An Ikaduha nga Libro han mga Hadi 13:1-25
13 Ha ika-23 ka tuig ni Jehoas+ nga anak ni Ahazias+ nga hadi han Juda, hi Jehoahaz nga anak ni Jehu+ nagin hadi ha Israel ha Samaria, ngan nagmando hiya hin 17 ka tuig.
2 Nagpadayon hiya ha pagbuhat han maraot ha pagkita ni Jehova, ngan ginbinuhat niya an sala ni Jeroboam nga anak ni Nebat, nga nagin hinungdan han pakasala han Israel.+ Waray hiya bumaya hito.
3 Salit nasina gud hi Jehova+ ha Israel,+ ngan iya hira igintubyan ha kamot ni Hadi Hazael+ han Sirya ngan ha kamot ni Ben-hadad+ nga anak ni Hazael ha ngatanan nira nga adlaw.
4 Ha urhi, hi Jehoahaz nakimalooy para han pag-uyon* ni Jehova, ngan namati ha iya hi Jehova, kay nakita niya an panalumpigos han hadi han Sirya ha Israel.+
5 Salit gintagan ni Jehova an Israel hin paratalwas+ nga magtatalwas ha ira tikang ha gahum han Sirya, ngan an mga Israelita inukoy ha ira mga balay pariho han naglabay.*
6 (Pero waray nira bayai an sala han panimalay ni Jeroboam nga tungod ha iya nakasala an Israel.+ Padayon nga ginbuhat nira ini nga sala,* ngan an sagrado nga poste*+ nagpabilin nga natindog ha Samaria.)
7 An nahibilin na la han kasundalohan ni Jehoahaz 50 nga parapangabayo, 10 nga karuwahe, ngan 10,000 nga nagbabaktas nga kasundalohan, kay an iba ha ira ginpamatay han hadi han Sirya,+ gintamak-tamakan hira pariho han tapotapo ha panahon han paggiok.+
8 Mahitungod han iba pa nga bahin han kasaysayan ni Jehoahaz, an ngatanan nga iya ginbuhat ngan an iya pagkagamhanan, diri ba iginsurat ito ha libro han kasaysayan han mga panahon han mga hadi han Israel?
9 Katapos, hi Jehoahaz pinahuway kaupod han iya mga kaapoy-apoyan, ngan ira iginlubong hiya ha Samaria;+ ngan an iya anak nga hi Jehoas an nagin hadi kasaliwan niya.
10 Ha ika-37 ka tuig ni Hadi Jehoas han Juda, hi Jehoas+ nga anak ni Jehoahaz nagin hadi ha Israel ha Samaria, ngan nagmando hiya hin 16 ka tuig.
11 Padayon nga ginbuhat niya an maraot ha pagkita ni Jehova, waray niya bayai an ngatanan nga sala ni Jeroboam nga anak ni Nebat, nga nagin hinungdan han pakasala han Israel.+ Nagpadayon* hiya hini nga mga sala.
12 Mahitungod han iba pa nga bahin han kasaysayan ni Jehoas, an ngatanan nga iya ginbuhat ngan an iya pagkagamhanan ngan kon paonan-o hiya nakig-away kan Hadi Amazias han Juda,+ diri ba iginsurat ito ha libro han kasaysayan han mga panahon han mga hadi han Israel?
13 Katapos, hi Jehoas pinahuway kaupod han iya mga kaapoy-apoyan, ngan hi Jeroboam*+ liningkod ha iya trono. Ngan hi Jehoas iginlubong ha Samaria kaupod han mga hadi han Israel.+
14 Yana han hi Eliseo+ nagkaada hin sakit nga ha urhi nagin hinungdan han iya kamatayon, hi Jehoas nga hadi han Israel linugsad ngadto ha iya ngan nagtangis ha iya atubangan, nga nasiring: “Tatay ko, tatay ko! An karuwahe han Israel ngan an iya mga parapangabayo!”+
15 Katapos, hi Eliseo nagsiring ha iya: “Kuha hin bawog ngan mga pana.” Salit kinuha hiya hin bawog ngan mga pana.
16 Ngan nagsiring hiya ha hadi han Israel: “Kapti an bawog.” Salit iya ito ginkaptan, katapos igintungbaw ni Eliseo an iya mga kamot ha mga kamot han hadi.
17 Sunod, hiya nagsiring: “Abrihi an bintana nga naatubang ha este.” Salit iya ito gin-abrihan. Hi Eliseo nagsiring: “Pagpana!” Salit nagpana hiya. Yana hiya nagsiring: “An kan Jehova pana han kadaogan,* an pana han kadaogan kontra* ha Sirya! Imo pipirdihon an Sirya ha Afek+ tubtob nga mabungkag mo ito.”
18 Nagsiring pa hiya: “Kuhaa an mga pana,” ngan iya ito ginkuha. Katapos, nagsiring hiya ha hadi han Israel: “Balbaga an tuna.” Salit iya ginbalbag an tuna hin tulo ka beses ngan inundang hiya.
19 An surugoon han tinuod nga Dios nasina ha iya ngan nagsiring: “Imo unta ginbalbag an tuna hin lima o unom ka beses! Ngan mapipirde mo unta an Sirya tubtob nga mabungkag mo ito, pero yana mapipirde mo an Sirya hin tulo la ka beses.”+
20 Katapos hito, namatay hi Eliseo ngan iginlubong. May-ada Moabita nga mga grupo han mga tikasan+ nga napakada ha tuna ha tinikangan han tuig.*
21 Han may pipira nga lalaki nga naglulubong hin tawo, nakita nira an grupo han mga tikasan, salit iginlabog dayon nira an tawo ngadto ha ginlubngan kan Eliseo ngan nandadlagan hira. Han sinaghid an tawo ha mga tul-an ni Eliseo, nabuhi hiya+ ngan tinindog.
22 An Israel gintalumpigos+ ni Hadi Hazael+ han Sirya ha ngatanan nga adlaw ni Jehoahaz.
23 Pero, hi Jehova nagpakita hin pagkabuotan ngan kalooy ha ira+ ngan iya gin-ataman hira tungod han kasabotan nga iya ginhimo kanda Abraham,+ Isaac,+ ngan Jacob.+ Diri niya karuyag nga mapoo hira, ngan waray niya hira isalikway tikang ha iya presensya tubtob hini nga adlaw.
24 Han namatay hi Hadi Hazael han Sirya, an iya anak nga hi Ben-hadad an nagin hadi kasaliwan niya.
25 Katapos, ginbawi ni Jehoas nga anak ni Jehoahaz tikang kan Ben-hadad nga anak ni Hazael an mga syudad nga gin-agaw ni Hazael durante han pakiggirra kan Jehoahaz. Tulo ka beses nga napirde ni Jehoas hi Ben-hadad,+ ngan iya nabawi an mga syudad han Israel.
Mga footnote
^ O “nagpahumok han nawong.”
^ Karuyag sidngon, may kamurayawan ngan seguridad.
^ Lit., “Dida hito hiya naglakat.”
^ Lit., “Naglakat.”
^ Karuyag sidngon, hi Jeroboam II.
^ O “katalwasan.”
^ O “katalwasan kontra.”
^ Lit., “ha pagsulod han tuig,” posible nga ha katsaringsing.
