An Ikaduha nga Libro han mga Cronicas 14:1-15
14 Katapos, hi Abias pinahuway kaupod han iya mga kaapoy-apoyan, ngan iginlubong nira hiya ha Syudad ni David;+ ngan an iya anak nga hi Asa an nagin hadi kasaliwan niya. Ha iya panahon an tuna nakapahuway hin napulo ka tuig.
2 Ginbuhat ni Asa an maopay ngan husto ha pagkita ni Jehova nga iya Dios.
3 Iya ginpananggal an mga halaran han mga dios han iba nga mga nasud+ ngan an higtaas nga mga lugar, gindugmok an sagrado nga mga harigi,+ ngan gin-utod an sagrado nga mga poste.*+
4 Dugang pa, iya ginsidngan an Juda nga pamilngon hi Jehova, nga Dios han ira mga kaapoy-apoyan ngan sundon an Balaud ngan an mga sugo.
5 Salit iya ginpananggal an higtaas nga mga lugar ngan an burutangan han insenso ha ngatanan nga syudad han Juda,+ ngan ha iya pagmando, an ginhadian nagpadayon nga waray samok.
6 Nagtukod hiya ha Juda hin pinader nga mga syudad,+ kay waray samok ha tuna ngan waray nakiggirra ha iya durante hito nga mga tuig, kay gintagan hiya ni Jehova hin kapahuwayan.+
7 Nagsiring hiya ha Juda: “Tukuron naton ini nga mga syudad ngan palibotan ito hin mga pader ngan mga torre,+ mga ganghaan* ngan mga trangka. Kay aton pa an tuna, tungod kay ginpamiling naton hi Jehova nga aton Dios. Namiling kita, ngan naghatag hiya ha aton hin kapahuwayan ha bisan diin.” Salit nagin malampuson an ira pagtukod.+
8 Hi Asa may-ada 300,000 nga sundalo tikang ha Juda, nga may dagku nga mga taming ngan mga sugob. Ngan tikang ha tribo ni Benjamin may-ada 280,000 nga magkusog nga girriro nga nagdadara hin gudtiay nga mga taming* ngan armado hin mga pana.*+
9 Katapos, gin-atake hira ni Zera nga taga-Etiopia upod an 1,000,000 nga sundalo ngan 300 nga karuwahe.+ Pag-abot niya ha Maresah,+
10 gin-atubang hiya ni Asa ngan pinwesto hira basi makiggirra didto ha Walog han Zepata ha Maresah.
11 Katapos, hi Asa nakimalooy kan Jehova nga iya Dios+ ngan nagsiring: “O Jehova, diri problema ha imo kon an imo ginbubuligan damu o waray gahum.+ Buligi kami, O Jehova nga amon Dios, kay nasarig kami* ha imo,+ ngan ha imo ngaran kinanhi kami kontra hini nga damu nga tawo.+ O Jehova, ikaw an amon Dios. Ayaw tuguti nga an mortal nga tawo magdaog kontra ha imo.”+
12 Salit ginpirde ni Jehova an mga taga-Etiopia ha atubangan ni Asa ngan ha atubangan han Juda, ngan namalagiw an mga taga-Etiopia.+
13 Ginlanat hira ni Asa ngan han mga tawo nga kaupod niya tubtob ha Gerar,+ ngan ginpamatay nira an mga taga-Etiopia tubtob nga waray bisan usa ha ira an nahisalin nga buhi, kay bug-os nga ginpirde hira ni Jehova ngan han iya kasundalohan. Katapos hito, damu hinduro nga dinag-an an ira nadara.
14 Dugang pa, ira ginbungkag an ngatanan nga syudad ha palibot han Gerar, kay gin-abat hito nga mga syudad an duro nga kahadlok kan Jehova; ngan ira ginpanguha sugad nga dinag-an an mga butang han ngatanan nga syudad, kay damu gud an makukuha dida hito.
15 Ira liwat gin-atake an mga tolda hadton may-ada mga hayop, ngan nakakuha hira hin damu nga karnero ngan mga kamelyo, katapos hito, binalik hira ha Jerusalem.
Mga footnote
^ Lit., “doble nga mga purtahan.”
^ Lit., “ngan nagtataod han higot han bawog.”
^ Gutiay nga taming nga agsob dad-on han mga parapamana.
^ Lit., “nasandig kami.”
