Ta laggee haymaanootiyaabaa eriya asadan taani qoppabeenna gishshawu miiccaas. Taani, “Geeshsha Maxaafaabaa ne ay eray?” gaada oychchaas. I sohuwaara zaaribeenna. Wurssettan, ba aayyiyaa Yihoowa Markka gidiyoogaa tawu yootiis; I ippe amaridabaa tamaariis. Taani eranawu keehi koyada, I gujjidi tawu yootanaadan oychchaas.

Nuuni haasayiiddi qamissida. Ha alamiyaa haariyay Seexaanaa gidiyoogaa Geeshsha Maxaafay yootiyoogaa ta laggee tawu odiis. (Yoh. 14:30) Hegaa neeni ne deꞌo laytta ubban erana danddayaasa, shin hegee tawu oorattaba. Kehanne suure pirddiya Xoossay ha alamiyaa haarees giyoogaa taani darotoo siyaas. SHin taani ta deꞌuwan beꞌidobaappe denddidaagan hegaa ammanabeykke. Tawu layttay 26 xalla gidikkonne, unꞌꞌissiya darobaa beꞌaas.

Ta aaway Amarkkaa olanchchatu horophilliyaa laaggiis. Hegaa gishshawu, taani naatettan deꞌiyo wode niyukileere olay denddana danddayiyoogaa erays; olanchchati awudenne niyukileere bombbiyaa xuussanawu giigi uttidosona. Taani Kaliforniyan kolloojjiyan tamaariyo wode Vetinaamen olay deꞌees. Taani hegaa eqettiya tamaaretuura walahetaas. Polisetu citay nuna oyqqanawu yedettin, nuuni woxxida; qassi yeekkanaadan oottiya cuwaappe denddidaagan, nuuni maara shemppanawunne loytti xeellanawu danddayibookko. He wodee maaray mankkay xayidonne danobay kumido wode. Qassi deriyaa haariyaageeta woriyoogee, eqettiyoogeenne shabbirssay deꞌees. Oottana koshshiyaabaa xeelliyaagan ubba asay dumma dummabaa qoppees. Ubbabay asawu kirqqi giis.

Taani 1970n, huuphessa Alaskkan oosuwaa doommada daro miishshaa shiishshaas. Hegaappe simmin motoriyaa shammanawu Londdene baas; qassi awu biyaakko erennan, motoriyaa laaggada tohossa baggi baas. Amarida aginatuppe simmin Afirkkaa gakkaas. Taani yaa baydda bantta meto ubbaappe laꞌa kiyanawu koyiya asaara gayttaas.

Hegaa gishshawu, taani beꞌidobaappenne siyidobaappe denddidaagan, iita ayyaana meretay saꞌaa haarees giidi Geeshsha Maxaafay tamaarissiyoogaa  ammanaas. SHin Xoossay ha saꞌaa haarana xayikko, I ay oottiiddi deꞌii? Taani hegaa eranawu koyaas.

Kaalliya aginatun taani zaaruwaa demmaas. Guyyeppe, eta hanotay dumma dumma gidikkokka issi tumu Xoossawu ammanettidi deꞌiyoogaa bessida daro asaa eraasinne siiqaas.

Taani Londdene simmido wode, ta laggiyaa aayeera gayttaas; yaatin A tawu Geeshsha Maxaafaa immaasu. Guyyeppe, taani Nezerlandden Amstterdaame katamaa biido wode, ogiyan deꞌiya xomppiyaa pooꞌuwan Geeshsha Maxaafaa taani nabbabiyoogaa issi Yihoowa Markkay beꞌidi gujjada eranaadan tana maaddiis. Hegaappe simmin, Ayerlanden, Dabiline katamaa baas; qassi yan Yihoowa Markkatu macara biiruwaa demmaas. Taani kariya qoxxaas. Yan akeekanchchanne meezee deꞌiyo ishaa, Artter Maatiyuzaara gayttaas. Tana Geeshsha Maxaafaa xannaꞌissanaadan taani A oychchin I maayettiis.

Taani minnada xannaꞌiyoogaa doommaas, qassi Yihoowa Markkati attamissido maxaafatanne maxeeteta yeemuwan nabbabaas. Qassi Geeshsha Maxaafaakka nabbabays. Hegan keehi ufayttaas. Tamaarida asay daro xeetu layttawu oychchiyo oyshatu zaaruwaa, gubaaꞌiyan guutta naatikka eriyoogaa beꞌaas; hegeetikka, ‘Asaa iitabay gakkiyoy aybissee? Xoossay oonee? Asay hayqqiyo wode waanii?’ giyaageeta. Ta laggeti ubbaykka Yihoowa Markkata. Taani he biittan hara oonanne erenna gishshawu hegee wayissibeenna. Taani Yihoowa siiqanaadaaninne I koyiyoobaa oottanaadan eti tana maaddidosona.

Taani 1972n xammaqettaas. Issi layttappe guyyiyan, aqinye gidada Huuphessa Ayerlanden, Nuwure kataman, issi guutta gubaaꞌiyan haggaaziyoogaa doommaas. Taani deretiyaasan haakkidi deꞌiya shuchchan keexettida issi guutta keettaa keraa ekkaas. Yan deꞌiya dembban miizzati deꞌoosona, qassi taani eta sinttan ta haasayata meezetays. Eti waammotiiddi taani haasayiyoobaa loytti ezggoosona. Eti tana zorana xayikkonne, taani haasayata shiishshiyo wode waatada ezggiyaageeta xeellanaakko eranaadan maaddidosona. Taani 1974n dumma aqinye gidada sunttettaas; qassi ta deꞌo laytta ubban tawu lagge gidida, Nijel Pittaara issippe haggaazaas.

He wode Huuphessa Ayerlanden daro olay deꞌees. Hegaa gishshawu, issoti issoti Huuphessa Ayerlanddee, “bombbeenne xiitee darido biittaa” goosona. Asay ogiyan issoy issuwaara warettiyoogaa, xiitiyaa  tokkosiyoogaanne kaamiyaa xuuggiyoogaa beꞌiyoogee meeze gididaba. Darotoo metoy merettiyoy polotikaaranne haymaanootiyaara gayttidabaana. Gidikkonne, Yihoowa Markkati polotikan ooyyoonne exatennaagaa Protesttanttetinne Kaatolike haymaanootiyaa kaalliyaageeti eriyo gishshawu, nuuni laꞌatettan sabbakoos. Asay awude, qassi awan olay deꞌiyaakko darotoo eriyo gishshawu, nuuni qohuwaappe naagettanaadan nuussi yootees.

Gidikkonne, metiya hara hanotaykka deꞌees. Issi galla, Denis Karigina giyo hara aqinyaara, Yihoowa Markkati baynna sohuwan, qassi kase nuuni issitoo xallaa biido matan deꞌiya kataman sabbakida. Issi maccaasiyaa, nuuni Ayerlandde qaalaa haasayenna gishshawu, qosan Inggilize wotaaddaratuura oottiyaageeta gaada nuna mootaasu. He mootuwaa gaasuwan nuuni keehi yayyida. Neeni wotaaddaratuura laggetikko, nena tokkosidi worana woy ne gulbbataa menttana danddayoosona. Nuuni meeguwan nurkka eqqidi otobisiyaa naagishin, nuna mootida maccaasiyaa deꞌiyo shaye keettaa kareera kaamee yiyoogaa beꞌida. A kare kiyada nuukko malaataydda, kaame giddon deꞌiya naaꞌꞌu asatuura haasayaasu. He asati leddan nuukko laaggiiddi yiidi otobisee aappun saatiyan yiyaakko oychchidosona. Otobisee yin, eti laaggiyaagaara haasayidosona. Eti haasayiyoobaa nuuni siyana danddayibookko. Otobisee hara asa caanibeenna gishshawu, nuna katamaappe kessidi qohanawu halchchidosona giidi qoppida. SHin nuuni qoppidoogaa mala gidenna. Taani otobisiyaakko baada shufeeriyaa hagaadan oychchaas: “Ha guyyen deꞌiya asati nubaa oychchidonaa?” I hagaadan zaariis: “Intte oonakko taani erays, qassi inttebaa etawu yootaas. Hirggoppite. Inttena ooninne qohenna.”

Taani 1976n Dabiline kataman shiiqido awuraajjaa shiiquwan, a Inggilizeppe yiida Powulina Lomakis giyo dumma aqinyeera gayttaas. A ayyaanaaban mino, ashkkenne puulanchcha. Anne I ishay, Ray naatettaappe doommidi Yihoowa Markka. Issi layttappe guyyiyan Powulinanne taani aqo oyqqida; qassi Huuphessa Ayerlanden, Balemeenan dumma aqinye gididi haggaazida.

Nuuni amarida wodiyawu Belfastten, Lenddonderiyin qassi hara iita heeratun woradaa oosuwaa oottida. Nu ishanttinne michchontti Yihoowawu haggaazanawu, attida haymaanoote wogaa kaallennan aggiyoogaa, qassi zaggiyoogaanne ixuwaa gencciyoogaa beꞌiyoogan nu ammanoy minniis. Yihooway eta keehi anjjiisinne naagiis!

Taani Ayerlandden tammu laytta deꞌaas. Hegaappe simmin, 1981n, 72tta kayan tamaaranawu Giiliyaade shoobettida. Giiliyaadeppe anjjetti simmidi, nuuni Arggo Afirkkan, Seera Liyone maddabettida.

Nuuni misoonaawetu keettan 11 asatuura issippe deꞌida. Nuussi qumaa kattiyo issi sohoy, heezzu sheeshsha keettay, bollaa meecettiyo naaꞌꞌu sohoy, issi silkkee, maayuwaa meecciyo issi maashineenne maayuwaa melissiyo issi maashinee deꞌees. Xomppee darotoo beesinne yees, qassi awude xayiyaakko erettenna. Kaaray ecere xalaala, qassi pooqiyawu garssa kifiliyan shooshshay deꞌees.

Deꞌuwaa hanotay injjetennaba gidikkokka, nuuni haggaazuwan keehi ufayttoos. Asay Geeshsha Maxaafaa bonchchiyo gishshawu nuuni yootiyoobaa loytti siyees. Daroti Geeshsha Maxaafaa xannaꞌidi Yihoowa Markka gididosona. Heeran deꞌiya asay tana, “Mantta Roberttaa” giidi xeesees. Powulino qassi, “Godattee Roberttee” giidi xeesoosona. Amarida wodiyaappe guyyiyan, taani darotoo macara  biiruwaa oosuwaa oottiyo gishshawu, kaseegaadan haggaazuwaa kiyennan aggin asay Powulino, “Godattee Powuliinee” giidi xeesiyoogaa doommiis. Eti tana “Mantta Powulinaa” giidi xeesoosona. Powulina hegaa dosaasu.

Ishanttuppe daroti hiyyeesa gidikkonne, Yihooway ubbatoo etawu koshshiyaabaa kunttees; issi issitoo hegaa maalaaliya ogiyan oottees. (Maa. 6:33) Issi michchiyaa baassinne ba naatussi he gallassa xallawu qumaa shammiyo miishshay deꞌikkonne, shekkeeriyaa xaliyaa shammanawu metootida sahettida issi ishawu he ubba miishshaa immidoogaa taani hassayays. He gallassi guyyeppe, issi maccaasiyaa qoppennan he michcheekko yaada, I huuphiyaa giigissido gishshawu miishshaa iyyo qanxxaasu. Hegaa mala hara darobay haniis.

Nuuni Seera Liyonen uddufun laytta deꞌida. Guyyeppe nuuni Nayjeeriyaa Beeteele gelida. Haꞌꞌi nuuni issi gita macara biiruwan deꞌoos. Taani Seera Liyonen oottiyoogaara issi mala oosuwaa biiruwan oottays; shin Beeteelen oottiyoogee Powulinissi gita laamenne deexxiyaaba. A kase aginan aginan 130 saatiyaa haggaazawusunne ayyaanaaban dicciya Geeshsha Maxaafaa xinaateta xannaꞌissawusu. Haꞌꞌi A peerettida maayuwaa sikkiiddi peꞌiyo, maayuwaa sikkiyo kifiliyan maddabettaasu. A hegaa meezetanawu wodiyaa ekkikkonne, harati A oottiyoobaa nashshiyoogaa akeekaasu; qassi Beeteelen deꞌiya harata minttettanawu bawu danddayettida ubbabaa oottiyoogan xeelaa wottaasu.

Nayjeeriyaa asaa wogay nuussi ooratta, qassi nuuni darobaa meezetana koshshiis. Issi wode, mati Beeteele gelida issi michchiyo tanaara eretissanawu issi ishay ta biiruwaa ekkidi yiis. Taani sarotanawu iyyo kushiyaa immiyo wode A ta tohuwaa matan ziqqi gaada gulbbataasu. Taani dagammaas! Taani sohuwaara naaꞌꞌu xiqiseta hassayaas: Oosuwaa 10:25, 26, qassi Ajjuutaa 19:10. ‘A hegaadan oottennaadan yootana koshshii?’ gaada qoppaas. SHin A Beeteele gelidoogaa akeekaas; qassi Geeshsha Maxaafay tamaarissiyoobaa erawusu.

Hegaappe simmin, haasayiyo wode yeellataas, qassi guyyeppe taani amaridabaa pilggaas. He biittan amarida sohotun he wode meeze gididabaa he michchiyaa oottidoogaa taani akeekaas. Attumaageetikka hegaadan oottoosona. Hegee eti harata bonchchiyoogaa bessiyo oge. Hegee goyno gidenna; hegaa mala hanotaa Geeshsha Maxaafaykka yootees. (1 Sam. 24:8) Taani ta michchiyo  yeellayana danddayiya aybanne haasayabeenna gishshawu, keehi ufayttaas.

Daro layttawu ammanettidi deꞌida, Nayjeeriyan deꞌiya daro ishanttuura nuuni gayttida. Ayziya Adagiboona b hanotaa beꞌa. I yelagatettan tumaa siyiis, shin guyyeppe A goga harggee oyqqiis. I goga harggiyan oyqqettidaageeti deꞌiyoosaa biis; yan Yihoowa Markki A xalla. Harati eqettishinkka, goga harggee oyqqido 30ppe dariyaageeti tumaa siyanaadan maaddiisinne yan gubaaꞌee eqqanaadan oottiis.

Nuuni 1996n Keeniyaa macara biiruwaa maddabettida. Doomettan odido, xomoosanawu biido wodiyaappe simmin, he biittaa zaarettada biidoy he laytta. Nuuni Beeteelen deꞌida. Qassi Beeteele gibbiyan daro qaareti deꞌoosona. Eti dumma dumma mittaa ayfee son deꞌiyo michchonttuppe wuuqqoosona. Issi gallassi, Beeteelen deꞌiya issi michchiyaa maskkootiyaa dooya aggaasu. A soo simmiyo wode, daro qaareti I kifiliya gelidi qumaa miyoogaa A beꞌaasu. A waassaydda kare woxxaasu. Qaaretikka waassiiddi maskkootiyaara guppidi kiyidosona.

Powulinanne taani Siwahilettuwaa haasayiya gubaaꞌiyaa maddabettida. Daro takkennan, Gubaaꞌe Maxaafa Xinaatiyaa (ha wodiyan Gubaaꞌiyaa Geeshsha Maxaafaa Xinaatiyaa geetettees) kaalettanaadan maddabettaas. Gidikkokka, taani he qaalaa loyttada haasayana danddayikke. Taani kasetada giigettiyo gishshawu, oyshata nabbabana danddayays. SHin zaariyaageetu qofay xaafettidaagaappe guuttaa dummatiyo wodekka, hegaa akeekana danddayikke. Hegee tawu keehi deexxiis! Ishanttubaynne michchonttubay tana qarettiis. Taani shiiquwaa kaalettanaadan eti danddayaaninne ashkketettan eeno giidoogee tana keehi maalaalissiis.

Nuuni issi layttaappe guuxxiya wodiyawu Keeniyan deꞌida. Hegaappe simmin, 1997n Niwu Yorkken, Birukiliine Beeteele shoobettida. Nuuni haꞌꞌi deꞌiyo biittan asawu daro aqoy deꞌees; hegeekka metuwaa kaalettana danddayees. (Lee. 30:8, 9) SHin hegaa mala biittankka, nu ishanttunne michchonttu ammanoy mino. Nu ishanttinne michchontti bantta wodiyaanne bantta aquwaa goꞌettiyoy, banttawu duretanawu gidennan, Yihoowa dirijjitiyaa oosuwaa kaafanaassa.

Daro layttawu nu ishantti deꞌiyo hanotay dumma dumma gidikkokka, eta ammanuwaa akeekida. Ayerlanden, nu ishantti olay deꞌishinkka mino ammanoy deꞌiyoogaa bessidosona. Afirkkan, nu ishantti hiyyeesatettaynne zaggiyoogee deꞌishinkka mino ammanoy deꞌiyoogaa bessidosona. Amarkkan, nu ishantti duretettay deꞌishinkka mino ammanoy deꞌiyoogaa bessidosona. Yihooway dumma dumma hanotan deꞌiiddi, A siiqiya asata beꞌiyoonne akeekiyo wode keehi ufayttees!

Layttay “shimainniyaa muhuuhaappekka aadhdhi eesotees.” (Iyy. 7:6) Nuuni haꞌꞌi Niwu Yorkken, Worwiken deꞌiya waanna biiruwan haratuura issippe oottoos; qassi issoy issuwaa wozanappe siiqiyaageetuura issippe oottiyoogan ufayttoos. Matan, zawi baynna ammanettidaageeta woytana, nu Kawuwaa Kiristtoos Yesuusa maaddanawu nuussi danddayettida ubbabaa oottiyoogan keehi ufayttoos.—Maa. 25:34.