1. Yoꞌaasha, Ooziyaananne Yoosiyaasa gakkida metiyaabay aybee?

 INTTE naatettan woy yelagatettan Xoossaa asawu kawo gididabadan qoppite! Yaatin intte maataa waati goꞌettuuteetii? Geeshsha Maxaafay Yihudan kawotida daro yelagatubaa yootees. Leemisuwawu, Yoꞌaashi 7 layttan, Ooziyaani 16 layttan, qassi Yoosiyaasi 8 layttan kawo gididosona. Hagee keehi metiyaaba gidana danddayees! SHin hegee metiyaaba gidikkonne, Yihoowaynne harati maaddin eti loꞌꞌo gidida darobaa oottidosona.

2. Yoꞌaashabaa, Ooziyaanabaanne Yoosiyaasabaa xannaꞌiyoogee nuussi loꞌꞌo gidiyoy aybissee?

² Nuuni kawo woy kawiyo gidana xayikkonne, Yoꞌaasha, Ooziyaananne Yoosiyaasa deꞌuwan hanidabaappe darobaa tamaarana danddayoos. Eti loꞌꞌobaakka iitabaakka kuuyidosona. Eta leemisuwaa kaallidi nuuni loꞌꞌo laggeta doorana, nuna ziqqi oottidi deꞌananne Yihoowa koyana koshshiyoy aybissakko beꞌana.

3. Kawuwaa Yoꞌaashi loꞌꞌobaa kuuyanaadan Yoodaahe waati maaddidee?

³ Yoꞌaashadan loꞌꞌobaa kuuyite. Kawuwaa Yoꞌaashi yelagatettan loꞌꞌobaa kuuyiis. Awu aawi baynnaba gidikkonne, ammanettida Qeese Ubbatu Halaqaa Yoodaahe immiyo kaaletuwaa kaalliis. He qeesee Yoꞌaasha ba naꞌadan zoriis. Yoodaahe loꞌꞌo leemiso gidido gishshawu Yoꞌaashi Yihoowawu haggaazanawunne aagaadan Yihoowawu haggaaziya asata maaddanawu kuuyiis. Qassi Yoꞌaashi Yihoowa beeta maqidasiyaa kaseegaadan ooraxissiis.—2 Odi. 24:1, 2, 4, 13, 14.

4. Nuuni Yihoowa azazota siiqiyoonne azazettiyo wode waani goꞌettiyoo? (Leemiso 2:1, 10-12)

⁴ Intte Yihoowa siiqanaadaaninne I kessido maaraadan deꞌanawu tamaariyoogee inttessi imettida dumma imota. (Leemiso 2: 1, 10-12 nabbaba.) Inttena yelidaageeti daro ogetun inttena loohissana danddayoosona. Kaatiyo giyo michchiyaa loꞌꞌobaa kuuyanaadan I aaway O waati maaddidaakko ane beꞌoos. Ubba galla I aaway O timirtte keettaa efiiddi gallassa xiqisiyaa iira tobbees. A hagaadan gaasu: “Hegaadan tobbiyoogee he gallassaa giddon metoy merettiyo wode suurebaa oottanaadan tana maaddiis.” Inttena yelidaageeti Geeshsha Maxaafaa qofaara maayettiya higgeta kessana danddayoosona, shin he higgeti intte dosiyoobaa oottennaadan diggiyaabadan qoppana danddayeeta. He higgeta azazettanawu inttena aybi maaddana danddayii? Anasteziya giyo michchiyaa O yelidaageeti amarida higgeta kessidoy aybissakko wodiyaa bazzidi iyyo qonccissiyoogaa A hassayawusu. A hagaadan gaasu, “Eti ha higgeta kessidoy tana qohanaassa gidennan, tana siiqiyo gishshawu naaganaassa gidiyoogaa akeekanaadan hegee tana maaddiis.”

5. Intte oottiyoobay inttena yelidaageetinne Yihooway waananaadan oottii? (Leemiso 22:6; 23:15, 24, 25)

⁵ Inttena yelidaageeti Geeshsha Maxaafaappe yootiyo zoriyaa intte oosuwan peeshshiyo wode eti ufayttana. Ubbaappe aaruwan, Xoossay ufayttana, qassi intte aara kaseegaappe aaruwan dabbotana. (Leemiso 22:6; 23:15, 24, 25 nabbaba.) Nuuni Yoꞌaashi yelagatettan oottidobaa kaalliyo loꞌꞌo gaasoy deꞌees.

6. Yoodaahee hayqqi simmin, Yoꞌaashi O zoriyaa siyidee, qassi hegee ay kaalettidee? (2 Hanidabaa Odiya 24:17, 18)

⁶ Yoꞌaashi kuuyido iitabaappe tamaarite. Yoodaahee hayqqi simmin, Yoꞌaashi iitatuura laggetiis. (2 Hanidabaa Odiya 24:17, 18 nabbaba.) Yihoowa siiqenna Yihudaa halaqatu zoriyaa I siyiis. Eti iitabaa oottiyo gishshawu Yoꞌaashi etappe haakkana koshshiyoogaa inttekka maayettennan aggekketa. (Lee. 1:10) SHin I eti yootido iita zoriyaa siyiis. Qassi, Yoꞌaashassi aawaa michchee naꞌaa gidida Zakkaariyaasi A suurissanawu malido wode, Yoꞌaashi Zakkaariyaasa worissiis. (2 Odi. 24:20, 21; Maa. 23:35) Hagee keehi azzanttiyaabanne eeyyatetta! Yoꞌaashi koyro heeran suurebaa oottiis, shin guyyeppe kaddidaagaanne shemppo woriyaagaa gididoogee azzanttiyaaba. Wurssettan, A ashkkarati A woridosona. (2 Odi. 24:22-25) I Yihoowanne A siiqiyaageeti yootiyoobaa ubbatoo siyidaba gidiyaakko A deꞌoy hegaappe keehi dumma gidana! Intte hagaappe ay tamaareetii?

7. Intte oonaara laggetana koshshii? (Misiliyaakka xeella.)

⁷ Yoꞌaashi kuuyido iitabaappe nuuni tamaarana danddayiyo issibay Yihoowa siiqiyaanne A ufayssanawu koyiya asaara laggetana koshshiyoogaa. Eti nuuni loꞌꞌobaa oottanaadan maaddoosona. Nuuni nuuppe bayratiyaageetuura  woy kaalotiyaageetuura laggetana danddayoos. Yoꞌaashi ba laggiyaa Yoodaaheppe keehi kaalotiyoogaa hassayite. Laggeta dooriyoogaara gayttidaagan inttena hagaadan oychchite: ‘Eti taani Yihoowa mintta ammananaadan maaddiyoonaa? Xoossay kessido maaraadan deꞌana mala tana minttettiyoonaa? Yihoowabaanne A tumaabaa haasayiyoonaa? Xoossay kessido maarata eti kaalliyoonaa? Tawu zoree koshshiyo wode tana zoriyoonaa?’ (Lee. 27:5, 6, 17) Intte laggeti Yihoowa siiqennaba gidikko, inttena maaddokkona. SHin intte laggeti Yihoowa siiqiyaageeta gidikko, inttena ubbatoo maaddana!—Lee. 13:20.

8. Asaara gayttanawu nuuni Intternneetiyaa goꞌettiyaaba gidikko, loytti qoppana koshshiyaabay aybee?

⁸ Ha wodiyan Interneettiyaa goꞌettidi so asaaranne laggetuura gayttana danddayiyo loꞌꞌo ogeti deꞌoosona. SHin daro asati harata maalaalissanawu eti shammidobaa woy oottidobaa qonccissiya poototanne biidota ubba asaa bessanawu hegaa goꞌettoosona. Asaara gayttanawu intte hegaa goꞌettiyaaba gidikko, inttena hagaadan oychchite: ‘Taani harata maalaalissanawu koyada hegaa goꞌettiyaanaa? Ta halchchoy harata minttettiyoogeeyye otorettiyoogee? Taani haratuugaadan iitabaa qoppiyaanaa, haasayiyaanaanne oottiyaanaa?’ Oosuwaa Kaalettiya Citaa yara gididi haggaazida Ishaa Naatan Noori hagaadan zoriis: “Asaa ufayssanawu baaxetoppite. Intte yaatikko oonanne ufayssana danddayekketa. Yihoowa ufayssite, intte yaatikko Yihoowa siiqiya asa ubbaa ufayssana.”

9. Ooziyaani ay oottanaadan Yihooway maaddidee? (2 Hanidabaa Odiya 26:1-5)

⁹ Ooziyaanadan loꞌꞌobaa kuuyite. Kawuwaa Ooziyaani yelagatettan deꞌiyo wode bana ziqqi oottiya asa. I ‘tumu Xoossawu yayyiyoogaa’ tamaariis. Ooziyaani 68 layttaa deꞌiis, qassi A deꞌo layttan darotoo Yihooway A anjjiis. (2 Hanidabaa Odiya 26:1-5 nabbaba.) Ooziyaani morkketuppe darota xooniisinne Yerusalaame qohettennaadan loytti naagiis. (2 Odi. 26:6-15) Ooziyaani he ubbabaa oottanaadan Xoossay A maaddido gishshawu ufayttidoogee qoncce.—Era. 3:12, 13.

10. Ooziyaana gakkidabay aybee?

¹⁰ Ooziyaani kuuyido iitabaappe tamaarite. Kawuwaa Ooziyaani darotoo harata azazees. Geella hegee I Yihoowa azazuwaa azazettana koshshenna giidi qoppanaadan oottennan aggenna. Issi galla Ooziyaani Yihoowa beeta maqidasiyaa gelidi otoruwan ixaanaa cuwayiyoosan ixaanaa cuwayanawu maliis, hegee kawoti oottanaadan paqqadettibeennaba. (2 Odi. 26:16-18) Qeese Ubbatu Halaqay Azaariyaasi A zorido gishshawu, Ooziyaani keehi hanqqettiis. Azzanttiyaabay, Ooziyaani ammanettidi deꞌibeenna gishshawu, Yihooway A gogaa harggiyan qaxxayiis. (2 Odi. 26:19-21) I ubbatoo bana ziqqi oottidaba gidiyaakko A deꞌoy ayba loꞌꞌo gidaneeshsha!

11. Nuna ubbatoo ziqqi oottanaadan aybi maaddana danddayii? (Misiliyaakka xeella.)

¹¹ Ooziyaani keehi wolqqaama gidido wode A minotettawunne duretettawu pulttoy Yihoowa gidiyoogaa dogiis. Nuuni hagaappe ay tamaariyoo? Nuuni anjjuwaanne maataa Yihoowappe demmidoogaa hassayana koshshees. Nu oottidoban otorettiyoogaappe, nuuni oottidobawu Yihoowa galatana koshshees. b (1 Qor. 4:7) Nuuni nagaranchcha gidiyoogaanne nuuyyo seeray koshshiyoogaa nuna ziqqi oottidi akeekana bessees. Layttay 60 heera gidido issi ishay hagaadan giis: “Harati ta balaa akeekiyo wode taani yiillotana woy hidootaa qanxxana koshshennaagaa tamaaraas. Taani issi issitoo eeyyabaa  oottin taayyo zoree imettiyo wode hegaa giigissanawu baaxetaysinne tawu danddayettida keenan Yihoowawu ubbatoo oottays.” Nuuni Yihoowawu azazettiyoonne ubbatoo nuna ziqqi oottiyo wode nu deꞌuwan tumuppe ufayttana.—Lee. 22:4.

12. Yoosiyaasi yelagatettan deꞌiyo wode Yihoowa waati koyidee? (2 Hanidabaa Odiya 34:1-3)

¹² Yoosiyaasadan loꞌꞌobaa kuuyite. Yoosiyaasi awu layttay 16 gidido wode, Yihoowa koyiyoogaa doommiis. I Yihoowabaa eranawunne A sheniyaa polanawu koyiis. Gidikkonne, ha yelaga kawuwawu deꞌoy metiyaaba gidennan aggenna. Worddo goynoy aakkido he wodiyan I tumu goynuwawu exatana koshshiis. Qassi I hegaadan oottiis! Yoosiyaasi awu layttay 20 gidanaappe kase worddo goynuwaa biittaappe xayssiyoogaa doommiis.—2 Hanidabaa Odiya 34:1-3 nabbaba.

13. Inttena Yihoowawu sheedhdhiyoogee inttena waati maaddii?

¹³ Intte yelaga gidikkokka Yihoowabaanne ufayssiya A eeshshatubaa gujjidi tamaariyoogan Yoosiyaasa milatana danddayeeta. Intte yaatiyo wode inttena Yihoowawu sheedhdhanawu koyana. Hegee inttena waati maaddanee? Luuka giyo 14 layttan xammaqettida ishay bana Yihoowawu sheedhdhido gallassan hagaadan giis, “Haꞌꞌippe doommada ta deꞌuwan Yihoowa haggaazuwaa kaseyanawunne A ufayssanawu baaxetana.” (Mar. 12:30) Inttekka hegaadan oottanawu koyikko hegee intteyyo gita anjjo gidana!

14. Amarida yelagati Kawuwaa Yoosiyaasi oottidobaa waati kaalliyaakko bessiya leemisuwaa yoota.

¹⁴ Yihoowa ashkkara gidida issi yelagaa gakkana danddayiya amarida paaceti awugeetee? Johaani 12 layttan xammaqettiis; aara tamaariya naati I elektronike sijaaraa sarbbanaadan iisettiyoogaa yootiis. He paaciyaa eqettanawu minotettaa demmanawu Johaani I elektronike sijaaraa sarbbiyoogee ba payyatettaanne I Yihoowaara dabbotido dabbotaa qohana danddayiyoogaa hassayiis. Raacheelo giyo 14 layttan xammaqettida michchiyaa timirtte keettan O gakkiya paaciyaa xoonanawu O aybi maaddidaakko yootaasu. A hagaadan gaasu: “Geeshsha Maxaafaabaanne Yihoowabaa taani hassayanaadan oottiyaabata  koyanawu baaxetays. Leemisuwawu, taarikiyaa timirttee taani Geeshsha Maxaafaa taarikiyaa woy hiraagaa hassayanaadan oottees. Woy issi issitoo timirtte keettan issi uraara haasayiyo wode awu yootana danddayiyo xiqisiyaa qoppays.” Inttena gakkiya paacee Yoosiyaasaagaappe dumma gidana danddayees; shin aagaadan akeekanchchanne ammanettiyaageeta gidana danddayeeta. Yelagatettan intte paaciyaa xooniyoogee sinttappe gakkana paaciyawu intte giigettanaadan maaddana.

15. Yoosiyaasi Yihoowawu ammanettidi haggaazanaadan maaddidabay aybee? (2 Hanidabaa Odiya 34:14, 18-21)

¹⁵ Kawuwaa Yoosiyaasi awu layttay 26 gidido wode beeta maqidasiyaa bottokoniyoogaa doommiis. Bottokoniyo wode, “GODAI Muuse baggaara immido Higgiyaa [Maxaafay]” beettiis. He kawoy hegee nabbabettin siyido wode, hegan xaafettidabaa azazettanawu issi issibaa sohuwaara laammiis. (2 Hanidabaa Odiya 34:14, 18-21 nabbaba.) Geeshsha Maxaafaa ubbatoo nabbabiyoogaa doseetii? Intte ubba galla hegaa nabbabanawu baaxetennan waayi aggana. SHin yaatiyoogan ufaytteetii? Inttena maaddana danddayiya xiqiseta xaafi oyqqidetii? Qommoora odettida Luuki demmido ufayssiyaabata xaafi oyqqees. Hegaadan oottiyoogee Geeshsha Maxaafaa xiqiseta woy hegaappe tamaaridobata intte hassayanaadan maaddana danddayees. Intte kaseegaappe aaruwan Geeshsha Maxaafaa eriyoonne siiqiyo wode Yihoowawu kaseegaappe aaruwan haggaazanawu koyana. Qassi Xoossaa Qaalay Yoosiyaasi suurebaa oottanaadan maaddidoogaadan, inttenakka maaddana.

16. Yoosiyaasi moorido gita mooroy aybee, qassi nuuni hegaappe ay tamaariyoo?

¹⁶ Yoosiyaasi kuuyido iitabaappe tamaarite. Yoosiyaasi awu layttay 39 heera gidido wode, I hayqqanaadan oottiya moorobaa oottiis. Kaaletuwaa Yihoowa oychchiyoogaa aggidi banan ammanettiis. (2 Odi. 35:20-25) Nuuni hagaappe tamaariyoobay deꞌees. Nu layttay aappuna gidikkokka woy Geeshsha Maxaafaa xannaꞌido wode ay keena gidikkokka, nuuni Yihoowa ubbatoo  koyana bessees. Yaatanawu nuuni ubbatoo A kaaletuwaa demmanawu woossana, A qaalaa xannaꞌananne kayma Kiristtaaneti yootiyo zoriyaa siyana koshshees. Nuuni yaatikko darin moorennan aggananne ufayttana danddayoos.—Yaaq. 1:25.

17. Yihudan kawotida heezzu kawotuppe nuuni tamaariyoobay aybee?

¹⁷ Intte yelagatettan oottana danddayiyo ufayssiya darobati deꞌoosona. Yoꞌaasha, Ooziyaananne Yoosiyaasa taarikee bessiyoogaadan, yelagati loꞌꞌobaa doorananne Yihoowa ufayssiya deꞌuwaa deꞌana danddayoosona. Ha yelagati moorido mooroy iitabaa kaalettidoogee qoncce. SHin intte eti oottido loꞌꞌobaa oottikko, qassi eti balidobaa oottennaadan naagettikko ufayssiya deꞌuwaa deꞌana danddayeeta.

18. Intte ufayssiya deꞌuwaa deꞌana danddayiyoogaa bessiya Geeshsha Maxaafaa taariketi awugeetee? (Misiliyaakka xeella.)

¹⁸ Geeshsha Maxaafay Yihoowakko shiiqida, A ufayssidanne ufayssiya deꞌuwaa deꞌida hara yelagatubaakka yootees. Etappe issoy Daawita. I yelagatettan Xoossawu goynnanawu dooriisinne ammanettiya kawo gidiis. Daawiti moorobaa oottido wodee deꞌikkonne, Xoossay A ammanettiya asadan xeelliis. (1 Kaw. 3:6; 9:4, 5; 14:8) Daawitabaa xannaꞌiyoogee intte Yihoowawu ammanettidi haggaazanaadan minttettana danddayees. Qassi Marqqoosa woy Ximootiyoosa taarikiyaa loytti pilggana danddayeeta. Eti naatettaappe doommidi Yihoowawu ammanettidi haggaazidosona. Eti Yihoowawu haggaazanawu kuuyidoogan I ufayttiis, qassi etikka ufayttidosona.

19. Intte ay mala deꞌuwaa deꞌana danddayeetii?

¹⁹ Intte haꞌꞌi oottiyoobay sinttappe intte deꞌoy ufayssiyaagaa gidanaadan woy gidennaadan oottees. Intte intte akeekan gidennan, Yihoowan ammanettiyaaba gidikko loꞌꞌobaa kuuyanaadan I inttena maaddana. (Lee. 20:24) Intte woppu giidi ufayssiya deꞌuwaa deꞌana danddayeeta. Yihooway intte awu oottidobaa xoqqu ootti xeelliyoogaa hassayite. Nuuni saluwan deꞌiya nu siiqo Aawawu haggaaziyoogaappe aaruwan nu deꞌuwan oottana danddayiyo loꞌꞌobi baawa.