An Ikaduha nga Surat ha mga Taga-Tesalonica 1:1-12
1 Tikang kan Pablo, kaupod hira Silvano* ngan Timoteo,+ para ha kongregasyon han mga taga-Tesalonica nga kahiusa han Dios nga aton Amay ngan han Ginoo nga hi Jesu-Kristo:
2 Makarawat unta niyo an diri matupngan nga pagkabuotan ngan kamurayawan tikang ha Dios nga Amay ngan ha Ginoo nga hi Jesu-Kristo.
3 Mga kabugtoan, obligado kami pirme nga magpasalamat ha Dios tungod ha iyo. Angayan ini, kay an iyo pagtoo nagtutubo hin labaw pa ngan an gugma han kada tagsa ha iyo nagtitikahilarom para ha usa kag usa.+
4 Ito an hinungdan nga gindadayaw namon kamo+ ha mga kongregasyon han Dios tungod han iyo pagpailob ngan pagtoo ha ngatanan nga pagtimaraot ngan han mga kakurian* nga iyo gin-aantos.*+
5 Pamatuod ito han matadong nga paghukom han Dios, nga tungod hito gintagad kamo nga takos ha Ginhadian han Dios, nga amo an hinungdan nga nag-aantos gud kamo.+
6 Kay ha pagkamatuod matadong para ha Dios nga bumulos hin kasakitan ha mga nagpapasakit ha iyo.+
7 Kondi kamo nga nag-aantos hin kasakitan tatagan hin kapahuwayan kaupod namon kon an Ginoo nga hi Jesus+ igpahayag na tikang ha langit upod an iya gamhanan nga mga anghel+
8 ha naglalaga nga kalayo, samtang nabulos hiya ha mga diri nakilala ha Dios ngan ha mga diri nasugot ha maopay nga sumat mahitungod han aton Ginoo nga hi Jesus.+
9 Ini hira mismo makakakarawat han hudisyal nga sirot nga waray kataposan nga kabungkagan+ tikang ha atubangan han Ginoo ngan tikang ha himaya han iya kusog,
10 ha panahon nga umabot hiya basi paghimayaon may kalabotan ha iya mga baraan ngan basi tagdon nga urusahon hito nga adlaw han ngatanan nga nagpakita hin pagtoo, kay tinoo kamo han amon pagpamatuod.
11 Tungod hito pirme namon kamo igin-aampo, nga hinaot tagdon kamo han aton Dios nga takos han iya pagtawag+ ngan pinaagi han iya gahum bug-os nga buhaton niya an ngatanan nga maopay nga iya nalilipayan ngan himoon nga malampuson an tagsa nga buhat han iyo pagtoo.
12 Basi an ngaran han aton Ginoo nga hi Jesus paghimayaon pinaagi ha iyo ngan paghimayaon kamo kahiusa niya, uyon ha diri matupngan nga pagkabuotan han aton Dios ngan han Ginoo nga hi Jesu-Kristo.
