1. Nuuppe darota metiyaabay aybee?

 NEENI ayyaanaabaa halchchuwaa kessida hegaa polanawu metoota eray? b Yaatikko, hegaadan metootiyay ne xalla gidakka. Leemisuwawu, Pilipi kaseegaappe loytti woossanawunne darotoo woossanawu koyikkonne, woosawu wodiyaa demmanawu metootiis. Eriika haggaazo shiiqotun pooꞌissennan agganawu halchchikkonne, A ubba shiiqota pooꞌissada gakkawusu gaana danddayettees. Tomaashi kumetta Geeshsha Maxaafaa nabbabanawu darotoo maliis. I hagaadan giis: “Geeshsha Maxaafaa nabbabiyoogee tana salettees. Taani nabbabanawu heezzutoo malikkonne, he wodetu ubban Wogaabaa maxaafaa gakkanaashin xalla nabbabada essaas.”

2. Nuuni haꞌꞌi polichchibeenna ayyaanaabaa halchchoy nuussi deꞌikko nuuni hidootaa qanxxana koshshennay aybissee?

² Neeni haꞌꞌi polaychchabeenna halchchoy deꞌikko hayyanaa hidootaa qanxxoppa. Guutta halchchuwaakka polanawu darotoo wodeenne baaxee koshshees. Neeni ne halchchuwaa polanawu haꞌꞌikka koyiyoogee ne Yihoowaara dabbotido dabbotaa xoqqu ootta xeelliyoogaanne keehi loꞌꞌobaa awu immanawu koyiyoogaa bessees. Yihooway ne baaxiyaa nashshees. I ne danddayiyoobaappe aarobaa naagennaagee qoncce. (Maz. 103:14; Mik. 6:8) Hegaa gishshawu neeni halchchuwaa kessiyo wode, hegaa polana danddayiyaakkonne shaakka era. Neeni halchchuwaa kessa simmada hegaa polanawu waatana danddayay? Ane amarida qofaa beꞌoos.

3. Halchchuwaa polanawu keehi koyiyoogee koshshiyoy aybissee?

³ Neeni ne halchchota polanawu keehi koyiyoogee loytti koshshiyaaba. Neeni ne halchchuwaa polanawu keehi koyikko, hegaa polanawu minna oottaasa. Nuuni nu halchchuwaa polanawu koyiyoogee wolwoloy biyoosaa gakkanaadan sugiya carkkuwa mala. Carkkoy aggennan carkkikko, wolwoluwaa laaggiyaagee biyoosaa gakkana danddayees. Wolqqaama carkkoy carkkikko, I ubba sohuwaara gakkana danddayees. Hegaadankka, nu halchchuwaa polanawu nuuni keehi koyikko, hegaa polana danddayoos. El Salvaadooren deꞌiya Deevida giyo ishay hagaadan giis: “Neeni keehi koyikko, mintta baaxetaasa. Neeni ne halchchuwaa poliyoogaa aybinne diggenna mala baaxetaasa.” Yaatiyo gishshawu, ne halchchuwaa polanawu keehi koyanawu waatana danddayay?

4. Nuuni aybaa xeelliyaagan woossana danddayiyoo? (Piliphphisiyuusa 2:13) (Misiliyaakka xeella.)

⁴ Keehi koyanawu woossa. Yihooway ba ayyaanan neeni ne halchchuwaa polanaadan denttettana danddayees. (Piliphphisiyuusa 2:13 nabbaba.) Nuuni halchchuwaa kessana koshshiyoogaa eriyo gishshawu issi issitoo halchchuwaa kessoos, qassi hegee loꞌꞌoba. SHin nuuni hegaa polanawu tumuppe koyennan aggana danddayoos. Ugandan deꞌiya Noorino giyo michchee hanotaykka hegaa mala. A Geeshsha Maxaafaa xannaꞌissanawu halchchaasu, shin gooba asttamaare gidikke gaada qoppido gishshawu he halchchuwaa polanawu keehi koyabeykku. O maaddidabay aybee? A hagaadan gaasu: “Taani Geeshsha Maxaafaa xannaꞌissanawu keehi koyanaadan tana maaddana mala Yihoowa ubba galla woossiyoogaa doommaas. Taani tamaarissiyo hiillaa dichchanawu ta woosaara maayettiya hanotan baaxetaas. Amarida aginatuppe simmin, Geeshsha Maxaafaa xannaꞌissanawu taani keehi koyidoogaa akeekaas. He laytti, naaꞌꞌu asaa Geeshsha Maxaafaa xannaꞌissiyoogaa doomissaas.”

5. Nu halchchuwaa polanawu loytti koyanaadan nuna maaddana mala ay qoppana danddayiyoo?

⁵ Yihooway neessi oottidobaa wotta dentta qoppa. (Maz. 143:5) Kiitettida PHawuloosi Yihooway awu bessido aaro kehatettaa wotti dentti qoppiis, qassi hegee I Yihoowawu minnidi haggaazanaadan denttettiis. (1 Qor. 15:9, 10; 1 Xim. 1:12-14) Hegaadankka, Yihooway neeyyo oottidobaa ne loytta qoppikko, ne halchchuwaa polanawu loytta koyana. (Maz. 116:12) Honddurasen deꞌiya issi michchiyaa ubba wode aqinye gidanawu halchchido halchchuwaa polanaadan O maaddidabaa akeeka. A hagaadan gaasu: “Yihooway tana ay keenaa siiqiyaakko taani wotta dentta qoppaas. Taani A asaara gayttanaadan oottiis. I tawu koshshiyaabaa kuntteesinne tana naagees. Taani hegaa loytta qoppidoogee Yihoowa taani siiqiyo siiqoy minnanaadan maaddiis, qassi aqinye gidada haggaaziyoogaa doommanawu baaxetana koyaas.”

6. Nu halchchuwaa polanawu keehi koyanaadan nuna maaddana danddayiya harabay aybee?

⁶ Ne halchchuwaa poliyoogee demissiyo goꞌꞌaa qoppa. Qommoora ibay odettido Eriika, pooꞌissennan gakkanaadan O maaddidabaa akeeka. A hagaadan gaasu: “Taani haggaazuwawu  pooꞌissada gakkiyoogan taappe darobay halidoogaa akeekaas. SHin kasetada gakkiyoogan ishanttanne michchontta sarotanawunne etaara wodiyaa aattanawu danddayays. Taani ta haggaazuwan ufayttanaadaaninne qara gidanaadan maaddiya loꞌꞌo qofaakka siyana danddayays.” Eriika pooꞌissennan gakkiyoogee demissiyo goꞌꞌaa qoppido gishshawu ba halchchuwaa polaasu. Ne qoppana danddayiyo goꞌꞌay aybee? Ne halchchoy Geeshsha Maxaafaa loytta nabbabiyoogaa woy loytta woossiyoogaa gidikko, hegee neeni Yihoowaara dabbotido dabbotaa waati minttiyaakko loytta qoppa. (Maz. 145:18, 19) Xoossaa ufayssiya eeshshay neessi deꞌanaadan halchchikko, hegee neeni haratuura dabbotido dabbotaa waati minttiyaakko qoppa. (Qol. 3:14) Neeni ne halchchuwaa polanawu koyiyo gaaso ubbaa xaafa oyqqana danddayaasa. Xaafa oyqqidobaa ubbatoo xeella. Qommoora abay odettido Tomaashi hagaadan giis: “Taani issi halchchuwaa polanawu baaxetana koshshiyo daro gaasoy deꞌikko, hegaa polanawu minna oottays.”

7. Halchchidobaa polanaadan Juuliyanne A machchiyo maaddidabay aybee?

⁷ Ne halchchuwaa polanaadan nena minttettiya asaara wodiyaa aatta. (Lee. 13:20) Aassiyaageeti keehi koshshiyoosaa baanawu halchchido halchchuwaa polanawu baaxetanaadan Juuliyanne A machchiyo maaddidabaa akeeka. I hagaadan giis: “Nuuni nu halchchuwaa polanaadan minttettiyaageetuura laggetida, qassi etaara nu halchchuwaabaa haasayoos. Etappe daroti hegaa mala halchchuwaa halchchidi polido gishshawu, nuna maaddiyaabaa zoridosona. Nu laggeti nuuni nu halchchuwaa waati poliiddi deꞌiyaakkokka oychchoosona, yaatidi nuussi minttettoy koshshiyo wode nuna minttettoosona.”

8. Nuuni keehi koyiyo wode xallan nu halchchuwaa polanawu baaxetikko aybi hanana danddayii? (Misiliyaakka xeella.)

⁸ SHin nuuni ubbay nu halchchuwaa polanawu keehi koyennan aggiyo wodeti deꞌoosona. Hegaa giyoogee nuuni nu halchchuwaa polana danddayokko giyoogee? CHii. Leemisuwawu: Wolqqaama carkkoy wolwoluwaa sugiyoogee wolwoloy biyoosaa gakkanaadan oottana danddayees. SHin carkkuwaa hanotay dumma dumma, qassi issi issitoo mule carkkennan aggana danddayees. Hegaa giyoogee wolwoluwaa laaggiyaagee baana danddayenna giyoogee? Gidennan aggana danddayees. Leemisuwawu, issi issi wolwolotuyyo motoree deꞌees; haratuyyo qassi haattaa shaariyo mittay deꞌees. Wolwoluwaa laaggiyaagee baana koyidosaa gakkanawu motoriyaa woy haattaa shaariyo mittaa goꞌettana danddayees. Nu koshshay carkkuwaa mala; hegee hara gallassatuppe aaruwan issi issitoo wolqqaamees. Hara wodetun qassi, nuuni nu halchchuwaa polanawu mule koyennan aggana danddayoos. Yaatiyo gishshawu nuuni keehi koyiyo wode xallan nu halchchuwaa polanawu baaxetiyaaba gidikko, nu halchchuwaa mule polana danddayokko. Gidikkonne, wolwoluwaa laaggiyaagee baana koyidosaa gakkanawu dumma dumma hiillaa goꞌettiyoogaadan, nu halchchuwaa polanawu nuuni keehi koyenna wodetunkka baaxetana danddayoos.  Hegee metiyaaba gidiyoogee tuma. SHin neeni ne halchchuwaa poliyo wode ufayttana. Nuuni ay oottana danddayiyaakko beꞌanaappe kase issi oyshaa ane pilggoos.

9. Nuuni ayyaanaabaa halchchuwaa polanawu tumuppe koyennaba gidikkokka hegaa polanawu baaxetana koshshii? Qonccissa.

⁹ Yihooway nuuni eeno giidi ufayssan awu haggaazanaadan koyees. (Maz. 100:2; 2 Qor. 9:7) Yaatin nuuni ayyaanaabaa halchchuwaa polanawu koyennaba gidikko, hegaa polanawu baaxetana koshshii? Kiitettida PHawuloosa hanotaa qoppa. I hagaadan giis: “Ta bollaa yimppada haarissais.” (1 Qor. 9:25-27) PHawuloosi Yihooway koyiyoobaa oottanawu koyibeenna wodekka bana seeridi hegaa oottiis. PHawuloosa haggaazuwan Yihooway ufayttidee? Ee, ufayttiis! Qassi I baaxetido gishshawu Yihooway A anjjiis.—2 Xim. 4:7, 8.

10. Nuuni halchchuwaa polanawu keehi koyenna wodekka hegawu baaxetiyoogee demissiyo goꞌꞌay aybee?

¹⁰ Hegaadankka, nuuni nu halchchuwaa polanawu keehi koyenna wodetunkka hegaa polanawu baaxetiyoogaa Yihooway beꞌidi ufayttees. Nuuni oottiyoobaa ubbatoo dosennan aggana danddayikkonne, hegaa nuuni A siiqidi oottiyoogaa I eriyo gishshawu ufayttees. Yihooway PHawuloosa anjjidoogaadan nu baaxiyaa gishshawu nunakka anjjana. (Maz. 126:5) Qassi Yihooway nuna anjjidoogaa nuuni akeekiyo wode keehi koyiyoogaa doommana danddayoos. Poolandden deꞌiya Luutsino giyo issi michchiyaa hagaadan gaasu: “Issi issitoo, ubba taani daafuriyo wode haggaazuwaa kiyanawu koyikke. Gidoppe attin, taani haggaazuwaa kiya simmada ufayttiyo ufayssay maalaalissiya imota.” Yaatikko, nuuni halchchuwaa polanawu keehi koyenna wode waatana danddayiyaakko ane beꞌoos.

11. Nu huuphiyaa loytti naaganaadan Yihooway nuna waati maaddana danddayii?

¹¹ Ne huuphiyaa naaganawu woossa. Huuphiyaa naagiyoogee issi uri ba qofaanne ba oosuwaa naagiyoogaa qonccissees. Darotoo ha qofay nuuni iitabaa oottiyoogaappe naagettiyoogaa bessees. Gidikkonne, nuuni loꞌꞌobaa oottanawu, ubba qassi keehi deexxiya oosuwaa woy nuuni koyennabaa oottanawukka nu huuphiyaa naagana koshshees. Huuphiyaa naagiyoogee ayyaanaa ayfiyaa macara gidiyo gishshawu, kaseegaappe aaruwan neeni ne huuphiyaa naaganaadan maaddana mala geeshsha ayyaanaa Yihooway immanaadan woossana koshshiyoogaa hassaya. (Luq. 11:13; Gal. 5:22, 23) Qommoora abay odettido Deevidi, woosay A waati maaddidaakko yootiis. I buzo xinaatiyaa aggennan xannaꞌanawu koyiis. I hagaadan giis: “Taani ta huuphiyaa naagiya asa gidanaadan maaddana mala Yihoowa woossaas. I maaddin, taani aggennan loytta xannaꞌana danddayaas.”

12. Eranchchaa 11:4y nuuni nu halchchuwaa polanaadan waati maaddii?

¹² Ubbabay injjetana gakkanaashin naagoppa. Ha alamiyan, nuussi ubbabay injjetana danddayenna. Nuuni ubbabay injjetana gakkanaashin naagikko, nu halchchuwaa mule polana danddayokko. (Eranchchaa 11:4 nabbaba.) Dayniyeela giyo ishay hagaadan giis: “Ubbabay injjetiyo wodee deꞌenna. Nuuni halchchuwaa poliyoogaa doommiyo wode hanotay injjetanaadan oottoos.” Ugandan deꞌiya Pawula giyo ishay nuuni haganaa sugana koshshenna hara gaasuwaa hagaadan giis: “Waayissiya wodiyankka nuuni nu halchchuwaa poliyoogaa doommikko Yihooway nuna maaddana.”—Mil. 3:10.

13. Guutta halchchotun doommiyoogee loꞌꞌo gidana danddayiyoy aybissee?

¹³ Guuttaban doomma. Nu halchchidobay polanawu keehi metiyaaba milatiyo gishshawu hegaa polanawu keehi koyennan aggana danddayoos. Ne hanotay hegaadan gidikko, shaakkada guuttaa guuttaa oottana danddayay? Neeni loꞌꞌo eeshshay neessi deꞌanaadan halchchikko, koyro heeran guuttabata oottiyoogan hegaa bessana danddayaasa. Neeni kumetta Geeshsha Maxaafaa nabbabanawu halchchikko, amarida daqiiqaa nabbabanawu prograamiyaa kessiyoogan  doommana danddayay? Doomettan abay odettido Tomaashi Geeshsha Maxaafaa issi layttan nabbabi wurssanawu halchchido halchchuwaa polanawu metootiis. I hagaadan giis: “Taani bessiyaagaappe aaruwan eesotada nabbabiyoogaa akeekaas. Hegaa gishshawu zaarettada malanawu qoppaas, shin he wode taani ubba galla issi shemppuwaappe amarida payduwaa nabbabanawunne hegaa wotta dentta qoppanawu halchchaas. Hegaappe denddidaagan, taani nabbabiyooban ufayttiyoogaa doommaas.” Tomaashi Geeshsha Maxaafaa nabbabiyoogan ufayttiyoogaa doommido gishshawu kaseegaappe adussa wodiyawu nabbabanawu koyiis. Guyyeppe, I kumetta Geeshsha Maxaafaa nabbabidi wurssiis. c

14. Ne halchchuwaa polanawu neeni keehi metootanaadan oottiyaabay ayba gidana danddayii?

¹⁴ Nuuni nu halchchuwaa polanawu ay keenaa koyikkokka, woy nu huuphiyaa naagikkokka, hegaa polanawu metootanaadan oottiyaabay deꞌana danddayees. Leemisuwawu, ‘qoppennan gakkiyaabay’ nuuni nu halchchuwaa polanaassi baaxetanawu nuussi koshshiya wodiyaa xayssana danddayees. (Era. 9:12) Unꞌꞌettanaadaaninne wolqqaa xayanaadan oottiya metoy nuna gakkana danddayees. (Lee. 24:10) Nuuni nagaranchcha gidiyo gishshawu, nu halchchuwaa polanawu keehi metootanaadan oottiya mooruwaa moorana danddayoos. (Roo. 7:23) Woy daafurana danddayoos. (Maa. 26:43) Nu halchchuwaa polanawu keehi metootanaadan oottiyaabaa xoonanaadan nuna aybi maaddana danddayii?

15. Ne halchchuwaa polanawu keehi metootanaadan oottiyaabay merettikko hidootaa qanxxana koshshennay aybissee? (Mazamure 145:14)

¹⁵ Ne halchchuwaa polennaadan diggiyaabay merettikko, hegee neeni halchchuwaa polanawu baaxetiyoogaa aggana koshshees giyoogaa gidennaagaa hassaya. Nuna metoy woy waayee darotoo gakkana danddayiyoogaa Geeshsha Maxaafay yootees. SHin, hegee nuna Yihooway maaddin, nu halchchuwaa polanawu zaarettidi baaxetana danddayiyoogaa bessees. (Mazamure 145:14 nabbaba.) Qommoora abay odettido  Pilipa giyo ishay hagaadan giis: “Taani ta halchchuwaa polabeenna wodeta qoppikke. SHin, he halchchuwaa polanawu taani zaarettada baaxetido wodeta qoppays.” Qommoora abay odettido Deevidi hagaadan giis: “Taani ta halchchuwaa polanawu keehi metootanaadan oottiyaabaa xubedan gidennan, taani Yihoowa ay keenaa siiqiyaakko bessiyo injjedan xeellanawu malays.” Waayissiya wodetunkka ne halchchuwaa polanawu ubbatoo baaxetiyoogan Yihoowa ufayssanawu koyiyoogaa bessaasa. Ne halchchuwaa polanawu ne ubbatoo baaxetiyoogaa Yihooway beꞌidi keehi ufayttanaagee qoncce!

16. Neeni ne halchchuwaa polennaadan diggiyaabay merettikko hegaappe ay tamaarana danddayay?

¹⁶ Ne qoppidoogaadan ne halchchuwaa polennaadan diggiyaabay merettiyo wode hegaappe tamaara. Hanidabaa loytta qoppa, qassi nena hagaadan oychcha: ‘Haroode hagaa malabay merettennaadan waatana danddayiyaanaa?’ (Lee. 27:12) SHin issi issitoo ne halchchuwaa polanawu keehi metootikko, hegee neeni polana danddayennaba gidiyoogaa bessana danddayees. Ne hanotaykka hegaa mala gidikko, ne halchchoy neeni polana danddayiyoobakkonne zaarettada qoppa. d Neeyyo hanennabaa halchchada polennan xayikko, Yihooway nena halchchuwaa polana danddayenna asadan qoppenna.—2 Qor. 8:12.

17. Nuuni kase polidobaa hassayana koshshiyoy aybissee?

¹⁷ Neeni kase polidobaa hassaya. Geeshsha Maxaafay ‘Xoossay neeni oottido oosuwaa doganawu worddanchcha gidennaagaa’ yootees. (Ibr. 6:10) Yaatikko neenikka ne oottidobaa dogana koshshenna. Neeni polaychchido halchchota qoppa. Hegee neeni Yihoowaara dabbotido dabbotay minnidoogaa, abaa haratussi yootidoogaa, woy xammaqettidoogaa gidana danddayees. Neeni kase ayyaanaabaa halchchota halchchada polidoogaadan, haꞌꞌikka ne halchchuwaa polana danddayaasa.—Pili. 3:16.

18. Nu halchchuwaa polanawu nuuni baaxetiyo wode hassayana koshshiyaabay aybee? (Misiliyaakka xeella.)

¹⁸ Wolwoluwaa laaggiyaagee baana koyidosaa ufayttiiddi gakkiyoogaadan, Yihooway maaddin neenikka ne halchchuwaa polana danddayaasa. Wolwoluwaa laaggiya darotikka wolwoluwan biyo wode beꞌiyooban ufayttiyoogaa hassaya. Hegaadankka, Yihooway nena maaddiyoogaa ubbatoo akeekanawu baaxeta, hegee neeni ne halchchuwaa polanawu baaxetiyo wode ufayttanaadan maaddana. (2 Qor. 4:7) Neeni hidootaa qanxxennan aggikko, keehi daro anjjuwaa demmana.—Gal. 6:9.