1-2. Asay xammaqettiyo wode darotoo aybi hanii, qassi nuuni ha huuphe yohuwan ay xannaꞌanee?

 NEENI xammaqettanawu giigidaageeta beꞌa eray? Eti xammaqettanaappe kase ammanettiyoogaa bessiya hanotan naaꞌꞌu oyshata zaarishin siyadasa. Eta soo asaynne eta laggeti keehi ufayttiyoogaa beꞌadasa. Xammaqettiyaageeti haattaappe kiyiyo wode beꞌiyaageeti kushiyaa baqqiyoogaa siyaasa, qassi xammaqettiyaageeti keehi ufayttiyoogaa beꞌaasa. Amakaayiyan, saaminttan saaminttan daro shaꞌu asati banttana sheedhdhiyoogan xammaqettidi Xoossaa Yihoowa Markka gidoosona.

² Neeni shin? Xammaqettanawu neeni qoppiyaaba gidikko, ha iita alamiyan ‘Yihoowa koyiyo’ gishshawu, neeni keehi alꞌꞌo. (Maz. 14:1, 2) Neeni yelaga woy gastta gidin ha huuphe yohoy neessi giigiis. SHin xammaqettiichchidaageeti Yihoowawu merinawu haggaazanawu murttido murttiyaa yaa minttanawu koyoosona. Hegaa gishshawu, nuuni Yihoowawu haggaazanaadan oottiya daro gaasotuppe heezzata ane beꞌoos.

3. Yihoowa ashkkarati tumatettaanne xillotettaa dosiyoy aybissee? (Mazamure 119:128, 163)

³ Yihooway ba asay ‘tumaa dosanaadan’ azaziis. (Zak. 8:19) Yesuusi bana kaalliyaageeti xillotettaa kaallanaadan yootiis. (Maa. 5:6) Hegaa giyoogee, issi uri Xoossaa sinttan likkebaa, loꞌꞌobaanne geeshshabaa oottana koshshees giyoogaa. Neeni tumatettaanne xillotettaa siiqay? Siiqiyoogaa ammanettoos. Neeni wordduwaa, balaanne iita ubbaa ixxaasa. (Mazamure 119:128, 163 nabbaba.) Worddotiya uri ha alamiyaa haariya Seexaanaa milatees. (Yoh. 8:44; 12:31) Seexaanaa halchchotuppe issoy geeshsha gidida Xoossaa Yihoowa sunttaa mooriyoogaa.  Edenen makkalay denddido wodiyaappe doommidi Seexaanay nu Xoossaabaa wordduwaa aassees. I Yihooway ba xallaa siiqiyaagaanne asaa loꞌꞌobaa diggiya maara Haarennaagaa giidi asay qoppanaadan oottanawu baaxetees. (Doo. 3:1, 4, 5) Seexaanay Yihoowa xeelliyaagan yootiyo worddoy asay Yihoowaabaa iitabaa qoppanaadan oottiiddi deꞌees. Asay ‘tumaa’ dosennan aggiyo wode, eti worddobaa ubbaanne iitabaa ubbaa oottanaadan Seexaanay denttettana danddayees.—Roo. 1:25-31.

4. Yihooway ‘tumaa Xoossaa’ gidiyoogaa waati bessidee? (Misiliyaakka xeella.)

⁴ Yihooway ‘tumaa Xoossaa,’ qassi I bana siiqiyaageeta kehatettan tumaa tamaarissees. (Maz. 31:5) Yaatiyoogan, Seexaanaa wordduwan cimettennaadan I eta maaddees. Qassi Yihooway ba ashkkarati tumanchchanne xillo gidanaadan tamaarissees. Hegee eti bonchchettidinne woppu giidi deꞌanaadan maaddees. (Lee. 13:5, 6) Neeni Geeshsha Maxaafaa xannaꞌiyo wode I neeyyo hegaadan oottibeennee? Yihoowa ogee asa ubbawukka neeyyookka keehi loꞌꞌo gidiyoogaa tamaaradasa. (Maz. 77:13) Yaatiyo gishshawu, neeni Yihooway likke giidobaa oottanawu koyaasa. (Maa. 6:33) Neeni tumaa erissanawunne nu Xoossaa Yihoowa xeelliyaagan Seexaanay yootiyoobay worddo gidiyoogaa qonccissanawu koyaasa. Hegaadan waatada oottana danddayay?

5. Neeni tumatettaawunne xillotettawu exatiyoogaa waata bessana danddayay?

⁵ Neeni deꞌuwaa ogiyaa dooridoogee hagaadan giyoogaa mala: “Taani Seexaanaa wordduwaa ixxays, qassi tumawu exatays. Yihooway tana haaranaadaaninne I likke giidobaa oottanawu koyays.” Hegaadan waata oottana danddayay? Neeni Yihoowawu merinawu haggaazanawu qaalaa gelidoogaa woosan awu yoota simmada xammaqetta. Tumaanne xillotettaa siiqiyoogee xammaqettanawu keehi maaddees.

6. Mazamure 45:4y neeni Yesuus Kiristtoosa siiqanaadan oottiya ayba gaasota yootii?

⁶ Neeni Yesuus Kiristtoosa siiqiyoy aybissee? Mazamure 45:4n deꞌiya amarida loꞌꞌo gaasota beꞌa. (Nabbaba.) Yesuusi tumatettaa, ashkketettaanne xillotettaa dosees. Neeni tumatettaanne xillotettaa dosikko, Yesuus Kiristtoosakka dosiyoogee qoncce. Yesuusi tumawunne likke gididabawu xalatettan waani exatidaakko qoppa. (Yoh. 18:37) SHin nuuni  ashkke gidanaadan Yesuusi waati tamaarissidee?

7. Yesuusa ashkketettaa xeelliyaagan nena ufayssiyaabay aybee?

⁷ Yesuusi ba oottiyooban ashkketettaa tamaarissiis. Leemisuwawu, I bonchcho ubbay bawu gidennan, ba Aawawu imettanaadan oottiis. (Mar. 10:17, 18; Yoh. 5:19) Yesuusa ashkketettay neeni waananaadan oottii? Hegee neeni Xoossaa Naꞌaa siiqanaadaaninne A kaallanaadan oottennee? Oottiyoogee qoncce. Yesuusi ashkke gididoy aybissee? Ashkke gidida ba Aawaa siiqiyo gishshataassanne A milatiyo gishshataassa. (Maz. 18:35, NW; Ibr. 1:3) Yihoowa eeshshaa loytti qonccissiya Yesuusakko shiiqanawu koyikkii?

8. Yesuusi nu Kawo gidiyoogan nuuni ufayttiyoy aybissee?

⁸ Nu Kawoy Yesuusi haariyoogan ooppenne aadhdhiyaagaa gidiyo gishshawu, nuuni A siiqoos. Yihooway ba Naꞌaa loohissiisinne haaranaadan A sunttiis. (Isi. 50:4, 5) Yesuusikka ba goꞌꞌaa aggibayidi bessido siiquwaa qoppa. (Yoh. 13:1) Yesuusi ne Kawo gidiyo gishshawu neeni A wozanappe siiqiyoogee awu bessiyaaba. Yesuusi tumuppe bana siiqiyaageeta ba laggeta giidi xeesiis; qassi eti awu azazettiyoogan A siiqiyoogaa bessoosona. (Yoh. 14:15; 15:14, 15) Yihoowa Naꞌawu lagge gidiyoogee nuussi gita maata!

9. Kiristtaanetu xinqqatee Kiristtoosaagaara issi mala gidiyoy aybiinee?

⁹ Yesuusi azazidobaappe issoy A kaalliyaageeti xammaqettana koshshiyoogaa. (Maa. 28:19, 20) I hegaadan oottiyoogan nuussi leemiso. A xinqqatee A kaalliyaageetuugaappe amarida ogiyan dummatees. (“ Yesuusa Xinqqatee A Kaalliyaageetuugaappe Aybin Dummatii?” giya saaxiniyaa xeella.) SHin issi mala gidiyo ogetikka deꞌoosona. Yesuusi xammaqettido wode ba Aawaa sheniyaa oottanawu koyiyoogaa bessiis. (Ibr. 10:7) Hegaadankka, Kiristtoosa kaalliyaageeti xammaqettiyo wode, Xoossaa Yihoowawu banttana sheedhdhidoogaa asaa sinttan bessoosona. Haꞌꞌi eta deꞌuwan keehi koshshiyaabay Xoossay koyiyoobaappe attin, eti koyiyoobaa gidenna. Hegaa gishshawu, eti bantta Godaa leemisuwaa kaalloosona.

10. Neeni Yesuusa siiqanaadan oottiya gaasoti aybee, qassi he siiqoy neeni waatanaadan oottana koshshii?

¹⁰ Yesuusi Yihoowawu mexi issi Naꞌaa gidiyoogaanne nuna haaranaadan Yihooway A Kawo oottidi sunttidoogaa neeni ammanadasa. Yesuusi ashkke gidiyoogaanne wottiyoobi baynna hanotan ba Aawaa milatiyoogaa eradasa. I namisettidaageeta mizidoogaa, unꞌꞌettidaageeta minttettidoogaa, ubba qassi sahettidaageeta pattidoogaa tamaaradasa. (Maa. 14:14-21) I ha wodiyan gubaaꞌiyaa waati kaalettiyaakko beꞌadasa. (Maa. 23:10, NW) Qassi I Xoossaa Kawotettaa Kawo gidiyoogaadan mata wode hegaappe aadhdhiyaabaa oottanaagaa eradasa. Neeni A siiqiyoogaa waata bessana danddayay? A leemisuwaa kaalliyoogaana. (Yoh. 14:21) Neeni A leemisuwaa kaallanawu oottana danddayiyo koyrobay nena Yihoowawu sheedhdhiyoogaanne xammaqettiyoogaa.

11. Neeni xammaqettanaadan oottiya keehi koshshiya gaasoy aybee, qassi aybissi?

¹¹ Neeni xammaqettanaadan oottiya keehi koshshiya gaasoy aybee? Yesuusi ubbaappe aadhdhiya azazuwaa hagaadan giidi yootiis: “Intte Godaa intte Xoossaa intte kumetta wozanaappe, intte kumetta shemppuwaappe, intte kumetta qofaappe, intte kumetta wolqqaappe siiqite.” (Mar. 12:30) Ha xiqisee neeni Xoossaa keehi siiqana koshshiyoogaa qonccissennee?

12. Neeni Yihoowa siiqiyoy aybissee? (Misiliyaakka xeella.)

 ¹² Nuuni Yihoowa siiqanaadan oottiya daro gaasoy deꞌees. Leemisuwawu, I ‘deꞌuwaa pultto’ gidiyoogaanne ‘loꞌꞌo imo ubbaanne kumetta woyto ubbaa’ Immidaagaa gidiyoogaa eradasa. (Maz. 36:9; Yaaq. 1:17) Neessi deꞌiya loꞌꞌobay ubbay kehanne siiqiya Xoossay immidoba.

13. Wozuwaa alꞌꞌo imota oottiyaabay aybee?

¹³ Wozoy Yihooway nuussi immido alꞌꞌo imota. Nuuni hegaadan giyoy aybissee? Yihoowaynne Yesuusi keehi siiqettiyoogaa qoppa. Yesuusi hagaadan giis: “Ta Aawai tana siiqees,” qassi ‘taani ta Aawaa siiqays.’ (Yoh. 10:17; 14:31) Eti daro biiloone layttawu issippe deꞌido gishshawu eta dabbotay keehi mino. (Lee. 8:22, 23, 30) Xoossay ba Naꞌay waayettidi hayqqanaadan paqqadido wode ay keena azzanidaakko qoppa. Yihooway nena gujjin, asa ubbaa keehi siiqiyo gishshawu neeninne harati merinawu deꞌanaadan ba siiqiyo Naꞌaa immiis. (Yoh. 3:16; Gal. 2:20) Xoossaa siiqanaadan oottiya, hagaappe aadhdhiya gaasoy baawa.

14. Neeni ne deꞌuwan doorana danddayiyo aybippenne aadhdhiyaabay aybee?

¹⁴ Neeni Yihoowaabaa loytta tamaarido gishshawu A kaseegaappe aaruwan siiqaasa. Neeni haꞌꞌikka merinawukka Xoossaakko shiiqanawu koyiyoogee qoncce. Qassi yaatana danddayaasa. Neeni A wozanaa ufayssanaadan I  kehatettan nena minttettees. (Lee. 23:15, 16) Neeni haasayiyoobaa xallan gidennan, oottiyoobankka hegaa bessana danddayaasa. Neeni deꞌiyo ogee ne tumuppe Yihoowa siiqiyoogaa bessees. (1 Yoh. 5:3) Hegee neeni ne deꞌuwan doorana danddayiyo aybippenne aadhdhiyaaba.

15. Neeni Yihoowa siiqiyoogaa waata bessana danddayay?

¹⁵ Neeni Yihoowa siiqiyoogaa waata bessana danddayay? Koyruwan, neeni issi tumu Xoossawu nena sheedhdhidoogaa woosan awu yootaasa. (Maz. 40:8) Hegaappe simmin, nena woosan awu sheedhdhidoogaa daro asaa sinttan xammaqettiyoogan bessaasa. Nuuni ha huuphe yohuwaa doomettan beꞌidoogaadan, ne xinqqatee keehi ufayssiyaabanne neeni ne deꞌuwan keehi xoqqu oottada xeelliyooba. Neeni neessi gidennan, Yihoowawu deꞌiyoogaa doommaasa. (Roo. 14:8; 1 PHe. 4:1, 2) Hegee gita kuushsha milatana danddayees, qassi gitaba. Hegee neeni aybippenne aadhdhiya deꞌuwaa deꞌanaadan oottees. Waatidi?

16. Yihooway bawu haggaaziyaageetuyyo ay oottanaagaa Mazamure 41:12y yootii?

¹⁶ Yihooway kehiyoogan ooppenne aadhdhees. Neeni awu ay immikkonne, I hegaappe aadhdhiyaabaa neessi zaarettidi ubbatoo immana. (Mar. 10:29, 30) Neeni ha iita alamiyankka ufayssiyaa, goꞌꞌiyaanne giiga deꞌuwaa deꞌanaadan I maaddana. Qassi hagee doometta xalla. Neeni xammaqettiyoode doommiyo deꞌoy wurssettay deꞌiyooba gidenna. Neeni ne siiqo Aawawu merinawu haggaazana danddayaasa. Neeni ne Aawaa siiqiyo siiqoy ubbatoo diccana, qassi neenikka aagaadan merinawu deꞌana.—Mazamure 41:12 nabbaba.

17. Neeni Yihoowawu immana danddayiyo awu baynnabay aybee?

¹⁷ Neeni ne huuphiyaa Xoossawu sheedhdhada xammaqettiyo wode, ne Aawawu tumuppe alꞌꞌo gididabaa immiyo maataa demmaasa. Hanno gakkanawu neeni ufayttiyo loꞌꞌobaa ubbaanne ufayssiya wodiyaa ubbaa I immiis. Neenikka saluwaanne saꞌaa Godawu baynna issibaa awu immana danddayaasa, hegeekka ne dosan awu ammanettada haggaaziyoogaa.  (Iyy. 1:8; 41:11; Lee. 27:11) Hagee aybippenne aadhdhiya deꞌo gidiyoogee qoncce. Yihoowa siiqiyoogee neeni xammaqettanaadan oottiya aybippenne aadhdhiya gaaso gidiyoogee aynne sirissenna.

18. Neeni nena oychchana danddayiyo oyshati awugeetee?

¹⁸ Neeni xammaqettanawu giigettadii? giya oyshaa woygada zaaruutee? Hegaa zaarana danddayiyay ne xalla. SHin neeni nena hagaadan oychchiyoogee maaddana danddayees: ‘Taani xammaqettennan takkiyoy aybissee?’ (Oos. 8:36) Nuuni xannaꞌido heezzu gaasota hassaya. Koyroogee, neeni tumatettaanne xillotettaa siiqaasa. Nena hagaadan oychcha: ‘Taani ubba asay tumaa haasayiyoonne xillotettaa oottiyo wodiyaa beꞌanawu koyiyaanaa?’ Naaꞌꞌanttoogee, neeni Yesuus Kiristtoosa siiqaasa. Nena hagaadan oychcha: ‘Taani Xoossaa Naꞌay ta Kawo gidanaadaaninne A leemisuwaa kaallanawu koyiyaanaa?’ Heezzanttoogee, ubbaappe aaruwan neeni Yihoowa siiqaasa. Nena hagaadan oychcha: ‘Taani Yihoowawu haggaaziyoogan A wozanaa ufayssanawu koyiyaanaa?’ Neeni he oyshatussi ee gaada zaarikko, yaatin ayssi xammaqettikkii?—Oos. 16:33.

19. Neeni xammaqettanawu mammottana koshshennay aybissee? Leemisuwaa yoota. (Yohaannisa 4:34)

¹⁹ Neeni xammaqettanawu mammotikko Yesuusi yootido issi leemisuwaa beꞌa. (Yohaannisa 4:34 nabbaba.) Yesuusi ba Aaway koyiyoobaa oottiyoogaa qumaara geeddarssidoogaa akeeka. Aybissi? Qumay nuussi loꞌꞌo. Nuuni oottanaadan Yihooway oychchiyo ubbabay nuussi loꞌꞌo gidiyoogaa Yesuusi erees. Nuna qohiya aybanne nuuni oottanaadan Yihooway koyenna. Neeni xammaqettanaadan Yihooway koyii? Ee. (Oos. 2:38) Yaatiyo gishshawu, xammaqettanaadan yootiya azazuwaa azazettiyoogee nena maaddanaagaa ammanettana danddayaasa. Neeni malꞌꞌiya qumaa maanawu mammottana xayikko, yaatin xammaqettanawu aybissi mammottay?

20. Nuuni kaalliya huuphe yohuwan ay beꞌanee?

²⁰ Issoti issoti xammaqettennan takkiyoy aybissee? Daroti hagaadan zaaroosona: “Taani haꞌꞌi giigettabeykke.” Nena Yihoowawu sheedhdhada xammaqettiyoogee neeni hanno gakkanawu kuuyido ay kuushshaappekka aadhdhiyoogee qoncce. Yaatiyo gishshawu, hegaabaa loytta qoppa, qassi xammaqettanaayyo giigettanawu wodeenne baaxee koshshees. SHin neeni xammaqettanawu keehi koyikko, giigettanawu haꞌꞌi ay oottana danddayay? Hegaa zaaruwaa kaalliya huuphe yohuwan beꞌana.