An Siyahan nga Surat ha mga Taga-Tesalonica 3:1-13
3 Salit han diri na namon ito naiilob, nahunahuna namon nga maopay gud nga magpabilin ha Atenas nga nag-uusahan;+
2 ngan ginsugo namon hi Timoteo,+ nga aton bugto ngan ministro han Dios* nga nagsasangyaw han maopay nga sumat mahitungod han Kristo, basi parig-unon kamo* ngan liawon kamo may kalabotan ha iyo pagtoo,
3 basi diri mabay-og* an bisan hin-o tungod hini nga mga kasakitan. Kay kamo mismo maaram nga diri kita makakalikay ha pag-antos han sugad nga mga butang.*+
4 Kay han kaupod pa kami niyo, ginsinidngan na namon kamo nga daan nga mag-aantos kita hin kasakitan, ngan ito an nahitabo, sugad han iyo hinbabaroan.+
5 Salit han diri ko na ito naiilob, may ginpakada ako ha iyo basi hibaroan an iyo pagkamatinumanon,+ kay bangin la nasulay na kamo han Paragsulay,+ ngan makarag la an amon pagbudlay.
6 Pero inabot pa la yana hi Timoteo ha amon tikang ha iyo+ ngan gin-istorya niya ha amon an maopay nga sumat mahitungod han iyo pagkamatinumanon ngan gugma, nga pirme niyo kami nahinunumdoman hin malipayon ngan naghihingyap kamo nga makita kami sugad han amon hingyap nga makita liwat kamo.
7 Ito an hinungdan, mga kabugtoan, nga ha ngatanan nga amon kakurian* ngan kasakitan, naliaw kami tungod ha iyo ngan han pagkamatinumanon nga iyo iginpapakita.+
8 Kay napapakusog utro kami* kon natindog kamo hin marig-on dapig ha Ginoo.
9 Kay paonan-o namon maipapakita an amon pagpasalamat ha Dios may kalabotan ha iyo sugad nga balos han duro nga kalipay nga amon inaabat ha atubangan han aton Dios tungod ha iyo?
10 Ha gab-i ngan adlaw sinsero nga nangangamuyo kami tubtob ha amon mahihimo basi makita kamo hin personal* ngan basi maihatag kon ano an kulang ha iyo pagtoo.+
11 Yana, hinaot an aton mismo Dios ngan Amay ngan an aton Ginoo nga hi Jesus maghimo hin paagi para ha amon nga makakada ha iyo.
12 Dugang pa, hinaot pahinaboon han Ginoo nga mag-uswag kamo, oo, nga magdugang pa an iyo gugma ha usa kag usa+ ngan ha ngatanan, sugad han amon paghigugma ha iyo,
13 basi maparig-on niya an iyo kasingkasing, nga waray ikasaway ha pagkabaraan ha atubangan han aton Dios+ ngan Amay ha presensya han aton Ginoo nga hi Jesus+ upod an ngatanan niya nga baraan.
Mga footnote
^ O posible nga “ngan igkasi-magburuhat han Dios.”
^ O “pakusgon kamo.”
^ Lit., “madara.”
^ O “nga ginpili kita para hini.”
^ Lit., “panginahanglan.”
^ Lit., “nabubuhi kami.”
^ Lit., “an iyo nawong.”
