1. Nuuni shiiqotun qofaa yootiyoy aybissee?

 NUUNI gubaaꞌe shiiqota shiiqiyoy aybissee? Waanna gaasoy, Yihoowa sabbanaassa. (Maz. 26:12; 111:1) Qassi ha wayssiya wodiyan nuuni issoy issuwaa minttettanawukka shiiqota shiiqoos. (1 Tas. 5:11) Nuuni shiiqotun qofaa yootiyo wode he naaꞌꞌubatakka oottoos.

2. Nuuni shiiqotun qofaa yootana danddayiyoy awudee?

² Saaminttan saaminttan nuuni shiiqotun qofaa yootana danddayoos. Leemisuwawu, saaminttaa wurssettan gubaaꞌiyan Wochchiyo Keelaa xannaꞌiyo wode nu qofaa yootana danddayoos. Saaminttawu gidduwan shiiqiyo shiiquwaa wode Ayyaanaaban Alꞌꞌoban, Gubaaꞌiyaa Geeshsha Maxaafaa Xinaatiyan, qassi ezggiyaageetuura tobbiyo hara kifiletun nu qofaa yootana danddayoos.

3. SHiiqotun qofaa yootiyoogaara gayttidaagan metiyaabay aybee, qassi Ibraawe 10:24, 25y waati maaddana danddayii?

³ Nuuni ubbay Yihoowa sabbanawunne issoy issuwaa minttettanawu koyoos. SHin qofaa yootanawu nuuni metootanaadan oottana danddayiyaabati deꞌoosona. Nuuni qofaa yootanawu yayyana danddayoos woy gujjidi qofaa yootanawu koyikkonne, issi issitoo ishantti nuuni kushiyaa denttiyo wode nuna oychchennan aggana danddayoosona. Nuna aybi maaddana danddayii? PHawuloosi Ibraawe Kiristtaanetussi xaafidobay nuuni zaaruwaa demmanaadan maaddana danddayees. Issippe shiiqiyoogaa goꞌꞌaa I yootiyo wode nuuni ubbatoo “issoi issuwaa” minttettana koshshiyoogaa odiis. (Ibraawe 10:24, 25 nabbaba.) Nu ammanuwaabaa qonccissiya qantta qofaa yootiyoogeekka harata minttettana danddayiyoogaa  hassayikko, nuuni kushiyaa denttidi zaaranawu darin yayyennan aggana danddayoos. Nuuni darotoo zaarana xayikkonne, gubaaꞌiyan deꞌiya harati zaaridoogan ufayttana danddayoos.—1 PHe. 3:8.

4. Nuuni ha huuphe yohuwan beꞌana heezzubati aybee?

⁴ Ha huuphe yohuwan, qofaa yootiyaageeti darenna guutta gubaaꞌiyan, nuuni issoy issuwaa waati minttettana danddayiyaakko koyro beꞌana. Kaallidi, qofaa yootanawu daroti kushiyaa denttiyo gita gubaaꞌiyan nuuni issoy issuwaa waati minttettana danddayiyaakko pilggana. Wurssettan, nuuni qofaa yootiyo wode zaariyooban harata waati minttettana danddayiyaakko beꞌana.

5. Guutta asay shiiqiyoosan nuuni issoy issuwaa waati minttettana danddayiyoo?

⁵ Guutta gubaaꞌiyan woy citan kaalettiya ishay, qofaa yootanaadan doorana danddayiyo daro asay deꞌenna. Qofaa yootiya uri kushiyaa denttana gakkanaashin Issi issitoo I naagiyoogee koshshana danddayees. SHiiqoy salettiyaagaa milatananne minttettiyaagaa gidennan aggana danddayees. Neeni waatana danddayay? Qofaa yootanawu kushiyaa darotoo dentta. Yaatiyoogan, haratikka qofaa yootanawu darotoo denttanaadan oottana danddayaasa.

6-7. Nuuni qofaa yootiyo wode yayyiyoogaa waati aggana danddayiyoo?

⁶ Neeni qofaa yootanawu keehi yayyikko waatuutee? Daroti neegaadan yayyoosona. Gidikkonne, ne ishanttanne michchontta minttettanawu qofaa yootanawu yayyiyoogaa agganaadan maaddiyaabata pilggana danddayaasa. Hegaadan waata oottana danddayay?

⁷ Wochchiyo Keelan kase kiyida maaddiya amarida qofata pilggiyoogee nena maaddana danddayees. b Leemisuwawu, loytta giigetta. (Lee. 21:5) Neeni xuufiyaa loytta giigettikko, qofaa yootanawu metootennan aggana danddayaasa. Qassi qantta qofaa yoota. (Lee. 15:23; 17:27) Qanttan zaariyoogee neeni darin yayyennaadan oottees. Adussa qofaa yootiyoogaappe, issi woy naaꞌꞌu qofaa qashuwaa qanttan zaariyoogee, ishanttinne michchontti neeni zaariyo qofaa metootennan akeekanaadan oottees. Xuufiyaappe nabbabennan qanttan zaariyoogan neeni loytta giigettidoogaanne xuufiyaa qofaa loytta akeekidoogaa bessana danddayaasa.

8. Nuuni nuussi danddayettida ubbabaa oottiyoogaa Yihooway waati xeellii?

⁸ Neeni ha qofatuppe amaridaageeta oottanawu malikkonne, issitooppe woy naaꞌꞌutooppe daruwaa zaaranawu haꞌꞌikka yayyikko shin? Neeni zaaranawu neessi danddayettida ubbabaa oottiyoogaa Yihooway nashshees. (Luq. 21:1-4) Neeni danddayiyoogaappe aaruwaa oottanaadan Yihooway koyenna. (Pili. 4:5) Neeni danddayiyoobaa oottanawu murtta, hegaa oottanawu halchchuwaa kessa, qassi Yihooway maaddanaadan woossa. He halchchoy neeni koyro heeran qanttabaa zaaranaadan maaddana danddayees.

9. Gita gubaaꞌiyan qofaa yootiyoogee metiyaaba gidanaadan oottiyaabay aybee?

⁹ Ne gubaaꞌiyan aassiyaageeti daro gidikko metiya harabay deꞌees. Daro ishanttinne michchontti qofaa yootanawu kushiyaa denttiyo gishshawu, neeni darotoo denttikkokka zaarennan aggana danddayaasa.  Leemisuwawu, Daaniyela darotoo shiiqotun qofaa yootiyoogan ufayttawusu. c A hegaa goynodan, harata minttettiyo ogedan, qassi Geeshsha Maxaafaa timirttiyan ba ammanuwaa minttiyo ogedan xeellawusu. SHin A gita gubaaꞌiyaa biido wode darin zaarana danddayabeykku; ubba qassi issi issitoo kumetta shiiquwan issitookka zaarukku. A hagaadan gaasu: “Taani keehi unꞌꞌettaas. Taappe maatay halidabadan qoppaas. Hegaa malabay darotoo hanikko, kaalettiya ishay eriiddi oottiyaabadan qoppiyoogaa doommaasa.”

10. SHiiqotun qofaa yootanawu waatana danddayay?

¹⁰ Neeni Daaniyeliigaadan qoppa eray? Yaatikko, neeni hidootaa qanxxada shiiquwan coꞌꞌu gaada ezgganawu doorana danddayaasa. SHin qofaa yootanawu baaxetiyoogaa aggoppa. Neeni ay oottana danddayay? Ubba shiiqotun daro qofaa yootanawu giigettiyoogee nena maaddana danddayees. Yaatikko, neeni doometta heeran zaariyo injjiyaa demmana xayikkonne, guyyeppe zaarana danddayaasa. Neeni Wochchiyo Keelaa Xinaatiyawu giigettiyo wode ubba menttoti huuphe yohuwaara waani gayttiyaakko qoppa. Neeni yaatikko kumetta xinaatiyan yootiyo loꞌꞌo qofaa demmana danddayaasa. Hegaa bollikka, qonccissanawu wayssiya Geeshsha Maxaafaa timirtteti deꞌiyo menttotun qofaa yootanawu giigettana danddayaasa. (1 Qor. 2:10) Aybissi? Amaridaageetu xallay he menttotun qofaa yootanawu koyana danddayiyo gishshataassa. Neeni he ubbabata oottikkonne, daro shiiqotunkka qofaa yootiyo injjiyaa demmana xayikko shin? Neeni zaaranawu koyiyo oyshaa kaalettiya ishawu shiiquwaappe kase yootana danddayaasa.

11. Piliphphisiyuusa 2:4y nuuni ay oottanaadan yootii?

¹¹ Piliphphisiyuusa 2:4 nabbaba. Kiitettida PHawuloosi ayyaanay kaalettin Kiristtaaneti harata goꞌꞌiyaabaa koyanaadan minttettiis. Nuuni shiiqotun he zoriyaa waati oosuwan peeshshana danddayiyoo? Nuugaadan, haratikka qofaa yootanawu koyiyoogaa hassayiyoogaana.

12. SHiiqotun harata minttettiyo loꞌꞌo ogee aybee? (Misiliyaakka xeella.)

¹² Hegaabaa ane hagaadan qoppa. Neeni ne  laggetuura haasayiyo wode darobaa haasayiyoogan harati haasayennaadan oottay? Hegaadan oottennaagee qoncce! Neeni etikka haasayanaadan koyaasa. Hegaadankka, shiiqotun danddayettida keenan daroti qofaa yootanaadan koyoos. Nu ishanttanne michchontta minttettana danddayiyo keehi loꞌꞌo ogee, eti bantta ammanuwaabaa qonccissanaadan etawu injjiyaa immiyoogaa. (1 Qor. 10:24) Nuuni yaatana danddayiyo ogiyaa ane beꞌoos.

13. Daroti qofaa yootanaadan waatana danddayiyoo?

¹³ Issibay, haratikka bantta qofaa yootanaadan, nu qofaa qanttan yootiyoogaa. Cimatinne kayma Kiristtaaneti leemiso gidana danddayoosona. Neeni qanttabaa zaariyo wodekka, daro zaaruwaa yootiyoogaappe naagetta. Neeni menttuwan deꞌiya ubbabaa zaarikko harati zaariyoobay xayana danddayees. Leemisuwawu, ha menttuwan naaꞌꞌu qofati odettidosona, hegeetikka ubbatoo qanttabaa zaariyoogaanne daro zaaruwaa yootiyoogaappe naagettiyoogaa. Ha menttuwan zaaruwaa yootanaadan koyro neessi imettikko, he qofatuppe issuwaa xallaa yootanawu mala.

14. Nuuni qofaa yootanawu aapputoo kushiyaa denttanaakko kuuyanaadan aybi maaddana danddayii? (Misiliyaakka xeella.)

¹⁴ Qofaa yootanawu kushiyaa aapputoo denttanaakko kuuyiyo wode akeekanchcha gida. Nuuni darotoo kushiyaa denttikko, harati zaaribeennaba gidikkonne, kaalettiya ishay darotoo nuna oychchanaadan iisettana danddayoos. Hegee harati qofaa yootanawu kushiyaa denttennaadan oottana danddayees.—Era. 3:7.

15. (a) Qofaa yootanaadan kaalettiyaagee nuna oychchennan aggikko nuuni waanana koshshennee? (b) Kaalettiyaageeti ubba asawu qoppiyoogaa waati bessana danddayiyoonaa? (“ Neeni Kaalettiyo Wode” giya saaxiniyaa xeella.)

¹⁵ SHiiquwan daroti kushiyaa denttikko,  nuuni koyidoogaa keenaa zaarennan aggana danddayoos. Issi issitoo kaalettiyaagee nuna mule oychchennan aggana danddayees. Hegee hidootaa qanxxissiyaaba gidana danddayees, shin kaalettiyaagee nuna oychchennan aggiyo wode nuuni yiillotennan agganawu baaxetana koshshees.—Era. 7:9.

16. SHiiquwan qofaa yootidaageeta waati minttettana danddayiyoo?

¹⁶ Neeni koyidoogaa keenaa zaarana xayikko, harati zaariyo wode loytta ezggada shiiquwaappe simmin eta galatana danddayaasa. Neeni shiiquwan qofaa yootiyoogee minttettiyoogaadan galatiyoogeekka ne ishanttanne michchontta minttettana danddayees. (Lee. 10:21) Galatiyoogee nuuni issoy issuwaa minttettana danddayiyo hara oge.

17. (a) Yelidaageeti bantta naati qofaa yootanawu giigettanaadan waati maaddana danddayiyoonaa? (b) Biiduwaappe akeekidoogaadan, qofaa yootanawu giigettanaadan maaddiya oyddubati aybee? (Tohossa qofaakka xeella.)

¹⁷ SHiiqotun nuuni issoy issuwaa minttettana danddayiyo hara ogee aybee? Intte yelidaageeta gidikko, intte naati bantta layttawu haniyaagaadan bantta qofaa yootanawu giigettanaadan maaddite. (Maa. 21:16) Issi issitoo so asaa metuwaa woy kandduwaabaa xeelliyaagan gita allaallee gubaaꞌiyan xannaꞌettana  danddayees; shin intte naꞌi qofaa yootana danddayiyo issi woy naaꞌꞌu menttoti deꞌana danddayoosona. Qassi intte naati kushiyaa denttido wode ubban oyshettennan aggana danddayiyo gaasuwaa akeekanaadan eta maaddite. Yaatiyoogee, harata oychchiyo wode eti yiillotennaadan oottana danddayees.—1 Xim. 6:18. d

18. Nuuni shiiquwan qofaa yootiyo wode nubaa darobaa yootiyoogaappe waani naagettana danddayiyoo? (Leemiso 27:2)

¹⁸ Nuuni ubbay Yihoowa bonchchissiyaanne nu mala Kiristtaaneta minttettiya qofaa yootanawu giigettana danddayoos. (Lee. 25:11) Nuuni issi issitoo nu deꞌuwan hanidabaa qanttan yootana danddyikkonne, nubaa darobaa haasayennaadan naagettana koshshees. (Leemiso 27:2 nabbaba; 2 Qor. 10:18) Nuuni Yihoowa, A Qaalaanne A asaa xeelliyaagan haasayanawu baaxetana koshshees. (Ajj. 4:11) Menttuwaa oyshay nuuni nubaa yootanaadan oychchiyaaba gidikko nu yaatana koshshees. Hegaa qonccissiya leemisuwaa kaalliya menttuwan beꞌa.

19. (a) Nuuni shiiquwan ubba asawu qoppiyoogaa bessiyo wode ayba ayfe demmiyoo? (Roome 1:11, 12) (b) SHiiquwan qofaa yootiyoogaa xeelliyaagan nena ufayssidabay aybee?

¹⁹ SHiiquwan nu qofaa waati yootanaakko diggiya higgee baynnaba gidikkonne, nuuni ubbay issoy issuwaa minttettanawu baaxetana danddayoos. Hegee kaseegaappe guutta qofaa gujjidi zaariyoogaa gidana danddayees. Woy nuuni qofaa yootiyoogan ufayttiyoogaa, qassi harati zaariyoogan ufayttiyoogaakka gidana danddayees. Gubaaꞌe shiiqotun haratu goꞌꞌaa kaseyiyoogan, nuuni ubbay “mintettana” danddayoos.—Roome 1:11, 12 nabbaba.