XANNAꞌIYO HUUPHE YOHUWA 7
MAZAMURE 51 Nuna Xoossawu Geppida!
Naaziraawetuppe Ay Tamaarana Danddayiyoo?
“I bana GODAAYYO dummayido wodiyan ubban i GODAASSI geeshsha.”—QOO. 6:8.
TAMAARANABAA
Naaziraawetu taarikee nuuni Yihoowa haggaazuwan nu goꞌꞌaa aggi bayanaadaaninne xala gidanaadan waati maaddiyakko beꞌana.
1. Asi deꞌido wode ubban Yihoowawu goynniyageeti bessido loꞌꞌo eeshshay aybee?
NEENI Yihoowara dabbotido dabbotaa xoqqu ootta xeellay? Xeelliyogee qoncce! Xoqqu ootta xeelliyay ne xalla gidakka. Beni wodeppe doommidi daro asay neegaadan xoqqu ootti xeellees. (Maz. 104:33, 34) Daroti Yihoowawu goynnanawu bantta goꞌꞌaa aggi bayidosona. Beni Israaꞌeelan deꞌida Naaziraaweti hegaadan oottidosona. Eti oonee, qassi nuuni eta taarikiyappe ay tamaarana danddayiyoo?
2. (a) Naaziraaweti oonee? (Qoodaabaa 6:1, 2) (b) Amarida Israaꞌeelati Naaziraawe gidiyoy aybissee?
2 “Naaziraawe” giyogee Ibraawetto qaala; hegaa giyogee “Doorettidaagaa,” “Dummatidaagaa,” woy “Bana Geppidaagaa” giyogaa. Naaziraaweti Yihoowawu dumma ogiyan haggaazanawu bantta goꞌꞌaa aggi bayidi minni oottiya Israaꞌeelata. Attuma asi woykko macca asi amarida wodiyawu Naaziraawe gididi deꞌanawu bana Yihoowayyo dummayanawu geppanaadan Muuse Higgee paqqadees. a (Qoodaabaa 6:1, 2 nabbaba.) Issi Israaꞌeela asi Naaziraawe gidanawu bana geppikko hara Israaꞌeelati kaallana koshshenna higgeta kaallees. Yaatin issi Israaꞌeela asi Naaziraawe gidiyoy aybissee? I Yihoowa wozanappe siiqiyo gishshawunne Yihooway A daroban anjjidoogawu A galatanawu koyiyo gishshawu gidana danddayees.—Zaa. 6:5; 16:17.
3. Ha wodiyan deꞌiya Xoossaa asati Naaziraawetu mala gidiyoy aybiinee?
3 Muuse Higgee ‘Kiristtoosa higgiyan’ laamettido gishshawu Xoossaa asay Naaziraawe gidana koshshenna. (Gal. 6:2; Roo. 10:4) Shin ha wodiyan deꞌiya Yihoowa asati Naaziraawetuugaadan bantta kumetta wozanaappe, shemppuwappe, qofaappenne wolqqaappe awu haggaazanawu loytti koyiyogaa ubbatoo bessoosona. (Mar. 12:30) Nuna Yihoowawu sheedhdhiyo wode awu haggaazanawu nu dosan qaalaa geloos. Nuuni qaalaa gelidoogaadan deꞌanawu Yihoowa sheniya oottananne nu goꞌꞌaa aggi bayana koshshees. Naaziraaweti qaalaa gelidoogaadan waani deꞌidaakko pilggiyogan, nuunikka hegaadan deꞌanawu waatana danddayiyakko keehi koshshiyabaa tamaarana danddayoos. b (Mat. 16:24) Ane amarida taariketa pilggoos.
NE GOꞌꞌAA AGGA BAYA
4. Qoodaabaa 6:3, 4y yootiyogaadan, Naaziraaweti aybaa aggi bayidonaa?
4 Qoodaabaa 6:3, 4 nabbaba. Naaziraaweti ushshaa uyana, woyniya teeraanne mela woyniya maana koshshenna. Harati he qumata ubbatoo moosona, qassi yaatiyogee bala gidenna gishshawu eti aynne mooribookkona. ‘Asaa wozanaa ufayssiya woynee’ Xoossaa imota gidiyogaa Geeshsha Maxaafay yootees. (Maz. 104:14, 15) Hageeti issi uraa deꞌoy ufayssiyagaa gidanaadan oottana danddayikkonne, Naaziraaweti bantta dosan hegeetuppe haakkidosona. c
Naaziraawetuugaadan ne goꞌꞌaa agga bayanawu eeno gay? (Mentto 4-6 xeella)
5. Maadiyaninne Marseela waatidonaa, qassi aybissi?
5 Naaziraawetuugaadan nuunikka Yihoowawu loytti haggaazanawu nu goꞌꞌaa aggi bayoos. Maadiyananne Marseeli hanotaa beꞌa. Ha aqo laggeti ishalo deꞌuwa deꞌoosona. Maadiyanawu loꞌꞌo oosoy deꞌiyo gishshawu eti loꞌꞌiya keettan deꞌoosona. Shin eti Yihoowawu loytti haggaazanawu koyidosona. Eti bantta halchchuwa polanawu issi issibaa laammanawu kuuyidosona. Eti hagaadan giidosona: “Daro miishshaa kessiyogaa aggida, guutta keettan deꞌiyogaa doommida; qassi nu kaamiya bayzzida.” Maadiyaninne Marseela bantta goꞌꞌaa aggi bayidoy eti yaatana koshshiyo gishshawu gidennan, Yihoowawu loytti haggaazanawu koyido gishshataassa. Eti hegaadan kuuyidoogan woppu giidi deꞌoosonanne ufayttoosona.
6. Ha wodiyan deꞌiya Kiristtaaneti bantta goꞌꞌaa aggi bayiyoy aybissee? (Misiliyakka xeella.)
6 Ha wodiyan deꞌiya Kiristtaaneti Yihoowawu haggaazanaayyo daro wodiya demmanawu bantta goꞌꞌaa aggi bayiyogan ufayttoosona. (1 Qor. 9:3-6) Yihooway nuuni hegaa aggi bayanaadan nuuppe naagenna, woy nuuni aggi bayiyobay bala gidenna. Leemisuwawu, amaridaageeti bantta dosiyo oosuwa woy keettaa aggi bayidosona. Daroti qassi adussa wodiyawu aqo oyqqennan deꞌanawu woy aqo oyqqi simmidi sohuwara naata yelennan agganawu kuuyidosona. Harati bantta laggetuppenne so asaappe haahosan deꞌikkonne aassiyageeti keehi koshshiyosan haggaazoosona. Nuuni Yihoowawu loytti oottanawu koyiyo gishshawu, nuuppe daroti hegaadan bantta goꞌꞌaa aggi bayoosona. Neeni Yihoowawu haggaazanawu agga bayiyobay daro woy guutta gidinkka, I hegaa xoqqu ootti xeelliyogaa ammanetta.—Ibr. 6:10.
HARATUPPE DUMMATANAWU EENO GA
7. Issi Naaziraawee ba gelido qaalaa naaganawu metootana danddayiyoy aybissee? (Qoodaabaa 6:5) (Misiliyakka xeella.)
7 Qoodaabaa 6:5 nabbaba. Naaziraaweti bantta huuphiya qanxxettennan agganawu caaqqidosona. Hegee eti Yihoowawu wozanappe haarettiyogaa bessees. Issi Israaꞌeela asi adussa wodiyawu Naaziraawe gidikko, A huuphee keehi dicciyo gishshawu harati hegaa akeekanawu metootokkona. Harati A bonchchiyabanne I gelido qaalaa naaganaadan minttettiyaba gidikko, issi Naaziraawee haratuppe dummatanawu metootenna. Shin Israaꞌeelatu taarikiyan, harati Naaziraaweta bonchchibeenna woy kaafibeenna wodeti deꞌiyogee azzanttiyaba. Xoossay erissidobaa yootiya Amoxa wode, kaddida Israaꞌeeleti Naaziraaweta ‘woyne eessaa ushshidosona;’ eti yaatidoy Naaziraaweti woyniyappe haakkanawu caaqqido caaquwa naagennaadan oottanawu gidana danddayees. (Amo. 2:12) Naaziraaweti bantta gelido qaalaa naagidi deꞌanawunne haratuppe dummatanawu issi issitoo keehi xala gidana koshshiis.
Ba gelido qaalaa naagiyogan haratuppe dummatanawu eeno giya issi Naaziraawiya (Mentto 7 xeella)
8. Benjjaamina hanotay nena waati minttettii?
8 Nuuni dungguuxa gidikkonne, Yihooway maaddin nuunikka haratuppe dummatanawu xala gidana danddayoos. Norwey biittan deꞌiya layttay tamma gidido Benjjaamina giyo Yihoowa Markkaa hanotaa beꞌa. Yukireene olan qohettida heeratun deꞌiyageeta kaafiyogaa bessanawu I tamaariyo timirtte keettay issi prograamiya giigissiis. Yukireene banddiraa maayidi mazamuriya yexxanaadan naatuyyo odettiis. Benjjaamini etaara hashetanawu koyibeenna gishshawu, he prograamee deꞌiyosaappe haakki eqqiis. Shin asttamaariya A beꞌada cenggurssaa xoqqu oottada hagaadan gaasu: “Neeni yaana koshshees; yaatada nunaara yexxa. Nuuni ubbay nena naagiiddi deꞌoos!” Benjjaamini yayyennan asttamaareekko shiiqidi hagaadan giis: “Taani oossinne exatenna gishshawu, polotikaaban gelikke. Qassi Yihoowa Markkatuppe daroti, olawu beennan ixxido gishshawu qashettidosona.” Asttamaariya I yootiyobaa siyada I etaara hashetennan aggana danddayiyogaa yootaasu. Shin aara tamaariya naati I etaara yexxibeennay aybissakko oychchidosona. Benjjaamini keehi hirggidi yeekkana haniis; gidikkokka I asttamaareeyyo yootidobaa kifiliyan deꞌiya ubbawukka xalatettan yootiis. Benjjaamini ba ammanuwawu exatanaadan Yihooway maaddidoogaa bana yelidaageetussi guyyeppe yootiis.
9. Nuuni Yihoowa waati ufayssana danddayiyoo?
9 Nuuni Yihoowawu azazettiyo gishshawu harati nu etappe dummatiyogaa akeekoosona. Nuuni Yihoowa Markka gidiyogaa ooso sohuwan woy timirtte keettan haratussi yootanawu nuussi xalatettay koshshees. Qassi ha alamiya asaa eeshshaynne kanddoy iiti iiti biyo gishshawu, nuuni Geeshsha Maxaafay yootiyo maaraadan deꞌanawunne mishirachchuwa haratussi yootanawu keehi metootana danddayoos. (2 Xim. 1:8; 3:13) Gidikkonne, Yihoowawu haggaazenna asatuppe nuuni dummatanawu xala gidiyo wode, ‘Yihoowa ufayssiyogaa’ ubbatoo hassaya.—Lee. 27:11; Mil. 3:18.
NE DEꞌUWAN YIHOOWA KASEYA
10. Qoodaabaa 6:6, 7n odettida azazuwa azazettiyogee Naaziraawetussi waani metiyaba gidana danddayii?
10 Qoodaabaa 6:6, 7 nabbaba. Naaziraaweti anhaakko shiiqana danddayokkona. Shin beni wode issi Naaziraawiyawu mata dabboy hayqqikko yaatiyogee metiyaba gidana danddayees. Beni wode, baliyan asay anhaakko shiiqiyo meezee deꞌees. (Yoh. 19:39, 40; Oos. 9:36-40) Shin issi Naaziraawe hegaa mala meeziya kaallana danddayenna. Naaziraaweti keehi kayyottiyo wodekka bantta gelido qaalaa naagiyogan mino ammanoy deꞌiyogaa bessidosona. Ha ammanettida asati hegaa mala waayissiyabata genccanaadan Yihooway eta minttettidoogee qoncce.
11. Issi Kiristtaanee so asaara gayttidabaa kuuyiyo wode waatanawu murttana koshshii? (Misiliyakka xeella.)
11 Nuuni Kiristtaane gidiyo gishshawu Yihoowawu gelido qaalaa xoqqu ootti xeelloos. Hegee so asaa xeelliyagan nuuni kuuyiyobaaranne oottiyobaara gayttees. Nu soo asawu koshshiyabaa kunttanawu nuuni minni oottikkokka, Yihooway nuuppe koyiyobaappe nu soo asay koyiyobaa mule kaseyokko. (Mat. 10:35-37; 1 Xim. 5:8) Issi issitoo, nu dabbota gidennan Yihoowa ufayssiyabaa kuuyiyogee koshshana danddayees.
Keehi metiya hanotankka Yihooway koyiyobaa ne deꞌuwan kaseyanawu eeno gay? (Mentto 11 xeella) d
12. So asaa hanotaa giigissanawu Aleksandiru ay oottidee, qassi ay oottibeennee?
12 Aleksandirunne A machchee Dorini hanotaa beꞌa. He aqo laggeti issi layttawu Geeshsha Maxaafaa xannaꞌi simmin, Dorina agganawu kuuyaasu; qassi Aleksandirukka agganaadan koyaasu. Gidikkonne, I xannaꞌiyogaa aggennaagaa woppu giidi hiillan yootiis. Dorina hegan ufayttabeenna gishshawu, I xannaꞌiyogaa agganaadan oottanawu baaxetaasu. Aleksandiru A hegaadan haniyoy aybissakko akeekanawu baaxetikkokka, hegee awu metiyaba gidiyogaa yootiis. Dorina A boriyonne A bolli iitabaa haasayiyo gishshawu, I Geeshsha Maxaafaa xannaꞌiyogaa agganawu issi issitoo qoppiis. Shin Aleksandiru ba deꞌuwan Yihoowa kaseyees; ba machchiyo loytti siiqeesinne bonchchees. I loꞌꞌo leemiso gidido gishshawu A Geeshsha Maxaafaa xannaꞌiyogaa zaarettada doommaasu; qassi guyyeppe haattan muukettaasu.—“Tumay Asay Laamettanaadan Oottees” giya kaalli kaalli kiyiyagan Aleksandiranne Dorina Vaakar: ‘Siiqoy Danddayanchchanne Keha’ giya biiduwa jw.org saytiyan xeella.
13. Yihoowanne nu soo asaa siiqiyogaa waati bessana danddayiyoo?
13 Yihooway so asaa deꞌuwa doomissiis; qassi I so asay ufayttanaadan koyees. (Efi. 3:14, 15) Nu tumuppe ufayttanawu koyikko, Yihooway nuuppe koyiyobaa nuuni oottana koshshees. Neeni so asawu koshshiyabaa kunttaydda, qassi eta siiqayddanne bonchchaydda Yihoowawu haggaazanawu oottiyobaa I nashshiyogaa ammanetta.—Roo. 12:10.
NAAZIRAAWETU MALA GIDANAADAN HARATA MINTTETTA
14. Nuuni haasayiyoban oona minttettana koshshii?
14 Ha wodiyan Yihoowawu goynniyageeti ubbay A siiqiyo gishshawu bantta goꞌꞌaa aggi bayanawu eeno gaana koshshees. Yaatiyogee issi issitoo metiyaba. Bantta goꞌꞌaa aggi bayanaadan harata waati maaddana danddayiyoo? Minttettiyabaa haasayiyogan yaatana danddayoos. (Iyy. 16:5) Yihoowawu loytti haggaazanawu bantta deꞌuwa sima oottidaageeti ne galchchan deꞌiyonaa? Metiyaba gidikkokka, tamaare son haratuppe dumma gidanawu xala gidida yelagata neeni eray? So asaappe yedetay gakkishinkka ammanettidi deꞌanawu baaxetiya xinaatetinne ne mala Kiristtaaneti deꞌiyonaa? Eta minttettanawu, qassi eta xalatettaa gishshawunne eti Yihoowawu oottiyobaa gishshawu nuuni eta keehi nashshiyogaa yootanawu neessi danddayettida ubbabaa ootta.—Pilm. 4, 5, 7.
15. Ubba wode haggaaziyageeta amaridaageeti waati maaddidonaa?
15 Issi issitoo nuuni ubba wode haggaazuwa haggaaziya nu mala Kiristtaaneta koshshiyaban maaddana danddayoos. (Lee. 19:17; Ibr. 13:16) Siri Lankkan deꞌiya ammanettida cima michchiya hegaadan oottanawu keehi koyaasu. Iyyo xuurataa miishshay gujettido gishshawu, miishshaa metoy deꞌishinkka aqinye gididi haggaaziyogaa aggennaadan naaꞌꞌu yelaga michchontta maaddanawu koyaasu. Yaatiyo gishshawu eti silkkiyawu kessiyo miishshaa qanxxiyogan maaddanawu aginan aginan A etawu amarida miishshaa immaasu. He michchiya keehi loꞌꞌobaa oottaasu!
16. Beni wode deꞌida Naaziraawetuppe nuuni ay tamaarana danddayiyoo?
16 Naaziraawetu loꞌꞌo leemisuwappe nuuni keehi darobaa tamaaridoogee tuma! Shin Naaziraawetubaa xannaꞌiyogan saluwan deꞌiya nu Aawaa Yihoowabaakka tamaarida. I nuuni A ufayssanawu koyiyogaanne nu gelido qaalaadan deꞌanawu nu goꞌꞌaa aggi bayanawu eeno giyogaa erees. I nuuni A siiqiyogaa bessanaadan paqqadiyogan nuna bonchchiis. (Lee. 23:15, 16; Mar. 10:28-30; 1 Yoh. 4:19) Naaziraawetu taarikee bessiyogaadan Yihooway nuuni awu haggaazanawu aggi bayiyobaa akeekeesinne xoqqu ootti xeellees. Simi yaakko, nuussi danddayettida ubbabaa nu dosan oottiyogan Yihoowawu ubba wode haggaazanawu murttidaageeta gidoos.
WOYGADA ZAARUUTEE?
-
Naaziraaweti bantta goꞌꞌaa aggi bayiyogaa ayba ogetun bessidonaa?
-
Harati Naaziraawetu mala gidanaadaaninne bantta goꞌꞌaa aggi bayanaadan waati minttettana danddayiyoo?
-
Yihooway bawu goynniyageetun ammanettiyogaa Naaziraawetu taarikee waati bessii?
MAZAMURE 124 Awudenne Ammanettoos
a Amarida asati Naaziraawe gidanaadan dooriday Yihoowa gidikkokka, amarida wodiyawu Naaziraawe gidanaadan doorettida daroti Israaꞌeela asa gidennan aggokkona.—“ Yihooway Sunttido Naaziraaweta” giya saaxiniya xeella.
b Issi issitoo nu xuufetun ubba wode haggaaziyageeti Naaziraawetu mala gidiyogee odettiis. Shin banttana Yihoowawu sheedhdhidaageeti ubbay Naaziraawetu mala waani gidana danddayiyakko ha huuphe yohoy qonccissees.
c Xaaxi waaxi xeelliyo wode, issi Naaziraawee ba gelido qaalaa naaganawu oottiyogaappe hara aawatetti awu deꞌiyaba milatenna.
d MISILIYA QONCCISSUWA: Pooqe keettaa baranddan uttida issi Naaziraawee I siiqiyo so asaappe issoy hayqqin mooguwawu efiyogaa beꞌees. I Yihoowawu gelido qaalaa naagiyo gishshawu mooguwawu bibeenna.
