1-2. Looxeegaadan, ha wodiyan deꞌiya Kiristtaaneta gakkiya paacee aybee?

 NUUNI ha wodiyan deꞌiya asaa iita kandduwaa beꞌiyo wode Looxeegaadan nuussi siyettees. Saluwan deꞌiya nu Aaway iita kandduwaa ixxiyoogaa I eriyo gishshawu, ‘higgiyawu azazettenna shaaramuxiya asati oottiyooban I keehi unꞌꞌettiis.’ (2 PHe. 2:7, 8) Looxee Xoossaa wozanappe bonchchidonne siiqido gishshawu he wode deꞌiya asaa iita kandduwaa ixxiis. Nuunikka Yihooway kessido kandduwaa maaraa darin bonchchenna woy mule azazettenna asaa giddon deꞌoos. Hegaa malabay deꞌishinkka, nuuni nu Xoossaa loytti siiqiyo wodenne wozanappe A bonchchiyo wode kandduwan geeshsha gididi deꞌana danddayoos.—Lee. 14:2.

² Leemiso maxaafan deꞌiya minttettiya qofaa baggaara Yihooway nuuni kandduwan geeshsha gididi deꞌanaadan nuna maaddees. Ubba Kiristtaaneti attumaageeti, maccaageeti, yelagatinne cimatikka hegan deꞌiya loꞌꞌo zoriyaa pilggiyoogan loytti goꞌettana danddayoosona.

3. Leemiso 17:3y yootiyoogaadan, nu wozanaa naagana koshshiyo waanna gaasoy aybee? (Misiliyaakka xeella.)

³ Nu leemiso wozanaa naagana koshshiyo waanna gaasoy Yihooway nu wozanaa qoriyoogaa. Hegaa giyoogee harati nubaa akeekana danddayiyoogaappe aaruwan I nuna beꞌeesinne nuuni tumuppe ay mala asakko erees giyoogaa. (Leemiso 17:3 nabbaba.) Merinaa deꞌuwaa demmanaadan maaddana danddayiya ha zoriyaa nuuni ubbatoo loytti qoppikko, I nuna siiqana. (Yoh. 4:14) Nuuni yaatiyo wode, iita kandduwan, Seexaanay  aassiyo wordduwaaninne ha alamiyan deꞌiya iita asatun mule qohettokko. (1 Yoh. 5:18, 19) Nuuni kaseegaappe aaruwan Yihoowakko shiiqiyo wode nuuni A loytti siiqananne bonchchana. Nuuni nu Aawaa azzanttanawu koyenna gishshawu, nagaraa oottanaadan denttettiya qofaa eqettoos. Nuuni iitabaa oottanawu paacettiyo wode nuna hagaadan oychchana danddayoos, ‘Tana keehi siiqiya Yihoowa aybissi azzanttiyaanaa?’—1 Yoh. 4:9, 10.

4. Issi michchiyaa Yihoowawu yayyidoogee iitabaa oottennaadan waati naagidee?

⁴ Pokkobaa oottanaadan paacettida Kiroweshiyan deꞌiya Martto giyo michchiyaa hagaadan gaasu: “Loytta qoppanawunne iitabaa oottanaadan denttettiya amuwaa eqettanawu metootaas. SHin Yihoowawu yayyiyoogee tana naagiis.” b Xoossawu yayyiyoogee yaatanaadan waati maaddii? Martta iitabaa oottanawu kuuyiyoogee kaalettiyo qohuwaa A wotta dentta qoppidoogaa yootaasu. Nuunikka hegaadan oottana danddayoos. Hegee kaalettiyo keehi iitabay nuuni Yihoowa azzanttiyoogaanne awu merinawu haggaazana danddayennaagaa.—Doo. 6:5, 6.

5. Liyo hanotaappe ay tamaarana danddayay?

⁵ Nuuni Yihoowawu yayyikko iitaa oottiyaageetuura laggetokko. Kongon deꞌiya Liyoy hegaa akeekiis. I xammaqettin oyddu layttay aadhdhi simmin, iitabaa oottiya asatuura laggetiis. Iitabaa oottana xayikko hegee bala gidenna giidi I qoppiis. Gidoppe attin, iitatuura laggetidoogee I sohuwaara ushshaa likkiyaappe aattidi uyanaadaaninne pokkobaa oottanaadan denttettiis. Hegaappe simmin, Kiristtaane gidida A yelidaageeti tamaarissidobaanne Yihoowawu haggaaziyo wode ay keenaa ufayttidaakko I loytti qoppiyoogaa doommiis. Hegee waati maaddidee?  I zaarettidi loꞌꞌobaa oottanawu qoppiyoogaa doommiis. Cimati maaddin I Yihoowakko simmiis. Ha wodiyan I cimanne dumma aqinye gididi ufayssana haggaaziiddi deꞌees.

6. Nuuni haꞌꞌi ay beꞌanee?

⁶ Naaꞌꞌu maccaasadan qonccida aadhdhida eratettaabaanne eeyyatettaabaa yootiya Leemiso shemppo 9 ane pilggoos. c Nuuni hegaa pilggiyo wode, Seexaanaa alamiyan deꞌiya asay bessenna inddaa gaytettaanne pornograafiyaa ubbatoo qoppiyoogaa hassaya. (Efi. 4:19) Yaaniyo gishshawu, ubbatoo Xoossawu yayyiyoogeenne iitabaappe haakkiyoogee keehi koshshiyaaba. (Lee. 16:6) Hegaa gishshawu, attuma woy macca gidin nuuni ubbaykka ha shemppoy yootiyoobaappe loytti goꞌettana danddayoos. Ha naaꞌꞌu maccaasati ‘akeeki baynnaageeta’ shoobbiyaabadan qonccidosona. Eti naaꞌꞌaykka hagaadan goosona giyoogaa mala, ‘Ta soo yiidi qumaa miite.’ (Lee. 9:1, 5, 6, 13, 16, 17) He shoobiyaa ekkiyaageetuura gayttidaagan haniyaabay dumma dumma.

7. Leemiso 9:13-18y yootiyoogaadan, eeyya maccaasee shoobiyaa ekkiyaageeti waananee? (Misiliyaakka xeella.)

⁷ ‘Eeyya maccaasee’ shoobiyaa beꞌa. (Leemiso 9:13-18 nabbaba.) Akeeki baynnaageeti I soo yiidi gibiraa maanaadan yeellaa xayada shoobbawusu. Hegee ay kaalettanee? ‘I imattati duufo giddon deꞌoosona.’ Leemiso shemppo 9ppe kasetidi odettida hegaa mala leemisota neeni hassayennan aggakka. Nuuni “shaaramuxa maccaaseeppenne sheleeshshiya qaalan haasayiya laggetteeppe” naagettanaadan odettiis. “I soo biyoogee haiqqanau biyoogaa” gidiyoogeekka nuussi odettiis. (Lee. 2:11-19) Leemiso 5:3-10y ‘I tohoti hayquwaakko duge biyo’ hara ‘shaaramuxa maccaaseeppe’ naagettanaadan yootees.

8. Nuuni doorana koshshiyaabay aybee?

⁸ ‘Eeyya maccaasiyaa’ yootiyoobaa siyiyaageeti I shoobiyaa ekkanawu woy ixxanawu doorana koshshees. Nuunikka hegaa malabaa dooriyoogee koshshana danddayees. Issi uri nuuni pokkobaa oottanaadan denttettikko, woy nuuni qoppennan pornograafiyaa misiliyaa beꞌikko nu waatanee?

9-10. Bessenna inddaa gaytettaappe nuuni naagettana koshshiyo amarida gaasoti awugeetee?

⁹ Bessenna inddaa gaytettaappe nuuni naagettana koshshiyo loꞌꞌo gaasoy deꞌees. Ha ‘eeyya maccaasiyaa’ hagaadan gidoogee odettiis: “Wuuqqidi uyiyo haattai mal77ees.” “Wuuqqidi uyiyo haattai” ay qonccissii? Geeshsha Maxaafay  azinaynne machchiyaa inddan gayttiyoogaa gazddissiya haattan leemisees. (Lee. 5:15-18) Higgiyaa maaran aqo oyqqida azinaynne machchiyaa inddan gayttiyoogan ufayttana danddayoosona. SHin hegee ‘wuuqqidi uyiyo haattappe’ keehi dummatees. Wuuqqidi uyiyo haattay bessenna inddaa gaytettaa qonccissana danddayees. Kaysoy qosan wuuqqiyoogaadan, pokkobaa oottiya asati hegaa genttanawu maloosona. Eti oottiyoobaa ooninne erennabadan qoppiyaaba gidikko, “wuuqqidi uyiyo haattai” malꞌꞌiyaaba milatana danddayees. Yihooway ubbabaa beꞌiyo gishshawu, eti banttana cimmoosona. Yihoowan sabettennan aggiyoogaappe aaruwan iitabi baawa; hegaa gishshawu he azzanttiyaabay malꞌꞌenna. (1 Qor. 6:9, 10) SHin harabaykka deꞌees.

¹⁰ Bessenna inddaa gaytettay issi uri yeellatanaadan, pattenna asadan bana xeellanaadan, koyennan shaaranaadaaninne so asay laalettanaadan oottana danddayees. Eeyya maccaasee shoobiyaa ekkennan aggiyoogee eratetta gidiyoogee qoncce. Pokkobaa oottiya daroti eti Yihoowaara dabbotido dabbotay moorettiyoogaa xalla gidennan, worana danddayiya harggiyan oyqettoosona. (Lee. 7:23, 26) SHemppo 9 paydo 18y hagaadan giidi kuuyees: ‘I imattati duufo giddon deꞌoosona.’ Yaatin, azzanttiyaabaa kaalettiya I shoobiyaa daroti ekkiyoy aybissee?—Lee. 9:13-18.

11. Pornograafiyaa beꞌiyoogee keehi qohiyaaba gidiyoy aybissee?

¹¹ Nuuni naagettana koshshiya issibay pornograafiyaa. Amaridaageeti pornograafiyaa beꞌiyoogee qohenna giidi qoppoosona. SHin, pornograafee asa qohees, asay bananne harata bonchchennaadan oottees qassi amale gidees. Pokkobaa bessiya misiliyaa beꞌikko, hegaa dogiyoogee keehi metees. Qassi pornograafee asay iitabaa amottiyoogaa agganaadan oottenna; ubba hegee yaa amottanaadan oottees. (Qol. 3:5; Yaaq. 1:14, 15) Ee, pornograafiyaa beꞌiya daroti pokkobaa oottoosona.

12. Nuuni pokkobaa qoppanaadan oottiya misiletuppe naagettanawu baaxetiyoogaa waati bessana danddayiyoo?

¹² Nu elektronike miishshan pornograafiyaa misilee yiikko nuuni Kiristtaane gidiyoogaadan waatana koshshii? Nuuni beꞌiyoogaa sohuwaara aggana koshshees. Nuussi aybippekka aadhdhiyaabay nuuni Yihoowaara dabbotido dabbotaa gidiyoogaa hassayiyoogee yaatanaadan nuna maaddana danddayees. Issi issi misileti pornograafe gidana xayikkonne, nuuni pokkobaa qoppanaadan oottana danddayoosona. Nuuni hegaappe naagettana koshshiyoy aybissee? Nuuni pokkobaa oottiyoogaa qoppanawukka koyenna gishshataassa. (Maa. 5:28, 29) Taylandden deꞌiya Deevida giyo cimay hagaadan giis: “‘Misilee pornograafe gidana xayikkokka, taani hegaa aggennan beꞌikko Yihooway ufayttii?’ gaada tana oychchays. Yaatiyoogee taani loꞌꞌobaa oottanaadan maaddiis.”

13. Loꞌꞌobaa oottanaadan nuna aybi maaddii?

¹³ Yihoowa azzanttiyaabaa oottanawu yayyiyoogee nuuni loꞌꞌobaa oottanaadan maaddees. Xoossaassi yayyiyoogee ‘aadhdhida eratettaassi doometta.’ (Lee. 9:10) Leemiso shemppo 9 doomettan nuuni hagaa akeekoos; xiqisee ‘tumu aadhdhida eratettaa’ hara maccaaseera geeddarssees.

14. Leemiso 9:1-6y yootiyo hara shoobee aybee?

¹⁴ Leemiso 9:1-6 nabbaba. Ha xiqisee nuna Medhdhidaagaanne aadhdhida eratetta ubbawu Pultto gidida Yihoowa shoobiyaabaa yootees. (Lee. 2:6; Roo. 16:27) Ha sohoy laappun tuussati deꞌiyo wogga keettaabaa yootees. Hagee Yihooway keha gidiyoogaanne A aadhdhida eratettaa bantta deꞌuwan  oosuwan peeshshanawu koyiya ubbaa mokki ekkiyoogaa qonccissees.

15. Xoossay nuuni ay oottanaadan shoobbii?

¹⁵ Leemiso shemppo 9n odettida ‘tumu aadhdhida eratettaa’ qonccissiya maccaasee leemisuwaappe Yihooway keha gidiyoogaanne nuussi loꞌꞌobaa ubbaa immiyoogaa akeekoos. Ha maccaasiyaa imattati I soo yaanaadan, A giigissido malꞌꞌiya ashuwaa maanaadaaninne A agido woyne eessaa uyanaadan shoobbiyoogaa ha paydoti yootoosona. (Lee. 9:2) Qassi paydo 4ynne 5y yootiyoogaadan, “Eeyyatakka a [tumu aadhdhida eratettiyaa] hagaadan yaagaasu; ‘Haa yiite; yiidi ta qumaa miite.’” Ha maccaasee shoobiyaa nuuni ekkana koshshiyoy aybissee? Yihooway ba naati akeekanchcha gidanaadaaninne qohettennaadan koyiyo gishshataassa. Nuuni nuna qohana danddayiya moorobaa oottanaadan I koyenna. ‘I suuretussi maaddiya zoriyaa woy aadhdhida eratettaa minjjiyoy’ hegaassa. (Lee. 2:7) Nuuni Yihoowa wozanappe bonchchiyo wode, A ufayssanawu koyoos. A loꞌꞌo zoriyaa siyoosinne hegaa oosuwan peeshshanawu keehi koyoos.—Yaaq. 1:25.

16. Xoossawu yayyiyoogee loꞌꞌobaa kuuyanaadan Aliyaana waati maaddidee, qassi hegee ay demissidee?

¹⁶ Xoossawu yayyiyoogee loꞌꞌobaa kuuyanaadan Aliyaana waati maaddidaakko akeeka. Aliyaani gubaaꞌe cimanne asttamaaretettaa oosuwaa oottees; I hagaadan giis: “Tanaara oottiyaageetuppe daroti pornograafe pilimeta mattumaa gaytettaabaa tamaarissiyaabadan qoppoosona.” SHin Aliyaani hegan cimettibeenna. I hagaadan giis: “Taani Yihoowa siiqiyoonne bonchchiyo gishshawu, he pilimeta mule beꞌennan ixxaas. Qassi taani hegaa beꞌennan ixxidoy aybissakko tanaara oottiyaageetussi qonccissaas.” ‘Akeekaa ogiyan hemettanaadan’ ‘tumu aadhdhida eratettay’ zoriyo zoriyaa I oosuwan peeshshiis. (Lee. 9:6) Aara tamaarissiyaageetuppe amaridaageeti keehi maalaalettido gishshawu, haꞌꞌi Geeshsha Maxaafaa xannaꞌoosonanne shiiqota shiiqoosona.

17-18. ‘Tumu aadhdhida eratettaa’ shoobiyaa ekkiyaageeti demmiyo anjjoy aybee, qassi eti aybaa yeemuwan naagana danddayiyoonaa? (Misiliyaakka xeella.)

¹⁷ Ufayssiya hidootay nuussi deꞌanaadan nuuni waatanaakko qonccissanawu Yihooway naaꞌꞌu maccaasatu leemisuwaa yootiis. ‘Eeyya maccaasee’ shoobiyaa ekkiyaageeti pokkoban ufayttanawu baaxetoosona. Tumaa yootanawu, eti sinttanaabaa sheneho giidi haꞌꞌissa xallawu deꞌoosona. Eti oottiyoobay hayquwaa kaalettees.—Lee. 9:13, 17, 18.

¹⁸ ‘Tumu aadhdhida eratettaa’ qonccissiya maccaasee shoobiyaa ekkiyaageetussi keehi dumma hidootay deꞌees! Qassi Yihoowa dabbo gididi deꞌanawu koshshiya ubbabay etassi  deꞌiyo gishshawu eti keehi ufayttoosona. (Isi. 65:13) Hananabaa yootiya Isiyaasa baggaara Yihooway hagaadan gees: “Ane loittidi, taani odiyoogaa ezggite; lo77obaa miite; qassi modhdhuwan intte asatettaa ufaissite.” (Isi. 55:1, 2) Nuuni Yihooway dosiyoobaa dosoos, qassi I ixxiyoobaa ixxoos. (Maz. 97:10) ‘Tumu aadhdhida eratettaa’ tamaaranaadan harata shoobbiyoogan nuuni ufayttoos. Nuunikka “katamaassi xoqqa sohuwan eqqidi, ‘Inttenoo, eri paccidoogeetoo hagaa gelite!’ [yaagiya]” ashkkaratu mala. Nuuninne shoobiyaa ekkiyaageeti demmiyo goꞌꞌay haꞌꞌissa xallawu deꞌiyaaba gidenna. Hegee merinawu demmiyooba; nuuni ‘akeeka ogiyan hemettiyoogee’ merinawu ‘deꞌanaadan’ oottees.—Lee. 9:3, 4, 6.

19. Eranchchaa 12:13, 14y yootiyoogaadan, nuuni ay oottanawu murttana koshshii? (“ Xoossawu Yayyiyoogee Nuna Goꞌꞌees” giya saaxiniyaakka xeella.)

¹⁹ Eranchchaa 12:13, 14 nabbaba. Nuuni wozanappe Yihoowa bonchchiyoogee nuna naagees, qassi ha wurssetta gallassatun nuuni kandduwan geeshsha gididi deꞌanaadaaninne akko shiiqanaadan maaddees. Nuuni Xoossawu wozanappe yayyiyoogee danddayettida keenan daro asay ‘tumu aadhdhida eratettaa’ koyanaadaaninne hegan goꞌettanaadan aggennan shoobbana mala nuna denttettees.