An Ikaduha nga Libro han mga Cronicas 5:1-14
5 Salit nahuman ni Solomon an ngatanan nga buruhaton nga kinahanglan niya buhaton para ha balay ni Jehova.+ Katapos, gindara ni Solomon ha sulod an mga butang nga ginbaraan han iya tatay nga hi David,+ ngan iya ginbutang an mga silber, an mga bulawan, ngan an ngatanan nga garamiton didto ha mga tiripigan hin bahandi ha balay han tinuod nga Dios.+
2 Hito nga panahon gintirok ni Solomon an mga tigurang han Israel, an ngatanan nga ulo han mga tribo, an mga lider han mga panimalay* han Israel. Kinadto hira ha Jerusalem basi dad-on an arka han kasabotan ni Jehova tikang ha Syudad ni David,+ nga amo an Zion.+
3 An ngatanan nga lalaki ha Israel nagtirok ha atubangan han hadi durante han piyesta* nga ginhihimo ha ikapito ka bulan.+
4 Salit inabot an ngatanan nga tigurang han Israel, ngan gin-alsa han mga Levita an Arka.+
5 Ira gindara an Arka, an tolda nga katirokan,+ ngan an ngatanan nga baraan nga garamiton nga nakada ha tolda. An mga saserdote ngan an mga Levita* an nagdara hito.
6 Hi Hadi Solomon ngan an bug-os nga komunidad han Israel nga iginpatawag basi makigkatirok ha iya, nakadto ha atubangan han Arka. Damu hinduro nga karnero ngan baka an iginhalad+ nga diri na ito maihap o diri mahibaroan an kadamu.
7 Katapos, gindara han mga saserdote an arka han kasabotan ni Jehova ngadto ha burutangan hito, didto ha gisusuluri nga kwarto han balay, an Pinakabaraan, ha ilarom han mga pako han mga kerubin.+
8 An mga pako han mga kerubin nakabuklad ha bawbaw han ginbutangan han Arka, basi matabonan han mga kerubin an Arka ngan an mga bayawan hito+ tikang ha igbaw.
9 Hilaba hinduro an mga bayawan nga an mga kataposan hito nakikita tikang ha Baraan ha atubangan han gisusuluri nga kwarto, pero diri ito nakikita tikang ha gawas. Ngan aadto ito didto tubtob yana nga adlaw.
10 Waray iba nga sulod an Arka, an duha la nga papan nga iginbutang dida ni Moises ha Horeb,+ han naghimo hi Jehova hin kasabotan+ ha katawohan han Israel samtang nagawas hira ha Ehipto.+
11 Han ginawas an mga saserdote tikang ha baraan nga lugar (kay an ngatanan nga saserdote nga nakadto nagbaraan han ira kalugaringon,+ anoman an ira mga dibisyon),+
12 an ngatanan nga Levita nga parakanta+ nga sakop ni Asap,+ ni Heman,+ ni Jedutun,+ ngan han ira mga anak nga lalaki ngan han ira kabugtoan nakasul-ot hin maopay nga klase hin tela, may ginkakaptan hira nga mga simbal, mga instrumento nga may kwerdas, ngan mga arpa; natindog hira ha este han halaran, ngan kaupod nira an 120 nga saserdote nga nagpapatunog han mga trumpeta.+
13 Han takna nga an mga paratrumpeta ngan an mga parakanta urosa nga nagdayaw ngan nagpasalamat kan Jehova, ngan han nabatian an tunog tikang ha mga trumpeta, ha mga simbal, ngan ha iba pa nga mga instrumento ha musika samtang nagdadayaw hira kan Jehova, “kay hiya maopay; an iya maunungon nga gugma nagpapabilin ha kadayonan,”+ ngan an balay, an balay ni Jehova, napuno hin dampog.+
14 An mga saserdote waray makatindog basi magserbi tungod han dampog, kay an himaya ni Jehova nakapuno ha balay han tinuod nga Dios.+
