1. Xoossay ammanettida ba ashkkarata beni wode waati minttettidee?

 XOOSSAA QAALAY ammanettida asati mino gidiyogaa darotoo qonccissees. Shin eti ubbatoo mino gidokkona. Leemisuwawu, Kawuwa Daawiti issi issitoo ‘deriyadan mino’ gididabadan qoppiis, shin hara wodetun ‘dagammiis.’ (Maz. 30:7) Xoossaa ayyaanay Samssoonawu gita wolqqaa immiis, shin Samssooni Xoossay awu wolqqaa immennaakko I ‘daafuridi hara asadan hananaagaa’ eriis. (Daan. 14:5, 6; 16:17) Ha ammanettida asati mino gididoy Yihooway etawu wolqqaa immido gishshataassa.

2. Kiitettida Phawuloosi bana daafuranchchanne mino giidoy aybissee? (2 Qoronttoosa 12:9, 10)

² Kiitettida Phawuloosikka Yihooway immiyo wolqqay awu koshshiyogaa akeekiis. (2 Qoronttoosa 12:9, 10 nabbaba.) Nuuppe darotuugaadan Phawuloosikka harggiis. (Gal. 4:13, 14) I issi issitoo loꞌꞌobaa oottanawu metootiis. (Roo. 7:18, 19) Qassi I issi issitoo unꞌꞌettiisinne ta bolli aybi gakkaneeshsha giidi yayyiis. (2 Qor. 1:8, 9) Gidikkonne, Phawuloosi daafurido wode wolqqaa demmiis. Waatidi? Phawuloosi bana gakkida metota genccanaadan koshshiya wolqqaa Yihooway immido gishshataassa.

3. Nuuni ha huuphe yohuwan zaarana oyshati awugeetee?

³ Genccanawu koshshiya wolqqaa Yihooway nuussikka immanawu qaalaa geliis. (1 Phe. 5:10) Shin nuuni aynne baaxetennan he wolqqaa demmana giidi naagana danddayokko. Leemisuwawu, sayniyara neessi qumay imettikko, qumaa maanawu neeni ne kushiya sayniyan yeddana koshshees. Yaatiyogan neeni qumaappe bollawu koshshiyabaa demmada loytta goꞌettana. Hegaadankka, Yihooway nuussi koshshiya wolqqaa  immanawu giigi uttiis, shin hegaappe goꞌettanawu issi issibaa oottana koshshees. Yihooway nuussi wolqqaa immanawu giigissidobay aybee? He wolqqaa demmanawu nuuni ay oottana koshshii? Hananabaa yootiya Yoonaasa, Yesuusa aayyiyo Mayraamonne kiitettida Phawuloosa Yihooway waati maaddidaakko pilggiyogan ha oyshatu zaaruwa demmana. Qassi ha wodiyan Yihooway ba ashkkaratussi ubbatoo hegaadan waati wolqqaa immiyakko beꞌana.

4. Nuuni Yihooway immiyo wolqqaa waati demmana danddayiyoo?

⁴ Nuuni Yihooway immiyo wolqqaa demmana danddayiyo issi ogee A woossiyogaa. Yihooway ‘ubbaappe aadhdhiya wolqqaa’ nuussi immiyogan nu woosaa zaarees. (2 Qor. 4:7) Qassi A Qaalaa nabbabiyogaaninne wotti dentti qoppiyogan wolqqaa demmana danddayoos. (Maz. 86:11) Yihooway Geeshsha Maxaafaa baggaara nuussi yootiyobay wolqqaamabaa “oottees.” (Ibr. 4:12) Neeni Yihoowa woossikkonne, A Qaalaa nabbabikko genccanawu, ubbatoo ufayttanawu woy deexo aawatettaa polanawu koshshiya minotettaa demmana. Yihooway hananabaa yootiya Yoonaasi minnanaadan waati maaddidaakko beꞌa.

5. Hananabaa yootiya Yoonaasi xala gidana koshshidoy aybissee?

⁵ Hananabaa yootiya Yoonaasi xala gidana koshshiis. I Yihooway awu immido deexo aawatettaa aggidi baqatiis. Hegaappe denddidaagan, inne markkabiyan aara deꞌiya asati wolqqaama gotee denddin hayqqichchi attidosona. Markkabiya laaggiyageeti abban A olin gita molee A mittiis. Yoonaasi keehi yashshiya moliya uluwan deꞌees. Yoonaasi waaniis gaada qoppay? I yan hayqqiyabadan qoppideeshsha? Geella Yihooway tana aggiis giidi qoppidee? Yoonaasi keehi unꞌꞌettidoogee qoncce.

6. Yoonaasa 2:1, 2, 7y yootiyogaadan, Yoonaasi moliya uluwan deꞌiyo wode minnanaadan maaddidabay aybee?

⁶ Yoonaasi moliya uluwan deꞌiiddi wolqqaa demmanawu waatidee? Yihoowa woossiis. (Yoonaasa 2:1, 2, 7 nabbaba.) Yoonaasi Yihoowawu azazettibeennaba gidikkokka, I ba nagaraappe simmiisinne Yihooway A woosaa siyanaagaa ammanettiis. Qassi Yoonaasi kase nabbabido xiqiseta loytti qoppiis. Nu hegaadan gaana danddayiyoy aybissee? A woosay Yoonaasa shemppo 2n odettiis; I hegan Mazamure maxaafan odettida qofaara issi mala qaalata goꞌettiis. (Leemisuwawu, Yoonaasa 2:2, 5; Mazamure 69:1; 86:7​ra gatta xeella.) He xiqiseta Yoonaasi loytti eriyogee tuma. He xiqiseti Yoonaasi Yihooway A maaddanaagaa ammanettanaadan oottidosona. Yihooway Yoonaasa ashshiis, yaatin I oottanaadan Yihooway azazidobaa oottanawu eeno giis.—Yona. 2:10–3:4.

7-8. Taywanen deꞌiya issi ishay bana metoy gakkido wode wolqqaa waati demmidee?

⁷ Dumma dumma metoy nuna gakkiyo wode Yoonaasa taarikee nuna maaddana danddayees. Leemisuwawu, Taywanen deꞌiya Zhiiming b giyo ishay keehi sahettees. Qassi I Yihoowa ammaniyo gishshawu so asay A bolli yedetaa gattees. I woossiyogaaninne xannaꞌiyogan Yihooway immiyo wolqqaa demmiis. I hagaadan giis: “Issi issitoo metoy merettiyo wode taani buzo xinaatiya xannaꞌanawu woppu gaana danddayenna gishshawu keehi unꞌꞌettays.” Shin I hidootaa qanxxibeenna. I hagaadan giis: “Koyruwan, Yihoowa woossaas. Kaallada, taani ta irfooniya hayttan wottada Kawotettaa mazamureta ezggays. Issi  issitoo taani woppu gaana gakkanaashin he mazamureta cenggurssaa ziqqi oottada yexxays. Yaatada xannaꞌiyogaa doommays.”

⁸ Zhiimingi buzo xinaatiyan tamaaridobaappe waayissiya hanotaa genccanawu koshshiya wolqqaa demmiis. Leemisuwawu, I shuhettidi paxiiddi deꞌiyo wode awu zoꞌo suuttaa seelee guuxxido gishshawu, I suuttaa ekkana koshshiyogaa issi narssiya yootaasu. Zhiimingi shuhettanaappe kase qammi aagaa mala sahuwa sahettada shuhettida issi michcheebaa nabbabiis. I zoꞌo suuttaa seelee aagaappekka keehi guutta gidikkonne, A suuttaa ekkennan paxaasu. He michchee taarikee Zhiimingi ammanettidi deꞌanaadan maaddiis.

9. Metoy nena gakkin neeni unꞌꞌettikko waatana danddayay? (Misiliyakka xeella.)

⁹ Waayee gakkin Yihoowa woossanawu neeni keehi unꞌꞌetta eray? Woy qassi neeni keehi daafurada xannaꞌanawu metootadii? Yihooway ne hanotaa loytti akeekiyogaa hassaya. Yaatiyo gishshawu, neeni qantta woosaa woossiyo wodekka I neessi koshshiyabaa immanaagaa ammanettana danddayaasa. (Efi. 3:20) Neeni sahettido, daafurido woy keehi unꞌꞌettido gishshawu nabbabanawunne xannaꞌanawu metootikko cenggurssan giigida Geeshsha Maxaafaa woy nu xuufetuppe issuwa siyana danddayaasa. Qassi nu mazamuretuppe issuwa ezggana woy jw.org saytiyan deꞌiya issi biiduwa beꞌana danddayaasa. Yihooway nena minttanawu koyees, qassi neeni A woossiyo wodenne ne woosaa zaaruwa Geeshsha Maxaafaappenne I giigissido hara ubbabaappe demmanawu koyiyo wode I nena minttana.

10. Nu ishanttinne michchontti nuna waati minttettiyonaa?

¹⁰ Yihooway Kiristtaane ishanttunne michchonttu baggaara nuna minttettana danddayees. Nuna metoy gakkiyo wode woy nuuni deexo aawatettaa polanawu metootiyo wode eti nuna ‘daro maaddoosona.’ (Qol. 4:10, 11) Qassi ishanttinne michchontti “metuwaa wode” nuussi keehi koshshoosona. (Lee. 17:17) Nuuni daafuriyo wode nu ishanttinne michchontti nuussi koshshiyabaa immoosona,  nuna zoroosona, qassi nuuni ubbatoo ammanettidi Yihoowawu haggaazanaadan minttettoosona. Yesuusa aayyiyo Mayraamo harati waati minttettidaakko beꞌa.

11. Mayraamissi minttettoy koshshidoy aybissee?

¹¹ Yihoowa sheniya polanawu Mayraamissi minttettoy koshshiis. Kiitanchchay Gabreeli iyyo gita aawatettaa immi simmin A ay keena unꞌꞌettidaakko qoppa. A azinaa gelabeykku, shin shahaaraasu. A naata dichcha erukku, shin Mase gidana naꞌaa dichchana koshshiis. A mule inddaa gaytta erukku, shin shahaaridoogaa Yooseefawu yootana koshshiis. Qassi yaatiyogee keehi deexxiyaba.—Luq. 1:26-33.

12. Luqaasa 1:39-45y yootiyogaadan, Mayraama baassi koshshiya minttettuwa waata demmadee?

¹² Deexxiya ha dumma aawatettaa polanawu koshshiya minttettuwa Mayraama waata demmadee? A haratu maaduwa oychchaasu. Leemisuwawu, A ha aawatettaa xeelliyagan harabaakka yootanaadan Gabreela oychchaasu. (Luq. 1:34) Hegaappe simmin darin takkennan, “deree dariyo” Yihudaa biittan deꞌiya Elssaabeexo giyo ba dabbiyo oychchanawu baasu. Yaa biidoogan A goꞌettaasu. Elssaabeexa Mayraamo galataasu, qassi Mayraami uluwan deꞌiya naꞌaabaa Yihoowa ayyaanay denttettin minttettiya hiraagaa yootaasu. (Luqaasa 1:39-45 nabbaba.) Mayraama Yihooway ‘ba kushiyan wolqqaama oosuwa oottidoogaa’ yootaasu. (Luq. 1:46-51) Gabreelanne Elssaabeexi baggaara Yihooway Mayraamo minttettiis.

13. Issi michchiya ba ishanttunne michchonttu maaduwa oychcha simmin hanidabay aybee?

¹³ Mayraamiigaadan, neenikka ne ishanttuppenne michchonttuppe minttettuwa demmana danddayaasa. Boliviyan deꞌiya Daasuuro giyo michcheessi hegaa mala minttettoy koshshiis. I aaway caddi oyqqiya harggiyan keehi sahettiis. I hosppitaaliyan zinꞌꞌido wode iyyo danddayettida keenan A maaddaasu. (1 Xim. 5:4) Hegee issi issitoo metiyaba. A hagaadan gaasu, “Hagaappe simmin yaatana danddayikke gaada darotoo qoppaas.” A maaduwa demmanawu oychchadee? Koyro heeran hegaadan oottabeykku. A gujjada hagaadan gaasu, “Taani ishanttanne michchontta metana koyabeykke. Koshshiyaban tana maaddiyagee Yihoowa gidiyogaa akeekaas. Shin taani haratuppe shaahettada, ta metuwa tarkka xoonanawu baaxetaydda deꞌiyogaa guyyeppe akeekaas.” (Lee. 18:1) Daasuura amarida ba laggetussi dabddaabbiya xaafada ba hanotaa qonccissanawu kuuyaasu. A hagaadan gaasu: “Ta ishanttinne michchontti tana ay keena minttettidaakko qonccissiyo qaali baawa. Eti nuussi qumaa hosppitaaliya ehiidosona, qassi minttettiya Geeshsha Maxaafaa xiqiseta tawu yootidosona. Nuuni nurkka deꞌennaagaa eriyogee keehi ufayssees. Nuuni ubbay Yihoowa so asaa yara. Qassi nu ishanttinne michchontti koshshiyaban nuna maaddanawu, nuuni waayettiyo wode nuussi qarettanawunne nuuni etaara Yihoowawu ubbatoo haggaazanaadan minttettanawu koyosona.”

14. Nuuni cimatu maaduwa ekkana koshshiyoy aybissee?

¹⁴ Yihooway cimatu baggaarakka nuna minttettees. Eti I nuussi wolqqaa immanawunne nuna minttettanawu goꞌettiyo imotata. (Isi. 32:1, 2) Yaakko neeni unꞌꞌettiyo wode, nena qofissidabaa cimatuyyo yoota. Cimatu maaduwa ekkanawu mammottoppa. Yihooway eta baggaara nena minttettana danddayees.

15. Ubba Kiristtaaneti xoqqu ootti xeelliyo hidootay aybee?

¹⁵ Geeshsha Maxaafay yootiyobay neessi hidootay deꞌanaadaaninne ubbatoo Yihoowawu  haggaazanawu wolqqaa demmanaadan oottana danddayees. (Roo. 4:3, 18-20) Amarida Kiristtaaneti merinawu saluwan deꞌanawu hidootoosona; harati qassi gannate gidida loꞌꞌiya saꞌan merinawu deꞌanawu hidootoosona. Nu hidootay nuuni metuwa genccanaadan, mishiraachchuwa sabbakanaadaaninne gubaaꞌiyan dumma dumma aawatettaa polanaadan nuussi wolqqaa immees. (1 Tas. 1:3) He hidootay kiitettida Phawuloosikka minnanaadan maaddiis.

16. Kiitettida Phawuloosawu minttettoy koshshidoy aybissee?

¹⁶ Phawuloosi minnana koshshiis. I Qoronttoosa Kiristtaanetuyyo xaafido dabddaabbiyan bana urqqaappe merettida miishshan leemisiis. I ‘unꞌꞌettiis, siriis, yedetettiis,’ qassi harati A “oli bayidosona.” Qassi I hayqqichchi attiis. (2 Qor. 4:8-10) I hegaa xaafidoy heezzantto misoonaawe buussana. I hegaa xaafi simminkka hara daro metoti A gakkidosona. Deree A bolli denddiis, markkabee meqqiis, qassi I qashettiis.

17. Naaꞌꞌantto Qoronttoosa 4:16-18 maaran, Phawuloosi metuwa genccanaadan maaddidabay aybee?

¹⁷ Phawuloosi ba hidootaa ubbatoo qoppido gishshawu genccanawu minotettaa demmiis. (2 Qoronttoosa 4:16-18 nabbaba.) A “asatettai wooqqiyaabaa gidikkokka,” I hidootaa qanxxennaagaa Qoronttoosan deꞌiya Kiristtaanetuyyo yootiis. Phawuloosi ubbatoo sinttanaabaa qoppiis. Saluwan merinawu deꞌiyo A hidootay ‘ubbaappe keehi gitatees.’ Phawuloosi ba hidootaa xoqqu ootti xeellido gishshawu ba woytuwa demmana mala ay metuwanne genccanawu eeno giis. Phawuloosi he hidootaa wotti dentti qoppidoogee A qofay ‘gallassi gallassi ooraxxanaadan’ oottiis.

18. Hidootay Tehomiranne A so asaa waati minttettidee?

¹⁸ Hidootay Bulgaariyan deꞌiya Tehomira giyo ishay minnanaadan maaddiis. Amarida layttaappe kase A kaalo ishay Istravikoy kaamiya daafan hayqqiis. Hegaappe denddidaagan Tehomiri keehi azzaniis. Inne A soo asay genccanawu, denddoy ay mala gidanaakko qoppidosona. I hagaadan giis: “Leemisuwawu,  nuuni Istravikoora awan gayttanaakko, awu ay qumaa kattanaakko, I so simmiyo wode nuuni giigissiyo gibiran oona shoobbanaakko, qassi wurssetta gallassatubaa nuuni awu ay yootanaakko tobboos.” Tehomira so asay hidootaabaa ubbatoo qoppidoogee A so asay genccanaadaaninne ba ishay Yihooway denttiyo wodiya naaganaadan maaddidoogaa I yootiis.

19. Neeni ne hidootaa minttanawu waatana danddayay? (Misiliyakka xeella.)

¹⁹ Neeni ne hidootaa waata minttana danddayay? Leemisuwawu, neeni saꞌan merinawu deꞌanawu hidootiyaba gidikko, Geeshsha Maxaafay gannatiyabaa yootiyobaa nabbaba, qassi hegaa wotta dentta qoppa. (Isi. 25:8; 32:16-18) Ooratta alamiyan deꞌoy ay mala gidanaakko wotta dentta qoppa. Neeni yan deꞌiyabadan qoppa. Neeni oona beꞌay? O cenggurssaa siyay? Ne qoppiyobay aybee? Gannatee ay mala gidana danddayiyakko qoppanawu nu xuufetun deꞌiya misiliya xeella, woy Yaana Ooratta Alamiya, woykko He Wodiya Qoppa (Amaarattuwa) woy qassi Yeemoyida Sarotettaa! giyagaa mala biiduwan giigida muuziqaa beꞌa. Nuuni ooratta alamiyan demmanabaa ubbatoo qoppikko, nu metoy ‘haꞌꞌissawu waayettiyo guutta waaye’ gidana. (2 Qor. 4:17) Yihooway neessi immido hidootay neeni minnanaadan oottana.

20. Nuuni daafurikkokka wolqqaa waati demmana danddayiyoo?

²⁰ Nuuni daafurikkokka, ‘Xoossay nuussi wolqqaa immees.’ (Maz. 108:13) Wolqqaa demmanawu neessi koshshiyabaa Yihooway giigissiis. Yaatiyo gishshawu issi aawatettaa polanawu, metuwa genccanawu, woy ubbatoo ufayttanawu neessi maadoy koshshiyo wode, Yihoowa woossanne buzo xannaꞌa. Kiristtaane ishanttinne michchontti immiyo maaduwa ekka. Ubbatoo wodiya bazzada ne hidootaabaa qoppa. Yaatiyo wode neeni “ubbaban ufaissan genccanaadaaninne danddayanaadan, Xoossai ba bonchchuwaa gitaadan immiyo wolqqa ubban [minnana].”—Qol. 1:11.