1. Yesuusi Geeshsha Maxaafaa xoqqu ootti xeelliyoogaa bessiyaabay aybee?

 YESUUSI tamaarissiyo wode siyiyoogee ay keena ufayssiyaabakko qoppa. I Geeshsha Maxaafaa xiqiseta darotoo hassayidi yootiis. Yesuusi xammaqetti simmidi haasayido koyrobaanne hayqqanaappe kasetidi haasayido amaridabaa Geeshsha Maxaafaappe ekkidi yootiis. b (Zaa. 8:3; Maz. 31:5; Luq. 4:4; 23:46) Yesuusi xammaqetti simmin deꞌiya heezzu layttanne baggaa gidiya wodiyan, darotoo asawu Geeshsha Maxaafaappe nabbabiisinne hegaappe ekettida qofaa qonccissiis.—Maa. 5:17, 18, 21, 22, 27, 28; Luq. 4:16-20.

2. Yesuusi gitaa gidiyo wode Geeshsha Maxaafaa loytti eranaadan maaddidabay aybee? (Koyro sinttan deꞌiya misiliyaa xeella.)

² Yesuusi ba haggaazuwaa doommanaappe daro layttaa kasetidi, darotoo Xoossaa Qaalaa nabbabiisinne nabbabettishin siyiis. Son Mayraamanne Yooseefi Geeshsha Maxaafaappe ekettida qofaa haasayiyo wode I siyidoogee qoncce. c (Zaa. 6:6, 7) Yesuusi sambbata ubban bantta soo asaara Ayhuda woosa keettaa biidoogaa ammanettana danddayoos. (Luq. 4:16) Yan Geeshsha Maxaafay nabbabettiyo wode I loyttidi siyiis. Guyyeppe Yesuusi xaatta maxaafaa nabbabiyoogaa tamaariis. Hegaappe denddidaagan, Yesuusi Geeshsha Maxaafaa loytti eriyoogaa xalla gidennan, hegaa siiqiisinne hegee bana oosuwawu denttettanaadan eeno giis. Leemisuwawu, Yesuusawu layttay 12 gidido wode beeta maqidasiyan hanidabaa hassaya. Muuse Higgiyaa loytti eriya asttamaareti  Yesuusi “immiyo era zaaruwan” garamettidosona.—Luq. 2:46, 47, 52.

3. Ha huuphe yohuwan nuuni ay beꞌanee?

³ Nuunikka Geeshsha Maxaafaa ubbatoo nabbabiyo wode Xoossaa Qaalaa loytti erananne siiqana danddayoos. Nuuni nabbabiyoobaappe waani loytti goꞌettana danddayiyoo? Higgiyaa tamaarissiyaageeta, Parisaawetanne Saaduqaaweta gujjin, Higgiyaa loytti eriyaageetussi Yesuusi yootidobaappe tamaarana danddayoos. Haymaanootiyaa kaalettiyaageeti ubbatoo Geeshsha Maxaafaa nabbabikkonne eti hegaappe goꞌettokkona. Geeshsha Maxaafaappe loytti goꞌettanawu he asati oottibeenna heezzubata Yesuusi yootiis. I he asatuyyo yootidobay, (1) nuuni nabbabiyoobaa akeekanawu, (2) ayyaanaaban alꞌꞌobaa demmanawu, qassi (3) Xoossaa Qaalay nu hanotaa laammanaadan oottanawu waati maaddiyaakko ha huuphe yohuwan beꞌana.

4. Xoossaa Qaalaa nabbabiyoogaa xeelliyaagan Luqaasa 10:25-29y nuna ay tamaarissii?

⁴ Nuuni Xoossaa Qaalaappe nabbabiyoobaa akeekanawu koyoos. Yaatana xayikko, nuuni nabbabiyoobaappe goꞌettana danddayokko. Leemisuwawu, “Higgiyaa tamaarissiya” issi bitaniyaara Yesuusi haasayidobaa beꞌa. (Luqaasa 10:25-29 nabbaba. d) Merinaa deꞌuwaa demmanawu ay oottana koshshiyaakko bitanee oychchido wode, Xoossaa Qaalaappe zaaruwaa demmanaadan Yesuusi A maaddiis. Yesuusi A hagaadan oychchiis: “Higgiyan xaafettidaagee aibee? Neeni ay akeekay?” He bitanee Xoossaanne shooruwaa siiqiyoogaabaa yootiya xiqiseta odiyoogan likkebaa zaariis. (Wog. 19:18; Zaa. 6:5) SHin he bitanee kaallidi giidobaa akeeka: “Ta shooroi oonee?” He bitanee nabbabidobaa akeekibeennaagaa bessiis. Hegaappe denddidaagan, I he xiqiseta waatidi oosuwan peeshshanaakko eribeenna.

5. Woosaynne leddan nabbabiyoogee nuuni nabbabiyoobaa akeekanaadan waatidi maaddana danddayii?

⁵ Nuussi Xoossaa Qaalaa loytti nabbabiyo meezee deꞌikko, nabbabiyoobaa kaseegaappe aaruwan akeekana danddayoos. Nena maaddana danddayiya amarida qofata beꞌa. Nabbabanaappe kasetada woossa. Nuuni Geeshsha Maxaafaa akeekanawu Yihoowa maadoy koshshiyo gishshawu, nabbabiyoobaa xallan xeelaa wottanawu maaddanaadan geeshsha ayyaanaa immana mala oychchana danddayoos. Yaatada, leddan nabbaba. Hegee neeni nabbabiyoobaa akeekanaadan maaddana. Cenggurssaa xoqqu oottada nabbabiyoogee woy ne qaalan deꞌikko, cenggurssan giigida Geeshsha Maxaafa nibaabee nabbabettishin kaalliyoogee nena maaddana danddayees. Neeni cenggurssan giigidaagaa siyaydda Geeshsha Maxaafaa kessada kaalliyoogee, Xoossaa Qaalaappe neeni nabbabidobaa akeekanaadan, hassayanaadaaninne loytta goꞌettanaadan maaddana danddayees. (Yaas. 1:8) Neeni nabbabiyoogaa wurssiyo wode, ba Qaala immido gishshawu Yihoowa galatanawunne nabbabidobaa oosuwan peeshshanawu maaddanaadan zaarettada woossa.

6. Nabbabiyo wode oyshata nena oychchiyoogeenne qantta masttooshaa oyqqiyoogee nena waati maaddi? (Misiliyaakka xeella.)

⁶ Neeni Geeshsha Maxaafaa loytta akeekanaadan maaddiya hara naaꞌꞌubata beꞌa. Neeni nabbabiyoobaa xeelliyaagan oyshata nena oychcha. Issi taarikiyaa nabbabiyo wode nena hagaadan oychcha: ‘Waannatiya asati oonee? Haasayiiddi deꞌiyaagee oonee? Oossi haasayii, qassi aybissi? Hegee hanidoy awaanee, qassi awudee?’ Hegaa mala oyshati neeni nabbabiyoobaa wotta dentta  qoppanaadaaninne oosuwan peeshshanaadan maaddana. Qassi nabbabiyo wode qantta masttooshaa oyqqa. Neeni nabbabidobaa xaafiyo wode hegaa loytta qoppaasa, qassi hegee neeni loytta akeekanaadan maaddees. Xaafiyoogee neeni nabbabidobaa hassayanaadankka maaddees. Neeni oyshata, pilggada demmidobata, zaarettanawu koyiyo waanna qofata, nabbabidobaappe oosuwan peeshshanawu koyiyoobata woy neeyyo siyettidabata xaafana danddayaasa. Hegaadan masttooshaa oyqqiyoogee, Xoossaa Qaalay neessi xaafettidabadan xeellanaadan maaddana danddayees.

7. Nuuni nabbabiyo wode nuussi koshshiya eeshshay aybee, qassi aybissi? (Maatiyoosa 24:15)

⁷ Xoossaa Qaalaa nabbabiyo wode nuussi gelanaadan koyikko, nuussi deꞌana bessiya issi eeshshaa Yesuusi yootiis; hegee akeekaa. (Maatiyoosa 24:15 nabbaba.) Akeekay aybee? Hegee issi qofay hara qofaara waani gayttiyaakkonne waani dummatiyaakko, qassi loytti qonccibeenna qofaa yiggidi eriyoogaa. Hegaa bollikka, polettiiddi deꞌiya Geeshsha Maxaafaa hiraagata eranawu nuuni akeekanchcha gidana koshshiyoogaa Yesuusi yootiis. Nuuni Geeshsha Maxaafan nabbabiyo ubbabaappe loytti goꞌettanawukka ha eeshshay koshshees.

8. Nuuni akeekan waatidi nabbabana danddayiyoo?

⁸ Yihooway ba ashkkaratussi akeekaa immees. Hegaa gishshawu, he eeshshay neessi deꞌanaadan maaddana mala A woosan oychcha. (Lee. 2:6) Ne woosaara maayettiyaabaa waata oottana danddayay? Neeni nabbabidobaa wotta dentta qoppa, qassi hegee neeni eriyoobaara waani gayttiyaakko akeeka. Yaatanaadan maaddana mala Geeshsha Maxaafaa xannaꞌanawu maaddiyaabata goꞌetta; leemisuwawu, Yihoowa Markkati Geeshsha Maxaafaa xannaꞌanawu maaddiya Xuufiyaa goꞌettana danddayaasa. Ha xannaꞌanawu maaddiyaabati neeni Geeshsha Maxaafaappe nabbabidobaa akeekanaadaaninne hegaa oosuwan peeshshiyo ogiyaa qoppanaadan maaddana danddayoosona. (Ibr. 5:14) Neeni akeekan nabbabiyo wode Geeshsha Maxaafaa loytta erana.

9. Saaduqaaweti ammanibeenna keehi koshshiya Geeshsha Maxaafaa tumay aybee?

⁹ Saaduqaaweti Ibraawetto Geeshsha Maxaafan koyro ichchashu maxaafata loytti eroosona; shin ayyaanay kaalettin he maxaafatun xaafettida keehi koshshiya tumaa ammanokkona. Leemisuwawu, hayquwaappe denddiyoogaa xeelliyaagan Saaduqaaweti Yesuusa oychchido wode I woygidi zaaridaakko akeeka. I eta hagaadan oychchiis: “Muuse maxaafan xaafettida xaragettiya buuraabaa odiya sohuwan, Xoossai Muusa, ‘Taani Abrahaama Xoossaa, Yisaaqa Xoossaa, Yaaqooba Xoossaa’ giidoogaa mulekka nabbabibeekketii?” (Mar. 12:18, 26) Saaduqaaweti he qofaa darotoo nabbabidaba gidikkonne, keehi koshshiya Geeshsha Maxaafaa tumaa, hegeekka dendduwaa timirttiyaa ammanennaagaa Yesuusi eta oychchidobay qonccissees.—Mar. 12:27; Luq. 20:38. e

10. Nuuni nabbabiyo wode loytti akeekana koshshiyaabay aybee?

¹⁰ Nuuni ay tamaariyoo? Nuuni nabbabiyo wode hegaappe tamaarana danddayiyo xiqiseta ubbaa, woy issi Geeshsha Maxaafaa taarikiyaa loytti akeekana koshshees. Nuuni qoncce gididabatu xallaa gidennan, hara alꞌꞌo tumaanne maarata akeekanawu koyoos.

11. Naaꞌꞌantto Ximootiyoosa 3:16, 17 maaran, Geeshsha Maxaafaappe ayyaanaaban alꞌꞌobaa waata demmana danddayay?

¹¹ Neeni Geeshsha Maxaafaa nabbabiyo wode ayyaanaaban alꞌꞌobaa waata demmana danddayay? Naaꞌꞌantto Ximootiyoosa 3:16, 17y woygiyaakko akeeka: (Nabbaba.) ‘Xoossaa maxaafa ubbay’ (1) tamaarissanawu, (2) seeranawu, (3) mooruwaa suurissanawu, qassi (4) zoranawu maaddees. Neeni darotoo nabbabenna Geeshsha Maxaafaa shaahotuppekka he oyddu maaddiyaabata demmana danddayaasa. He taarikee Yihoowaabaa, A halchchuwaabaa woy Xoossay kessido maaratubaa nena ay tamaarissiyaakko akeekanawu wotta dentta qoppa. Hegee seeranawu waati maaddiyaakko akeeka. Hegaadan oottiyoogan iita amuwaa woy qofaa shaakka eranawunne ixxanawu, qassi Yihoowawu ubbatoo ammanettada deꞌanawu he xiqiseti nena waati maaddiyaakko akeeka. Geella issi uri haggaazuwan yootido bala qofaa suurissanawu he taarikee nena waati maaddiyaakko pilgga. Qassi he xiqisee yootiyo zore ubbay neeni issibaa Yihoowaagaadan qoppanaadan loohissiyoogaa akeeka. Neeni ha oyddubata ubbatoo qoppiyo wode Geeshsha Maxaafaa nibaabiyaappe goꞌettanaadan maaddiya, ayyaanaaban alꞌꞌobaa demmana danddayaasa.

12. Yesuusi Parisaaweta, “Nabbabibeekketii?” giidi oychchidoy aybissee?

¹² Geeshsha Maxaafaa xeelliyaagan Parisaawetussi deꞌiya bala qofaa qonccissanawu  Yesuusi, “Nabbabibeekketii?” yaagidi eta oychchiis. (Maa. 12:1-7) f He wode, Yesuusi erissiyo ashkkarati Sambbataa bonchchibookkona giidi Parisaaweti mootidosona. Parisaaweti Sambbataa higgee koshshido gaasuwaa akeekibeennaagaanne maariyaageeta gidennaagaa qonccissanawu, Yesuusi naaꞌꞌu Geeshsha Maxaafaa leemisuwaanne Hooseꞌa maxaafaappe ekettida xiqisiyaa etawu yootiis. He asati Xoossaa Qaalaa nabbabiyoogee eti laamettanaadan oottibeennay aybisee? Eti boranawunne otorettanawu koyidi nabbabiyo gishshataassa. Eta hanotay eti nabbabiyoobaa akeekennaadan diggiis.—Maa. 23:23; Yoh. 5:39, 40.

13. Nuuni Geeshsha Maxaafaa nabbabiyo wode nu xeelay ay mala gidana koshshii, qassi aybissi?

¹³ Nuuni suurebaa qoppidi Geeshsha Maxaafaa nabbabana koshshiyoogaa Yesuusi yootidobaappe tamaaroos. Parisaawetuugaappe dumma hanotan nuuni nuna ziqqi oottiyaageetanne tamaaranawu eeno giyaageeta gidana koshshees. Nuuni nu ‘wozanan tokettida qaalaa ashkketettan ekkana’ koshshees. (Yaaq. 1:21) Nuuni ashkke gidikko, Xoossaa Qaalay nuna laammanaadan eeno gaana. Nuuni bala koyiyoogaanne otorettiyoogaa aggiyo wode xallan Geeshsha Maxaafay maarotaabaa, qaretaabaanne siiquwaabaa yootiyoobay nuuni laamettanaadan oottana.

14. Nuuni Geeshsha Maxaafay nuna laammanaadan eeno giidaakkonne waatidi erana danddayiyoo? (Misiliyaakka xeella.)

¹⁴ Nuuni harata oyqqiyo ogee, Xoossaa Qaalay nuna laammanaadan eeno giidaakkonne bessana danddayees. Parisaaweti Xoossaa Qaalay bantta qofaa laammanaadan eeno gibeenna gishshawu, ‘nagari baynna asaa bolli pirddidosona.’ (Maa. 12:7) Hegaadankka, nuuni qoppiyoobaynne harata oyqqiyo ogee Xoossaa Qaalay  nuna laammanaadan nuuni koyiyaakkonne bessees. Leemisuwawu, nuuni darotoo haratuyyo deꞌiya loꞌꞌobaa yootiyooyye eta bala yootiyoo? Nuuni maaranawunne atto gaanawu giigi uttidooyye boranawunne lancciyaa uluwan oyqqanawu koyiyoo? Nuuni he oyshatussi zaariyoobay nuuni nabbabiyoobay nu qoppiyoobaanne oottiyoobaa laammanawu eeno giidaakkonne bessees.—1 Xim. 4:12, 15; Ibr. 4:12.

15. Geeshsha Maxaafaa xeelliyaagan Yesuusa qofay aybee?

¹⁵ Yesuusi Geeshsha Maxaafaa dosees, qassi Xoossaa Qaalaa xeelliyaagan awu siyettiyaabay Mazamure 40:8n kasetidi odettiis. Xiqisee hagaadan gees: “Abeet ta Xoossau, taani neeni koyiyoogaa oottanau dosais; ne higgee ta wozanaa giddon de7ees.” Yesuusi Geeshsha Maxaafaa siiqiyo gishshawu, ufayttiisinne aggennan Yihoowawu haggaaziis. Nuunikka Xoossaa Qaalaa nabbabikko, qassi A siiqikko, ufayttananne aggennan Yihoowawu haggaazana danddayoos.—Maz. 1:1-3.

16. Geeshsha Maxaafaa nibaabiyaappe loytta goꞌettanawu waatana danddayay? (“ Yesuusi Yootidobati Neeni Nabbabiyoobaa Akeekanaadan Maaddana Danddayoosona” giya saaxiniyaa xeella.)

¹⁶ Yesuusi yootidobatanne oottidobata kaalliyoogan, Geeshsha Maxaafaa nabbabiyo hiillata loytti goꞌettiyaageeta gidoos. Nuuni woossiyoogan, leddan nabbabiyoogan, oyshata oychchiyoogan, qassi qantta masttooshaa oyqqiyoogan Geeshsha Maxaafaa kaseegaappe aaruwan akeekana danddayoos. Geeshsha Maxaafaa qofay deꞌiyo nu xuufeta goꞌettidi, nuuni nabbabidobaa loytti qoppiyoogan akeekanchcha gidana danddayoos. Nuuni darotoo nabbabi erenna Geeshsha Maxaafaa shaahotakka gidin, hegeetun deꞌiya taariketuppe ayyaanaaban alꞌꞌobaa demmanawu baaxetiyoogan, Geeshsha Maxaafaa kaseegaappe aaruwan goꞌettana danddayoos. Qassi nuuni nabbabiyo wode ubban suurebaa qoppiyoogan Xoossaa Qaalay nuna laammanaadan eeno gaana danddayoos. Nuuni yaatanawu nuussi danddayettida ubbabaa oottiyo wode, Geeshsha Maxaafaa nibaabiyaappe loytti goꞌettananne Yihoowakko kaseegaappe aaruwan shiiqana.—Maz. 119:17, 18; Yaaq. 4:8.