1-2. Nu woosaara gayttidaagan nuuni ay qoppana danddayiyoo?

 NEENI ‘Yihooway ta woosaa zaaraneeshsha?’ gaada qoppa eray? Yaatikko, hegaadan qoppiyay ne xalla gidakka. Hara daro ishanttinne michchonttikka banttana metoy gakkido wode hegaadan qoppidoogaa yootidosona. Waayee nuna gakkiiddi deꞌikko, Yihooway nu woosaa waati zaariyaakko akeekiyoogee nunakka metana danddayees.

² Yihooway bawu goynniyaageeti woossiyo woosaa zaariyoogaa nuuni ammanettana danddayiyoy aybissakko ane beꞌoos. (1 Yoh. 5:15) Qassi nuuni ha oyshata beꞌana: Issi issitoo nuussi Yihooway nu woosaa zaarennaba milatiyoy aybissee? Ha wodiyan, Yihooway woosaa ayba ogetun zaarii?

3. Yihooway nuuni A woossanaadan koyiyoy aybissee?

³ Yihooway nuna keehi siiqiyoogaanne I nuna xoqqu ootti xeelliyoogaa Geeshsha Maxaafay yootees. (Hag. 2:7; 1 Yoh. 4:10) Woosan A maaduwaa oychchanaadan I nuna shoobbiyoy hegaassa. (1 PHe. 5:6, 7) I nuuni A mata dabbo gididi deꞌanaadaaninne metuwaa genccanaadan maaddanawu koyees.

4. Yihooway bawu goynniyaageetu woosaa zaariyoogaa waati eriyoo? (Misiliyaakka xeella.)

⁴ Yihooway bawu goynniyaageetu woosaa zaaridoogaa yootiya taarikiyaa Geeshsha Maxaafaappe darotoo nabbaboos. O taarikiyaa qoppana danddayay? Issi taarikee Kawuwaa Daawitaagaa. Daawitawu A deꞌo laytta ubban iita morkketi daroti deꞌiyo gishshawu, bana Yihooway maaddanaadan I darotoo woossiis. Issi wode I hagaadan giidi Yihoowa mintti woossiis: “Abeet GODAU, ta woosaa siya; ta watiwatuwaa ezgga. Neeni xillonne ammanettiyaagaa gidiyo gishshau, taayyo zaaruwaa  imma.” (Maz. 143:1) Daawiti bana ashshanaadan woossido woosaa Yihooway zaariis. (1 Sam. 19:10, 18-20; 2 Sam. 5:17-25) Daawiti ammanettidi hagaadan gaana danddayiis: “GODAI bana xeesiya ubbau, . . . matan de7ees.” Nuunikka hegaa ammanettana danddayoos.—Maz. 145:18.

5. Beni Yihoowawu goynniyaageeti qoppidoogaadan bantta woosaa zaaruwaa demmidonaa? Leemisuwaa yoota. (Misiliyaakka xeella.)

⁵ Yihooway nuuni qoppidoogaadan nu woosaa zaarennan aggana danddayees. Kiitettida PHawuloosa hanotay hegaa bessees. I bana agunttaadan ‘caddi oyqqidabaa’ xayssanaadan Xoossaa oychchiis. Ha metuwaa xeelliyaagan PHawuloosi heezzutoo woossiis. Yihooway he woosaa zaaridee? PHawuloosi qoppidoogaadan gidana xayikkonne, ee zaariis. Yihooway he metuwaa xayssiyoogaappe, PHawuloosi ammanettidi awu haggaazanaadan koshshiya wolqqaa immiis.—2 Qor. 12:7-10.

6. Issi issitoo nuussi Yihooway nu woosaa zaarennaba milatiyoy aybissee?

⁶ Nu woosaa zaaroykka nuuni qoppidoogaappe issi issitoo dummatana danddayees. Yihooway nuna maaddanawu keehi loꞌꞌo ogiyaa eriyoogaa ammanettana danddayoos. Haray atto I “nuuni woossiyoobaa woi qoppiyoobaa ubbaappe keehi darissi oottanau” danddayees. (Efi. 3:20) Hegaappe denddidaagan, I nuuni qoppibeenna wodiyan woy nu qoppibeenna ogiyan nu woosaa zaarana danddayees.

7. Nuuni woossiyoobaa laammiyoogee koshshana danddayiyoy aybissee? Leemisuwaa yoota.

⁷ Nuuni Yihooway koyiyoobaa loytti akeekiyo wode nu woossiyoobaa laammiyoogee koshshana danddayees. Martin Potizingera hanotaa ane beꞌa. Ishaa Potizingeri aqo oyqqidi daro takkennan, Naazeti asaa issippe gurddiyo kambbiyan qashettiis. I ba machcheessi koshshiyaabaa kunttanawunne zaarettidi haggaazanawu asaa gurddiyo kambbiyaappe Yihooway A kessanaadan koyro woossiis. SHin, Yihooway A qashuwaappe laꞌa kessanaagaa bessiyaabi aybinne baynnaagaa I naaꞌꞌu saaminttaappe simmin akeekiis. Hegaa gishshawu I hagaadan woossiyoogaa doommiis: “Yihoowawu, taani oottanaadan neeni koyiyoobaa hayyanaa tana bessarkkii!” Hegaappe simmin, I kambbiyan deꞌiya hara ishantti gencciiddi deꞌiyoobaa qoppiyoogaa doommiis. Etappe darota machchotubaynne naatubay keehi hirggissees. Ishaa Potizingeri guyyeppe  hagaadan woossiis: “Yihoowawu, neeni tawu ooratta oosuwaa immido gishshawu galatays. Taani ta ishantta minttettanaadan tana maadda.” I kambbiyan kaalliya uddufun laytta hegaadan oottiiddi takkiis!

8. Nuuni woossiyo wode hassayana koshshiyoobay aybee?

⁸ Yihooway halchchidobay deꞌiyoogaanne I hegaa ba keerido wodiyan polanaagaa nuuni hassayana bessees. I meretay gattiyo daafabaa, harggiyaanne hayquwaa mala ha wodiyan nuuni tuggatanaadan oottiya meto ubbaa merinawu muleera xayssanawu halchchiis. Yihooway ba Kawotettaa baggaara ba halchchuwaa polana. (Dane. 2:44; Ajj. 21:3, 4) Gidoppe attin, he wodee gakkanaashin Seexaanay ha alamiyaa haaranaadan Yihooway paqqadiis. b (Yoh. 12:31; Ajj. 12:9) Yihooway ha wodiyan asaa metuwaa ubbaa xayssiyaakko, Seexaanay ha alamiyaa loꞌꞌo ogiyan haariiddi deꞌiyaaba milatana danddayees. Gidikkonne, Yihooway qaalaa gelidobata polanaashin nuuni naagana bessees; shin hegee I nuna maaddenna giyoogaa gidenna. Yihooway nuna maaddiyo amarida ogeta ane beꞌoos.

9. Nuuni loꞌꞌobaa kuuyana koshshiyo wode Yihooway nuna waati maaddii? Leemisuwaa yoota.

⁹ I aadhdhida eratettaa immees. Loꞌꞌobaa kuuyanawu nuussi koshshiya aadhdhida eratettaa immanawu Yihooway qaalaa geliis. Leemisuwawu, nuuni aqo oyqqanawu woy oyqqennan agganawu kuuyiyoogaa mala nu deꞌuwaa laammana danddayiyaabaa kuuyiyo wode Yihooway immiyo aadhdhida eratettay nuussi keehi koshshees. (Yaaq. 1:5) Maariyo giyo aqo oyqqabeenna michchee hanotaa beꞌa. c A issi ishaara erettiyo wode ubba wode aqinye gidada ufayssan haggaazaydda deꞌawusu. A hagaadan gaasu: “Nu laggetettay minniyo wode nuuni siiqettiyoogaa doommida. Taani issibaa kuuyana koshshiyoogaa akeekaas. Taani hegaa xeelliyaagan darotoo woossaas. Yihoowa kaaletoy tawu koshshikkonne, Yihooway tawu kuuyennaagaa erays.” Aadhdhida eratettaa demmanawu A woossido woosaa Yihooway zaaridoogaa akeekaasu. Waatada? A nu xuufeta pilggidoogee ba oyshatuyyo zaaruwaa demmanaadan O maaddiis. A ammanettida ba aayyiyaa yootido loꞌꞌo zoriyaakka siyaasu. He zoree Maariya ba qofaa yigganaadan maaddiis. Hegaa gishshawu, A loꞌꞌobaa kuuyaasu.

10. Naaꞌꞌantto Qoronttoosa 4:7y yootiyoogaadan, Yihooway bawu goynniyaageeta maaddanawu waatii? Leemisuwaa yoota. (Misiliyaakka xeella.)

¹⁰ Genccanawu I nuussi wolqqaa immees. Yihooway kiitettida PHawuloosawu oottidoogaadan, nuuni nu metuwaa genccanawu koshshiya wolqqaa nuussi immees. (2 Qoronttoosa  4:7 nabbaba.) Benjjaamina giyo ishay wayssiya hanotaa genccanaadan Yihooway waati maaddidaakko beꞌa. Benjjaamini yelagatettan daro wodiyawu bantta so asaara Afirkkan betetu kambbiyan deꞌiis. Benjjaamini hagaadan giis: “Yihoowa ufayssiyaabaa oottanawu I tawu wolqqaa immanaadan ubbatoo A woossaas. Taani woppu gaanaadan, aggennan sabbakanawu xala gidanaadaaninne ayyaanaaban minnada deꞌanawu xuufeta demmanaadan maaddiyoogan Yihooway ta woosaa zaariis.” I gujjidi hagaadan giis: “Ishanttunne michchonttu deꞌuwan hanidabaa nabbabiyoogeenne eti genccanaadan Yihooway eta waati maaddidaakko eriyoogee taani ammanettada deꞌanawu murttido murttiyaa minttiis.”

11-12. Yihooway nu ishanttunne michchonttu baggaara nu woosaa waati zaarii? (Misiliyaakka xeella.)

¹¹ I nu ishanttunne michchonttu baggaara nu woosaa zaarees. Yesuusi ba deꞌuwaa immanaappe kase qammi mintti woossiis. Harati I Xoossaa cayiis gi qoppidi A borennaadan Yihoowa mintti woossiis. SHin Yihooway yaatiyoogaappe minttettanaadan issi kiitanchcha yeddiyoogan Yesuusa maaddiis. (Luq. 22:42, 43) Nu ishanttuppe woy nu michchonttuppe issoy nuna minttettanawu nuussi dawalanaadan woy nuukko yiidi oychchanaadan oottiyoogan Yihooway nunakka maaddana danddayees. Nuuni ubbay demmido injje ubban nu mala Kiristtaanetuura ‘shonggaara deꞌiya haasayaa’ haasayanawu koyoos.—Lee. 12:25.

¹² Miriyaamo giyo michchee hanotaa ane beꞌa. Miriyaama I keettaaway hayqqin amarida saaminttaappe guyyiyan, son barkka attaasu, azzanaasunne unꞌꞌettaasu. A yeekkiyoogaa aggana danddayabeenna gishshawu O haasayissiya uri koshshiis. A hagaadan gaasu: “Taani oossinne dawalana danddayabeenna gishshawu Yihoowa woossaas. Taani yeekkaydda woossishin ta silkkee xeegiis. Dawalidaagee mata lagge gidida gubaaꞌe cima.” Miriyaama he cimaappenne A keettaayeeppe minttettuwaa demmaasu. He ishay iyyo dawalanaadan oottiday Yihoowa gidiyoogaa A ammanaasu.

13. Yihooway bawu goynnenna asatu baggaara nu woosaa waati zaariyaakko qonccissa.

¹³ I bawu goynnenna asatu baggaara nu woosaa zaarana danddayees. (Lee. 21:1) Issi  issitoo, Yihooway bawu goynnennaageeti ba asaa maaddanaadan denttettiyoogan ba asaa woosaa zaarees. Leemisuwawu, I Nahimee katama zaarettidi keexxanawu Yerusalaame simmanaadan Kawuwaa Arxxekssiisi paqqadana mala oottiis. (Nah. 2:3-6) Ha wodiyankka, nuussi maadoy koshshiyo wode Yihooway bawu goynnennaageetikka nuna maaddanaadan oottana danddayees.

14. Suu Hingi hanotay nena waati minttettidee? (Misiliyaakka xeella.)

¹⁴ Suu Hing giyo michchiyaa Yihooway O I dottoriyaa baggaara maaddidoogaa akeekaasu. I naꞌay guuggiyaa sahuwan waayettees. Guyyeppe, A wolqqaama daafay gakkido gishshawu A maaddanawu Suu Hinganne I keettaaway bantta oosuwaa aggidosona. Hegaappe denddidaagan, eta miishshay metiis. Suu Hinga hegaappe aaruwan genccana danddayennabadan iyyo siyettidoogaa yootaasu. A ba wozanaabaa Yihoowawu yootaasu; qassi maaduwaa A oychchaasu. Dottoree onne I soo asaa maaddana danddayiyo ogiyaa qoppiis. Hegaappe denddidaagan, kawotettay eta maaddiis, qassi deꞌanawu injjetiyaasaa demmidosona. Guyyeppe, Suu Hinga hagaadan gaasu: “Nuna Yihooway keehi maaddidoogaa akeekida. I tumukka ‘woosaa siyiyaagaa.’”—Maz. 65:2.

15. Issi michchiyo Yihooway I woosaa zaaridoogaa akeekanaadan maaddidabay aybee?

¹⁵ Nuuni darotoo nu woosawu maalaalissiya hanotan zaaruwaa demmennan aggana danddayoos. Nu woosaa zaaroy saluwan deꞌiya nu Aawawu nuuni ammanettidi deꞌanawu koshshiyaaba. Yaatiyo gishshawu, Yihooway ne woosaa waati zaaridaakko loytta akeeka. Yooko giyo issi michchiyaa Yihooway I woosaa zaaribeennabadan qoppaasu; shin guyyeppe A Yihoowa woossidobaa xaafa oyqqiyoogaa doommaasu. Amarida wodiyaappe simmin, A ba xaafidobaa xeelliyo wode, A dogidobata gujjin, I woosaappe daruwaa Yihooway zaaridoogaa akeekaasu. Yihooway nu woosaa waati zaariyaakko issi issitoo nuuni loytti qoppana koshshees.—Maz. 66:19, 20.

16. Nu woosaara gayttidaagan ammanuwaa waati bessana danddayiyoo? (Ibraawe 11:6)

¹⁶ Yihoowa woossiyoogaa xalla gidennan, I zaariyoobay ayba gidikkonne, nu woosaa zaaruwan maayettiyoogan ammanuwaa bessoos.  (Ibraawe 11:6 nabbaba.) Miikanne A keettaayee Kiriisi hanotaa beꞌa. Eti Beeteelen haggaazanawu halchchidosona. Miiki hagaadan giis: “Nuuni darotoo qitsiyaa kunttida, qassi he halchchuwaa xeelliyaagan zaari zaaridi Yihoowa woossida, shin mule shoobettibokko.” Miikinne Kiriisa Yihooway ba haggaazuwan eta goꞌettiyo keehi loꞌꞌo ogiyaa eriyoogaa ubbatoo ammanettoosona. Eti aassiyaageeti keehi koshshiyoosan ubba wode aqinye gididi haggaaziyoogaaninne Yihoowa dirijjitee goꞌettiyo keettata keexxiyoogan banttawu danddayettida ubbabaa aggennan oottidosona. Ha wodiyan eti xomoosiyo oosuwaa oottoosona. Miiki hagaadan giis: “Yihooway ubbatoo nuuni qoppidoogaadan nu woosaa zaaribeenna, shin nuuni qoppidoogaappe keehi loꞌꞌo ogiyan nu woosaa zaariis.”

17-18. Mazamure 86:6, 7y yootiyoogaadan, nuuni ay ammanettana danddayiyoo?

¹⁷ Mazamure 86:6, 7 nabbaba. Mazamuraawee Daawiti Yihooway ba woosaa siyidi zaarana danddayiyoogaa ammanettiis. Neenikka aagaadan ammanettana danddayaasa. Ha huuphe yohuwan nuuni beꞌido taariketi, genccanawu nuussi koshshiya aadhdhida eratettaanne wolqqaa Yihooway immana danddayiyoogaa bessoosona. I nuna maaddanawu nu ishanttanne michchontta woy ha wodiyan awu goynnennaageetakka goꞌettana danddayees.

¹⁸ Yihooway ubbatoo nuuni qoppidoogaadan nu woosaa zaarana xayikkonne, I hegaa zaaranaagaa eroos. I nuussi koshshiyaabaa koshshiya wodiyan immees. Simmi yaakko, ha wodiyan Yihooway neessi koshshiyaabaa kunttanaagaanne yaana ooratta alamiyan ‘paxa deꞌiyaageetu ubbaa amuwaa alanaagaa’ ammanettada ubbatoo woossa.—Maz. 145:16.