An Siyahan nga Libro han mga Hadi 21:1-29
21 Katapos hito ngatanan, may-ada nahitabo nga may kalabotan ha urubasan nga gintatag-iya ni Nabot nga taga-Jezreel; aadto ito ha Jezreel,+ sapit han palasyo ni Ahab nga hadi han Samaria.
2 Hi Ahab nagsiring kan Nabot: “Ihatag ha akon an imo urubasan kay gagamiton ko ito basi tamnan hin mga utanon, kay hirani ito ha akon balay. Katapos, tatagan ko ikaw hin mas maopay nga urubasan kasaliwan hito. O kon karuyag mo, babaydan ko ikaw han kantidad hito.”
3 Pero hi Nabot nagsiring kan Ahab: “Imposible gud nga ihatag ko ha imo an panurundon han akon mga kaapoy-apoyan, kay igindidiri ini ni Jehova.”+
4 Salit hi Ahab sinulod ha iya balay nga aburido ngan masurub-on tungod han baton ha iya ni Nabot nga taga-Jezreel nga nagsiring: “Diri ko ihahatag ha imo an panurundon han akon mga kaapoy-apoyan.” Katapos hinigda hiya ha iya katre, inatubang ha bungbong, ngan diniri pagkaon.
5 An iya asawa nga hi Jezebel+ kinadto ha iya ngan nagpakiana ha iya: “Kay ano nga ikaw* masurub-on hinduro ngan nadiri ka pagkaon?”
6 Binaton hiya: “Tungod kay nagsiring ako kan Nabot nga taga-Jezreel, ‘Papaliton ko an imo urubasan. O kon maruyag ka, tatagan ko ikaw hin iba nga urubasan kasaliwan hito.’ Pero hiya nagsiring, ‘Diri ko ihahatag ha imo an akon urubasan.’”
7 An iya asawa nga hi Jezebel nagsiring ha iya: “Diri ba ikaw an nagmamando sugad nga hadi ha Israel? Buhát, kaon ngan maglipay ka. Ihahatag ko ha imo an urubasan ni Nabot nga taga-Jezreel.”+
8 Salit naghimo hiya hin mga surat ha ngaran ni Ahab ngan ginselyohan ito han panselyo han hadi+ ngan iginpadara an mga surat ngadto ha mga tigurang+ ngan ha mga dungganon nga naukoy ha syudad ni Nabot.
9 Ini an iya iginsurat: “Pagpasamwak kamo hin pagpuasa, ngan palingkora hi Nabot ha atubangan han katawohan.
10 Ngan palingkora ha iya atubangan an duha nga waray pulos nga tawo ngan patestigoha kontra ha iya,+ nga nasiring, ‘Iginsumpa mo an Dios ngan an hadi!’+ Katapos, dad-a niyo hiya ha gawas ngan batoha hiya tubtob nga mamatay.”+
11 Salit ginbuhat han mga lalaki ha iya syudad, an mga tigurang ngan an mga dungganon nga naukoy ha iya syudad, kon ano an nakadto ha mga surat ni Jezebel nga iginpadara ha ira.
12 Nagpasamwak hira hin pagpuasa ngan ginpalingkod hi Nabot ha atubangan han katawohan.
13 Katapos, sinulod an duha han waray pulos nga mga tawo ngan liningkod ha atubangan ni Nabot ngan nagtestigo kontra ha iya ha atubangan han katawohan, nga nasiring: “Iginsumpa ni Nabot an Dios ngan an hadi!”+ Katapos hito, ira gindara hiya ha gawas han syudad ngan ginbato hiya tubtob nga namatay.+
14 Ira yana ginpasumatan hi Jezebel, nga nasiring: “Hi Nabot ginbato tubtob nga namatay.”+
15 Pakabati gud ni Jezebel nga hi Nabot ginbato tubtob nga namatay, nagsiring hiya kan Ahab: “Buhát, pagtag-iyaha an urubasan ni Nabot nga taga-Jezreel,+ nga nagdumiri hiya nga igbaligya ha imo, kay hi Nabot waray na. Patay na hiya.”
16 Pakabati gud ni Ahab nga hi Nabot patay na, binuhát hi Ahab basi lumugsad ngadto ha urubasan ni Nabot nga taga-Jezreel basi pagtag-iyahon ito.
17 Pero an pulong ni Jehova inabot kan Elias+ nga Tisbita, nga nasiring:
18 “Buhát, lugsad ngadto pakigkita kan Ahab nga hadi han Israel, nga aadto ha Samaria.+ Aadto hiya ha urubasan ni Nabot, nga iya ginkadto basi pagtag-iyahon ito.
19 Sumati hiya, ‘Ini an ginsiring ni Jehova: “May ginpatay ka ba nga tawo+ ngan imo liwat ginkuha an iya propyedad?”’*+ Katapos sidnga hiya, ‘Ini an ginsiring ni Jehova: “Ha lugar diin ginlaklak han mga ayam an dugo ni Nabot, lalaklakon liwat han mga ayam an imo mismo dugo.”’”+
20 Hi Ahab nagsiring kan Elias: “Nahiagian mo gud man ako, O akon kaaway!”+ Binaton hiya: “Nahiagian ko ikaw. ‘Tungod kay determinado ka* nga buhaton an maraot ha pagkita ni Jehova,+
21 magpapahinabo ako hin kadaot ngada ha imo, ngan sisilhigon ko ikaw ngan pupoohon ko tikang kan Ahab an tagsa nga lalaki,*+ upod na an mga waray mahihimo ngan maluya ha Israel.+
22 Ngan an imo panimalay hihimoon ko nga pariho han panimalay ni Jeroboam+ nga anak ni Nebat ngan pariho han panimalay ni Baasa+ nga anak ni Ahias, kay gin-aghat mo ako nga masina ngan tungod ha imo nakasala an Israel.’
23 Mahitungod liwat kan Jezebel, hi Jehova nagsiring: ‘Hi Jezebel kakaunon han mga ayam dida ha tuna han Jezreel.+
24 An bisan hin-o nga kan Ahab nga mamatay ha syudad kakaunon han mga ayam, ngan an bisan hin-o nga mamatay ha uma kakaunon han mga tamsi ha langit.+
25 Waray pa gud bisan hin-o nga pariho kan Ahab,+ nga determinado gud* ha pagbuhat han maraot ha pagkita ni Jehova, kay ginsulsolan han iya asawa nga hi Jezebel.+
26 Ginbuhat niya an pinakamangil-ad pinaagi ha pagsunod ha mangil-ad nga mga idolo,* sugad han ginbuhat han ngatanan nga Amorita, nga ginpaiwas ni Jehova tikang ha atubangan han mga Israelita.’”+
27 Pakabati gud ni Ahab hini nga mga pulong, iya gin-gisi an iya bado ngan nagsul-ot ha iya lawas hin sako nga panapton; ngan nagpuasa hiya ngan naghinigda nga nakasul-ot hin sako nga panapton ngan masurub-on nga naglinakat.
28 Katapos, an pulong ni Jehova inabot kan Elias nga Tisbita:
29 “Nakita mo ba kon paonan-o hi Ahab nagpaubos tungod han akon ginsiring kontra ha iya?+ Tungod kay nagpaubos hiya ha akon atubangan, diri ko pahihinaboon an kadaot ha bug-os niya nga kinabuhi. Pahihinaboon ko an kadaot ha iya panimalay ha panahon han iya anak.”+
Mga footnote
^ Lit., “an imo espiritu.”
^ Lit., “ginkuhaan hin panag-iya?”
^ Lit., “iginbaligya mo an imo kalugaringon.”
^ Lit., “an bisan hin-o nga naihi ha pader.” Usa nga Hebreo nga ekspresyon han panamay mahitungod ha mga lalaki.
^ Lit., “iginbaligya an iya kalugaringon.”
^ An Hebreo nga termino bangin may koneksyon ha pulong para ha “tai” ngan gin-gagamit sugad nga pagtamay.
