An Ikaduha nga Libro han mga Hadi 20:1-21
20 Hito nga panahon hi Hezekias nagkasakit ngan tikamatay na.+ Hi propeta Isaias nga anak nga lalaki ni Amoz kinadto ha iya ngan nagsiring, “Ini an siring ni Jehova: ‘Paghatag hin mga instruksyon ha imo panimalay, kay mamamatay ka; diri ka mag-oopay.’”+
2 Tungod hito inatubang hiya ha bungbong ngan nag-ampo kan Jehova:
3 “Nakikimalooy ako ha imo, O Jehova, alayon hinumdumi nga naglakat ako hin matinumanon ngan ha bug-os nga kasingkasing ha imo atubangan, ngan ginbuhat ko an maopay ha imo pagkita.”+ Ngan hi Hezekias nagtinangis gud.
4 Waray pa makaabot hi Isaias ha butnga han bungsaran han inabot ha iya an pulong ni Jehova, nga nasiring:+
5 “Balik ngan sidnga hi Hezekias, nga lider han akon katawohan, ‘Ini an siring ni Jehova nga Dios ni David nga imo kaapoy-apoyan: “Nabatian ko an imo pag-ampo. Nakita ko an imo mga luha.+ Kitaa, tatambalon ko ikaw.+ Ha ikatulo ka adlaw masagka ka ngadto ha balay ni Jehova.+
6 Dudugangan ko hin 15 ka tuig an imo kinabuhi,* ngan tatalwason ko ikaw ngan ini nga syudad tikang ha kamot han hadi han Asirya,+ ngan papanalipdan ko ini nga syudad tungod han akon ngaran ngan tungod kan David nga akon surugoon.”’”+
7 Katapos, hi Isaias nagsiring: “Pagdara kamo hin karan-on nga hinimo tikang ha pinisa nga uga nga mga igos.” Salit nagdara hira hito ngan igintampos* ito ha hubag, katapos hito hinay-hinay nga nag-opay hiya.+
8 Antes hini, hi Hezekias nagpakiana kan Isaias: “Ano an tigaman+ nga magpapakita nga tatambalon ako ni Jehova ngan masagka ako ha ikatulo ka adlaw ngadto ha balay ni Jehova?”
9 Hi Isaias binaton: “Ini an tigaman tikang kan Jehova basi ipakita ha imo nga tutumanon ni Jehova an iya ginsiring: Karuyag mo ba nga an lambong* ha hagdan* umabante hin napulo ka balitang o umatras hin napulo ka balitang?”+
10 Hi Hezekias nagsiring: “Masayon la nga an lambong umabante hin napulo ka balitang pero diri masayon nga umatras ito hin napulo ka balitang.”
11 Salit hi Isaias nga propeta nagtawag kan Jehova, ngan an lambong Iya ginpaatras hin napulo ka balitang ha hagdan ni Ahaz bisan kon inubós na ito ha mga balitang.+
12 Hito nga panahon an hadi han Babilonya, hi Berodac-baladan nga anak nga lalaki ni Baladan, nagpadara hin mga surat ngan hin regalo ngadto kan Hezekias, kay nabatian niya nga nagkasakit hi Hezekias.+
13 Gin-abiabi hira ni* Hezekias ngan iginpakita ha ira an iya bug-os nga balay nga tiripigan hin bahandi+—an silber, an bulawan, an lana han balsamo ngan an iba pa nga maopay nga klase hin lana, an iya burutangan han mga armas, ngan an ngatanan nga makikita ha iya mga tiripigan hin bahandi. Waray bisan usa nga butang ha kalugaringon nga balay* ni Hezekias ngan ha ngatanan niya nga nasasakopan nga waray niya ipakita ha ira.
14 Katapos hito, hi propeta Isaias kinadto kan Hadi Hezekias ngan nagpakiana ha iya: “Ano an ginsiring hini nga kalalakin-an, ngan diin hira tikang?” Hi Hezekias binaton: “Tikang hira ha hirayo nga tuna, ha Babilonya.”+
15 Katapos, nagpakiana hiya: “Ano an ira nakita ha imo balay?”* Hi Hezekias binaton: “Nakita nira an ngatanan ha akon balay.* Waray bisan usa nga butang ha akon mga tiripigan hin bahandi nga waray ko ipakita ha ira.”
16 Yana hi Isaias nagsiring kan Hezekias: “Pamatii an pulong ni Jehova,+
17 ‘Kitaa! Maabot an mga adlaw, ngan an ngatanan nga aada ha imo balay* ngan an ngatanan nga gintirok han imo mga kaapoy-apoyan tubtob hini nga adlaw dadad-on ha Babilonya.+ Waray bisan usa nga mahisasalin,’ nasiring hi Jehova.
18 ‘Ngan an pipira han imo katulinan nga matatawo kukuhaon+ ngan magigin mga opisyal ha palasyo han hadi han Babilonya.’”+
19 Salit hi Hezekias nagsiring kan Isaias: “Maopay an mensahe ni Jehova nga imo iginsumat.”+ Katapos, nagsiring pa hiya: “Maopay ito kon magkakaada hin kamurayawan ngan karig-on* samtang buhi ako.”*+
20 Mahitungod han iba pa nga bahin han kasaysayan ni Hezekias, an ngatanan nga iya pagkagamhanan ngan kon paonan-o niya ginhimo an tirokan hin tubig+ ngan an paawasan ngan kon paonan-o niya ginpaawas an tubig ngadto ha syudad,+ diri ba iginsurat ito ha libro han kasaysayan han mga panahon han mga hadi han Juda?
21 Katapos, hi Hezekias pinahuway kaupod han iya mga kaapoy-apoyan;+ ngan an iya anak nga hi Manases+ an nagin hadi kasaliwan niya.+
Mga footnote
^ Lit., “mga adlaw.”
^ O “iginbutang.”
^ Ha iba nga lugar, “dagaw.”
^ Ini nga mga hagdan bangin ginagamit hadto ha pag-ihap han oras, pariho han mga instrumento nga nagsusumat han oras pinaagi han sirak han adlaw.
^ O “palasyo.”
^ O “Namati ha ira hi.”
^ O “palasyo.”
^ O “palasyo.”
^ O “palasyo.”
^ Lit., “ha akon mga adlaw.”
^ O “kamatuoran.”
