1. Azazettiyogee nuussi metana danddayiyoy aybissee?

 NEENI azazettanawu metoota eray? Kawoy Daawitikka metooti erees, yaatiyo gishshawu Xoossaa hagaadan woossiis: ‘Taani neeyyo eeno gaada azazettanaadan tana maadda.’ (Maz. 51:12) Daawiti Yihoowa siiqees. Gidikkokka, Daawiti issi issitoo azazettanawu metootiis, qassi nuunikka azazettanawu metootoos. Aybissi? Koyruwan, nu laattido nagaray nuuni azazettanawu metootanaadan oottees. Naaꞌꞌanttuwan, Seexaanay nuuni aagaadan Yihoowa bolli makkalanaadan ubbatoo baaxetees. (2 Qor. 11:3) Heezzanttuwan, “Xoossaayyo azazettenna asaa ha77i haariya ayyaanaayyo [azazettiya]” makkalanchcha asati kumido alamiyan deꞌoos. (Efi. 2:2) Yaatiyo gishshawu, nuuni Yihoowawunne I maataa immidoogeetuyyo azazettanawu nu shugo miyyiya, Dabloosanne ha alamiya xoonanawu baaxetana koshshees.

2. ‘Ero giyogee’ woygiyogee? (Yaaqooba 3:17)

² Yaaqooba 3:17 nabbaba. Yaaqoobi ayyanay denttettin xaafido dabddaabbiyan akeekanchcha uri “ero giyaagaa” gidiyogaa yootiis. Hegee woygiyogaakko qoppa. Yihooway maataa immidoogeetuyyo nuuni nu dosan azazettana koshshees. Shin Yihooway A azazota azazettennaadan nuna oychchiya urawu nuuni azazettanaadan koyenna.—Oos. 4:18-20.

3. Nu bolli maatay deꞌiyogeetussi nuuni azazettiyogaa Yihooway xoqqu ootti xeelliyoy aybissee?

³ Asawu azazettiyogaappe Yihoowawu azazettiyogee metennabadan qoppana danddayoos. Qassi Yihooway awudekka wottiyobi baynna kaaletuwa immees. (Maz. 19:7) Shin maatay deꞌiyo asati nagaranchcha. Gidikkonne, saluwan deꞌiya nu Aaway yelidaageetuyyo, deriya haariyageetuyyonne cimatuyyo maataa immiis. (Lee. 6:20; 1 Tas. 5:12; 1 Phe. 2:13, 14) Nuuni etawu azazettiyo wode Yihoowawu azazettoos. Yihooway  maataa immido asatu kaaletoy issi issitoo azazettanawu metiyaba gidikkokka, nuuni etawu waati azazettana danddayiyakko ane beꞌoos.

4. Daro naati banttana yelidaageetussi azazettennay aybissee?

⁴ Yelagati, ‘banttana yelidaageetuyyo azazettenna’ hara yelagati kumido alamiyan deꞌoosona. (2 Xim. 3:1, 2) Daroti azazettennay aybissee? Yelida issoti issoti bantta naati oottanaadan yootiyobaa banttawu oottokkona. Qassi hegee likke gidenna giidi eta naati qoppoosona. Harati qassi ha alamee daroban laamettido gishshawu banttana yelidaageeti zoriyobay maaddenna woy laꞌatettaa diggees giidi qoppoosona. Neeni yelaga gidikko, hegaadan qoppa eray? Daroti, “Naatoo, inttena yelidaageetuyyo Godan azazettite; aissi giikko, hagee oottanau bessiyaabaa” giya Yihoowa azazuwa azazettanawu metootoosona. (Efi. 6:1) Neeni azazettanaadan aybi maaddana danddayii?

5. Luqaasa 2:46-52y yootiyogaadan, Yesuusi bana yelidaageetussi azazettidoogee maalaalissiyaba gidiyoy aybissee?

⁵ Azazettiyogan keehi loꞌꞌo leemiso gidida Yesuusappe tamaarana danddayaasa. (1 Phe. 2:21-24) I nagari baynna asa gidikkonne, nagaranchcha gidida ba aawaaranne aayeera deꞌiis. Shin Yesuusi bana yelidaageeti issi issitoo balabaa oottiyo wodenne bala ogiyan A akeekiyo wodekka I eta bonchchiis. (Kes. 20:12) Yesuusawu layttay 12 gidido wode hanidabaa beꞌa. (Luqaasa 2:46-52 nabbaba.) A yelidaageeti soo simmiyo wode I Yerusalaamen attiis. Baalaappe simmin Yooseefinne Mayraama bantta naati ubbay banttanaara deꞌiyakkonne shaakki erana koshshiis. Yooseefinne Mayraama Yesuusa koyidi demmido wode I Yerusalaamen attido gishshawu Mayraama A hanqqettaasu! Yesuusi hegee bessennaba giidi yootana danddayees. Shin I bonchchiyogaa bessiya ogiyan bana yelidaageetuyyo zaariis. Shin Yooseefinne Mayraama, “i giidobaa . . . akeekibookkona.” Gidikkonne, Yesuusi “etassi azazettees.”

6-7. Yelidaageetussi azazettanaadan yelagata aybi maaddana danddayii?

⁶ Yelagatoo, inttena yelidaageeti baliyo woy intte qofaa bala ogiyan akeekiyo wode etawu azazettanawu metooti ereetii? Yaatikko, inttena aybi maaddana danddayii? Koyruwan, azazettiyogaa Yihooway waati xeelliyakko qoppite. Intte inttena yelidaageetussi ‘azazettiyogee Xoossaa daro ufayssiyogaa’ Geeshsha Maxaafay yootees. (Qol. 3:20) Inttena yelidaageeti issi issitoo intte hanotaa akeekennan aggiyogaa woy azazettanawu metana danddayiya higgeta kessiyogaa Yihooway erees. Shin hanotay ayba gidikkonne, intte etawu azazettiyo wode Yihooway ufayttees.

⁷ Naaꞌꞌanttuwan, azazettiyogaa inttena yelidaageeti waati xeelliyakko qoppite. Intte inttena yelidaageetussi azazettiyo wode, eta ufaysseeta, qassi kaseegaappe aaruwan eti inttenan ammanettoosona. (Lee. 23:22-25) Kaseegaappe aaruwan etaara siiqettana danddayeeta. Beljiyemen deꞌiya Alekisanddera giyo ishay hagaadan giis: “Tana yelidaageeti azaziyobaa taani oottiyogaa doommido wode, nuuni kaseegaappe aaruwan siiqettidanne ufayttida.” b Heezzanttuwan, intte haꞌꞌi azazettiyogee sinttappe inttena waati maaddanaakko qoppite. Brazilen deꞌiya Pawuli hagaadan giis, “Taani ta aayeessinne  ta aawaassi azazettiyogaa tamaaridoogee Yihoowawunne maatay deꞌiyo haratussi azazettanaadan tana maaddiis.” Xoossaa Qaalay intte inttena yelidaageetussi azazettana koshshiyo ammanttiya gaasuwa yootees. Hagaadan gees: ‘Intteyyo ubbabay loꞌꞌananne saꞌan intte layttay aduqqana.’—Efi. 6:2, 3.

8. Daro yelagati banttana yelidaageetussi azazettiyoy aybissee?

⁸ Daro yelagati eti banttana yelidaageetussi azazettiyo wode etawu keehi loꞌꞌo gidiyogaa akeekidosona. Braazilen deꞌiya Luuza amarida wodiyawu A silkkiya oyqqanaadan paqqadettibeennay aybissakko akeekanawu koyro heeran metootaasu. Ubba qassi layttan iira issi mala gididaageetussi silkkee deꞌiyogaa A akeekaasu. Yelidaageeti O naaganawu hegaadan oottidoogaa A guyyeppe akeekaasu. A bana yelidaageetussi azazettiyogaa laꞌatettaa diggiyabadan qoppenna gishshawu eta zoree iyyo koshshiyogaa erawusu. Amarkkan deꞌiya Elizaabeto giyo issi yelagiya bana yelidaageetussi azazettanawu issi issitoo haꞌꞌikka metootawusu. A hagaadan gaasu, “Tana yelidaageeti higgiya kessiyo gaasuwa taani akeekenna wode eti kessido higgee tana qohuwappe naagido wodiya hassayays.” Armeeniyan deꞌiya Moonika A ubbatoo ufayttiyoy bana yelidaageetussi azazettennan aggiyo wodiyan gidennan, azazettiyo wodiyan gidiyogaa yootaasu.

9. Higgiyawu azazettiyogaa daroti waati xeelliyonaa?

⁹ Geeshsha Maxaafay asaa kawotettata ‘deriya heemmiyageeta’ yaagees. (Roo. 13:1) Kawotettati deꞌiyogee loꞌꞌo gidiyogaa daro asay maayettees; qassi kawotettati kessiyo higgetuppe amaridaageeta eti azazettana danddayoosona. Shin eti dosenna woy likke gidenna giidi qoppiyo higgetussi waayi azazettana. Leemisuwawu, giiraa giiriyogaabaa qoppa. Awurooppan issi biittan deꞌiya daro asay “giiray likke gidennabadan qoppikko, giirana koshshenna” giidi ammanees. Asay giiranaadan kawoy koyiyo giiraa ubbaa he biittan deꞌiya asay qanxxennay hegaassa.

10. Nuuni dosenna higgetakka azazettiyoy aybissee?

¹⁰ Asaa kawotettay tuggaa ehiyogaa, Seexaanaa haaruwan deꞌiyogaanne mata wode xayanaagaa Geeshsha Maxaafay yootees. (Maz. 110:5, 6; Era. 8:9; Luq. 4:5, 6) Qassikka Geeshsha Maxaafay “ha77i de7iya heemmiyaageeta ixxiya ooninne Xoossaa azazuwaa ixxees” yaagees. Amarida hanotan nuuni deriya haariyageetussi azazettiyogee maaray mankkay deꞌanaadan guutta wodiyawu Yihooway giigissidoba. Hegaa gishshawu nuuni giiraa, bonchchuwanne azazettiyogaa gujjin, “ubbau bessiyaagaa” immana koshshees. (Roo. 13:1-7) Higgiyawu azazettiyogee loꞌꞌo gidennabadan, likke gidennabadan woy nuna daro miishshaa kessisiyabadan xeellana danddayoos. Shin nuuni deriya haariyageetussi azazettanaadan nuussi yootiday Yihoowa gidiyo  gishshawu, A higgiya nu kanttanaadan eti oychchenna wode ubban nuuni etawu azazettana bessees.—Oos. 5:29.

11-12. Yooseefinne Mayraama higgiyawu azazettanawu waatidonaa, qassi hegee ayba ayfiya demissidee? (Luqaasa 2:1-6) (Misiliyakka xeella.)

¹¹ Deriya haariyageetussi azazettiyogee metiyo wodiyankka azazettida Yooseefappenne Mayraamippe nuuni tamaarana danddayoos. (Luqaasa 2:1-6 nabbaba.) Mayraama shahaarin uddufun aginaa heera gidido wode azazettiyogaara gayttidaagan onne Yooseefa paacee gakkiis. Rooma biittaa haariya, Augisxxoosi asay mazggabettanaadan azaziis. Yooseefinne Mayraama Beetaliheeme manddarana koshshiis; he deretiya ogee 150 kilo meetire. Ubbaappe aaruwan he ogee Mayraamissi injjetenna. Mayraamissinne uluwan deꞌiya shahaarawu eti hirggennan aggokkona. Mayraama manddariyo wode ogiyan yelikko shin? I uluwan deꞌiyagee sinttappe Mase gidana naꞌa. Yaatin eti kawoy kessido higgiyawu azazettennan aggana danddayiyonaa?

¹² Yooseefinne Mayraama hirgganaadan oottiya gaasoy deꞌikkonne, eti higgiyawu azazettidosona. Eti azazettido gishshawu Yihooway eta anjjiis. Mayraama saruwan Beetaliheeme gakkaasu, naꞌaa yelaasu, ubba qassi Geeshsha Maxaafaa hiraagay polettanaadan oottaasu!—Mik. 5:2.

13. Nuuni azazettiyogee nu ishantta waati goꞌꞌana danddayii?

¹³ Deriya haariyageetussi azazettiyogee nunakka haratakka goꞌꞌees. Waatidi? Issi ogee, higgiyawu azazettennan aggiyo gaasuwan gakkiya qixaatiyappe attiyogaa. (Roo. 13:4) Nuuni deriya haariyageetussi azazettiyo wode, Yihoowa Markkati azazettiyageeta gidiyogaa eti akeekana. Leemisuwawu, daro layttappe kase Nayjeeriyan giiraa giiranawu ixxidi makkaliyageeta koyiiddi wotaaddarati gubaaꞌe shiiquwa wode Shiiquwa Addaraashaa gelidosona. Shin wotaaddaratu halaqay wotaaddarati Shiiquwa Addaraashaappe kiyanaadan yootidi, hagaadan giis: “Yihoowa Markkati ubbatoo giiraa giiroosona.” Neeni  higgiyawu azazettiyo wode Yihoowa Markkatussi deꞌiya loꞌꞌo sunttay moorettennaadan maaddaasa. Qassi issi gallassi he loꞌꞌo sunttay ne ishanttanne michchontta qohuwappe naaganawu maaddana danddayees.—Maa. 5:16.

14. Deriya heemmiyageetussi ‘ero gaanaadan’ issi michchiyo maaddidabay aybee?

¹⁴ Gidikkonne deriya haariyageetussi azazettiyogaa nuuni issi issitoo koyennan aggana danddayoos. Amarkkan deꞌiya Joꞌaano giyo michchiya hagaadan gaasu: “Sunttati bessenna ogiyan ta so asaappe amaridaageeta qohido gishshawu taani etawu azazettanawu keehi metootaas.” Shin Joꞌaana ba qofaa laammanawu wozanappe baaxetaasu. Koyruwan, A sunttata eqettanaadan denttettiya Intternneetiyan kiyiyabata nabbabiyogaa aggaasu. (Lee. 20:3) Naaꞌꞌanttuwan, asaa kawotettay ehiyo laamiyan gidennan, Yihoowan ammanettanaadan I maaddana mala woossaasu. (Maz. 9:9, 10) Heezzanttuwan, A polotikaaban oossinne exatana koshshennaagaa yootiya huuphe yohota nu xuufetuppe nabbabaasu. (Yoh. 17:16) Joꞌaana haꞌꞌi sunttata bonchchiyonne etawu azazettiyo gishshawu A woppu giidoogaanne ufayttiyogaa yootaasu.

15. Yihoowa dirijjitee immiyo kaaletuwa azazettiyogee issi issitoo metana danddayiyoy aybissee?

¹⁵ Nuuni gubaaꞌiyan ‘aawatettay deꞌiyogeetussi azazettanaadan’ Yihooway koyees. (Ibr. 13:17) Nuna kaalettiya Yesuusi wottiyobi baynnaagaa gidikkonne, I saꞌan aawatettaa immidoogeeti nagaranchchata. Nuuni etawu azazettanawu metootana danddayoos; ubba qassi nuuni koyennabaa oottanaadan eti oychchiyo wode azazettiyogee yaa metees. Kiitettida Pheexiroosi issi wode azazettanawu mammottiis. Muuse Higgiya maaran tuna gidida mehiya ashuwa maanaadan kiitanchchay azazin Pheexiroosi issitoo xalla gidennan, heezzutoo ixxis giis! (Oos. 10:9-16) I ixxis giidoy aybissee? Ooratta kaaletuwa akeekanawu I metootido gishshataassa. Hagee I kase oottidobaappe keehi dummatees. Wottiyobi baynna kiitanchchay immido kaaletuwa azazettiyogee Pheexiroosawu metiyaba gidikko, nagaranchcha gidida asay immiyo kaaletuwa kaalliyogee nuussi hegaappe aaruwan metiyaba gidana danddayees!

16. Kiitettida Phawuloosi bawu imettida kaaletoy likke gidennabadan qoppana danddayikkokka waatidee? (Oosuwaa 21:23, 24, 26)

¹⁶ Likke gidennaba milatiya azazoy kiitettida Phawuloosawu imettido wodekka I azazettanawu ‘ero giis.’ Phawuloosi ‘Muuse Higgiya moorana mala tamaarisseesinne’ Muuse Higgiya bonchchenna giya oduwa Ayhuda Kiristtaaneti siyidosona. (Oos. 21:21) Yerusalaamen deꞌiya cimida Kiristtaaneti Phawuloosi Higgiya bonchchiyogaa bessanawu oyddu asata ekkidi beeta maqidasiya baanaadaaninne bana geeshshanaadan azazidosona. Shin Kiristtaaneti Muuse Higgiya kaallana koshshennaagaa Phawuloosi erees. Qassi I aybanne mooribeenna. Gidikkonne, Phawuloosi sohuwara azazettiis. I “wonttetta gallassi asata ekkidi, etaara geeyiis.” (Oosuwaa 21:23, 24, 26 nabbaba.) Phawuloosi azazettidoogee ishanttu giddon issippetettay deꞌanaadan maaddiis.—Roo. 14:19, 21.

17. Isttefaanippe neeni ay tamaaray?

¹⁷ Isttefaano giyo michchiya macara biiroy kuuyidoban maayettanawu keehi metootaasu. Anne I keettaaway kare biittaa qaalaa goꞌettiya citan ufayssan haggaazoosona. Guyyeppe macara biiroy he citay attanaadan oottin he azinaynne machchiya bantta biittaa qaalaa goꞌettiya gubaaꞌiyan zaarettidi  maddabettidosona. Isttefaana hagaadan gaasu: “Taani keehi azzanaas. Nu doonaa goꞌettiya heeran aassiyageeti keehi koshshoosona gaada qoppabeykke.” Gidikkonne, A ooratta kaaletuwara hashetanawu kuuyaasu. A hagaadan gaasu: “Macara biiroy kuuyidobay loꞌꞌo gidido gaasuwa taani guyyeppe akeekaas. So asay Yihoowa Markka gidenna nu gubaaꞌiyan deꞌiya darotussi nuuni ayyaanaaban aawanne aayo gidida. Yihoowawu goynniyogaa zaaretta doommida issi michchiyo taani xannaꞌissays. Qassi haꞌꞌi taani buzo xinaatiyawu daro wodiya demmaas.” A gujjada hagaadan gaasu, “Taani azazettanawu taassi danddayettida ubbabaa oottidoogaa eriyo gishshawu tawu geeshsha kahay deꞌees.”

18. Azazettiya asa gidiyogan nuuni waani goꞌettiyoo?

¹⁸ Nuuni azazettiyogaa tamaarana danddayoos. Yesuusi “waayettido waayiyan azazettiyoogaa tamaariis.” (Ibr. 5:8) Yesuusadan nuunikka waayissiya hanotatun azazettiyogaa darotoo tamaaroos. Leemisuwawu, korona harggee doommido heeran Shiiquwa Addaraashatun shiiqiyogaanne sooppe soo haggaaziyogaa agganaadan nuussi odettido wode neeni azazettanawu metootadii? Shin neeni azazettidoogee nena naagiis, gubaaꞌiya issippetettawu maaddiisinne Yihoowa ufayssiis. Gita waayiya wode nuussi imettiya ay kaaletuwakka azazettanawu nuuni ubbay haꞌꞌi loytti giigettida. He kaaletota azazettiyogee nu shemppuwa ashshana!—Iyy. 36:11.

19. Neeni azazettiya asa gidanawu koyiyoy aybissee?

¹⁹ Azazettiyogee zawi baynna anjjuwa demissiyogaa nuuni tamaarida. Shin nuuni Yihoowa siiqiyonne A ufayssanawu koyiyo gishshawu awu azazettoos. (1 Yoh. 5:3) Yihooway nuussi oottido ubbabaa gishshawu awu kushiya zaarana danddayokko. (Maz. 116:12) Shin nuuni ayyonne nu bolli maatay deꞌiyogeetussi azazettana danddayoos. Nuuni azazettiyo wode aadhdhida eranchcha gidiyogaa bessoos. Qassi aadhdhida eranchcha uri Yihoowa wozanaa ufayssees.—Lee. 27:11.