1-2. Samssoona taarikiyaa xannaꞌiyoogee nuussi loꞌꞌo gidiyoy aybissee?

 SAMSSOONA giyo sunttaa siyiyo wode neeni qoppiyoobay aybee? I keehi mino asa gidiyoogaa qoppennan aggakka. Hegee tuma. SHin Samssooni metuwaa kaalettiya iitabaa kuuyiis. Gidikkonne, Yihooway Samssooni awu haggaazanawu oottido ubbabaa qoppiis. Qassi Xoossay Samssooni ammanettidi oottidobay nu goꞌꞌaassi Geeshsha Maxaafan xaafettanaadan oottiis.

² Yihooway ba asaa Israaꞌeelata maaddanawu maalaalissiyaabata oottanaadan Samssoona goꞌettiis. Samssooni hayqqin daro xeetu layttaappe guyyiyan, Yihooway kiitettida PHawuloosi ammanuwan mino gididaageeta xaafiyo wode Samssoona sunttaakka xaafanaadan denttettiis. (Ibr. 11:32-34) Samssoona taarikee nuna minttettana danddayees. I waayissiya wodetunkka Yihoowan ammanettiis. Samssoonappe nuuni ay tamaarana danddayiyaakko, qassi A taarikee nuna waati minttettana danddayiyaakko ha huuphe yohuwan beꞌana.

3. Samssoonawu imettida aawatettay aybee?

³ Samssooni yelettido wode Pilisxxeemati Israaꞌeelata haaroosonanne huqqunnoosona. (Daan. 13:1) Pilisxxeemati meqettaa iita gidiyo gishshawu Israaꞌeelati keehi waayettidosona. Yihooway ‘Israaꞌeelata Pilisxxeema asaa kushiyaappe ashshanawu’ Samssoona dooriis. (Daan. 13:5) SHin hegee metiya aawatetta! Ha metiya aawatettaa polanawu Samssooni Yihoowan ammanettana koshshiis.

4. Pilisxxeema asaa kushiyaappe laꞌa kiyanaadan Yihooway Samssoona waati maaddidee? (Daannata 15:14-16)

 ⁴ Samssooni Yihoowaaninne A maaduwan ammanettidoogaa bessiya leemisuwaa ane beꞌoos. Issi wode, Pilisxxeema olanchchati Leeha giyo kataman deꞌiya Samssoona oyqqanawu yiidosona; he katamay Yihudaa biittan deꞌennan aggenna. Yihudaa asati keehi yayyido gishshawu Samssoona morkketuyyo aatti immanawu kuuyidosona. Samssoona asati, naaꞌꞌu ooratta wodoruwan A qachchidi Pilisxxeematukko efiidosona. (Daan. 15:9-13) SHin, Samssooni ‘Yihoowa ayyaanay A bolli wolqqappe wodhdhin’ wodoruwaa duuterettiis. Yaatidi I “mata wode haiqqida issi hariyaa gappataa demmi ekkidi” 1,000 Pilisxxeema asaa woriis!—Daannata 15:14-16 nabbaba.

5. Samssooni Yihoowan ammanettiyoogaa waati bessidee?

⁵ Samssooni hariyaa gappataa goꞌettidoy aybissee? Hegee asi goꞌetti eriyo olaa miishsha gidenna! Samssooni I goꞌettiyo olaa miishshay ayba gidinkka, Pilisxxeemata xoonanaadan Yihooway A maaddanaagaa eriyoogee qoncce. Ee, ha ammanettida bitanee demmidobaa goꞌettidi Yihoowa sheniyaa poliis. Samssooni Yihoowan ammanettido gishshawu ha ubba asaa xoonidoogee tuma.

6. Samssoona taarikiyaappe nuuni tamaarana danddayiyo issibay aybee?

⁶ Yihooway I nuuppe koyiyoobaa nuuni oottanaadan, ubba qassi danddayettennaba milatiya aawatettaakka polanaadan koshshiya wolqqaa nuussi immees. Qassi Xoossay maalaalissiya ogiyan nuna maaddana danddayees. Samssoonawu wolqqaa immida Yihooway neeni maaduwaa demmanawu An ammanettikko, I koyiyoobaa oottanaadan nena maaddanaagaa aynne siroppa.—Lee. 16:3.

7. Yihoowa kaaletoy nuussi keehi koshshiyaaba gidiyoogaa bessiya leemisoy aybee?

⁷ Yihoowa goynuwawu goꞌettiyo keettata keexxiyoogan maaddiya daro ishanttinne michchontti an ammanettiyoogaa bessidosona. Beni, daro ooratta SHiiquwaa Addaraashatuyyoonne hara keettatuyyo halchchuwaa kessiyaageetinne hegeeta keexxiyaageeti  darotoo ishantta. SHin keehi daro asay xammaqettiyo gishshawu Yihoowa dirijjitee issi issibaa laammana koshshiis. Aawatettay deꞌiyo ishantti Yihoowa kaaletuwaa demmanawu woossidosona, qassi keettata shammiyoogaanne bottokoniyoogaa mala ooratta hiillata malidosona. Kumetta saꞌan nuuni keexxiyo keettatuppe darotun mata layttatun oottida Roobertti hagaadan giis: “Issi issibata ha ooratta ogiyan oottiyoogee amaridaageeta koyro heeran metiis.” I gujjidi hagaadan giis: “Hagee nuuni daro layttawu oottidobatuppe keehi dummatees. SHin he ishantti hanotaa meezetanawu eeno giidosona, qassi hegee laamettidabaa Yihooway anjjiiddi deꞌiyoogaa bessiyaaba.” Yihooway ba asay A sheniyaa polanaadan kaalettiiddi deꞌiyoogaa bessiya leemisotuppe hagee issuwaa xalaala. Issi issitoo nuuni ubbay nuna hagaadan oychchana koshshees, ‘Taani Yihoowa kaaletuwaa demmanawu koyiyaanaa, qassi danddayettida keenan awu loytta haggaazanawu issi issibaa laammanawu eeno giyaanaa?’

8. Samssooni keehi saamettido wode waatidee?

⁸ Neeni Samssooni oottido hara maalaalissiyaabata hassayennan aggakka. I gaammuwaa woriis, qassi guyyeppe Asqqaloona kataman 30 Pilisxxeemata barkka woriis. (Daan. 14:5, 6, 19) Samssooni Yihooway maaddennaakko hegaadan mule oottana danddayennaagaa erees. Samssooni 1,000 Pilisxxeemata wori simmidi keehi saamettido wode hegaa bessiis. I waatidee? Uyiyo haattaa demmanawu banan ammanettiyoogaappe, Yihooway maaddanaadan woossiis.—Daan. 15:18.

9. Samssooni maaduwaa demmanawu woossido wode Yihooway waatidee? (Daannata 15:19)

⁹ Yihooway maalaaliya hanotan haattay pulttanaadan oottiyoogan Samssooni maaduwaa demmanawu woossido woosaa zaariis. Samssooni haattaa uyin, “ayyo shemppoi” woy minotettay simmiis. (Daannata 15:19 nabbaba.) Daro layttaappe guyyiyan, hananabaa yootiya Sameeli ayyaanay kaalettin Daannatu maxaafaa xaafiyo wodekka he pultto haattay deꞌiyaaba milatees. Goggiya haattaa beꞌida Israaꞌeelati ammanettidi bawu goynniyaageeta Yihooway meto wodiyan maaddanaagaa hassayennan aggokkona.

10. Yihoowa maaduwaa demmanawu nuuni waatana koshshii? (Misiliyaakka xeella.)

¹⁰ Nuuyyo deꞌiya eray woy nuuni Yihoowa haggaazuwan oottidobay ayba gidikkonne, nuunikka Yihoowa maaduwan ammanettana koshshees. Yihoowan ammanettiyo wode xallan nuussi tumuppe ushachchiyoogaa nuuni ashkketettan ammanana koshshees. Pulttanaadan Yihooway oottido haattaa Samssooni uyido wode bawu koshshiya wolqqaa demmiis. Samssoonaagaadan, nuuni Yihoowan ammanettidi deꞌanawu Yihoowa maaduwaa ekkana koshshees.—Maa. 11:28.

11. Maaduwaa demmanawu nuuni Yihoowan waani ammanettana danddayiyoo, qassi issi ishaynne michchiyaa waatidonaa?

¹¹ Wolqqaama yedetaa gencciya Raashiyan deꞌiya nu ishanttuppe issuwaa gidida Aleksa hanotaa beꞌa. Keehi waayissiya hanotaa genccanaadan A maaddidabay aybee? Inne A machchiyaa ayyaanaaban loꞌꞌobaa ubbatoo meeze oottidosona. I hagaadan giis: “Taani ubbatoo buzo xinaatiyaa xannaꞌaysinne Geeshsha Maxaafaa ubba galla nabbabanawu baaxetays. Ta machchiyaanne taani ubba galla maallado gallassaa xiqisiyaa issippe tobboosinne woossoos.” Appe nuuni ay tamaariyoo? Nuuni nunan ammanettiyoogaappe Yihoowan ammanettana koshshees. Waatidi? Geeshsha Maxaafaa nabbabiyoogaa, woossiyoogaa,  shiiqota shiiqiyoogaanne sabbakiyoogaa mala nu ammanuwaa minttiyaabata ubbatoo oottiyoogaana. Yaatikko, Yihooway nuuni ubbatoo awu haggaazanaadan koshshiyaaban nuna maaddana. Xoossay Samssoonawu wolqqaa immiis, qassi nuussikka wolqqaa immanaagee qoncce.

12. Samssooni kuuyido iitabay aybee, qassi hagee I kase kuuyidobaappe waani dummatii?

¹² Samssooni nu mala nagaranchcha asa gidiyo gishshawu iitabaa kuuyido wodeti deꞌoosona. I kuuyido issibay keehi iitabaa kaalettiis. Samssooni amarida wodiyawu daanna gididi ootti simmidi, “Soreeqa giyo zanggaaran de7iya issi Daliilo giyo maccaasiyo siiqiis.” (Daan. 16:4) Koyro, Samssooni Pilisxxeema geelaꞌiyo ekkanawu koyiis. “Pilisxxeemata olanau GODAI gaasuwaa koyidi,” Samssooni O ekkanawu koyanaadan oottiis. Guyyeppe, Samssooni Gaaza giyo Pilisxxeematu kataman deꞌiya issi shaaramuxa maccaasee son takkiis. He wode Samssooni he katamaa geliyo penggeta shoddidi efaanaadan Xoossay awu wolqqaa immiis; hegee katamay qohettanaadan oottiis. (Daan. 14:1-4; 16:1-3) Gidoppe attin, Daliila Israaꞌeela asa gidennan aggukku, yaatiyo gishshawu I O ekkiyoogee Pilisxxeematuura olettanaadan oottenna.

13. Daliila Samssooni waatanaadan oottadee?

¹³ Daliila Samssoona aatta immanawu Pilisxxeematuppe keehi daro miishshaa ekkaasu. Geella I Daliilo keehi siiqido gishshawu A oottanawu koyidobaa akeekibeenna. Gaasoy ayba gidikkokka, Daliila Samssooni mino gidanaadan oottidabaa iyyo yootanaadan iisettin wurssettan Samssooni yootiis. Azzanttiyaabay, Samssooni balidobay A minotettay xayanaadaaninne amarida wodiyawu Yihoowan sabettennaadan oottiis.—Daan. 16:16-20.

14. Samssooni Daliilin ammanettidoogee ay kaalettidee?

 ¹⁴ Samssooni Yihoowan ammanettiyoogaa aggidi Daliilin ammanettido gishshawu A bolli azzanttiyaabay gakkiis. Pilisxxeemati Samssoona oyqqidi A ayfiyaa wooci kessidosona. Eti A Gaazan qachchidosona; he katamay I kase penggiyaa shoddido soho. Yaatidi, Pilisxxeemati baalaa bonchchiyo sohotuppe issuwaakko Samssoona efiidosona. Eti Samssoona banttawu aattidi immiday bantta worddo xoossaa Daagoona giidi qoppido gishshawu awu gita yarshshuwaa yarshshidosona. Eti Samssooni kaaꞌidi banttana “ufaissana mala” qasho keettappe kessidi asay shiiqido sohuwaa A ehiidosona.—Daan. 16:21-25.

15. Samssooni zaarettidi Yihoowan ammanettidoogaa waati bessidee? (Daannata 16:28-30) (Koyro sinttan deꞌiya misiliyaa xeella.)

¹⁵ Samssooni gita mooruwaa moorikkonne hidootaa qanxxibeenna. I Pilisxxeematuura olettanawu gaasuwaa koyiis; hegee I oottanaadan Yihooway koyiyooba. (Daannata 16:28-30 nabbaba.) Samssooni, ‘Pilisxxeematu bolli haluwaa taani kessanaadan tana minttarkkii!’ giidi Yihoowa mintti woossiis. Tumu Xoossay Samssoona woosaa siyidi I dumma wolqqaa zaaretti demmanaadan oottiis. Hegaappe denddidaagan, Samssooni he wode worido Pilisxxeema asay I kase worido asaappe keehi dariis.

16. Samssooni mooridobaappe nuuni ay tamaarana danddayiyoo?

¹⁶ Samssooni balidobay keehi azzanttiyaabaa kaalettikkokka, I Yihooway koyiyoobaa oottanawu baaxetiyoogaa aggibeenna. Nuuni balikkokka, nuussi zoree imettikkokka woy maatay nuuppe halikkokka, hidootaa qanxxana koshshenna. Yihooway nuuyyo atto gaanawu giigi uttidoogaa hassaya. (Maz. 103:8-10) Nuuni balikkonne, Yihooway Samssoonawu oottidoogaadan A sheniyaa polanaadan nuuyyo wolqqaa immana danddayees.

17-18. Mikaaꞌeela hanotaappe nena minttettidabay aybee? (Misiliyaakka xeella.)

¹⁷ Mikaaꞌeela giyo yelaga ishaa hanotaa beꞌa. I gubaaꞌiyawu oottiyaagaanne ubba wode aqinye gididi Yihoowawu minnidi haggaaziis. SHin, gubaaꞌiyan deꞌiya aawatettay appe halanaadan oottida balabaa oottidoogee azzanttiyaaba. I hagaadan giis: “He wode gakkanaashin Yihoowa haggaazuwan minnada oottaas. Qoppennan he ubbabay laametti simmin, Yihoowa haggaazuwan taani aybanne oottana danddayikke gaada qoppaas. Taani Yihooway  tana mule aggenna gaada qoppaas, shin taani aara kaseegaadan dabbotaneeshsha woy kaseegaadan gubaaꞌiyan loytta haggaazana danddayiyaanaashsha gaada qoppaas.”

¹⁸ Mikaaꞌeeli hidootaa qanxxibeennaagee ufayssiyaaba. I gujjidi hagaadan giis: “Taani Yihoowa ubbatoo woossiyoogan, xannaꞌiyoogaaninne wotta dentta qoppiyoogan akko kaseegaappe aaruwan shiiqanawu baaxetaas.” Guyyeppe, Mikaaꞌeeli gubaaꞌiyan aawatettaa zaarettidi demmiis. I haꞌꞌi gubaaꞌe cimanne ubba wode aqinye gididi haggaazees. I hagaadan giis: “Taani cimatuppe demmido maadoynne minttettoy, Yihooway tana haꞌꞌikka siiqiyoogaa taani akeekanaadan maaddiis. Taani geeshsha kahan gubaaꞌiyan zaarettada haggaazana danddayays. Yihooway tumuppe nagaraappe simmiya ooyyoonne atto giyoogaa ha hanotaappe tamaaraas.” Nuuni moorobaa oottikkokka, hegaa giigissanawu nuussi danddayettida ubbabaa oottiyoonne Yihoowan ubbatoo ammanettiyo wode I nunakka goꞌettanaagaanne anjjanaagaa ammanettana danddayoos.—Maz. 86:5; Lee. 28:13.

19. Samssoona taarikee neeni minnanaadan waati oottii?

¹⁹ Samssoona deꞌuwan hanida amarida ufayssiyaabata ha huuphe yohuwan qanttan beꞌida. I nagaranchcha asa; shin Daliiliira gayttidaagan balabaa ootti simmidikka Yihoowawu haggaaziyoogaa aggibeenna. Qassi Yihooway Samssoona goꞌettiyoogaa aggibeenna. Xoossay maalaalissiya ogiyan Samssoona zaarettidi goꞌettiis. Yihooway ammanuwan mino gidida asadan Samssoona xeelliis, qassi Ibraawe shemppo 11n odettida ammanettida asatuura A sunttay xaafettanaadan oottiis. Nuuni daafuriyo wode nuna minttanawu keehi koyiya saluwan deꞌiya siiqo Aawawu nuuni haggaaziyoogaa eriyoogee keehi minttettiyaaba! Yaakko Samssoonaagaadan Yihoowa hagaadan woossoos: ‘Hay tana hassayarkkii! Hay tana minttarkkii!’—Daan. 16:28.