1. Geeshsha Maxaafaa gishshawu nuuni Yihoowa galatiyoy aybissee?

 NUUNI Geeshsha Maxaafaa gishshawu Xoossaa Yihoowa keehi galatoos! Ha wodiyan nuna metoy gakkiyo wode waatanaakko eranaadan maaddiya zoriyaa Geeshsha Maxaafay yootees. Yihooway ufayssiya sinttanaa hidootaakka nuussi immiis. Ubbaappe aaruwan, Yihooway Geeshsha Maxaafaa baggaara ba eeshshaa xeelliyaagan darobaa yootiis. Nuuni ufayssiya A eeshshata wotti dentti qoppiyo wode keehi ufayttoos; qassi awu mata dabbo gidanawu koyoos.—Maz. 25:14.

2. Yihooway bana asawu qonccissido dumma dumma ogeti awugeetee?

² Yihooway bana asay eranaadan koyees. Beni wode I aymuwaa, ajjuutaa, ubba qassi kiitanchchatu baggaara haratussi bana qonccissiis. (Qoo. 12:6; Oos. 10:3, 4) SHin ha aymoti, ajjuutati, woy kiitanchchati yootidobati xaafettennaba gidiyaakko, nuuni hageeta xannaꞌana danddayokko. Nuuni eranaadan I koyiyoobaa attuma asati ‘maxaafan xaafanaadan’ Yihooway oottidoy hegaassa. (Erm. 30:2) “Xoossaa ogee suure” gidiyo gishshawu, Geeshsha Maxaafaa baggaara I nunaara haasayiyoogee ufayssiyaaba, qassi nuna maaddiyaaba gidiyoogaa ammanettoos.—Maz. 18:30.

3. Geeshsha Maxaafay hanno gakkanawu takkanaadan Yihooway waati oottidee? (Isiyaasa 40:8)

³ Isiyaasa 40:8 nabbaba. Daro shaꞌu layttawu Xoossaa Qaalay ammanettida asawu loꞌꞌo zoriyaa zoriiddi takkiis. Waatidi? Geeshsha Maxaafay daro layttappe kase sohuwaara moorettiyaaban xaafettido gishshawu, koyro xaafettidaageetuppe awugeenne ha wodiyan baawa. SHin Yihooway Geeshsha Maxaafaa asay duuqqidi xaafanaadan oottiis. He asati nagaranchcha gidikkokka, akeekan xaafidosona. Leemisuwawu, Ibraawetto Geeshsha Maxaafaa xeelliyaagan issi eranchchay hagaadan giis:  “Beni xaafettida maxaafatuppe qofay laamettennan duuqetti xaafettida hara ay maxaafaykka baynnaagaa nuuni ammanoos.” Yaatiyo gishshawu, Geeshsha Maxaafay sohuwaara moorettiyaaban daro layttappe kase xaafettidabanne A duuqqi xaafida asati nagaranchcha gidikkonne, nuuni ha wodiyan Geeshsha Maxaafaappe nabbabiyoobay, A xaafissida Yihoowa qofaa gidiyoogaa ammanettana danddayoos.

4. Nuuni ha huuphe yohuwan ay pilgganee?

⁴ Yihooway ‘loꞌꞌo imo ubbaanne kumetta woyto ubbaa’ nuussi immees. (Yaaq. 1:17) Geeshsha Maxaafay Yihooway nuussi immido alꞌꞌo imotatuppe issuwaa. Issi uri nuussi imotaa immiyoogee I nunanne nuussi koshshiyaabaa loytti eriyoogaa bessees. Geeshsha Maxaafaara gayttidaagankka hanotay hegaa mala. Nuuni he imotaa pilggiyo wode Yihoowaabaa darobaa tamaaroos. I nunanne nuussi koshshiyaabaa loytti erees. Yihoowa eeshshatuppe heezzata xeelliyaagan Geeshsha Maxaafaappe nuuni tamaariyoobaa ha huuphe yohuwan pilggana; hegeetikka, A aadhdhida eratettaa, suure pirddaanne siiquwaa. Xoossay aadhdhida eranchcha gidiyoogaa Geeshsha Maxaafay waati qonccissiyaakko ane koyro beꞌoos.

5. Geeshsha Maxaafay Xoossaa aadhdhida eratettaa qonccissiyo issi ogee awugee?

⁵ Yihooway nuussi A loꞌꞌo zoree koshshiyoogaa erees. Qassi A imota gidida Geeshsha Maxaafan A aadhdhida eratettay deꞌees. Geeshsha Maxaafaa zoree asaa keehi maaddees. Geeshsha Maxaafay asay laamettanaadan oottees. Muusee Geeshsha Maxaafan koyro maxaafata xaafido wode, Xoossaa asa gidida Israaꞌeelatussi hagaadan giis: “Ha qaalai intteyyo de7oppe attin, coo mela qaala gidenna.” (Zaa. 32:47) Geeshsha Maxaafaa zoriyaa kaalliyaageeti ufayssiya deꞌuwaa deꞌoosona. (Maz. 1:2, 3) Xoossaa Qaalay daro wodiyaappe kase xaafettikkonne, haꞌꞌikka asaa deꞌoy giiga gidanaadan maaddees. Leemisuwawu, Geeshsha Maxaafaa zoriyaa kaalliyoogaa doommido gishshawu, eta deꞌoy keehi laamettidonne giiga gidido 50ppe dariya asatubaa, “Geeshsha Maxaafay Asay Laamettanaadan Oottees” giya jw.org saytiyan kaalli kaalli kiyiyaagaappe demmana danddayaasa.—1 Tas. 2:13.

6. Nuuni Geeshsha Maxaafay hara maxaafa mala gidenna giyoy aybissee?

⁶ Xoossaa Qaalaa mala hara maxaafi baawa. Hegaadan giyoy aybissee? Ayssi giikko, he maxaafaa xaafissida Xoossaa Yihooway ubbaa danddayiyaagaa, merinawu deꞌiyaagaanne aadhdhida eratettan aara likketiyaabi baynnaagaa. Hara daro maxaafata eta xaafidaageeti hayqqi simminkka asay nabbabees. SHin he maxaafatun deꞌiya zoree darotoo guyyeppe maaddenna. Gidoppe attin, aadhdhida eratettaa immiya Geeshsha Maxaafay yootiyo maarati ubbatoo maaddoosona; asi deꞌido wode ubban hegeeti maaddidosona. Nuuni Geeshsha Maxaafaa nabbabiyo wodenne nabbabidobaa wotti dentti qoppiyo wode, A xaafissidaagee nuuni Geeshsha Maxaafaa zoriyaa nu deꞌuwan waati oosuwan peeshshanaakko akeekanaadan maaddiya geeshsha ayyaanaa nuussi immees. (Maz. 119:27; Mil. 3:16; Ibr. 4:12) Ee, Geeshsha Maxaafaa xaafissidaagee nena maaddanawu giigi uttiis. Hegee nuuni Geeshsha Maxaafaa ubbatoo nabbabanaadan oottees!

7. Geeshsha Maxaafay Xoossaa asay issuwaa gidanaadan beni waati maaddidee?

⁷ Geeshsha Maxaafay Xoossaa aadhdhida eratettaa qonccissiyo hara ogee, Xoossaa asawu issippetettay deꞌanaadan oottiyoogaa. Israaꞌeelati Hidootaa Biittaa gelido wode dumma dumma heeran deꞌidosona. Issoti issoti  moliyaa oyqqiyaageeta, harati mehiyaa haariyaageeta, qassi harati goshshanchchata. Issi heeran deꞌiya Israaꞌeelati hara heeran deꞌiya Israaꞌeelatussi qoppiyoogaa sohuwaara aggana danddayoosona. SHin dumma dumma wodetun, Xoossaa Qaalaa nabbabiyo wodenne qonccissiyo wode Israaꞌeelati issippe shiiqidi siyanaadan Yihooway hanotaa injjeyiis. (Zaa. 31:10-13; Nah. 8:2, 8, 18) Ammanettida issi Israaꞌeela bitanee Yerusalaame gakkidi, Yihoowawu goynniya dumma dumma biittaappe yiida daro miiloone asaa beꞌiyo wode awu aybi siyettanaakko qoppa! Yihooway hegaa mala hanotaa injjeyiyoogan ba asay issuwaa gididi deꞌanaadan oottiis. Guyyeppe, Kiristtaane gubaaꞌee eqqido wode, dumma dumma qaalaa haasayiya attumaageetinne maccaageeti gubaaꞌiyan deꞌoosona. Etappe amaridaageeti erettida asa, harati qassi hegaa mala asa gidokkona; amaridaageeti dure harati qassi hiyyeesa. SHin eti Geeshsha Maxaafaa siiqiyo gishshawu, issuwaa gididi tumu Xoossawu goynnidosona. Mati ammanidaageeti Xoossaa Qaalaa akeekana danddayiyoy Yihoowawu goynniya harati maaddiyo wodenne issippe shiiqiyo wode xallaana.—Oos. 2:42; 8:30, 31.

8. Geeshsha Maxaafay Xoossaa asay issuwaa gidanaadan ha wodiyan waati maaddii?

⁸ Aadhdhida eranchcha gidida nu Xoossay Geeshsha Maxaafaa baggaara ubbatoo ba asaa tamaarisseesinne issuwaa oottees. Yihoowa xeelliyaagan nuuni erana koshshiya tumaa ubbaa  Geeshsha Maxaafay yootees. Geeshsha Maxaafaa nabbabiyo, qonccissiyoonne tobbiyo wode siyanawu, gubaaꞌe shiiqotanne gita shiiqota ubbatoo shiiqoos. Hegaa gishshawu, Yihooway ba asay ‘issippe ayyo oottanaadan’ maaddanawu Geeshsha Maxaafaa goꞌettees.—Sof. 3:9.

9. Geeshsha Maxaafay yootiyoobaa akeekanawu nuussi koshshiya eeshshay aybee? (Luqaasa 10:21)

⁹ Yihoowa aadhdhida eratettaa qonccissiya hara naqaashaa beꞌa. I Geeshsha Maxaafan deꞌiya daro qofaa ashkke asatu xallay akeekana danddayiyo ogiyan xaafissiis. (Luqaasa 10:21 nabbaba.) Ubbasan deꞌiya asay Geeshsha Maxaafaa nabbabana danddayees. Issi eranchchay “daro asay hara maxaafatuppe aaruwan Geeshsha Maxaafaa nabbabiyoogaanne hegaa akeekan nabbabiyoogaa” yootiis. SHin Geeshsha Maxaafay yootiyoobaa akeekananne hegaa oosuwan peeshshana danddayiyay ashkke asatu xalla.—2 Qor. 3:15, 16.

10. Geeshsha Maxaafay Yihoowa aadhdhida eratettaa qonccissiyo hara ogee aybee?

¹⁰ Geeshsha Maxaafay yootiyo Yihoowa aadhdhida eratettaabaa nuuni hara ogiyankka tamaarana danddayoos. Yihooway nuna Geeshsha Maxaafaa citan tamaarissiyoogaa xallan gidennan, huuphiyan huuphiyan nuna tamaarisseesinne minttettees. Nuuni ubbay Yihoowa Qaalaa nabbabiyo wode, I nuussi huuphiyan huuphiyan qoppiyoogaa akeekana danddayoos. (Isi. 30:21) Nena metoy gakkiiddi deꞌiyo wode Geeshsha Maxaafaa, qassi neessi xaafettidaba milatiya xiqiseta aapputoo nabbabadii? Gidikkokka, Geeshsha Maxaafay daro miiloone asay akeekana danddayiyo ogiyan xaafettiis. Geeshsha Maxaafay neessi koshshiyaabaa bessiya wodiyan waatidi yootana danddayii? Geeshsha Maxaafaa Xaafissidaagee saluwaaninne saꞌan aadhdhida eranchcha gidiyo gishshataassa.—2 Xim. 3:16, 17.

11. Geeshsha Maxaafay xaafettido ogee Xoossay asa asappe shaakkennaagaa waatidi bessii?

¹¹ Yihoowawu deꞌiya hara eeshshay suure pirddaa. (Zaa. 32:4) Suure pirddiya uri darotoo asa asaappe shaakkenna, qassi Yihooway asa asappe shaakkenna. (Oos. 10:34, 35; Roo. 2:11) Geeshsha Maxaafay daro qaalan xaafettidoogee I asa asappe shaakkennaagaa bessiyaaba. Koyro xaafettida 39 maxaafatuppe dariya baggay, he wode deꞌiya Xoossaa asay metootennan akeekana danddayiyo Ibraawetto doonan xaafettiis. Gidoppe attin, koyro xeetu layttan daro asay Giriikettuwaa haasayiyo gishshawu, hara 27 maxaafati Giriikettuwan xaafettidosona. Yihooway ba Qaalay issi doona xallan xaafettana koshshees giidi kuuyibeenna. Ha wodiyan hosppun biiloone gidiya asay dumma dumma qaalaa haasayees. Yaatin, keehi daro asay Yihoowabaa waatidi tamaarana danddayii?

12. Daaneela 12:4y ha wurssetta gallassatun polettido issi ogee aybee?

¹² Wurssetta wodiyan Geeshsha Maxaafaa tumu ‘eray daranaagaa’ Yihooway hananabaa yootiya Daaneela baggaara yootiis. Daroti hegaa akeekana danddayoosona. (Daaneela 12:4 nabbaba.) He eray daranaadan oottida issibay Geeshsha Maxaafaynne Geeshsha Maxaafaa qofay deꞌiyo xuufeti birshshettidoogaa, attamettidoogaanne daro asaa gakkidoogaa. Geeshsha Maxaafay daro qaalan birshshettidanne daro asaa gakkida maxaafa. Zalꞌꞌe dirijjiteti attamissiyo issi issi Geeshsha Maxaafaa birshshettati keehi alꞌꞌo. Yihoowa asay Geeshsha Maxaafaa kumettaa woy appe amaridaagaa 240ppe dariya qaalan birshshiis, qassi ooninne miishsha qanxxennan hegaa ekkana danddayees. Hegaappe denddidaagan, wurssettay yaanaappe kase ubba biittan deꞌiya asay  ‘Kawotettaa wonggeliyaa mishiraachchuwaa’ siyiiddi deꞌees. (Maa. 24:14) Suure pirddiya nu Xoossay, daro asay A Qaalaa nabbabidi A eranaadan koyees. I hegaadan oottiyoy nuna ubbaa keehi siiqiyo gishshataassa.

13. Geeshsha Maxaafay Yihoowa siiquwaabaa qonccissees giyoy aybissee? (Yohaannisa 21:25)

¹³ Geeshsha Maxaafay Yihoowawu deꞌiya waanna eeshshay siiquwaa gidiyoogaa nuuni akeekanaadan maaddees. (1 Yoh. 4:8) Geeshsha Maxaafan xaafettanaadaaninne xaafettennaadan Yihooway oottidobati aybakko akeeka. I nuuni aara dabbotanawu, ha wodiyan ufayssiya deꞌuwaa deꞌanawunne merinaa deꞌuwaa demmanawu nuussi koshshiyaabaa yootiis. Gidikkokka, Yihooway nuna siiqiyo gishshawu, nuuni danddayiyoogaappe aaruwan darobata nuussi yootibeenna.—Yohaannisa 21:25 nabbaba.

14. Xoossay nuna siiqiyoogaa qonccissiyo Geeshsha Maxaafay yootiyo hara ogee aybee?

¹⁴ Yihooway nuna bonchchuwan haasayissiyoogankka siiqiyoogaa bessiis. Nuuni nu deꞌo ubban oottana bessiya woy bessenna daro higgeta I Geeshsha Maxaafan nuussi yootibeenna. Ubba I nuuni loꞌꞌobaa kuuyanaadan maaddanawu tumu taariketa, ufayssiya hiraagatanne maaddiya zoreta goꞌettees. Ha ogetun nuuni wozanappe A siiqanaadaaninne awu azazettanaadan Xoossaa Qaalay nuna maaddees.

15. (a) Yihooway nuussi qoppiyoogaa Geeshsha Maxaafay waati qonccissii? (b) Misiliyan qonccidaagaadan, guutta naꞌiyaa, yelaga ishaynne cima michchiyaa wotti dentti qoppiyo Geeshsha Maxaafaa taariketi awugeetee? (Doo. 39:1, 10-12; 2 Kaw. 5:1-3; Luq. 2:25-38)

¹⁵ Geeshsha Maxaafay Yihooway nuussi keehi qoppiyoogaa yootees. Waatidi? A Qaalan  asaabaa yootiya daro taarikee deꞌees. Geeshsha Maxaafan etabay odettidoogeeti “nu mala asa” gidiyo gishshawu, eta hanotaa akeekana danddayoos. (Yaaq. 5:17) Ubbaappe aaruwan, Yihooway nu mala asaa waati oyqqidaakko akeekiyoogan, Yihooway “maarotainne qaretai kumidoogaa” gidiyoogaa loytti akeekana danddayoos.—Yaaq. 5:11.

16. Nagaraa oottida asatubaa Geeshsha Maxaafaappe nuuni nabbabiyo wode Yihoowaabaa ay tamaariyoo? (Isiyaasa 55:7)

¹⁶ Yihooway nuna hara ogiyankka siiqidoogaa Geeshsha Maxaafay yootees. Nuuni nagaraa oottiyo wode Xoossay nuna mule aggennaagaa Geeshsha Maxaafay yootees. Israaꞌeelati Yihoowa bolli darotoo nagaraa oottikkonne, eti bantta nagaraappe wozanappe simmido wode Xoossay etawu atto giis. (Isiyaasa 55:7 nabbaba.) Koyro xeetu layttan deꞌida Kiristtaanetikka Xoossay eta keehi siiqiyoogaa eridosona. Wolqqaama nagaraa oottidi ba nagaraappe simmida bitaniyawu ‘atto gaanawunne A minttettanawu’ bessiyoogaa kiitettida PHawuloosi ayyaanay kaalettin ba mala Kiristtaanetussi yootiis. (2 Qor. 2:6, 7; 1 Qor. 5:1-5) Yihooway bawu goynniyaageeti nagaraa oottido gishsha xallawu eta ixxibeennaagee ufayssiyaaba! Ubba I eta siiquwan maaddiis, zoriisinne zaarettidi ba dabbo gidanaadan oottiis. Ha wodiyan bantta nagaraappe simmiya ubbawu hegaadan oottanawu I qaalaa geliis.—Yaaq. 4:8-10.

17. Geeshsha Maxaafay alꞌꞌo imota giyoy aybissee?

¹⁷ Yihooway nuussi alꞌꞌo imotaa immiis. A Qaalay alꞌꞌoba giyoy aybissee? Nuuni tamaaridoogaadan, Geeshsha Maxaafay Xoossaa aadhdhida eratettaa, A suure pirddaanne siiquwaa qonccissees. Yihooway nuuni abaa eranaadan koyiyoogaa ha maxaafay bessees. Nuuni A dabbo gidanaadan I koyees.

18. Yihoowa ‘loꞌꞌo imota’ gidida Geeshsha Maxaafaa nashshiyoogaa waatidi bessana danddayiyoo?

¹⁸ Xoossaa Qaalay “lo77o imo” gidiyoogaa nuuni dogana koshshenna. (Yaaq. 1:17) Yaatiyo gishshawu, ubbatoo Geeshsha Maxaafaa nashshiyaageeta gidoos. Nuuni Xoossaa Qaalaa nabbabiyoogaaninne hegaa wotti dentti qoppiyoogan nashshiyoogaa bessana danddayoos. Yaatiyo wode, Geeshsha Maxaafaa Xaafissidaagee nu baaxiyaa anjjanaagaa, qassi nuuni ‘Xoossaa loyttidi eranaagaa’ ammanettana danddayoos.—Lee. 2:5.