1-2. Yihooway nu woosaa zaaribennabadan nuuni qoppana danddayiyoy aybissee?

 “GODAN ufaitta; i neeyyo ne wozanaa amuwaa immana.” (Maz. 37:4) Hagee keehi ufayssiyaba! Shin nuuni oychchido ubbabaa Yihooway sohuwara immana giidi qoppana koshshii? Nuuni ha oyshaa oychchana koshshiyoy aybissee? Ane kaallidi deꞌiya hanotata beꞌa. Aqo oyqqabeenna issi michchiya Kawotettaa Mishiraachchuwa Yootiyageetu Timirtte Keettan tamaaranawu woossawusu. Shin daro layttay aadhdhikkonne A shoobettabeykku. Yelaga ishay galchchawu loytti oottana mala caddi oyqqiya sahuwappe paxanawu Yihoowa woossees. Shin I paxibeenna. Yelidaageeti bantta naꞌay tumaa keettaappe kiyennaadan Yihoowa woossoosona. Shin eta naꞌay Yihoowawu haggaaziyogaa aggiis.

² Geella neenikka Yihoowa issibaa oychchidaba gidikkonne demmabaakka. Hegaappe denddidaagan neeni Yihooway haratu woosaa zaarikkokka neegaa zaarennabadan qoppennan aggakka. Woy balabaa oottidanaashsha gaada neeni qoppennan waaya aggana. Jeneso b giyo michchiya hegaadan qoppaasu. Anne I keettaaway Beeteelen haggaazanawu keehi koyido gishshawu woossidosona. A hagaadan gaasu: “Nuuni mata wode beeteele gelana gaada ammanettaas.” Shin daro layttay aadhdhikkokka eti shoobettibokkona. Jenesa hagaadan gaasu: “Taani keehi azzanaasinne haniyoba xayaas. Yihoowa azzanttiyabaa oottidanaashsha gaada qoppaas. Beeteele geliyogaa  xeelliyagan darotoo woossaas. I ta woosaa zaaribeennay aybissee?”

3. Nuuni ha huuphe yohuwan ay beꞌanee?

³ Issi issitoo nuuni Yihooway nu woosaa siyiishsha giidi qoppana danddayoos. Beni wode deꞌida ammanettida asatuppe amaridaageeti hegaadan qoppidosona. (Iyy. 30:20; Maz. 22:2; Imb. 1:2) Yihooway ne woosaa siyanaagaa ammanettana danddayay? (Maz. 65:2) He oyshaa zaaranawu nuna maaddana mala kaallidi deꞌiyageeta kasetidi zaarana koshshees: (1) Yihooway ay oottanee? (2) Yihooway nuuni ay oottanaadan koyii? (3) Nuuni woossiyobaappe amaridabaa laammana koshshiyoy aybissa gidana danddayii?

4. Ermmaasa 29:12y yootiyogaadan, Yihooway ay oottanawu qaalaa gelidee?

⁴ Yihooway nu woosaa siyanawu qaalaa geliis. (Ermmaasa 29:12 nabbaba.) Nu Xoossay ammanettidi awu goynniyageeta siiqiyo gishshawu eta woosaa ubbatoo siyees. (Maz. 10:17; 37:28) Shin hegaa giyogee I nu oychchido ubbabaa immees giyogaa gidenna. Nuuni woossidobaappe amaridabaa zaaruwa demmanawu ooratta alamiya gakkanawu naagiyogee koshshana danddayees.

5. Yihooway nu woosaara gayttidaagan ay qoppii? Qonccissa.

⁵ Yihooway nu woosay ba halchchuwara waani gayttiyakko qoppees. (Isi. 55:8, 9) A halchchuwappe issoy A haaruwan issuwa gidida ufayttiya asay ha saꞌaa kumiyogaa. Shin Seexaanay asay bana barkka haariyogee loꞌꞌo giidi yootees. (Doo. 3:1-5) Dabloosi giidobay worddo gidiyogaa qonccissanawu asay bana barkka haaranaadan Yihooway paqqadiis. Shin asaa haaroy ha wodiyan daro metoy nuna gakkanaadan oottiis. (Era. 8:9) Yihooway ha meto ubbaa haꞌꞌi xayssennaagaa eroos. I hegaadan oottiyakko amaridaageeti asaa haaroy meto ubbaa xayssana danddayiya suure haarodan qoppana danddayosona.

6. Yihooway ubbatoo siiquwanne suure pirddaa bessiyabaa oottiyogaa nuuni ammanettana koshshiyoy aybissee?

⁶ Yihooway issi mala woosaa dumma dumma ogiyan zaarana danddayees. Leemisuwawu, Kawuwa Hizqqiyasi keehi sahettido wode paxanawu Yihoowa mintti woossiis. Qassi Yihooway A pattiis. (2 Kaw. 20:1-6) Hara baggara qassi, Phawuloosi bana agunttaadan ‘caddi oyqqidabaa’ xayssanaadan Yihoowa mintti woossiis, hegee saho gidennan aggenna; shin Yihooway hegaa xayssibeenna. (2 Qor. 12:7-9) Qassi kiitettida Yaaqoobanne Pheexiroosa taarikiya ane beꞌoos. Eta naaꞌꞌaakka Kawuwa Heeroodisi woranawu koyiis. Galchchay Pheexiroosawu woossiis, qassi Yaaqoobawukka woossennan aggenna. Gidoppe attin, kawoy Yaaqooba worissiis, shin Pheexiroosi maalaalissiya hanotan attiis. (Oos. 12:1-11) Nuuni hagaadan qoppana danddayoos, ‘Yihooway Yaaqooba aggidi Pheexiroosa ashshidoy aybissee?’ Hegaabaa Geeshsha Maxaafay yootenna. c Yihooway ‘tumu pirddaa dosiyogaa’ ammanettana danddayoos. (Maz. 33:5) Qassi Yihooway Pheexiroosakka Yaaqoobakka siiqiyogaa eroos. (Ajj. 21:14) Yihooway issi issitoo nu woosaa nu qoppido ogiyan zaarennan aggana danddayees. Shin Yihooway awudekka loꞌꞌobaanne suurebaa oottiyogaa nuuni ammanettiyo gishshawu, I nu woosaa zaariyo ogiyan zuuzummokko.—Iyy. 33:13.

7. Nuuni aybippe naagettanawu baaxetiyoo, qassi aybissi?

⁷ Nuuni nu hanotaa haratuugaara geeddarssiyogaappe naagettanawu baaxetoos.  Leemisuwawu, Yihooway nuna maaddanaadan nuuni oychchidoogaadan I nuna maaddennan aggana danddayees. Guyyeppe, hara uri hegaa malabaa woossin Yihooway A woosaa zaaridoogaa bessiyaba akeekida. Aano giyo michchiyo hegaa malabay gakkiis. I azinay Maatiwi kansseriya harggiyappe paxanaadan woossaasu. He wode, keehi cimida naaꞌꞌu michchonttikka kansseriyan sahettoosona. Aana Maatiwayyonne ha naaꞌꞌu michchonttuyyo mintta woossaasu. Michchontti paxidosona, shin Maatiwi hayqqiis. Koyro heeran Aana he michchontti paxidoy Yihooway eta maaddido gishshaassa gaada qoppaasu. Yaatin, Yihooway eta maaddikko, Maatiwi paxanaadan A woossido woosaa ayssi zaaribeennee? Ha naaꞌꞌu michchontti waani paxidaakko nuuni erennaagee qoncce. Yihooway meto ubbaa xayssanaagaanne I siiqiyo hayqqidaageeta hayquwappe denttanawu laamotiyogaa eroos.—Iyy. 14:15.

8. (a) Isiyaasa 43:2y yootiyogaadan Yihooway nuna waati maaddii? (b) Waayissiya wodiya genccanaadan woosay nuna waati maaddana danddayii? (Woosay Nuuni Metiya Wodiyan Genccanaadan Maaddees giya biiduwa xeella.)

⁸ Yihooway nuna ubba wode maaddana. Yihooway nuna siiqiya Aawa gidiyo gishshawu nu waayettanaadan koyenna. (Isi. 63:9) Gidikkonne, shaafaa woy lacuwa mala gidida metoy nuna gakkennaadan teqqenna. (Isiyaasa 43:2 nabbaba.) Shin nuuni hegeetu “gidduwaara pinniyo wode” nuna maaddanawu qaalaa geliis. Qassi metoy nuna merinawu qohanaadan paqqadenna. Yihooway nuuni genccanaadan maaddiya ba geeshsha ayyaanaakka immees. (Luq. 11:13; 2 Qor. 4:7) Hegaa gishshawu, nuuni genccanawunne ammanettidi deꞌanawu koshshiyabaa I nuussi ubbatoo immanaagaa ammanettana danddayoos. d

9. Yihooway nuna maaddanaagaa ammanettiyogee keehi koshshiyogaa akeekanaadan Yaaqooba 1:6, 7y nuna waati maaddii?

⁹ Yihooway nuuni an ammanettanaadan koyees. (Ibr. 11:6) Nuna gakkida metuwan nuuni issi issitoo unꞌꞌettennan aggokko. Yihooway nuna maaddaneeshsha giidi qoppana danddayoos. Shin Xoossay immiyo wolqqan nuuni ‘miixaa xeeraara guppi aadhdhana’ danddayiyogaa Geeshsha Maxaafay yootees. (Maz. 18:29) Yaatikko hegaadan qoppiyogaa aggidi, Yihooway nu woosaa siyanaagaa ammanettidi woossana koshshees.—Yaaqooba 1:6, 7 nabbaba.

10. Nu woosaara maayettiyabaa nuuni ay oottana danddayiyakko bessiya leemisuwa yoota.

¹⁰ Yihooway nuuni nu woosaara maayettiyabaa oottanaadan koyees. Leemisuwawu, issi ishay killiliya shiiquwa shiiqanawu ba oosuwappe shemppuwa kiyanaassi piqaadiya demmanaayyo Yihooway maaddanaadan woossana danddayees. Yihooway he woosaa waati zaaranee? He ishay bana ootissiyagaa piqaadiya oychchanawu xalanaadan maaddana danddayees. Shin he ishay bana ootissiyagaakko biidi piqaadiya oychchana koshshees. Zaari zaaridi oychchiyogee koshshana danddayees. I oottiyo gallassaa haratuugaara laammanawukka oychchana danddayees. Koshshiyaba gidikko, shemppuwa kiyido gallassaa miishshay bawu qanxxettennaadan oychchana danddayees.

11. Nuna qofissiyabaa nuuni zaari zaaridi woossana koshshiyoy aybissee?

¹¹ Yihooway nuuni nuna qofissiyabaa xeelliyagan zaari zaaridi woossanaadan koyees. (1 Tas. 5:17) Nuuni woossiyobaappe amaridaageetu zaaruwa sohuwara demmennaagaa Yesuusi yootidobaappe akeekoos. (Luq. 11:9) Gidikkonne, hidootaa qanxxoppa! Wozanappe zaara zaara woossa. (Luq. 18:1-7) Nuuni issi allaalliyabaa ubbatoo Yihoowa woossiyo  wode, nu hegaa keehi koyiyogaa bessoos. I nuna maaddana danddayiyogaa nu ammaniyogaakka bessoos.

12. (a) Nu woosaa xeelliyagan nuuni nuna oychchana koshshiyo issi oyshay aybee, qassi aybissi? (b) Nuuni Yihoowa bonchchiyogaa nu woosan waati bessana danddayiyoo? (“ Ta Woosay Taani Yihoowa Bonchchiyogaa Bessii?” giya saaxiniya xeella.)

¹² Nuuni woossidobaa demmana xayikko ha heezzu oyshata nuna oychchana danddayoos. Koyroogee hagaa, ‘Taani woossiyobay likkee?’ Darotoo nuuni nuussi keehi loꞌꞌobaa eroos giidi qoppana danddayoos. Shin nuuni woossiyobay tumuppe nuna maaddiyaba gidennan aggana danddayees. Issi metuwabaa woossiyo wode, he metuwa giigissanawu nuuni woosan oychchidoogaappe aadhdhiya keehi loꞌꞌobay deꞌana danddayees. Qassi nuuni woossiyo issi issibay Yihoowa sheniyara maayettennaba gidana danddayees. (1 Yoh. 5:14) Leemisuwawu, qommoora etabay odettido yelidaageetubaa beꞌa. Eti bantta naꞌay tumaa keettaappe kiyennaadan Yihoowa woossidosona. He woosay likke milatana danddayees. Shin Yihooway awu goynnanaadan nuuppe oonanne giddenna. I nu naata gujjin, nuuni ubbay awu goynnanawu dooranaadan koyees. (Zaa. 10:12, 13; 30:19, 20) Hegaa gishshawu, yelidaageeti bantta naꞌay Yihoowa siiqanaadaaninne A dabbo gidanaadan loytti tamaarissanawu maaddana mala Yihoowa woossana danddayosona.—Lee. 22:6; Efi. 6:4.

13. Ibraawe 4:16 maaran, Yihooway nuna awude maaddii? Qonccissa.

¹³ Naaꞌꞌantto oyshay, ‘Hagee Yihooway ta woosaa zaariyo wodee?’ giyagaa. Nu woosawu sohuwara zaaruwa demmana koshshiyabadan qoppana danddayoos. Shin, Yihooway nuna maaddanawu keehi loꞌꞌo wodiya eriyogee tuma.  (Ibraawe 4:16 nabbaba.) Nuuni woossidobaa sohuwara demmana xayikko, ‘Yihooway zaaranawu koyibeenna’ giidi qoppana danddayoos. Shin ‘I zaariyo wodee gakkibeennaba’ gidana danddayees. Leemisuwawu, ba harggiyappe paxanawu woossida yelaga ishaa hassaya. Yihooway maalaalissiya ogiyan A pattiyakko, Seexaanay he ishay Yihoowawu haggaaziyogaa aggibeennay Yihooway A pattido gishshassa giidi yootana danddayees. (Iyy. 1:9-11; 2:4) Qassi Yihooway hargge ubbaa xayssiyo wodiya keeri uttiis. (Isi. 33:24; Ajj. 21:3, 4) He wode gakkanaashin, Yihooway nuna maalaalissiya ogiyan pattanaadan naagokko. Yaatiyo gishshawu, he ishay wolqqaanne sarotettaa demmidi ba sahuwa genccanawunne ubbatoo Xoossawu ammanettidi haggaazanawu Yihoowa woossana danddayees.—Maz. 29:11.

14. Janesippe neeni ay tamaaray?

¹⁴ Beeteelen haggaazanawu woossida Jenesibaa hassaya. Yihooway I woosaa waati zaaridaakko ichchashu layttaappe simmin akeekaasu. A hagaadan gaasu: “Yihooway he wodiyan tana darobaa tamaarissiisinne taani gooba Kiristtaane gidanaadan maaddiis. Taani an kaseegaappe aaruwan ammanettana koshshiis. Taani Geeshsha Maxaafaa loytta xannaꞌana koshshiis. Qassi taani Yihoowawu haggaaziyoy awan gidinkka, ufayttana danddayiyogaa tamaarana koshshiis.” Guyyeppe Jenesanne I azinay woradaa oosuwawu shoobettidosona. Jenesa kasebaa hassayada hagaadan gaasu: “Yihooway ta woosaa taani qoppabeenna ogiyan zaariis. Yihooway ta woosaa keehi loꞌꞌo ogiyan zaaridoogaa amarida wodiyappe simmin akeekaas, qassi I tana siiqidonne tawu kehido gishshawu, A keehi galatays.”

15. Nuuni issi issitoo nu woosan darobaa dummayidi qonccissana koshshennay aybissa gidana danddayii? (Misiliyakka xeella.)

¹⁵ Heezzantto oyshay, ‘Taani harabaa woossana  koshshii?’ giyagaa. Nuuni koyiyobaa dummayi qonccissidi woossiyogee loꞌꞌo gidikkonne, nubaa xeelliyagan Yihoowa shenee aybakko eranawu nu woosan darobaa qonccissennan aggiyogee issi issitoo keehi loꞌꞌo gidana danddayees. Kawotettaa Mishiraachchuwa Yootiyageetu Timirtte keettan tamaaranawu woossida aqo oyqqabeenna michchee hanotaa beꞌa. A aassiyageeti keehi koshshiyosan haggaazana mala he timirtte keettan tamaaranawu koyaasu. Hegaa gishshawu, A he timirtte keettan shoobettanaadan aggennan woossaydda Yihoowawu loytta haggaaziyo hara ogeta akeekanawu maaddanaadan oychchanakka danddayawusu. (Oos. 16:9, 10) Yaatada gujo aqinyeti koshshiyo galchchay matan deꞌiyakkonne woradaa xomoosiyagaa oychchiyogan ba woosaara maayettiyabaa oottana danddayawusu. Woy aassiyageeti keehi koshshiyosaa oychchanawu macara biiruwawu dabddaabbiya xaafana danddayawusu. e

16. Nuuni ammanettana danddayiyobay aybee?

¹⁶ Nuuni beꞌidoogaadan, Yihooway siiquwanne suure pirddaa bessiya ogiyan nu woosaa zaaranaagaa ammanettana danddayoos. (Maz. 4:3; Isi. 30:18) Issi issitoo nu woosawu nuuni qoppidoogaa mala zaaruwa demmennan aggana danddayoos. Shin Yihooway nu woosaa ubbatoo siyees. I nuna keehi siiqees; qassi I nuna mule yeggibayenna. (Maz. 9:10) Yaakko ne wozanan deꞌiya ubbabaa woosan Xoossawu yootiyogan ‘ubba wode an ammanetta.’—Maz. 62:8.