An Ikaduha nga Libro han mga Cronicas 19:1-11
19 Katapos, hi Hadi Jehosafat han Juda nakauli nga talwas*+ ha iya balay* ha Jerusalem.
2 Hi Jehu+ nga anak ni Hanani+ nga parasumat hin bisyon nakigkita kan Hadi Jehosafat ngan nagsiring ha iya: “Bubuligan mo ba an magraot,+ ngan hihigugmaon mo ba an mga nangangalas kan Jehova?+ Tungod hini hi Jehova nasisina ha imo.
3 Bisan pa hito, may maopay nga nakita ha imo,+ tungod kay imo ginbungkag an sagrado nga mga poste* ha tuna ngan igin-andam mo an imo kasingkasing* ha pagpamiling ha tinuod nga Dios.”+
4 Hi Jehosafat padayon nga inukoy ha Jerusalem, ngan kinadto na liwat hiya ha katawohan tikang ha Beer-sheba tubtob ha kabukiran han Efraim,+ basi ibalik hira kan Jehova, nga Dios han ira mga kaapoy-apoyan.+
5 Nagpili liwat hiya hin mga hukom ha bug-os nga tuna ha ngatanan nga pinader nga syudad han Juda, ha tagsa nga syudad.+
6 Ngan nagsiring hiya ha mga hukom: “Hunahunaa hin maopay an iyo ginbubuhat, kay diri kamo naghuhukom para ha tawo, kondi para kan Jehova, ngan kaupod niyo hiya kon naghuhukom kamo.+
7 Yana magkaada kamo hin kahadlok kan Jehova.+ Pagbantay kamo han iyo ginbubuhat, kay waray inhustisya,+ waray pagpaurog,+ waray pagkarawat hin hukip kan Jehova nga aton Dios.”+
8 Ha Jerusalem, nagpili liwat hi Jehosafat hin pipira han mga Levita ngan han mga saserdote ngan pipira han mga ulo han panimalay* han Israel basi magin mga hukom ni Jehova ngan magtuhay han mga kaso han mga umurukoy ha Jerusalem.+
9 Ngan iya hira ginsugo: “Ini an iyo angay buhaton tungod han kahadlok kan Jehova, nga may pagkamatinumanon ngan bug-os* nga kasingkasing:
10 Kon an iyo kabugtoan nga naukoy ha ira mga syudad may iginpapasaka nga kaso may kalabotan ha pagpatay*+ o may pakiana mahitungod ha balaud, sugo, mga regulasyon, o mga paghukom, pahamangnoi niyo hira basi diri hira magin salaan ha atubangan ni Jehova; kay kon diri, masisina hiya ha iyo ngan ha iyo kabugtoan. Ini an iyo angay buhaton, basi diri kamo magin salaan.
11 Aadi hi Amarias nga punoan nga saserdote nga nagdudumara ha iyo para ha ngatanan nga butang ni Jehova.+ Hi Zebadias nga anak ni Ismael amo an lider han panimalay ni Juda para ha ngatanan nga butang may kalabotan han hadi. Ngan an mga Levita an iyo magigin mga opisyal. Magin marig-on kamo ngan gios, ngan hinaot hi Jehova umupod ha mga nagbubuhat hin maopay.”*+
Mga footnote
^ O “murayaw.”
^ O “palasyo.”
^ O “determinado an imo kasingkasing.”
^ O “bug-os nga debotado.”
^ Lit., “pagpaagay han dugo.”
^ O “umupod ha maopay.”
