1. Hananabaa yootiya Isiyasi Israaꞌeelatussi yootidobay aybee?

 YIHOOWAY ‘tumatettaa Xoossaa’ gidiyogaa hananabaa yootiya Isiyasi odiis. ‘Tumaa’ geetetti birshshettida qaalay “aminꞌꞌi” giyogaa qonccissees. (Isi. 65:16, NW tohossa qofaa) “Aminꞌꞌi” giyogee “hano” woy “gido” giyogaa. Darotoo Geeshsha Maxaafan “aminꞌꞌi” giya qaalay Yihooway woy Yesuusi haasayiyo woykko oottiyobay tuma gidiyogaa qonccissees. Hegaa gishshawu, Isiyasi Israaꞌeelatussi hagaa yootiis: Yihooway kasetidi yootidobay awudekka polettees. Qassi Yihooway ubbatoo ba gelido qaalaa naagees.

2. Sinttanaabaa xeelliyagan Yihooway qaalaa gelidoban nuuni ammanettana danddayiyoy aybissee, qassi nu beꞌana oyshati awugeetee?

² Nuunikka Yihooway sinttappe polanawu qaalaa gelidoban ammanettana danddayiyoo? Isiyasa wodiyappe 800 gidiya layttay aadhdhi simmin kiitettida Phawuloosi, Xoossay qaalaa gelidobay polettanaagaa nuuni ammanettana danddayiyoy aybissakko yootiis. Phawuloosi hagaadan giis: “Xoossai worddotanau danddayenna.” (Ibr. 6:18) Pulttoy issi ollaappe cammiya haattaanne malꞌꞌiya haattaa pulttana danddayennaagaadan, tumaa Pultto gidida Yihooway worddotana danddayenna. Yihooway sinttappe oottanawu qaalaa gelidobata gujjin, I giido ubbaban nuuni ammanettana danddayiyoy hegaassa. Ha huuphe yohuwan ha oyshata beꞌana: Yihooway  sinttappe nuussi oottanawu qaalaa gelidobay aybee? Qassi Yihooway I qaalaa gelidobay polettanaagaa nuuni ammanettanaadan woygidee?

3. (a) Xoossaa ashkkarati xoqqu ootti xeelliyo, Yihooway qaalaa gelidobay aybee? (Ajjuutaa 21:3, 4) (b) Nuuni hegaa yootiyo wode amaridaageeti woygiyonaa?

³ Kumetta saꞌan deꞌiya Xoossaa ashkkarati xoqqu ootti xeelliyo I qaalaa gelidobaa nuuni beꞌana. (Ajjuutaa 21:3, 4 nabbaba.) “Haiqoinne kayyoi woi waasoinne sahoi” deꞌenna wodee yaanaagaa Yihooway qaalaa geliis. Nuuppe daroti sabbakiyo wode asaa minttettanawunne Gannatiyan deꞌoy ay mala gidanaakko etassi yootanawu ha xiqisiya nabbaboos. Yihooway qaalaa gelidobaa nuuni yootiyo wode amarida asati woygiyonaa? Hagaadan gaana danddayosona: “Hagee mule polettana danddayennaba.”

4. (a) Yihooway Gannatiya ehaanawu qaalaa gelido wode ha wodiyan aybi hananaagaa eridee? (b) Yihooway qaalaa geliyogaa xalla gidennan, harabaa ay oottidee?

⁴ Gannatiya xeelliyagan ha hidootaa xaafanaadan Yihooway Yohaannisa denttettido wode, nuuni ha wodiyan haratussi Kawotettaa mishiraachchuwa yootiyo wode ha hidootaa yootanaagaa erees. Ha laamettiyabay sinttappe polettanaagaa ammananawu daro asay metootanaagaakka Yihooway erees. (Isi. 42:9; 60:2; 2 Qor. 4:3, 4) Yaatiyo gishshawu, Ajjuutaa 21:3, 4n odettida anjjoti polettanaagaa ammanettanaadan harata waati maaddana danddayiyoo? Qassi nuuni Yihoowaninne I qaalaa gelidobatun waani mintti ammanettana danddayiyoo? Yihooway I hegaa polanaagaa nuuni aynne sirennaadan ammanttiya gaasota yootiis. I yootidobay aybee?

5. Xoossay qaalaa gelidoban nuuni ammanettanaadan oottiya xiqiseti awugeetee, qassi he xiqiseti woygiyonaa?

⁵ Hegaappe kaalliya paydotun odettida Yihooway Gannatiya ehaanawu gelido qaalan nuuni ammanettanaadan oottiya gaasuwa akeekana danddayoos. Hagaadan gees: “Araatan uttidaagee, ‘Taani ubbabaa ooraxissais’ yaagiis. Qassikka zaarettidi tana, ‘Taani haasayiyoogee ammanettiyaagaanne tuma gidiyo gishshau xaafa’ yaagiis. Qassikka tana hagaadan yaagiis; ‘Polettiis. Taani Alifaanne omeegaa; doomettaanne poluwaa.’”—Ajj. 21:5, 6a.

6. Ajjuutaa 21:5, 6n odettidabay nuuni Xoossay qaalaa gelidoban mintti ammanettanaadan oottiyoy aybissee?

⁶ Ha xiqisee nuuni Xoossay qaalaa gelidoban mintti ammanettanaadan oottiyoy aybissee? Ha xiqisiyan Yihooway oottiiddi deꞌiyobaa sanadiyan paramiyogaara geeddarssana danddayoos; hegee I ba gelido qaalaa polanaagaa bessees. Xoossay qaalaa gelidobay Ajjuutaa 21:3, 4n odettiis. b Qassi I qaalaa gelidobay polettanaagaa nuuni ammanettanaadan paydo 5ninne 6n paramiis gaana danddayettees. Yihooway nuuni an ammanettana danddayiyogaa waati loytti yootidaakko ane beꞌoos.

7. Paydo 5n haasayiyogaa doommiday oonee, qassi hegee dumma gididoy aybissee?

⁷ Paydo 5y doommiiddi hagaadan gees: “Araatan uttidaagee, . . . yaagiis.” (Ajj. 21:5a) Ajjuutaa maxaafan Yihooway haasayido heezzu wodetuppe hagee issuwa. Qassi hagaa yootiday Yihoowappe attin, kiitanchchaa woy Yesuusakka gidenna! Hagee I kaallidi yootiyobaa nuuni ammanettana danddayiyogaa bessees. Aybissi? Yihooway  “worddotenna” gishshataassa. (Tii. 1:2) Yaatiyo gishshawu, Ajjuutaa 21:5, 6n odettidabay polettiyogee attenna.

8. Yihooway ba gelido qaalay polettanaagaa qonccissanawu woygidee? (Isiyaasa 46:10)

⁸ Kaallidi Xoossay hagaadan giis: “Taani ubbabaa ooraxissais.” Yihooway hegaa sinttappe oottana. Shin I qaalaa gelidobaa polanaagaa ammanettiyo gishshawu, I hegaa oottiiddi deꞌiyabadan yootiis.—Isiyaasa 46:10 nabbaba.

9. (a) “Ubbabaa ooraxissays” giya qofay ay qonccissii? (b) Haꞌꞌi deꞌiya “saloinne sa7ai” waananee?

⁹ Yihooway Ajjuutaa 21:5n hagaadan giis: “Taani ubbabaa ooraxissais.” Hegee woygiyogee? Geeshsha Maxaafan ha shemppoy Yihooway oottiyo naaꞌꞌubata qonccissees. Koyruwan, Yihooway ha iita alamiya xayssana. Naaꞌꞌanttuwan, ooratta alamiya ehaana. Ajjuutaa 21:1y hagaadan gees: “Koiro saloinne koiro sa7ai xayiis.” ‘Koiro saloy’ Seexaanaynne dayddanttati haariyo polotikaa kawotettata qonccissees. (Maa. 4:8, 9; 1 Yoh. 5:19) Geeshsha Maxaafan ‘saꞌaa’ giya qaalay saꞌan deꞌiyageeta qonccissana danddayees. (1 Odi. 16:31; Maz. 33:8) Yaatiyo gishshawu, “koiro sa7ai” ha wodiyan deꞌiya iita asaa qonccissees. Yihooway haꞌꞌi deꞌiya ‘saluwanne saꞌaa’ muleera xaysseesippe attin guuttaa giigissenna. I haꞌꞌi deꞌiya saluwanne saꞌaa xayssidi “ooratta saluwaanne ooratta sa7aa” ehaana; hegaa giyogee ooratta kawotettay xillo asaa haarana giyogaa.

10. Yihooway ooraxissanabay aybee?

¹⁰ Kaallidi Ajjuutaa 21:5n Yihooway ooraxissiyobata xeelliyagan yootidobaa nabbaboos. Yihooway, “Taani ubbabaa ooraxissais” giisippe attin, “Taani oorattabaa medhdhays” gibeennaagaa akeeka. Yihooway saꞌaanne asaa wottiyobi baynnaagaa oottiyogan ooraxissana. Hananabaa yootiya Isiyasi kasetidi yootidoogaadan, Yihooway kumetta saꞌaa Edene gannatiyadan keehi loꞌꞌiya soho oottana. Qassi I nuna ubbaa muleera pattiyogan ooraxissana. Wobbeti, qooqetinne tulleti paxana, ubba qassi hayqqidaageetikka denddana.—Isi. 25:8; 35:1-7.

11. Yihooway Yohaannisa azazidobay aybee, qassi aybissi?

¹¹ Xoossay nuuni an ammanettanaadan harabaa ay yootidee? Yihooway Yohaannisawu hagaadan giis: “Taani haasayiyoogee ammanettiyaagaanne tuma gidiyo gishshau xaafa.” (Ajj. 21:5) Yihooway ‘xaafanaadan’ azazidi aggiigibeenna. Xaafiyo gaasuwakka awu yootiis. I hagaadan giis: “Taani haasayiyoogee ammanettiyaagaanne tuma.” “Xaafa” giya azazuwa Yohaannisi azazettido gishshawu nuuni A keehi galatoos. Hegaappe denddidaagan, nuuni Xoossay Gannatiya ehaanawu gelido qaalaa nabbabananne nu demmana maalaalissiya anjjota wotti dentti qoppana danddayoos.

12. Yihooway, “Polettiis!” giidoy aybissee?

¹² Kaallidi Xoossay woygidee? “Polettiis” yaagiis. (Ajj. 21:6) Yihooway hegaa polettichchidabadan yootidoy aybissee? Hegaadan giidoy ba halchchuwa polennaadan A aybinne diggana danddayenna gishshataassa. Yihooway I qaalaa gelidobay muleera polettanaagaa nuuni ammanettanaadan kaallidi harabaakka yootiis. I yootidobay aybee?

13. Yihooway, “Taani Alifaanne Omeegaa” giidoy aybissee?

¹³ Kasetidi qonccidaagaadan, Yihooway ajjuutan  Yohaannisawu heezzutoo haasayiis. (Ajj. 1:8; 21:5, 6; 22:13) He wodetun Yihooway hagaadan giis: “Taani Alifaanne omeegaa.” Giriiketto pitaliyan alifay koyroogaa, qassi omeegay wurssettaagaa. Yihooway I “Alifaanne Omeegaa” gidiyogaa yootidoogee, I issibaa oottiyogaa doommikko polennaadan A teqqana danddayiyabi baynnaagaa nuuni akeekanaadan maaddees.

14. (a) Yihooway “Alifaa” giidoy, qassi “Omeegaa” gaanay awudee? (b) Doomettaabaa 2:1-3y nuuni ammanettanaadan oottiyabaa ay yootii?

¹⁴ Yihooway asawunne saꞌawu halchchidobaa Addaamessinne Hewanissi yootiis. Geeshsha Maxaafay hagaadan gees: “Xoossai eta hagaadan yaagidi anjjiis; ‘Yelettite; corattite; ha sa7aa kumitenne haarite.’” (Doo. 1:28) He wode, Yihooway saꞌawunne asawu halchchido ba halchchuwa yootiis. Hegee doomettaa woy “Alifaa” giyogaa. Ha halchchoy muleera polettiyo wode, qassi Addaamenne Hewani zeretta gidida azazettiya asati ha saꞌaa kumidi saꞌaa Gannate oottiyo wode, “Omeegaa” gidana. Yihooway ‘salota, saꞌaanne etan deꞌiya ubbabaa’ medhdhiyogaa wurssi simmidi ba halchchoy polettennan attennaagaa bessiyabaa yootiis. Hegee Doomettaabaa 2:1-3n deꞌees. (Nabbaba.) Yihooway laappuntta gallassay geeshsha gidiyogaa yootiis. Hegee Yihooway asawunne saꞌawu halchchidobaa laappuntta gallassaa wurssettan muleera polanaagaa bessees.

15. Yihooway ba halchchuwa polennaadan diggana danddayiyabadan Seexaanay qoppana danddayiyoy aybissee?

¹⁵ Addaameenne Hewana Yihoowa bolli makkalidi nagaranchcha gididosona, qassi eti nagaraanne hayquwa bantta naata laatissidosona. (Roo. 5:12) Hegaappe denddidaagan, Yihoowawu azazettiya wottiyobi baynna  asay ha saꞌaa kumiyogee danddayettennaba milatennan aggenna. Yihooway ba halachchuwa polennaadan Seexaanay diggana danddayii? Seexaanay Yihooway ba gelido qaalaa polana danddayenna giidi qoppennan aggenna. Xoossay asawu halchchido ba halchchuwa polanawu Addaamanne Hewano xayssidi, wottiyobi baynna hara aqo laggeta medhdhana giidi Seexaanay qoppennan aggenna. Shin Xoossay hegaadan oottidaba gidiyakko, Dabloosi A worddanchcha giidi mootana. Aybissi? Doomettaabaa 1:28n qonccidaagaadan, Yihooway Addaamessinne Hewanissi eta naati ha saꞌaa kumanaagaa yootido gishshataassa.

16. Yihooway ba gelido qaalaa polenna giidi mootana danddayiyabadan Seexaanay qoppana danddayiyoy aybissee?

¹⁶ Xoossay oottana giidi Seexaanay qoppana danddayiyo harabay aybee? Yihooway Addaameenne Hewana naata yelanaadan paqqadana, shin eta naati mule wottiyobi baynnaageeta gidana danddayokkona giidi Seexaanay qoppennan aggenna. (Era. 7:20; Roo. 3:23) Addaamenne Hewani naati mule wottiyobi baynnaageeta gidana xayikko, Dabloosi Yihooway ba halchchuwa polana danddayibeenna gaana danddayees. Qassi wottiyobi baynna asay ha saꞌaa kumenna.

17. Seexaanay, Addaameenne Hewana makkali simmin Yihooway ba halchchwa polanawu giigissido keehi loꞌꞌo ogee aybee, qassi hegee wurssettan ay demissanee? (Misiliyakka xeella.)

¹⁷ Seexaanay Yihooway oottanabaa mule erana danddayenna. Seexaanay, Addaameenne Hewana makkalikkokka Yihooway ba halchchuwa polanawu keehi loꞌꞌo ogiya giissiis. (Maz. 92:5) Yihooway Addaameenne Hewana naata yelanaadan paqqadiyogan, I worddanchcha gidennan, tumanchcha gidiyogaa bessiis. Yihooway issibaa oottana giikko, hegaa oottennaadan aybinne A diggana danddayennaagaa bessiis. Addaamenne Hewani naata gidida, azazettiyageeta ashshiya, issi ‘zerettay’ deꞌanaadan oottiyogan I ba halchchuwa polanaagaa qonccissiis. (Doo. 3:15; 22:18) Yihooway wozuwa yarshshuwa giigissidoogan Seexaanay kehi dagammennan waayi aggana! Aybissi? Wozoy Yihooway siiquwan giigissidoba gidiyo gishshataassa. (Maa. 20:28; Yoh. 3:16) Seexaanawu ha eeshshay baawa. I ba xalaalaa siiqees. Yaatiyo gishshawu, wozuwa yarshshoy aybi hananaadan oottanee? Kiristtoosa 1000 layttaa haaruwa wurssettan, Yihooway koyro halchchidoogaadan  Addaamenne Hewani zeretta gidida wottiyobi baynna azazettiya asati gannate saꞌaa laattana. He wode, Yihooway hagaadan giyogaa mala, “Omeegaa.”

18. Nuuni ammanettanaadan oottiya Xoossay yootido heezzubay aybee? (“ Yihooway Qaalaa Gelidoban Ammanettanaadan Oottiya Heezzu Gaasota” giya saaxiniyakka xeella.)

¹⁸ Nuuni beꞌidoogaadan, Xoossay Gannatiya ehaanawu gelido qaalaa polanaagaa siriya asatussi nu ay yootana danddayiyoo? Koyruwan, he qaalaa geliday Yihoowa. Ajjuutaa maxaafay hagaadan gees: “Araatan uttidaagee, ‘Taani ubbabaa ooraxissais’ yaagiis.” Ba gelido qaalaa polanawu Yihoowayyo aadhdhida eratettay, wolqqaynne koshshaykka deꞌees. Naaꞌꞌanttuwan, Yihooway I qaalaa gelidobay polettennan attennaagaa erees. I hagaadan giidoy hegaassa: “Taani haasayiyoogee ammanettiyaagaanne tuma. . . . Polettiis.” Heezzanttuwan, Yihooway issibaa oottiyogaa doommikko polennaadan A teqqana danddayiyabi baawa. I “Taani Alifaanne Omeegaa” yaagidoy hegaassa. Yihooway yaatiyogan Seexaanay worddanchcha gidiyogaa bessana; Yihooway ba halchchuwa polennaadan Seexaanay diggana danddayenna.

19. Xoossay Gannatiya ehaanawu gelido qaalaa asay ammananawu metootikko neeni waatana danddayay?

¹⁹ Yihooway qaalaa gelidobay polettanaagaa nu ammanettanaadan I yootidobaa haggaazuwan nenaara gayttiya asatuyyo odiyo wode ubban neeni an loytta ammanettanaagaa hassaya. Ajjuutaa 21:4n odettida yaana Gannatiyabaa yootiya minttettiya qofaa haroode neeni issi urawu nabbabiyo wode I, “Hagee mule polettana danddayennaba,” giikko ne waatana danddayay? Paydo 5nne 6 nabbabada qonccissana danddayasa. Yihooway sanadiyan paramiyogaadan, qaalaa gelidobay polettanaagaa nu ammanettanaadan woygidaakko bessa.—Isi. 65:16.