1. Danddayanchcha asaa neeni nashshiyoy aybissee?

 NUUNI ubbay danddayanchcha asaa nashshoos. Unꞌꞌettennan issibaa naagana danddayiyaageeta bonchchoos. Nuuni balabaa oottishin harati nubaa danddayiyoogaa nuuni nashshoos. Qassi nuna Geeshsha Maxaafaa xannaꞌissiya uri issi Geeshsha Maxaafaa timirttiyaa nuuni eranawu, ammananawu woy oosuwan peeshshanawu metootiyo wode nubaa danddayido gishshawu galatoos. Ubbaappe aaruwan, Xoossaa Yihooway nubaa danddayiyo gishshawu A keehi galatoos!—Roo. 2:4.

2. Nuuni danddayanchcha gidanawu metootanaadan oottiya hanotati awugeetee?

² Harati nubaa danddayiyoogaa nashshiyaaba gidikkonne, nuuni danddayanchcha gidanawu issi issitoo metootana danddayoos. Leemisuwawu, nuuni issibaa oottanawu nuuyyo saꞌay pooꞌidaashin kattaa gaacissanawu baabure keettan taraa naagiyo wode, woppu giidi naaganawu metootana danddayoos. Harati nuna yiilloyiyo wode nuuni keehi hanqqettana danddayoos. Qassi Yihooway qaalaa gelido ooratta alamiyaa naagiyoogee issi issitoo deexxiyaaba gidana danddayees. Neeni kaseegaappe aaruwan danddayanchcha gidanawu koyay? Nuuni danddayanchcha gidiyoogaa waati bessana danddayiyaakko, qassi hegee keehi koshshiyoy aybissakko ha huuphe yohuwan beꞌana. Nuuni kaseegaappe aaruwan danddayanchcha gidanaadan nuna aybi maaddana danddayiyaakkokka beꞌana.

3. Danddayanchcha uri harati A yiilloyiyo wode waatii?

³ Nuuni danddayanchcha gidiyoogaa bessana danddayiyo oyddu ogeta ane beꞌoos. Koyruwan, danddayanchcha uri elle hanqqettenna. Harati A yiilloyiyaabaa oottiyo wode I woppu geesinne etawu etaagaadan hanenna. I unꞌꞌettiyo wodekka haratussi  meqettaa iitenna. Geeshsha Maxaafay Yihooway “qarettiyanne maariya Xoossaa; hanqqettanau gam77iyaagaa; aggenna siiqoinne ammanettiyoobai dariyoogaa” gidiyoogaa yootees.—Maz. 86:15.

4. Danddayanchcha uri issibaa naagana koshshiyo wode waanii?

⁴ Naaꞌꞌanttuwan, danddayanchcha uri woppu giidi naagees. Hegaa mala uri issibaa qoppido wodiyaappe aaruwan naagana koshshiyo wode elle hanqqettenna woy yiillotenna. (Maa. 18:26, 27) Nuuni woppu giidi naagana koshshiyo daro hanotati deꞌoosona. Leemisuwawu, issi uri haasayiyo wode nuuni kelttiyaa gelennan danddayan ezggana koshshees. (Iyy. 36:2) Qassi issi xinaatee Geeshsha Maxaafaa timirttiyaa akeekanaadan woy iita meeziyaa agganaadan maaddiyo wode nuuni danddayanchcha gidana bessees.

5. Nuuni danddayanchcha gidiyoogaa bessiyo hara ogee aybee?

⁵ Heezzanttuwan, danddayanchcha uri dirbbenna. Issi issitoo, issi issibaa eesuwan oottana koshshiyoogee qoncce. SHin danddayanchcha uri oottana koshshiyo gita oosoy deꞌiyo wode, hegaa doommanawu woy wurssanawu dirbbenna. I halchchidobaa polanawu gidiya wodee deꞌiyaakkonne shaakkidi erees. Yaatidi, he oosuwaa loytti oottanawu wodiyaa bazzees.

6. Danddayanchcha uri paacee woy metoy gakkiyo wode waanii?

⁶ Oyddanttuwan, danddayanchcha uri paaciyaa zuuzummennan genccanawu baaxetees. Hegee danddayay genccaara gayttidaba gidiyoogaa bessiyaaba. Nu mata laggiyaara nu wozanaabaa haasayiyoogeenne nuna gakkiiddi deꞌiyaabaa xeelliyaagan nuna qofissidabaa ayyo yootiyoogee bala gidennaagee tuma. Gidikkonne, danddayanchcha uri ba deꞌuwan loꞌꞌobaa qoppeesinne Yihoowawu ubbatoo ufayssan haggaazanawu bawu danddayettida ubbabaa oottees. (Qol. 1:11) Yihoowa asay ha ubba ogetun danddayanchcha gidiyoogaa bessana koshshees. Aybissi? Ane amarida gaasota beꞌoos.

7. Yaaqooba 5:7, 8y yootiyoogaadan, danddayanchcha gidiyoogee keehi koshshiyoy aybissee? (Misiliyaakka xeella.)

⁷ Nuuni merinaa deꞌuwaa demmanawu danddayanchcha gidana koshshees. Beni wode deꞌida ammanettida ashkkaratuugaadan, Xoossay qaalaa gelidobati polettanaashin nuuni danddayan naagana koshshees. (Ibr. 6:11, 12) Geeshsha Maxaafay nu hanotaa goshshanchcha hanotaara geeddarssees. (Yaaqooba 5:7, 8 nabbaba.) Issi goshshanchchay zeranawunne haatta ushshanawu minnidi oottikkokka, hegee awude diccanaakko erenna. Hegaa gishshawu, he goshshanchchay kattaa cakkanaagaa ammanettidi danddayan naagees. Hegaadankka, nu “Godai ai gallassi yaanaakkonne” nuuni erana xayikkonne Yesuusa kaallanawu loytti baaxetoos. (Maa. 24:42) Yihooway ba gelido qaala ubbaa ba keerido wodiyan polanaagaa ammanettidi danddayan naagoos. Nuuni danddayanchcha gidana xayikko, salettananne Yihoowawu goynniyoogaa loddan loddan aggana danddayoos. Qassi nuuni haꞌꞌissa xallawu ufayssana danddayiyaabaa oottiyoogaa doommana danddayoos. SHin nuuni danddayanchcha gidikko, wurssettaa gakkanawu genccananne attana danddayoos.—Mik. 7:7; Maa. 24:13.

8. Danddayay nuuni haratuura loytti laggetanaadan waati maaddii? (Qolasiyaasa 3:12; Efisoona 4:32)

⁸ Danddayay nuuni haratuura loytti laggetanaadan maaddees. Danddayay harati haasayiyo wode nuuni loytti ezgganaadan maaddees. (Yaaq. 1:19) Danddayay nuuni haratuura sarotettan deꞌanawukka maaddees. Nuuni danddayanchcha gidikko, unꞌꞌettiyo wode issibaa eesuwaara oottokko, qassi iitabaa haasayokko. Nuussi he eeshshay deꞌikko issi uri nuna qohiyo wode eesuwaara hanqqettokko. Nuuni haluwaa kessennan aggidi ‘issoy issuwawu atto yaagoos.’—Qolasiyaasa 3:12; Efisoona 4:32 nabbaba.

9. Nuuni issibaa kuuyana koshshiyo wode danddayay nuna waati maaddii? (Leemiso 21:5)

⁹ Danddayay nuuni loꞌꞌobaa kuuyanaadankka maaddana danddayees. Dirbbiyoogaappe woy eesotiyoogaappe nuuni doorana danddayiyoobaa wodiyaa bazzi pilggidi, kehiyaagaa doorana koshshees. (Leemiso 21:5 nabbaba.) Leemisuwawu, nuuni ooso koyiiddi deꞌiyaaba gidikko kaseti demmido oosuwaa oottanawu koyana danddayoos; shin hegee nuuni amarida shiiqota attanaadan woy darin haggaazennaadan oottana danddayees. Gidoppe attin, nuuni danddayanchcha gidikko ooso sohoy awan deꞌiyaakko, ay keena saatiyaa oottana koshshiyaakko, qassi ha oosoy nu soo asaanne nuuni Yihoowaara dabbotido dabbotaa waati qohiyaakko qoppoos. Nuuni danddayanchcha gidiyoogan iitabaa kuuyiyoogaappe naagettana danddayoos.

10. Issi Kiristtaanee kaseegaappe aaruwan danddayanchcha waani gidana danddayii?

¹⁰ Kaseegaappe aaruwan danddayanchcha gidanawu woossa. Danddayay Geeshsha ayyaanaa ayfiyaa macaratuppe issuwaa. (Gal. 5:22, 23) Yaatiyo gishshawu, nuuni geeshsha ayyaanaa demmanawunne geeshsha ayyaana ayfiyaa ayfanaadan Yihooway nuna maaddana mala woossana danddayoos. Nuuni danddayanchcha gidanawu metootanaadan oottiya hanotay merettiyo wode, danddayanchcha gidanawu maaddana mala geeshsha ayyaanaa demmanawu ‘aggennan woossoos.’ (Luq. 11:9, 13) Issibaa Yihooway xeelliyoogaadan xeellanaadan I nuna maaddanaadankka woossana danddayoos. Nuuni woossi simmidi ubba galla danddayanchcha gidanawu nuussi danddayettida ubbabaa oottana koshshees. Nuuni danddayanchcha gidanawu ubbatoo woossikko, qassi hegaa bessanawu ubbatoo baaxetikko, kase danddayanchcha asa gidana xayikkonne kaseegaappe  aaruwan danddayanchcha gidanaadan Yihooway nuna maaddana.

11-12. Yihooway danddayanchcha gidiyoogaa waati bessidee?

¹¹ Geeshsha Maxaafaa taariketa wotta dentta qoppa. Danddayanchcha gidida daro asatu taarikiyaa Geeshsha Maxaafay yootees. He taariketa wotti dentti qoppiyoogan nuuni danddayanchcha gidiyoogaa bessiyo ogeta erana danddayoos. He taariketuppe amaridaageeta pilgganaappe kasetidi, danddayanchcha gidiyoogan ooppenne aadhdhiya leemiso gidida Yihoowaabaa ane beꞌoos.

¹² Edene gannatiyan Seexaanay Yihoowa haaroy suurenne siiquwaa bessiyaaba gidiyoogaa Hewaana siranaadan oottanawu baaxetiyoogan Yihoowa sunttaa mooriis. Yihooway Seexaanaa sohuwaara xayssiyoogaappe, ba haaroy ubbaappe aaruwan loꞌꞌo gidiyoogaa bessanawu wodee koshshiyoogaa eriyo gishshawu, danddayanchchanne bana naagiyaagaa gidiyoogaa bessiis. Qassi, he wodee gakkanaashin Yihooway ba sunttay moorettishin genccees. Hegaa bollikka, daro asay merinaa deꞌuwaa demmanaadan Yihooway danddayan naagees. (2 PHe. 3:9, 15) Hegaappe denddidaagan, daro miiloone asay A eriis. Yihooway danddayanchcha gididoogee demissido goꞌꞌaa nuuni qoppiyaaba gidikko, wurssettaa ehaanawu I keerido wodiyaa naagiyoogee nuussi metenna.

13. Yesuusi danddayanchcha gidiyoogan wottiyoobi baynna ogiyan ba Aawaa waani milatidee? (Misiliyaakka xeella.)

¹³ Yesuusi danddayanchcha gidiyoogan wottiyoobi baynna ogiyan ba Aawaa milatiis; qassi saꞌan deꞌiyo wode he eeshshaa bessiis. Yesuusi higgiyaa tamaarissiyaageetuyyonne Parisaawetuyyo danddayaa bessanawu issi issitoo metootidoogee qoncce. (Yoh. 8:25-27) SHin, Yesuusi ba Aawaagaadankka elle hanqqettenna.  Eqettiyaageeti bana cayiyo wode woy hanqqetissiyo wode I etuugaadan hanibeenna. (1 PHe. 2:23) Yesuusi bana gakkida paaciyaa zuuzummennan danddayan gencciis. “Nagaranchchati bana daro ixxinkka genccida Yesuusa” nuuni qoppanaadan Geeshsha Maxaafay yootiyoy aybissakko akeekana danddayoos! (Ibr. 12:2, 3) Yihooway maaddin, nuunikka ay metuwaanne danddayan genccana danddayoos.

14. Abrahaama danddayaappe ay tamaarana danddayiyoo? (Ibraawe 6:15) (Misiliyaakka xeella.)

¹⁴ Nuuppe amaridaageeti wurssettay adussa wodeppe kase yaana giidi qoppennan aggokko. Qassi wurssettay yin beꞌana gakkanawu deꞌuwan deꞌana danddayokko giidi haꞌꞌi hirggana danddayoos. Danddayan naaganaadan nuna aybi maaddana danddayii? Ane Abrahaama taarikiyaa beꞌoos. Abrahaami naꞌa yelennan ayyo layttay 75 gidido wode, Yihooway hagaadan giis: “Taani nena gita kawotetta oottana.” (Doo. 12:1-4) Abrahaami Yihooway yootidobay polettishin beꞌidee? Ubbabay polettishin beꞌibeenna. Abrahaami Efiraaxiisa SHaafaa pinni simmidi, 25 layttaa naagidi A naꞌay Yisaaqi maalaaliya hanotan yelettin beꞌiis; qassi 60 layttaappe guyyiyan A naꞌaa naati Eesawinne Yaaqoobi yelettidosona. (Ibraawe 6:15 nabbaba.) SHin Abrahaami A zerettati gita kawotetta gididoogaanne Hidootaa Biittaa laattidoogaa mule beꞌibeenna. Gidoppe attin, he ammanettida bitanee bana medhdhidaagaara dabbotaa minttiis. (Yaaq. 2:23) Abrahaami hayquwaappe denddiyo wode, A ammanuwaanne danddayaa gaasuwan ha saꞌaa kawotetta ubbay anjjettidoogaa eridi keehi ufayttana! (Doo. 22:18) Hegaappe nu ay tamaariyoo? Nuuni Yihooway gelido qaala ubbay ha wodiyan polettin beꞌennan aggana danddayoos. SHin nuunikka Abrahaamaagaadan danddayanchcha gidikko, Yihooway ha wodiyaaninne I qaalaa gelido ooratta  alamiyan nuna darissidi woytanaagaa ammanettana danddayoos.—Mar. 10:29, 30.

15. Nuuni buzo xinaatiyan ay xannaꞌana danddayiyoo?

¹⁵ Geeshsha Maxaafay danddayanchcha gidida hara daro asatu taarikiyaa yootees. (Yaaq. 5:10) Etabaa xannaꞌiyoogee nena maaddana danddayees. b Leemisuwawu, Daawiti sinttappe Israaꞌeela kawo gidanaadan naatettan tiyettikkonne, kawo gidanawu daro layttaa naagana koshshiis. Simooninne Haanna yaana geetettida Masiyaa naagiiddi Yihoowawu ammanettidi haggaazidosona. (Luq. 2:25, 36-38) Hegaa mala taariketa neeni xannaꞌiyo wode kaallidi deꞌiya oyshatussi zaaruwaa koya: Ha bitanee danddayanchcha gidanaadan maaddidabay ayba gidana danddayii? Danddayanchcha gidiyoogan I waani goꞌettidee? Taani A leemisuwaa waana kaallana danddayiyaanaa? Danddayanchcha gidenna asatubaakka xannaꞌiyoogan neeni goꞌettana danddayaasa. (1 Sam. 13:8-14) Nena hagaadan oychchana danddayaasa: ‘Eti danddayanchcha gidennaadan oottidabay aybee? Hegee ay kaalettidee?’

16. Danddayanchcha gidiyoogee demissiyo amarida goꞌꞌay aybee?

¹⁶ Danddayanchcha gidiyoogee demissiyo goꞌꞌaa qoppa. Nuuni danddayanchcha gidiyo wode ufayttoosinne woppu goos. Yaatiyo gishshawu, danddayanchcha gidiyoogee nuuni qofaaninne asatettan payya gidanaadan oottees. Nuuni haratubaa danddayiyo wode, etaara dabbotaa minttoos. Nu gubaaꞌee kaseppe aaruwan issuwaa gidana. Issi uri nuna yiilloyiyo wode eesuwaara hanqqettokko, qassi hanotay yaa iitanaadan oottokko. (Maz. 37:8; Lee. 14:29) Hegaa bollikka, nuuni danddayanchcha gidiyo wode, saluwan deꞌiya nu Aawaa milatoosinne kaseegaappe aaruwan akko shiiqoos.

17. Nuuni ay oottanawu murttana koshshii?

¹⁷ Danddayay nuna ubbaa maaddiya keehi loꞌꞌo eeshsha. Danddayanchcha gidiyoogee issi issitoo metiyaaba gidikkonne, Yihooway maaddin nuuni ha eeshshaa ubbatoo bessana danddayoos. Qassi nuuni ooratta alamiyaa danddayan naagiiddi, “GODAA aifeti ayyo yayyiyaanne aggenna a siiquwan ufaissaa oottiya asatu bollaana” gidiyoogaa ammanettana danddayoos. (Maz. 33:18) Nuuni ubbaykka aggennan danddayaa maayanawu murttidaageeta gidoos.