An Ikaduha nga Libro han mga Cronicas 22:1-12
22 Katapos, ginhimo nga hadi han mga umurukoy han Jerusalem an iya putó nga hi Ahazias nga kasaliwan niya, kay an ngatanan niya nga magurang ginpamatay han grupo han mga tikasan kaupod han mga Arabo nga inabot ha kampo.+ Salit hi Ahazias nga anak ni Jehoram nagtikang pagmando sugad nga hadi han Juda.+
2 Hi Ahazias 22 anyos han nagin hadi hiya, ngan nagmando hiya hin usa ka tuig ha Jerusalem. An ngaran han iya nanay amo hi Atalia+ nga apo* ni Omri.+
3 Naglakat liwat hiya ha mga dalan han panimalay ni Ahab,+ kay nagin magsaragdon niya an iya nanay ha pagbuhat hin maraot.
4 Ngan padayon nga ginbuhat niya an maraot ha pagkita ni Jehova, pariho han panimalay ni Ahab, kay hira an iya nagin mga magsaragdon han namatay an iya tatay, nga nagresulta han iya kadaot.
5 Ginsunod niya an ira sagdon ngan kinadto hiya upod hi Jehoram nga anak ni Hadi Ahab han Israel basi makiggirra kan Hadi Hazael+ han Sirya didto ha Ramot-gilead,+ diin nasamaran han mga parapamana hi Jehoram.
6 Binalik hiya ngadto ha Jezreel+ basi magpaopay han iya mga samad kay nasamaran nira hiya didto ha Rama han nakig-away hiya kan Hadi Hazael han Sirya.+
Hi Ahazias* nga anak ni Jehoram+ nga hadi han Juda linugsad ngadto ha Jezreel basi kitaon hi Jehoram+ nga anak ni Ahab, kay nasamaran hiya.*+
7 Pero ginpahinabo han Dios nga mapirde hi Ahazias tungod han iya pagkadto kan Jehoram; ngan ha iya pag-abot, inupod hiya kan Jehoram basi makigkita kan Jehu+ nga apo* ni Nimsi, nga gindihogan ni Jehova basi magpatay* han panimalay ni Ahab.+
8 Han iginpadapat ni Jehu an paghukom ha panimalay ni Ahab, nakit-an niya an mga prinsipe han Juda ngan an mga anak nga lalaki han kabugtoan ni Ahazias, an mga surugoon ni Ahazias, ngan ginpamatay niya hira.+
9 Katapos, ginpamiling niya hi Ahazias; nadakpan nira hiya ha iya gintatagoan ha Samaria, ngan gindara nira hiya ngadto kan Jehu. Katapos, ginpatay nira hiya ngan iginlubong hiya,+ kay hira nagsiring: “Apo hiya ni Jehosafat, nga bug-os-kasingkasing nga namiling kan Jehova.”+ Waray bisan usa ha panimalay ni Ahazias an may gahum ha pagmando han ginhadian.
10 Han nakita ni Atalia+ nga nanay ni Ahazias nga an iya anak namatay, binuhát hiya ngan ginpoo an ngatanan nga tulin han hadi* ha panimalay ni Juda.+
11 Pero ginkuha ni Jehosabat nga anak nga babaye han hadi hi Jehoas+ nga anak ni Ahazias ngan ginkawat hiya tikang ha mga anak han hadi nga pamamatayon, ngan igintago niya hiya ngan an iya yaya ha kwarto ha sulod. Naitago hiya ni Jehosabat nga anak ni Hadi Jehoram+ (asawa hiya ni Jehoiada+ nga saserdote ngan bugto hiya ni Ahazias) tikang kan Atalia, salit waray niya hiya mapatay.+
12 Nagpabilin hiya kaupod nira hin unom ka tuig, nga nakatago ha balay han tinuod nga Dios, samtang hi Atalia nagmamando ha tuna.
Mga footnote
^ Lit., “anak nga babaye.”
^ O “may sakit hiya.”
^ Ha iba nga Hebreo nga mga manuskrito, “Azarias.”
^ Lit., “anak nga lalaki.”
^ Lit., “mag-utod.”
^ Lit., “ngatanan nga binhi han ginhadian.”
