An Siyahan nga Libro han mga Hadi 12:1-33
12 Hi Rehoboam kinadto ha Sikem, kay an bug-os nga Israel kinadto ha Sikem+ basi himoon hiya nga hadi.+
2 Pakabati gud hito ni Jeroboam nga anak nga lalaki ni Nebat (nakadto pa hiya ha Ehipto kay pinalagiw hiya tungod kan Hadi Solomon ngan inukoy hiya ha Ehipto),+
3 ira iginpatawag hiya. Katapos hito, hi Jeroboam ngan an bug-os nga kongregasyon han Israel kinadto kan Rehoboam ngan nagsiring:
4 “Ginpakurian kami han imo tatay ha pagpas-an han amon yugo.+ Pero kon imo pasayunon an makuri nga pagpatrabaho han imo tatay ngan imo pagaanon an mabug-at* nga yugo nga iya iginpapas-an ha amon, magsiserbi kami ha imo.”
5 Salit nagsiring hiya ha ira: “Lakat kamo ha sulod hin tulo ka adlaw; katapos, balik kamo ha akon.” Amo nga nagkalakat an katawohan.+
6 Katapos, hi Hadi Rehoboam nangaro hin sagdon ha lagas nga kalalakin-an* nga nagserbi ha iya tatay nga hi Solomon han buhi pa. Hiya nagsiring: “Ano an iyo maisasagdon kon paonan-o ko babatunon ini nga katawohan?”
7 Binaton hira ha iya: “Kon yana nga adlaw magigin surugoon ka hini nga katawohan ngan magsugot han ira hangyo ngan bumaton ka hin pabor ha ira, magigin surugoon mo pirme hira.”
8 Pero iginsalikway niya an sagdon ha iya han lagas nga kalalakin-an,* ngan nangaro hiya hin sagdon ha batan-on nga kalalakin-an nga kadungan-dungan niya ngan mga kabulig na niya yana.+
9 Nagpakiana hiya ha ira: “Ano an iyo maisasagdon kon paonan-o kita mabaton hini nga katawohan nga nagsiring ha akon, ‘Pagaana an yugo nga iginpapas-an ha amon han imo tatay’?”
10 An batan-on nga kalalakin-an nga iya kadungan-dungan nagsiring ha iya: “Ini an imo igyayakan hini nga katawohan nga nagsiring ha imo, ‘Ginpabug-at han imo tatay an amon yugo, pero sadang mo ito pagaanon para ha amon’; ini an imo igsusumat ha ira, ‘An akon kamuyingking magigin mas madakmol pa kay han baliatang han akon tatay.
11 Ginpapas-an kamo han akon tatay hin mabug-at nga yugo, pero dudugangan ko an iyo yugo. Ginsirotan kamo han akon tatay pinaagi hin mga latigo, pero sisirotan ko kamo pinaagi hin mga latigo nga may magtarom nga mga kataposan.’”
12 Hi Jeroboam ngan an ngatanan nga katawohan kinadto kan Rehoboam ha ikatulo ka adlaw, sugad han ginsiring han hadi: “Balik kamo ha akon ha ikatulo ka adlaw.”+
13 Pero an hadi mapintas nga binaton ha katawohan, nga iginsasalikway an sagdon ha iya han lagas nga kalalakin-an.*
14 Nagyakan hiya ha ira sumala ha sagdon han batan-on nga kalalakin-an, nga nasiring: “Ginpabug-at han akon tatay an iyo yugo, pero dudugangan ko an iyo yugo. Ginsirotan kamo han akon tatay pinaagi hin mga latigo, pero sisirotan ko kamo pinaagi hin mga latigo nga may magtarom nga mga kataposan.”
15 Salit an hadi waray mamati ha katawohan, kay hi Jehova an nagpahinabo hini,+ basi matuman an pulong ni Jehova kan Jeroboam nga anak ni Nebat nga iya ginyakan pinaagi kan Ahias+ nga Shilonita.
16 Han nakita han bug-os nga Israel nga an hadi diniri pagpamati ha ira, an katawohan binaton ha hadi: “May-ada ba kami malon kan David? Waray kami panurundon ha anak ni Jesse. Balik ha iyo mga dios, O Israel. Yana panginanoa an imo kalugaringon nga panimalay, O David!” Ngan nanguli an mga Israelita ha ira mga balay.*+
17 Pero hi Rehoboam padayon nga naghadi ha mga Israelita nga naukoy ha mga syudad han Juda.+
18 Katapos, ginsugo ni Hadi Rehoboam hi Adoram,+ nga nagdudumara ha mga gin-obligar nga magtrabaho para ha hadi, pero ginbato hiya han bug-os nga Israel tubtob nga namatay. Nakahimo pagsakay hi Hadi Rehoboam ha iya karuwahe basi pumalagiw ngadto ha Jerusalem.+
19 Ngan an mga Israelita nagrebelde+ ha panimalay ni David tubtob hini nga adlaw.
20 Pakabati gud han bug-os nga Israel nga binalik na hi Jeroboam, iginpatawag nira hiya ngadto ha katirok ngan ginhimo hiya nga hadi ha bug-os nga Israel.+ Bisan usa han katawohan waray nagsunod ha panimalay ni David gawas la han tribo ni Juda.+
21 Pag-abot ni Rehoboam ha Jerusalem, gintirok dayon niya an bug-os nga panimalay ni Juda ngan an tribo ni Benjamin, 180,000 nga binansay* nga girriro basi makig-away ha panimalay ni Israel para maibalik an pagkahadi kan Rehoboam nga anak ni Solomon.+
22 Katapos, an mensahe han tinuod nga Dios inabot kan Semaias+ nga surugoon han tinuod nga Dios, nga nasiring:
23 “Sumati hi Rehoboam nga anak ni Solomon nga hadi han Juda ngan an bug-os nga panimalay ni Juda ngan ni Benjamin ngan an iba pa nga katawohan,
24 ‘Ini an siring ni Jehova: “Ayaw kamo pagsagka ngan pakig-away ha iyo kabugtoan nga Israelita. An tagsa ha iyo kinahanglan umuli ha iya balay, kay ako an nagpahinabo hini.”’”+ Salit sinugot hira ha ginsiring ni Jehova ngan nanguli ha ira balay, sugad han ginsiring ha ira ni Jehova.
25 Katapos, gintukod* ni Jeroboam an Sikem+ ha kabukiran han Efraim ngan inukoy didto. Tikang didto, ginawas hiya ngan gintukod* an Penuel.+
26 Hi Jeroboam nagsiring ha iya kasingkasing: “Yana an ginhadian ibabalik ha panimalay ni David.+
27 Kon ini nga katawohan padayon nga sumagka basi maghalad hin mga halad ha balay ni Jehova ha Jerusalem,+ an kasingkasing hini nga katawohan mabalik liwat ha ira ginoo nga hi Hadi Rehoboam han Juda. Oo, papatayon nira ako ngan mabalik hira kan Hadi Rehoboam han Juda.”
28 Katapos mangaro hin sagdon, an hadi naghimo hin duha nga bulawan nga nati nga baka+ ngan nagsiring ha katawohan: “Makuri hinduro para ha iyo nga sumagka ngadto ha Jerusalem. Ini an iyo Dios, O Israel, nga naggawas ha iyo ha tuna han Ehipto.”+
29 Katapos, an usa iginbutang niya ha Bethel,+ ngan an usa pa iginbutang niya ha Dan.+
30 Ngan nagin hinungdan ini han ira pakasala,+ ngan an katawohan kinadto pa ha Dan basi magsingba ha nati nga baka didto.
31 Ngan naghimo hiya hin mga balay para ha pagsingba didto ha higtaas nga mga lugar ngan nagpili hin mga saserdote tikang ha ngatanan nga katawohan, nga diri mga Levita.+
32 Gintikangan liwat ni Jeroboam an usa nga piyesta ha ikawalo ka bulan, ha ika-15 ka adlaw han bulan, pariho han piyesta ha Juda.+ Dida ha halaran nga iya ginhimo ha Bethel,+ naghalad hiya ha nati nga mga baka nga iya ginhimo, ngan ha Bethel nagpili hiya hin mga saserdote para ha higtaas nga mga lugar nga iya ginhimo.
33 Ngan nagtikang hiya paghalad dida ha halaran nga iya ginhimo ha Bethel ha ika-15 ka adlaw han ikawalo ka bulan, ha bulan nga iya mismo ginpili; ngan gintikangan niya an usa nga piyesta para ha katawohan han Israel, ngan sinaka hiya ngadto ha halaran basi maghalad ngan magpaaso han halad.
Mga footnote
^ O “matalumpiguson.”
^ O “ha mga tigurang.”
^ O “han mga tigurang.”
^ O “han mga tigurang.”
^ Lit., “mga tolda.”
^ Lit., “pinili.”
^ O “ginpader.”
^ O “ginpader.”
