Ta aaway Yuunaytid CHerch of Kanaada giyo woosa keettaa cima gidiyo gishshawu, saaminttan saaminttan I ta michchiyoonne tana woosa keettay naatuyyo giigissido timirttiyaa tamaaranaadan Woggaa maallado kiittees, yaatidi 5:00 saatiyan woosa keettaa prograamiyawu aara boos. Qassi saateppe guyyiyan aayeera SHiiquwaa Addaraashaa boos. Yaatiyo gishshawu naaꞌꞌu haymaanootiyaa giddon deꞌiya dummatettaa akeekanawu metootibookko.

Ta aayyiyaa Geeshsha Maxaafaappe tamaaridobaa Boobanne Maariyon Hechison geetettiya ba loꞌꞌo laggetussi yootaasu, yaatin etikka Yihoowa Markka gididosona. Niwu York Sitin 1958n daro biittaappe yiidaageeti shiiqido Xoossaa SHeniyaa giya hosppun gallassaa shiiquwawu eti tana bantta heezzu naatuura efiidosona. Tana efiyoogee etassi keehi deexxiyaaba gidiyoogaa taani haꞌꞌi akeekays, shin he shiiqoy taani hassayiyo gitabatuppe issuwaa.

Taani yelagatettan deꞌishin nuuni goshsha gaden deꞌoos, yan mehiyaa heemmiyoogaa dosays. Taani mehiyaa aakime gidanawu keehi koyaas. Ta aayyiyaa hagaa gubaaꞌe cimawu yootaasu. I nuuni ‘wurssetta gallassatun’ deꞌiyoogaa kehatettan tana hassayissiisinne yuniversttiyaa gelidi adussa layttawu tamaariyoogee taani Yihoowaara dabbotido dabbotaa keehi mooranaagaa yootiis. (2 Xim. 3:1) Hegaappe denddidaagan yuniversttiyaa beennan agganawu kuuyaas.

Naaꞌꞌantto xekka timirttiyaa wurssa simmada taani ay oottanaakko qoppaas. Taani saaminttaa wurssettan ubbatoo haggaazuwaa kiyikkonne, haggaazoy tana ufayssenna; yaatiyo gishshawu taani aqinye gidana danddayays gaada qoppabeykke. He wode, Yihoowa Markka gidenna ta aawaynne A  kaalo ishay taani Torontton erettida inshuransse dirijjitiyan kumetta gallassaa oottanaadan tana minttettidosona. Ta aawaa ishaassi yan aawatettay deꞌiyo gishshawu taani he oosuwaa oottanawu maayettaas.

Taani Torontton daro saatiyaa oottiyoogeenne Yihoowa Markka gidenna asaara daro wodiyaa aattiyoogee taani shiiqota shiiqennaadaaninne ubbatoo sabbakennaadan diggiis. Koyro taani Yihoowa Markka gidenna ta aawaa aawaara deꞌaas, shin I hayqqi simmin deꞌanawu harasaa baana koshshiis.

Tana 1958n gita shiiquwaa efiida Boobinne Maariyaana tawu aawanne aayo mala. Taani eta son deꞌanaadan tana shoobbidosonanne ayyaanaaban diccanaadan tana maaddidosona. Taani 1960n eta naꞌaa Joonaara xammaqettaas. Jooni aqinye gididi haggaaziyoogaa doommidoogee taanikka loytta haggaazanaadan minttettiis. Gubaaꞌiyan ishantti taani ayyaanaaban diccaydda deꞌiyoogaa akeekidosona, qassi guyyeppe Tiꞌokiraase Haggaazo Timirtte Keettaa kaalettiyaagaa gidada sunttettaas. a

Taani 1966n Raandi Berggo ekkaas; A aassiyaageeti keehi koshshiyoosan haggaazanawu loytta koyiya mino aqinye. Nu woradaa xomoosiya ishay Onttariyon, Oriliyan deꞌiya gubaaꞌiyaa maaddanaadan nuna minttettiis. Hegaa gishshawu nuuni sohuwaara yaa biida.

Nuuni Oriliya gakkin darin takkennan taani Raandiigaadan ubba wode aqinye gidaas. Taani iigaadan keehi ufayttaas! Taani gooba aqinye gidanawu baaxetiyoogaa doommada Geeshsha Maxaafaa goꞌettiyoogaaninne asay hegaa akeekiyoogaa beꞌiyoogan keehi ufayttaas. Nuuni Oriliyan, asay laamettidi Yihoowa ashkkara gidanaadan maaddiyoogee nuussi gita anjjo.

Torontto biido wode, Beeteelen aawatettay deꞌiyo ishanttuppe issuwaa gidida Arnold Maknamaaraara taani gayttaas. Nuuni dumma aqinye gidanawu  koyiyaakkonne I oychchiis. Taani sohuwaara hagaadan zaaraas: “Ee! Kuwibeke gidana xayikko awanne baana!” Kanaadan deꞌiya Inggilizettuwaa haasayiya asay Paransaayettuwaa haasayiyaageeti deꞌiyo Kuwibeke heeraa xeelliyaagan qoppiyo iitabaa taani qoppiyoogaa doommaas. He wode kawotettaa eqettiya asay Kuwibeke heeray Kanaadaappe laꞌa kiyanaadan koyiis.

Arnoldi hagaadan giis, “Haꞌꞌi macara biiroy dumma aqinyeta Kuwibeke xallaa kiittees.” Taani baanawu sohuwaara maayettaas. Raanda yan haggaazanawu keehi koyiyoogaa taani kasekka erays. Hegee nuuni nu deꞌuwan kuuyido keehi loꞌꞌobatuppe issuwaa gidiyoogaa taani guyyeppe akeekaas!

Nuuni ichchashu saaminttawu Paransaayetto qaalaa tamaari simmidi, Raandanne taani issi azinaanne machcheera Montriyaaleppe huuphessa arshshon 540 kilo meetire gidiyaagaa haakkiya Rimoskki giyoosaa biida. Nuuni haꞌꞌikka darobaa tamaarana koshshiyoogaa taani shiiquwan erissota nabbabiyo wode akeekaas. Taani kaalliya gita shiiquwan daro “Osttiriyaa biittaa imattati” yoosona gaana koshshishin “ostrichche (yanchcha) kafoti imattatettan” yoosona yaagaas.

Rimoskkin, minnidi haggaaziya aqo oyqqibeenna oyddu michchonttuura, qassi Hayberdda doꞌuwaaranne eta naaꞌꞌu macca naatuura nu oydday gayttida. Hayberddantta so asay wogga keettaa karayettidosona; he keettan deꞌiya aqinyeti ubbay keraa qanxxidi maaddoosona. Keettaayyo kare baggaynne tuussati bootta gidiyo gishshawu, nuuni hegaa Bootta Keettaa giidi xeegoos. Darotoo yan deꞌiya asaa qooday 12ppe biidi 14 gakkanaashiina. Raandanne taani dumma aqinye gidiyoogaadan maalladokka, saateppe guyyiyankka, omarssankka sabbakiyo gishshawu, ubba qassi balgguwan keehi meeggiya omarssankka nunaara ubbatoo haggaaziya uri deꞌiyo gishshawu keehi galatoos.

Ha ammanettida aqinyetuura nuuni keehi laggetido gishshawu so asa mala gidida. Issi issitoo nuuni tamaa eettidi A yuushuwan uttoos; woykko nuuni qumaa issippe kattiyo gallassay deꞌees. He ishanttuppe issoy muuziqaa miishshaa kaaꞌiyo gishshawu nuuni darotoo Qeeraa omarssan yexxoosinne duroos.

Rimoskkin deꞌiya daroti Geeshsha Maxaafaabaa tamaaranawu koyoosona! Ichchashu laytta giddon, Geeshsha Maxaafaa xannaꞌiya daroti ayyaanaaban diccidi xammaqettiyoogaa beꞌiyoogan keehi ufayttida. Gubaaꞌiyan deꞌiya aassiyaageetu qooday 35 heeraa gakkiis.

Nuuni Kuwibeken mishiraachchuwaa yootanawu loytti loohida. Yihooway nuna haggaazuwaaninne asatettan nuussi koshshiyaaban keehi maaddidoogaa akeekida. Hegaa bollikka, nuuni Paransaayettuwaa haasayiya asaa, eta qaalaanne eta wogaa dosidoogee hara wogaakka dosanaadan oottiis.—2 Qor. 6:13.

Niwu Bernswiken arshsho baggaara deꞌiya Trakeda katamaa baanaadan nuuni qoppennan macara biiroy nuna oychchiis. Keettaa keraa miishshaa qanxxichchido gishshawunne saaminttan amarida saatiyawu asttamaare gidada oottiyo oosuwaa demmaychchido gishshawu hegee paace gidiis. Hegaa bollikka, nu xinaatetuppe amaridaageeti aassiyaageeta biron gididosona; qassi SHiiquwaa Addaraashaa keexxiiddi deꞌoos.

Rimoskkippe keehi dummatiya Trakeda biyoogaa xeelliyaagan saaminttaa wurssetta ubban woossoos. SHin nuuni yaa baanaadan Yihooway koyiyo gishshawu baanawu kuuyida. Nuuni Yihoowa paaccin I nuna xubiyaa ubbabaa xayssidoogaa akeekida. (Mil. 3:10) Raanda Yihoowaara mintta  dabbotido gishshawu, A ba goꞌꞌaa aggabayiyo gishshawunne ufayttiyo gishshawu yaa baanawu metootibookko.

Nu ooratta gubaaꞌiyan deꞌiya cimay Robert Rosa xalla. I ba machchee Linddiira aqinye gididi yan haggaaziis; qassi eti bantta bayra naꞌaa yeli simmidikka yan takkanawu kuuyidosona. Eti bantta guutta naꞌaa dichchiyaaba gidikkonne, imatuwaa mokkiyoogaaninne sabbakiyo oosuwaa minni oottiyoogan nuna minttettidosona.

Nuuni Trakedan naaꞌꞌu layttawu aqinye gididi haggaazi simmidi, woradaa oosuwaa oottanaadan shoobettido wode zaarettidi keehi ufayttida. Inggilizetto woradatun laappun layttawu haggaazi simmidi, Kuwibeken Paransaayetto woradan haggaazanawu maddabettida. Kuwibeken nu awuraajjaa xomoosiya Liyons Kiripoli ta haasayatu gishshawu tana galatiis. SHin guyyeppe I tana, “Hagaappe aaruwan maaddiya ogiyan waata haasayana danddayay?” giidi darotoo oychchees. b Hegaadan oychchidoogee qonccenne akeekanawu metenna ogiyan ubbatoo tamaarissanaadan tana maaddiis.

Taani awudenne dogenna oosoy 1978n Montiryaalen daro biittaappe yiidaageeti shiiqido “Xooniya Ammanuwaa” giya gita shiiquwan tawu imettida oosuwaa. Taani Qumaa Kattiyo Kifiliyan oottaas. Nuuni 80,000 asay shiiqana giidi qoppida; qassi kaseegaappe dummatiya ogiyan eta mizana koshshiis. Qumaa kattiyo miishshay, qumaa qommoynne qumaa giigissiyo ogee ubbay muleera ooratta. Nuussi 20 gidiya wogga piriijeti deꞌoosona; shin eti issi issitoo oottokkona. Koyro gallassay doommanaappe kase, isttaademee ispportte kaassawu kasetidi oyqettido gishshawu nuuni ubbabaa giigissanawu qamma bilahe gakkanaashin yaa gelana danddayibookko. Qassi saꞌay wonttanaappe kase, qanꞌꞌiyaa giigissanawu kattiyo miishshaa dooyana koshshees! Nuuni keehi daafurikkokka minni oottiya, loꞌꞌo eeshshati deꞌiyoonne ufayttiya Kiristtaane gidida tanaara bantta dosan oottiyaageetuppe darobaa tamaaraas. Nuuni hanno gakkanawu mata lagge. Qassi 1940ppe biidi 1960 gakkanaashin wolqqaama yedetay gakkido Kuwibeke heeran hagaa mala gita shiiquwaa shiiqiyoogee keehi ufayssiyaaba!

Montiryaalen shiiqido gita shiiquwaa wode, taagaadan woradaa xomoosiyaageetuppe darobaa tamaaraas. Haꞌꞌi Oosuwaa Kaalettiya Citan haggaaziya Devid Ispleni issi laytti gita shiiquwaa xomoosiyaagaa gididi oottiis. Hegaappe simmin  shiiqido gita shiiquwan he oosuwaa ta oottanaadan maddabettido wode Devidi tana keehi maaddiis.

Raandanne taani 36 layttawu woradaa oosuwaa ootti simmin, Gubaaꞌiyaa Cimati Tamaariyo Timirtte Keettan tamaarissanaadan 2011n shoobettaas. Nuuni naaꞌꞌu laytta giddon 75 dumma dumma hiixan aqidaba gidikkonne, nu goꞌꞌaa aggibayidoogee keehi ufayssiyaaba. Cimati Oosuwaa Kaalettiya Citay eti Yihoowaara dabbotido dabbotawu qoppiyoogaa akeekido gishshawu saaminttaa wurssetta ubban keehi galatoosona.

Guyyeppe, taani Kawotettaa Mishiraachchuwaa Yootiyaageetu Timirtte Keettan tamaarissaas. Tamaareti banttawu oosoy dariyo gishshawu darotoo daafuroosonanne unꞌꞌettoosona: issi gallassan laappun saatiyawu kifiliyan uttidi tamaaroosona, omarssi omarssi heezzu saatiyawu so oosuwaa oottoosonanne saaminttaa giddon oyddu woy ichchashu kifileta shiishshoosona. Taaninne tanaara tamaarissiyaagee Yihooway eta maaddana xayikko, eti hegaa oottana danddayennaagaa yootida. Tamaareti Yihoowan ammanettiyoogan eti qoppidoogaappe aarobaa oottana danddayidoogaa beꞌidi ay keenaa maalaalettidaakko taani ubbatoo hassayays.

Ta aayyiyaa haratussi qoppiyoogee A Geeshsha Maxaafaa xannaꞌissiyoogeeti ayyaanaaban diccanaadan oottiis, qassi ta aaway tumaa xeelliyaagan ba qofaa laamanaadankka maaddiis. A hayqqin heezzu gallassappe simmin, I dere haasayaa siyanawu SHiiquwaa Addaraashaa yiidoogeenne kaalliya 26 layttawu ubbatoo shiiqota shiiqidoogee nuna maalaalissiis. Ta aaway xammaqettibeennaba gidikkonne saaminttan saaminttan shiiqota ooppenne ubbatoo kasetidi gakkiyoogaa cimati tawu yootidosona.

Ta aayyiyaa taassinne ta michchonttussi keehi loꞌꞌo leemiso. Ta heezzu michchonttinne eta azinati Yihoowawu ammanettidi haggaazoosona. Naaꞌꞌati macara biiruwan haggaazoosona—issinniyaa Porchchugaalen, haranniya qassi Heytin haggaazawusu.

Raandanne taani haꞌꞌi Onttariyon, Hamiltonen dumma aqinye gididi haggaazoos. Nuuni woradaa oosuwaa oottiyo wode harati zaarettidi oychchiyoogeeta oychchiyoogaaninne eta Geeshsha Maxaafaa xinaateta xannaꞌissiyoogan ufayttida. SHin haꞌꞌi nu xinaateti ayyaanaaban dicciyoogaa beꞌiyoogan keehi ufayttoos. Qassi nu ooratta gubaaꞌiyan deꞌiya ishanttuuranne michchonttuura nuuni laggetido gishshawu, Yihooway eta loꞌꞌo wodiyankka iita wodiyankka waati maaddidaakko beꞌidoogan minettida.

Nuuni kasebaa qoppiyo wode nuna maaddida darota wozanappe nashshoos. Harati banttassi danddayettida keenan Yihoowawu haggaazanaadan minttettanawu nuunikka eta “maaddanau giigettidoogaa” yootoos. (2 Qor. 7:6, 7) Leemisuwawu, issi so asay machchiyaa, naꞌaynne naꞌiyaa ubba wode haggaazuwaa haggaazoosona. Azinay aqinye gidanawu qoppi eriyaakkonne taani A oychchaas. I heezzu aqinyeta maaddiyoogaa yootiis. Yaatin taani hagaadan oychchaas, “Yihooway maaddana danddayiyoogaappe aaruwan neeni eta maaddana danddayay?” Eti ufayttiyoogaadan I ufayttanaadan A minttettaas. Usuppun aginaappe simmin I aqinye gidiis.

Raandanne taani ‘garamissiya Yihoowa oosuwaabaa’ ‘yiya yeletawu’ ubbatoo yootana; qassi eti nuugaadan Yihoowa haggaazuwan ufayttanaagaa hidootoos.—Maz. 71:17, 18.