

Taani tamaariyo wode nuuyyo koshshiyaabaa kunttanawu Masuka oottawusu. Akkamuwaa timirttiyaa keehi dosaas. Asi keehi makkisettidi merettidoogee tana daro maalaalees! SHin Medhdhidaagee deˈiyoogaa mule qoppa erikke. Akkamuwaa timirttee taani ufayttanaadan oottana gaada qoppaas. Yaatiyo gishshawu, aakime gida simmada, harggiyaa hanotaa, gaasuwaanne hegee kaalettiyoobaa pilggiyo, Paatoolojiyaa xannaˈiyoogaa doommaas.

Kansseriyaa gaasuwan hayqqida asaa anhaa pilggiyo wode, akkamuwawu suuttaa goˈettiyoogee maaddenna gaada qoppiyoogaa doommaas. Kansseree wolqqaamido asawu zoˈo suuttaa seeleti keehi guuxxananne izaawu keehi daafurana danddayees. Kansseriyaa akkamoy hanotay yaa iitanaadan oottana danddayiyo gishshawu, aakimeti darotoo suuttaa immoosona. SHin taani suuttaa immiyoogee kansseree bolla giddon ubbasaa gakkanaadan oottana gaada qoppiyoogaa doommaas. Hanotay aybanne gidin, kansseriyaa harggiyaa akkamuwawu suuttaa goˈettiyoogee kixay zaarettidi diccanaadan oottiyoogan hargganchchati eesuwan paxennaadan, ubba hayqqanaadan oottiyoogee ha wodiyan erettiis. *

Doomettan odidobay 1975n tana gakkidaba. He profeseree suuttaa harggiyaabaa eranchcha, qassi hayqqida hargganchchaabay A xeellees. Yaatiyo gishshawu, he hargganchchaa woriday akkamuwawu suuttaa ekkidoogaa gin, I yiillotidoogee garamissenna! SHin taani ta qofaa loytta qonccissin, I guyyeppe woppu giis.

Harggee Woy Hayqoy Deˈenna

Ta keettaayiyaa Yihoowa Markka gidida cima maccaaseera gayttidoy he wode. A haasayaydda “Yihoowa” gaasu; yaatin ta machchiyaa hegee woygiyoogaakko oychchaasu. Yaatin he Yihoowa Markkiyaa, “Yihoowa giyoogee tumu Xoossaa suntta” yaagaasu. Masuka naatettaappe doommada Geeshsha Maxaafaa nabbabawusu; shin a nabbabiyo Geeshsha Maxaafay Xoossaa sunttay deˈiyoosan “GODAA” yaagees. A Xoossaassi sunttay deˈiyoogaa eraasu!

Masuka he cima Yihoowa Markkeera Geeshsha Maxaafaa xannaˈiyoogaa sohuwaara doommaasu. Taani hosppitaaliyaappe qammi 7:00 saatiyan soo yiyo wode, ta keettaayiyaa ufayttaydda taayyo, “Geeshsha Maxaafay harggeenne hayqoy xayanaagaa yootees!” yaagaasu. Yaagin taani, “Hegee keehi loˈˈo!” yaagada zaaraas. A gujjadakka, “Ooratta alamee yaanawu matido gishshawu, neeni ne wodiyaa coo wurssanaadan koyikke” yaagaasu. Taani dottore gidada oottiyoogaa agganaadan koyawusu gaada qoppido gishshawu, keehi yiillotaas; nu dobbotaykka moorettana haniis.

Gidikkokka, ta keettaayiyaa ta koshshaa denttettanawu maliyoogaa aggabeykku. A woossada tawu haniya xiqiseta koyada tana bessaasu. Eranchchaa 2:22, 23y yootiyoobay ta wozanaa denttettiis: “Salo gufantton asi keehi daafuridi oottiyoobaappe ubbaappe ai go77a demmii? . . . Harai atto qammikka a huuphee qofaappe shemppenna; gido shin, he ubbaikka hada.” Hagee tawukka haniya qofa; taani qamminne gallassi akkamuwaara gayttidabaa oottikkonne tumu ufayssaa demmabeykke.

Isiine 1975n issi Woggaa galla maallado, ta keettaayiyaa Yihoowa Markkatu SHiiquwaa Addaraashaa ba simmin, taanikka yaa baanawu denddaas. A tana yan beˈada keehi maalaalettaasu; qassi ishanttinne michchontti tana ufayssan mokkidosona. He wodeppe doommada, Woggaa gallassi aggennan shiiquwaa bays. Issi aggina gidiya wodeppe guyyiyan, issi ishay tana Geeshsha Maxaafaa xannaˈissiyoogaa doommiis. Ta keettaayiyaa Yihoowa Markkatuura gayttoosappe heezzu aginay aadhdhin xammaqettaasu.

Suuttaa Xeelliyaagan Xoossay Yootidobaa Ammanaas

Kiristtaaneti ‘suuttaa uyennaadan’ woy appe haakkananaadan Geeshsha Maxaafay yootiyoogaa sohuwaara akeekaas. (Oosuwaa 15:28, 29; Doomettaabaa 9:4) Akkamuwawu suuttaa ekkiyoogee maddanaagaa taani kasekka siriyo gishshawu, suuttaa xeelliyaagan Xoossay yootidobaa ammananaagee tana metibeenna. * Taani, ‘Medhdhidaagee deˈiyaabanne hegaadan giyaaba gidikko, I giyoobay tuma gidana’ gaada qoppaas.

Harggiyawunne hayquwawu gaasoy Addaameppe laattido nagaraa gidiyoogaakka akeekaas. (Roome 5:12) He wode, taani arteeriyosileroosis giyoobaa xannaˈays. Nuuni cimiyo wode, suuttay wozanaappe kiyiyoonne geliyo xaphoti minniyoonne xuummiyo gishshawu, daro qommo wolqqaama harggee oyqqees. Hegawu gaasoy nuuni laattido nagaraa giyoogee ammanttees. Hegaappe simmin, akkamuwaaba minna xannaˈiyoogaa agga agga baas. Harggiyaanne hayquwaa xayssana danddayiyay Xoossaa Yihoowa xalla!

Geeshsha Maxaafaa xannaˈiyoogaa doommoosappe laappun aginay aadhdhin, Laappune 1976n, hosppitaaliyaa yuniversttiyan tamaariyoogaa aggaagaas. Hegaappe guyyiyan aakime gidada oottanaagaa siraas; shin hara hosppitaaliyan oosuwaa demmaas. Uddufune 1976n xammaqettaas. Taani ta deˈuwan ubba wode haggaaziya aqinye gidiyoogee aybippenne aadhdhiyaaba gidiyoogaa kuuyaas; yaatada Isiine 1977n hegaadan haggaaziyoogaa doommaas.

Suuttaa Xeelliyaagan Xoossay Yootiyoobawu Exatiyoogaa

Hidaare 1979n, Masukanne taani sabbakiya asay keehi koshshiyo CHiba Prefekcher giyo heeri biida. Issi hosppitaaliyan amarida gallassaa oottiyo ooso demmaas. Oosuwaa doommido gallassi, asaa shukkiya amarida dottoreti taakko shiiqidi, “Neeni Yihoowa Markka gidiyo gishshawu, suuttaa immana koshshiyo issi hargganchchay yiikko waatuutee?” giidi mintti oychchidosona.

Xoossay suuttaa xeelliyaagan odidobaa kaallanaagaa etawu bonchchuwan yootaas. Suuttaa goˈettennan akkamiyo hara ogeekka deˈiyoogaanne hargganchchaa pattanawu taani oottana bessiya loˈˈobaa ubbaa oottanaagaa etawu yootaas. Issi saate gidiyaagaa haasayi simmin, shukkiya dottoretu halaqay, “Ne qofaa akeekaas. SHin daro suuttay gukkido asi akkamettanawu yiyo wode hegaa nu oyqqana” yaagiis. He halaqay asaara maayettenna giyo asa; shin nuuni hegaa haasayi simmin tanaara aynne baa saro, qassi I ubbatoo ta ammanuwaa bonchchees.

Suuttaa Bonchchiyoogan Gakkida Paaciyaa

Nuuni CHiban haggaaziyo wode, Jaappaanen Ibina giyoosan Yihoowa Markkatu ooratta macara biiroy keexettiiddi deˈees. Taaninne ta keettaayiyaa Beeteele geetettiya he keettaa keexxiya ishatunne michchotu payyatettaa xeellanawu saaminttan issi gallassaa yaa boos. Amarida aginay aadhdhi simmin, Ibina Beeteelen ubba wode oottanaadan shoobettida. Yaatiyo gishshawu, Laappune 1981n, bantta dosan oottiya 500ppe dariya ishati amarida wodiyawu deˈanaadan giigida keettan deˈiyoogaa doommida. Maallado, keexettiya sohuwan deˈiya, bollaa meecettiyoosaanne sheeshsha keettaa geeshshays; saateppe guyyiyan qassi ishanttu payyatettaa maramarays.

Taani akkamido hargganchchatuppe issinniyaa, misoonaawe gidada Awustiraaliyaappe 1949n Jaappaane yiida Iilmo. A luukemiya giyo harggiyaa harggiyo gishshawu, amarida agina xallaa deˈanaagaa I aakimeti yootidosona. Iilma suuttaa ekkada ba bariyaa adussanawu koyabeenna gishshawu, hayqqana gakkanaashin Beeteelen takkanawu koyaasu. He wode zoˈo suuttaa seeletu qooday daranaadan oottiya eriytiropoytin giyoogaa mala xaleti deˈokkona. Yaatiyo gishshawu, issi issitoo I himoglobiinee 3 woy 4 giraame! (Payya asaagee 12-15 giraame.) SHin taani O akkamanawu tawu danddayettida ubbabaa oottaas. Iilma laappun laytta gidiyaagaa takkada Ichchashe 1988n hayqqana gakkanawu, Xoossaa Qaalaa mintta ammaniyoogaa aggabeykku!

Aadhdhida layttatun, Jaappaanen deˈiya Yihoowa Markkatu macara biiruwan bantta dosan oottiya daroti akkamuwawu shuhettidosona. Matan deˈiya hosppitaaletun oottiya dottoreti suuttaa goˈettennan shukkiyoogan maaddidosona; hegee galatissiyaaba. Eti shukkiyo wode hanotaa kaallanaadan darotoo tana shoobboosona; ubba issi issitoo shuukkiyoogankka eta maadda erays. Suuttaara gayttidaagan Yihoowa Markkatu ammanuwaa bonchchiya he dottoreta galatays. Etaara oottiyoogee darotoo ta ammanuwaabaa etawu yootanawu danddayanaadan maaddiis. He dottoretuppe issoy mata wode xammaqettidi Yihoowa Markka gidiis.

Dottoreti Yihoowa Markkata akkamiyo wode suuttaa goˈettennan aggidoogee akkamuwaara gayttidaagan keehi maaddiis. SHukkiyo wode suuttaa goˈettennaagee akkamuwawu suuttaa goˈettennan aggiyoogaa goˈˈaa akeekanawu maaddiis. Hegaadan akkamettida asay eesuwan paxiyoogaanne shuhaara gayttida metoy etawu darennaagaa xinaatee bessees.

Ooppenne Aadhdhiya Aakimiyaappe Tamaariyoogaa

Akkamuwaara gayttida oorattabaa haˈˈikka eranawu malays. SHin ooppenne aadhdhiya Aakimiyaa, Yihoowappekka ubbatoo tamaarays. I nubaa qoncci beettiyaabaa xalla gidennan, nu kumetta oonatettaa xeellees. (1 Sameela 16:7) Taani akkamiyo wode, harggiya uraa kumetta oonatettaappe attin, A hargge xallaa xeellikke. Yaatiyoogee taani izaawa loytta akkamanaadan maaddees.

Taani haˈˈikka Beeteelen oottays; qassi Yihooway suuttaa xeelliyaagan yootiyoobaa gujjin, asay A eranaadan maaddiyoogee tana keehi ufayssees. Qassi Ubbaappe Aadhdhiya Aakimee, Xoossaa Yihooway hargge ubbaanne hayquwaa matan xayssanaadan woossays.—Yasushi Ayzawi yootidoogaa.

[Tohossa qofaa]

[Qonccissuwaa]

“Suuttaa goˈettennan akkamiyo hara ogeekka deˈiyoogaanne hargganchchaa pattanawu taani oottana bessiya loˈˈobaa ubbaa oottanaagaa etawu yootaas”

[Qonccissuwaa]

“SHukkiyo wode suuttaa goˈettennaagee akkamuwawu suuttaa goˈettennan aggiyoogaa goˈˈaa akeekanawu maaddiis”

[Misiliyaa]

Huupheessaagaa: Geeshsha Maxaafaappe tamaarissays

Ushachchaagaa: Ha wodiyan, ta keettaayee Masukiira