An Ikaduha nga Libro han mga Cronicas 12:1-16
12 Katapos gud maestablisar hin marig-on an pagkahadi ni Rehoboam+ ngan han nagin makusog hiya, iginsalikway niya an Balaud ni Jehova+ ngan ito liwat an ginbuhat han bug-os nga Israel.
2 Ha ikalima ka tuig ni Hadi Rehoboam, hi Hadi Sisak+ han Ehipto sinulong ha Jerusalem, kay waray hira magin matinumanon kan Jehova.
3 May-ada hiya 1,200 nga karuwahe, 60,000 nga parapangabayo, ngan diri maihap nga mga sundalo nga kaupod niya tikang ha Ehipto—mga taga-Libya, mga Sukiim, ngan mga taga-Etiopia.+
4 Iya ginsakop an pinader nga mga syudad han Juda ngan ha urhi nakaabot hiya ha Jerusalem.
5 Hi Semaias+ nga propeta kinadto kan Rehoboam ngan ha mga prinsipe han Juda nga nagtirirok ha Jerusalem tungod kan Sisak, ngan hiya nagsiring ha ira: “Ini an siring ni Jehova, ‘Iyo ako ginbayaan, salit igintubyan ko liwat kamo+ kan Sisak.’”
6 Tungod hito, an mga prinsipe han Israel ngan an hadi nagpaubos+ ngan nagsiring: “Hi Jehova matadong.”
7 Han nakita ni Jehova nga nagpaubos hira, an pulong ni Jehova inabot kan Semaias, nga nasiring: “Nagpaubos hira. Diri ko hira bubungkagon,+ ngan ha diri mag-iiha akon hira tatalwason. Diri ko ighuhuwad an akon kapungot ha Jerusalem pinaagi kan Sisak.
8 Pero magigin mga surugoon niya hira, basi mahibaro hira han kaibahan han pagserbi ha akon ngan han pagserbi ha mga hadi* han iba nga katunaan.”
9 Salit hi Hadi Sisak han Ehipto sinulong ha Jerusalem. Iya ginkuha an mga bahandi ha balay ni Jehova+ ngan an mga bahandi ha balay* han hadi. Iya ginkuha an ngatanan, upod an mga taming nga bulawan nga ginhimo ni Solomon.+
10 Salit hi Hadi Rehoboam naghimo hin tumbaga* nga mga taming basi igsaliwan hito, ngan iya ito igintapod ha mga lider han mga gwardya,* nga nagbabantay ha aragian tipasulod ha balay han hadi.
11 Ha kada panahon nga an hadi nakadto ha balay ni Jehova, an mga gwardya nasulod ngan gindadara ito, ngan katapos ira ito iginbabalik ha kwarto han gwardya.
12 Tungod kay nagpaubos an hadi, waray na masina ha iya hi Jehova,+ ngan waray niya bungkaga hin bug-os an syudad.+ Dugang pa, may pipira liwat nga mag-opay nga buhat nga nakita ha mga tawo ha Juda.+
13 Ginparig-on ni Hadi Rehoboam an iya katungdanan ha Jerusalem ngan padayon nga naghadi; hi Rehoboam 41 anyos han nagin hadi hiya, ngan nagmando hiya hin 17 ka tuig ha Jerusalem, an syudad nga ginpili ni Jehova tikang ha ngatanan nga tribo han Israel sugad nga lugar nga bubutangan han iya ngaran. An ngaran han nanay han hadi amo hi Naama nga Ammonita.+
14 Pero ginbuhat niya an maraot, kay an iya kasingkasing diri determinado nga pamilngon hi Jehova.+
15 Mahitungod han kasaysayan ni Rehoboam, tikang ha tinikangan tubtob ha kataposan, diri ba iginsurat ito kaupod han mga pulong ni Semaias+ nga propeta ngan ni Ido+ nga parasumat hin bisyon ha rekord han katulinan? Ngan pirme may mga girra ha butnga nira Rehoboam ngan Jeroboam.+
16 Katapos, hi Rehoboam pinahuway kaupod han iya mga kaapoy-apoyan ngan iginlubong ha Syudad ni David;+ ngan an iya anak nga hi Abias+ an nagin hadi kasaliwan niya.
Mga footnote
^ Lit., “mga ginhadian.”
^ O “palasyo.”
^ Ha Ingles, copper.
^ Lit., “mga paradalagan.”
